San Mateo 12

Allempo Jesús poeyochreshaꞌ tasoꞌtampesyesnomoet trigo añe yethro allempokma amesen judioneshaꞌ

(Mr. 2.23-28; Lc. 6.1-5)

1Allempoña xherrerr pamtharr allempo xhokma amesen judioneshaꞌ. Allempoña Jesúspaꞌ arr oñem chetsoꞌmar epoet poeyochreshaxhno. Allempo oñenet poeyochreshaꞌñapaꞌ eꞌñe paꞌchporrñothetpaꞌ tasoꞌtampesyesnomoet poechmhaꞌtets trigo oꞌ rraꞌyesnomet. 2Fariseoneshaꞌña ñeñth entawet ateth phaꞌnmoetpaꞌ ñetñapaꞌ allentha otyeset Jesús:

—Pekweꞌñakaꞌyeña añ peyochreshaꞌ tasoꞌtampesyesnomoet trigo; ateth penet ñeñth ama pokteyaye oꞌch ateth yepha tarwasats añe yethro tharroꞌmar theꞌpaꞌ añe yethro ñeñth ateth anareth awathotheñ allempokmach yamesen.

3Jesúsñapaꞌ ateth otanet:

—Sapaꞌ amaꞌtrra selleyareña ñeñth ateth pha awath David allempo cheporraꞌnma epoet ñamha allowen ñeñth kotheneꞌ. 4Ña allempopaꞌ beꞌthosos Yompor paꞌpakllo allñapaꞌ rrosan pan ñeñth atmaꞌntatareth ateth ñerraꞌmrratheꞌ ñeñth nenet all Partsokop. Ñewa, ñeñth panpaꞌ ama pokteyayñe oꞌch rros David ñamha ñeñth epoet. Ñeñthpaꞌ añach ñapoeth rreneꞌ kornaneshaxhno; ñeñthpaꞌ ateth anwareth judioneshakop. 5Ñamha amaꞌt selleyareña ñoñets ñeñth ateth anareth ñeñth Moisés poꞌñoñ all oten ateth pena ñamha kornaneshaꞌ Parets paꞌpakllo. Ñewa, ñet poesherbeñothetpaꞌ ama ameseneto añe yethro allempokma yamesen. Ñetpaꞌ amaꞌt ateth penetpaꞌ Yomporñapaꞌ eꞌñe pokteꞌ entenanet. 6Napaꞌ oꞌch notas: Napaꞌ ñeñthen arroꞌtsenen nanak nesherben ello nemhtaneñ ñeñth ateth sherben Parets paꞌpakëll. 7Ñewa, añ ñoñetspaꞌ ñeñthña ateth oteꞌth Yompor awath: “Napaꞌ ama eꞌñe aña kowen nenteno oꞌch sapoenen sayara ñeñth semtsen nokop. Añeꞌnaña atarr kowen nenten oꞌch semoereña allowen samoꞌtseshaꞌ.” Ñerraꞌm xho xhennasañ seyoxhro ñeñth ateth oteney Yompor, amach erroth sotatscheña amaꞌt erraꞌtsena acheñer ñeñth eꞌñe pokteꞌ enten Yompor. 8Ñeñthoꞌmarña theꞌpaꞌ oꞌch notas, na Ñeñthen Acheñetosets ñeñthen allsensarethen, nakaꞌyeña ateth otets estheꞌ poktetsaña ñeñthchaꞌ ateth yepha añe yethro allempokma yamesen.

Allempo Jesúspaꞌ aꞌkrraterran ñeñth chelletsa pot

(Mr. 3.1-6; Lc. 6.6-11)

9Metwerrerr Jesús allothpaꞌ beꞌthoswerrerr judioneshaꞌ poꞌprawo. 10Allñapaꞌ alloꞌtsen poesheñarr yakma ñeñth xha chellena pot. Fariseoneshaꞌñapaꞌ allentha aꞌphthoꞌchet:

—Añe yethro allempokma yamesenpaꞌ taꞌm ¿pokteꞌtheꞌ penteñ oꞌch phaꞌkrrateñerr acheñ?

Tharroꞌmar ateth aꞌphthoꞌteñet allochñapaꞌ eshekchaꞌ otteñeꞌchet.

11Ñañapaꞌ ateth otanet:

—Sapaꞌ ñerraꞌm xho shoraꞌnen amaꞌt poemokarra secarneror añe yethro allempokma yamesen, amaꞌtchaꞌña allentha sechtere amaꞌt ñeñthe yethro allempo yamesen alloweney. 12Ñewa, acheñpaꞌ ellokaꞌye metanenanña ñeñth attho sherben carnero. Ñeñthoꞌmarña napaꞌ notenes eꞌñe pokteꞌ oꞌch ateth yepha ñeñth kowentetsa amaꞌt añe yethro allempokma yamesen.

13Allempoña Jesúspaꞌ ateth otan yakma ñeñth chelletsa pot:

—Theꞌpaꞌ oꞌch notaph petapoerr phot.

Eꞌñe otweꞌpaꞌ ñañapaꞌ allenthepaꞌtchaꞌ tapoerran pot, eꞌñe allorokma kowenterra pot eꞌñe atthekmaterr ñerraꞌm poꞌpshemhtañoth pot. 14Fariseoneshaꞌña xhaꞌnmaxherretpaꞌ kothapeꞌchatannaꞌtyesnerret, atarr oꞌpateñet Jesús atthoch moetsatachet.

Ateth oteꞌth Yompor awath Jesúsokop

15Jesúsña eñotanetpaꞌ awerr alloth. Shonteꞌ acheñeneshaxhno kothaꞌwanereterr. Allowen ñeñth atsnaꞌtyetspaꞌ eꞌñe aꞌkrratyeswerranet. 16Ateth otyesanet:

—Poꞌñoxh amach eseshaꞌ sotaphsaꞌtatsto napaꞌ na ñeñthen Yompor Poechemeren.

17Ñewa, ñeñthpaꞌ ateth pha allochñapaꞌ atthoch etsota Isaías poꞌñoñ ñeñth aꞌmhtayeꞌth Yompor poꞌñoñ, ñeñthpaꞌ ateth oteꞌth Yompor Poechemerekop ñeñthchaꞌ Cristoterrets:

18Añmapaꞌ ñeñthchaꞌ atarr thorrerrtsa nokop, ñapaꞌ ñeñth nenen ñeñthchaꞌ atarr sherberrets. Ñapaꞌ ñeñth atarr nemorrentena ñeñth eꞌñe nokshateneꞌ. Ñapaꞌ ñach awamenkath neperr nekamkëñoth, ñach eñotaterreꞌ allowen paꞌnamen acheñeneshaꞌ amaꞌt ñeñth ama judioneshayaye. Añchaꞌ eñotaterranet ñeñth eꞌñe kowen ñoñets atthochña eꞌñe pokteꞌ nentwerranet.

19Ñapaꞌ amach es otnareꞌtyerraneto amaꞌt mameshapaꞌ amach amaꞌtoxhetyerro. Amaꞌt mameshapaꞌ amach cheꞌxhameꞌtyerraneto amaꞌt allekma chopeñeꞌchyen acheñeneshaꞌ.

20Amaꞌt ñeñth moeroxhetyetsapaꞌ ñapaꞌ eꞌñech moererranet. Ñeñthpaꞌ atethchaꞌ netmaꞌntacha ñerraꞌmrratheꞌ amaꞌt poecharra choꞌneꞌch tsopaꞌneꞌpaꞌ ñañapaꞌ amach xha aꞌmeyatere. Ñamha ñerraꞌm lampareñ xha moeneꞌ mayen ñeñthpaꞌxhoꞌña amach emayatere. Ñapaꞌ amach xha es amhchaꞌnoxhtanaꞌtyerro, tharraña esempowañenpaꞌ eꞌñech attha aꞌmchechatwerran ora allowen ñeñth ama pokteyeꞌ enteno Yompor.

21Ñeñthoꞌmarña allowen paꞌnamen acheñeneshaxhno ñachña eꞌñe yemoetwerret. Arrpaꞌ allowa wañ ateth oteꞌth Yompor ñeñth kellkëꞌth Isaías.

Attho poesheñaꞌtets oteñet Jesús ñapaꞌ oneñethoꞌ poꞌwamenkoth kexhpatenanña poꞌpotantañ oneñethexhno acheñeneshaꞌ

(Mr. 3.19-30; Lc. 11.14-23; 12.10)

22Jesúspaꞌ alla wapaterrñañeterr poesheñarr yakma ñeñth aporoꞌyeth ñeñth chorrena oneñeth xha opanatateñ. Jesúsñapaꞌ aꞌkrrataph, ñeñthña opanerpaꞌ oꞌ alla eñorerra, ñamha oꞌ eꞌñe kowen kowerr. 23Allowenña acheñeneshaꞌpaꞌ atarr kowanrrorteñet, ñetñapaꞌ ateth otyeset:

—Ñatoꞌ añtheꞌkaꞌyeña David poꞌmhreneñ ñeñthchaꞌ Cristotosets.

24Fariseoneshaꞌña allempo eꞌmareꞌchetpaꞌ ñetñapaꞌ ateth otyeset:

—Attho kexhpatatyenan oneñethexhno acheñeneshaꞌ añakaꞌye awamenkath peneꞌ Beelzebú ñeñth pompor pen allowen oneñethexhno.

25Jesúsñapaꞌ eñotanet ñeñth ateth kothapeꞌchatseꞌtyenet poeyoxhreto ñokop ñeñth attho otyeñet ñapaꞌ oneñetha pompor poꞌwamenkoth kexhpatatenan oneñethexhno acheñeneshaꞌ. Ñeñthoꞌmarña ñapaꞌ ateth otanet:

—Ñerraꞌm poesheñarr amhchaꞌtareth elloptannena paꞌcheñer eꞌñe ñagattsetpaꞌ eꞌñech poktakma aꞌkllatannaꞌtwerret. Atthekmach phannerra ñeñth parro yexhetsa patherr anetso, ñerraꞌm xho elloptannenet eꞌñe ñagattsetpaꞌ ñeñthña attho womenkatenetpaꞌ ñeñthpaꞌxhoꞌña xhachkaꞌye wañerrets. Atthekmach phannerra amaꞌt ñeñth eꞌñe pamoꞌtsnaꞌtarekmoet ñerraꞌm elloptannerret eꞌñe ñagattsetpaꞌ ñeñthña attho womenkatenetpaꞌ ñeñthpaꞌxhoꞌña xhachkaꞌye wañerrets. 26Atthekmach phannaꞌta ñamha oneñeth poeyochreshaxhno ñerraꞌm oneñethexhno eꞌmoñeꞌtannenet, ñerraꞌm waporeꞌtannenet eꞌñe ñagattseta amach errothenoth alloꞌna atarr womenkatneneto. Poꞌñoxh oneñethpaꞌ amakaꞌye waporeꞌtanneno. 27Sapaꞌ ateth sotenen napaꞌ Beelzeboꞌ poꞌwamenkoth nekexhpateññañ eꞌñe ña poeyochreshaꞌ, ñewa, theꞌpaꞌ oꞌch notas: Ñeñth seyochreshaꞌ sepen sa ñeñth eñoteneꞌ ñamet oꞌch kexhpatachet oneñethexhno acheñeneshaꞌ, ñetpaꞌxhoꞌña amaña Beelzebú poꞌwamenkotheyeꞌ kexhpateñetoña oneñethexhno acheñeneshaꞌ. Ñetpaꞌxhoꞌña Yomporoña poꞌwamenkoth kexhpateñetña oneñeth. Ñeñthña oꞌ eñotatas ñeñth ateth sotennoñ ñeñthpaꞌ amakaꞌye poꞌñoxh attheyaye. 28Poꞌñoxhkaꞌye Yompor eꞌñe Poekamkëñoth ñeñthña awamenkath nepeneꞌ atthoth nekexhpateñña oneñethexhno acheñeneshaꞌ, ñeñthchaꞌña señotateꞌ theꞌpaꞌ oꞌ nexhapatonas Yompor poꞌkowenña ñeñth attho poꞌñoxh atarr ayochreshathtena ña.

29‘Ñewa, yapaꞌ yeñoteñ ñeñth atarr awamenkathtetsa attho atarr awamenkathtena oneñeth, ñañapaꞌ eꞌñe poꞌwamenkoth kowampesyenan allowen eꞌñe kowen ñeñth paꞌpakëll phaꞌyen. Tharraña ñerraꞌm esempo oꞌch wapoña ñeñth atarr awamenkatheshaꞌ ñeñthchaꞌ metanoseꞌña poꞌwamenk ateth ñerraꞌm na Nompor, ñeñthchaꞌña rromoseꞌ oꞌch wankos, allochñapaꞌ oꞌch beꞌthosos all ñeñth paꞌpakëll phaꞌyen oꞌch eꞌñe poerratamphsos ñeñth allpon oꞌpatyena ña.

30‘Ñeñthoꞌmarña theꞌpaꞌ oꞌch notas allowenes: Ñerraꞌm eseshas ñeñthes ama nethorrapretenaye ñeñthña acheñerpaꞌ xhakaꞌye epatareꞌtennan ñeñth ateth nethorraꞌyena na. Ñeñthpaꞌ oꞌch netmaꞌntatasa ateth: Ñerraꞌm eseshaꞌ ama naꞌyapaxhapretenaye ñeñth naꞌyapaxhen na, ñeñthñapaꞌ xha aꞌparratseꞌtampenen aꞌyeneth.

31‘Ñeñthoꞌmarña theꞌpaꞌ oꞌch notas: Allowen paꞌnamen sosyaꞌtsañexhno ñeñth ama pokteyeꞌ enteno Yompor amaꞌt ñamha achmhareꞌtannaꞌteñets ñeñthpaꞌ aphretnaꞌpoꞌ nenteñ. 32Ñamha ñerraꞌm eseshaꞌ nesaseneꞌ na Ñeñthen Acheñetosets ñeñthpaꞌ aphretnaꞌpoꞌ nenteñ. Tharraña ñerraꞌm eseshaꞌ añ achmhareꞌteññañet Parets Poekamkëñ ñeñthñapaꞌ amakaꞌye aphretnaꞌpawoyeꞌ nenteñe. Ñeñthpaꞌ amach aphretnaꞌpawoterro eꞌñe thayotheñ errponowañen.

Allowen acheñ ñeñth eꞌñe poꞌñoxh kowen acheñer, ñetñapaꞌ añchaꞌ orrtatyenet ñeñth eꞌñe kowenareꞌ

(Lc. 6.43-45)

33‘Ñewa, yeñoteñ allowen acheñ ñeñth eꞌñe poꞌñoxh kowen acheñer, ñetchaꞌña orrtatenet ñeñth eꞌñe kowenareꞌ. Tharraña poꞌpotantañ acheñeneshaꞌ ñeñth poꞌñoxh ama kowenayaye ñetñapaꞌ añach orrtatenet ñeñth ama kowenayaye. Ñeñthpaꞌ atethchaꞌ netmaꞌntaterrsa: Ora allowen ñeñth eꞌñe kowen narmetsoch poeꞌmerpaꞌxhoꞌña eꞌñech kowenareꞌ. Añña poꞌpchañ narmetsoch ñeñth ama kowenayayepaꞌ poeꞌmerpaꞌxhoꞌña amach eꞌñe kowenayaye. Ñeñthoꞌmarña atthoña yeñoteñ erraꞌtsentheꞌ ñeñth eꞌñe kowenareꞌ narmetsoch ñamha ñeñth ama kowenayaye narmetsoch, poeꞌmerothña eꞌñe yechmeꞌtenanet. 34-35Sapaꞌ ama kowenayayso. Xha sottena ñerraꞌm shechpha eꞌñe sompor sepen allowenes. Ñeñthoꞌmarña amach errothenoth señoso kowen tharroꞌmar sapaꞌ poꞌñoxhpaꞌ ama kowenayayso. Eꞌñe ateth atarr sokthapeꞌchatseꞌtyen seyoxhro ñeñth ama kowenayaye, atthothkaꞌyeña señosatseꞌtyen. Amaꞌt erraꞌtsena acheñer ñeñth eꞌñe poꞌñoxh kowen ñapaꞌ añchaꞌña orrtatyen ñeñth eꞌñe kowenareꞌ kothapeꞌchen poeyoxhro tharroꞌmar poeyoxhroña all kothapeꞌchenan shonteꞌ ñeñth eꞌñe kowentetsa. Tharraña poꞌpoñ acheñer ñeñth poꞌñoxh ama kowenayaye, ñapaꞌxhoꞌña añach orrtatyen ñeñth ateth kothapeꞌchen poeyoxhro ñeñth ama kowenayaye tharroꞌmar poeyoxhroña all kothapeꞌchenan shonteꞌ paꞌnamen sosyaꞌtsañ. Tharroꞌmar ñerraꞌm shonteꞌ yokthapeꞌchen yeyoxhro ñeñth kowentetsa, ñeñthpaꞌ eꞌñech ñeñtha kowen yeserrpareꞌten. Tharraña ñerraꞌm shonteꞌ yokthapeꞌchen ñamha yeyoxhro ñeñth ama kowenayayepaꞌ ñeñthpaꞌxhoꞌña eꞌñech ñeñtha yemnen oꞌch yeserrpareꞌtyen. 36Poꞌñoxh napaꞌ oꞌch alla noterrserr, esempowañen allempoch akrarethetwerra allowen acheñeneshaꞌpaꞌ allowen ñoñets ñeñth attha otatseꞌtyen acheñeneshaꞌ ñeñthñapaꞌ aꞌmethatatyeretchaꞌ. 37Tharroꞌmar ñerraꞌm eꞌñe kowenareꞌ seserrpareꞌtyen theꞌ Yomporñapaꞌ eꞌñech pokteꞌ entwerrnas señoñ allempo. Tharraña theꞌpaꞌ ñerraꞌm xha señosatseꞌtyen ñeñthña señoñerpaꞌ ñeñthachña sekoñchaterreꞌ allempo.

Attho Jesúspaꞌ otan acheñeneshaꞌ ñeñth ama kowenayeꞌ kothapeꞌchetso ñetñapaꞌ xhokma eꞌnenet partsoteñets

(Mr. 8.12; Lc. 11.29-32)

38Allempoña allponsheña ñeñth atarr etsotayenayeñ ñoñets ñeñth ateth anareth epoet ñamha allpon fariseoneshaꞌ ñetña eꞌñe poeshkëñothetpaꞌ ateth ochet Jesús:

—Yapaꞌ Maestrochaꞌ yemneñ oꞌch phorrtatonay pepartsoña ñeñthchaꞌ yeñotateꞌ phapaꞌ poꞌñoxhtheꞌ Parets Poechemereph ñeñthephtheꞌ Cristotosets.

39Ñañapaꞌ ateth otanet:

—Acheñeneshaꞌ ñeñth korraꞌyetsa theꞌ ñetñapaꞌ ama kowenayeꞌ kothapeꞌchyeneto, ama añeyeꞌ kosheneto Yompor ñeñthoꞌmarña ñetpaꞌ eꞌñe orrena otennet awoꞌch norrtatanet nepartsoña. Tharraña amach es norrtataneto. Napaꞌ añach patherr neñotatanet ateth eñotataneꞌth Jonás awath nínivoꞌmarneshaꞌ allempo aꞌmhtaneꞌth Yompor poꞌñoñ. 40Ñewa, yeñoteñ Jonás allempopaꞌ alloꞌtsena kakakotmo maꞌpamoet, yetho amaꞌt ñamha tsapo ñeñth añekmoen kak. Atethchaꞌ neperra namha Ñeñthen Acheñetosets, napaꞌxhoꞌña nemaꞌpamoetchaꞌ oꞌpono eꞌñe allowanen patso, yetho amaꞌt ñamha tsapo. Ñeñthchaꞌña eñotaterrawet ateth penaña ñeñth wetsa Yomporeshoth. 41Tharroꞌmar awath allempo serrpareꞌtataneꞌth Jonás nínivoꞌmarneshaꞌ, ñetñapaꞌ allempokma kothapeꞌcherret eꞌñe kowen Yomporekop. Theꞌña arr seshopaꞌ alloꞌtsenen na ñeñthen ello metaneneꞌ ñeñth ateth serrpareꞌtateꞌth Jonás. Tharraña sañapaꞌ amaña sokthapeꞌchenoña ello kowen Yomporekop. Ñeñthoꞌmarña esempowañen allempoch akrarethetwerra allowen acheñeneshaꞌ ñeñthña nínivoꞌmarneshaꞌ ñeñth eꞌñe kowen kothapeꞌcherrets Yomporekop awath, ñetpaꞌxhoꞌña orrterretchaꞌ, ñeñthchaꞌña señotaterreꞌña sapaꞌ amaꞌt mameshapaꞌ ama pokteyayeña ñeñth ateth sephaꞌyeseꞌth tharroꞌmar ama sokthapeꞌcherro ello kowen Yomporekop. 42Ñamha theꞌpaꞌ oꞌch neyerpatasa ñeñth ateth pha awath poesheñarr koyaneshaꞌ ñeñth amhchaꞌtarethtatseꞌth atarr bhaxhayo allowanen pats saꞌponeth. Ñeñthña koyaneshaꞌpaꞌ allotheñ on oꞌch eꞌmhñotenanaꞌ Salomón poeserrpareñ ñeñth ateth atarr eñotañteꞌth. Theꞌña arr eꞌñe seshopaꞌ alloꞌtsenen ñeñthen poesheñarrana ñeñthen atarr es neñoten namha, ello nemhtaneñ attho eñotañteꞌth Salomón. Tharraña sañapaꞌ amaña es sotapoteno. Ñeñthoꞌmar esempowañen allempoch akrarethetwerra allowen acheñeneshaꞌ, ñeñthña koyaneshaꞌ ñeñth eꞌñe kowen eꞌmhñotatseꞌth ñapaꞌxhoꞌña orrterrach, ñeñthchaꞌña señotaterreꞌ sapaꞌ ama pokteyayeña ñeñth ateth sephaꞌyeseꞌth tharroꞌmar sapaꞌ ama es sameꞌñeꞌthe amaꞌt eꞌñe mamesha.

Attho Jesúspaꞌ eñotatanet ñatoꞌ oneñethpaꞌ oꞌch alla chorrerranerr acheñ alloth xhaꞌnom awaña

(Lc. 11.24-26)

43-45‘Ellonethpaꞌ oꞌch alla neñotaterrserr poꞌpoñoneth ñeñthchaꞌ ateth apharethterra acheñeneshaꞌ ñeñth theꞌpaꞌ ama eꞌñeyeꞌ kowen kothapeꞌcheneto Yomporekop. Ñewa, oneñeth ñerraꞌm esempo xhaꞌnom acheñenesheshoth, ñeñthña oneñethpaꞌ oꞌch awyes errapharen amaꞌt amayoꞌmar eꞌnyeseꞌ poꞌpsheñeñ allchaꞌ yexherrerr allchaꞌ eꞌñe ameswerrerr kowen. Tharraña ñerraꞌm amach erra eñchepaꞌ attheñapaꞌ oꞌch ot: “Napaꞌ oꞌch alla awerren nepakllo alloth nexhaꞌnom awaña.” Atethchaꞌxhoꞌ pha. Oꞌch alla awerr alloth xhaꞌnom awaña. Allña oꞌch xherrpaꞌ eꞌñech kowen entwerran paꞌpakëll, eꞌñech kowen atarrapoꞌtwareth, eꞌñech kowen aññoꞌtyesareth, tharraña amach eseshayeꞌ yexhetso all. Allempoñapaꞌ oꞌch alla awerr alloꞌtsaꞌyen pamoꞌtseshaꞌpaꞌ oꞌch enanaꞌ poꞌpoñ kanxherrsheña oneñethexhno ñeñth nanak sosyareꞌ, ñeñth ello metanaꞌtweneꞌ ñeñth ateth sosyaten ñeñth waꞌñeneꞌ oꞌch yexhaprecha. Allowenetpaꞌ oꞌch chorreñet ñeñth acheñer. Allempoña tsapathonethpaꞌ alloꞌnach sen ñeñth acheñer sosyatnomoets womenk. Elloch metanerran ñeñth ateth phatseꞌtyeseꞌth ñenmath. Poꞌñoxhchaꞌkaꞌye ateth perraña acheñeneshaꞌ ñeñth theꞌpaꞌ ama eꞌñeyeꞌ kowen kothapeꞌcheneto Yomporekop.

Allempo wapoña Jesús pachor ñamha paꞌmoꞌnasheñneshaꞌ

(Mr. 3.31-35; Lc. 8.19-21)

46Allempo ateth eñoranaꞌtenana acheñeneshaꞌpaꞌ oꞌ wapa Jesús pachor epoet ñamha paꞌmoꞌnasheñneshaꞌ. Oꞌ xhapoet allpaꞌ ñetñapaꞌ alla thomxhenet aꞌyoth. Añ moenenet awoꞌch serrpareꞌtatoset. 47Allempoña poesheñarrpaꞌ ateth otan Jesús:

—Oꞌkaꞌye wapaña phachor ñamha pemoꞌnasheñneshaꞌ. Ñetpaꞌ aꞌyotheꞌtsaꞌyenet, moeneñet oꞌch serrpareꞌtatospet.

48Ñañapaꞌ ateth otan ñeñth oteneꞌ:

—¿Amaꞌt señoteñe ñeñth eꞌñe poꞌñoxh nachor nepen ñamha ñeñth eꞌñe poꞌñoxh nemoꞌnasheñ nepen?

49Allempoñapaꞌ yochan poeyochreshaꞌpaꞌ ateth otanet:

—Napaꞌ añkaꞌyeña ñeñth eꞌñe poꞌñoxh nachor nepen ñamha ñeñth eꞌñe poꞌñoxh nemoꞌnasheñneshaꞌ nepen. 50Ñewa, amaꞌt erraꞌtsena ñeñthchaꞌ eꞌñe ateth phoweneꞌ ñeñth ateth moenen Nompor ñeñth poeꞌntañoꞌtsen ñeñthkaꞌyeña eꞌñe poꞌñoxh nemoꞌnasheñ nepen ñeñthña noxh nepen ñeñthña nachor nepen.

Currently Selected:

San Mateo 12: ame

Highlight

Copy