San Mateo 10

Allempo Jesúspaꞌ akran xharrasheña ñeñth poechetsa epsheña ñeñthchaꞌ llesensaꞌ

(Mr. 3.13-19; Lc. 6.12-16)

1Allempo xhapaꞌmoen allempo Jesús agotaꞌmoenan poeyochreshaꞌ xharrasheña ñeñth poechetsa epsheña. Eꞌñe apxhaꞌwet ñeshopaꞌ ñañapaꞌ apanet llesens atthoch kexhpatyeset oneñethexhno acheñeneshaꞌ. Ñamha llesensanet atthoch aꞌkrratyeset acheñeneshaꞌ ñeñth osyen allowen paꞌnamen atsnañtsoxhno ñamha ñeñth paꞌnamen atsotyenet.

2Ñewa, ñetpaꞌ arroꞌtsaꞌyenet paꞌsoꞌchñexhno; allowenetpaꞌ xharrasheñet poechena epsheña ñeñth llesensaꞌ. Ñeñth ñanom atarr sherbets ñeñthpaꞌ Simón ñeñthara sochetsa Pedro, allothpaꞌ ñamha Andrés ñeñth eꞌñe paꞌmoꞌnasheñ; allothñapaꞌ ñamha Jacobo ñeñth Zebedeo poechemer epoet paꞌmoꞌnasheñ Juan. 3Allothñapaꞌ ñamha Felipe ñamha Bartolomé; allothñapaꞌ ñamha Tomás ñamha Mateo ñeñth cobrayeꞌth acheñeneshaꞌ kelle ñeñth gobiernokop; allothñapaꞌ Jacobo ñeñth Alfeo poechemer, allothpaꞌ ñamha Tadeo. 4Allothñapaꞌ ñamha Simón ñeñth cananistaneshaꞌ ñeñth nanak thorratseꞌth paꞌnetsrekop, allothpaꞌ ñamha Judas Iscariote ñeñthchaꞌ pomoerreꞌ tsapathoneth Jesús.

Allempo Jesúspaꞌ llesensan poeyochreshaꞌ oꞌch awanemyeset allchaꞌ serrpareꞌtyenetaꞌ

(Mr. 6.7-13; Lc. 9.1-6)

5Ñeñthña xharrasheña poechena epsheña llesensanet atthoch awanemyeset paꞌnamen anetsoꞌmar, ñeñthpaꞌ ateth otapanet:

—Amach arrentha setatsto all yexhaꞌyena ñeñth ama judioneshayaye. Ñamha amach arrentha setatsto samarioꞌmarneshaꞌ paꞌnetsro all yexhaꞌyenet. 6Arrchaꞌña seta all yexhaꞌyena israelenaꞌtarneshaꞌ. Ñetpaꞌ eꞌñe ateth nentenanet ñerraꞌmrratheꞌ carneroxhno ñeñth payaꞌtyetsa. 7Allchaꞌ soñemyespaꞌ seserrpareꞌtatyesnomanetchaꞌ atethchaꞌ sotyesnomanet: “Theꞌpaꞌ oꞌ xherr allempoch ayochreshatthena Yompor ñeñth poeꞌntañoꞌtsen.”

8Ñamha alla oterranerr poeyochreshaꞌ:

—Ñeñth atsnaꞌtyetspaꞌ saꞌkrratyesnomanetchaꞌ, ñeñth rromayetspaꞌ setantatyesnomhchaꞌ, ñeñth osyen poetsarñatspaꞌ saꞌkrratyesnomhchaꞌ atthoch eꞌñe kowen entwerranet acheñeneshaꞌ, sekexhpatatyeschaꞌ ñamha oneñethexhno ñeñth chorraꞌyenaya acheñeneshaꞌ. Sapaꞌ eꞌñe attha aparethes womenkñats attho es kowen sorrtatyen Yomporekop, ñeñthoꞌmarña sapaꞌxhoꞌña eꞌñech attha sapaꞌyesanet samha, amach secobratstaneto ñeñth ateth oꞌ sephaꞌyesanet.

9‘Ñamha oꞌch notas: Ñerraꞌm oꞌch sawanmapaꞌ amaꞌt poetallarrapaꞌ amach seshaꞌtatsetnomo kelle. Amaꞌt orotllellen, amaꞌt wallatllellen, amaꞌt cobretllellen amach seshaꞌtatsetnome. 10Amaꞌt eꞌñe koñeꞌtha amach es sanmatsto allchaꞌ sechopeñeꞌchyes, amaꞌt sebolsa, amaꞌt eꞌñe epma seshtam, amaꞌt sesapata, amaꞌt sekarra, amach sanmatsche tharroꞌmar ñeñtheschaꞌ thorraꞌyetsapaꞌ eꞌñe pokteꞌ rratyesapasetchaꞌ.

11‘Amaꞌt erraꞌtsena anetser amaꞌt ñamha all ama tama eñalle acheñ ñerraꞌm erra sexhapaꞌchpaꞌ xhochña ñanom saꞌphthoꞌtyesosanet erroꞌtsentheꞌ kowen acheñpaꞌ allchaꞌña sexhap. Allñapaꞌ allchaꞌña saꞌposa tharrempowach esempoch seserrerr ñamha alloth. 12Amaꞌt erraꞌtsena pokoller allchaꞌ sexhap, eꞌñe sewomhchaꞌteñoth oꞌch senamatosanet Yompor paꞌnateña. 13Ñetña ñerraꞌm eꞌñe kowen acheñret, Yomporñapaꞌ aꞌnatenanetchaꞌ. Ñerraꞌm ama kowenayaye acheñretpaꞌ Yomporñapaꞌ oꞌch alla apoerres sa paꞌnateña. 14Ñerraꞌm erra anetsro ñeñth alloꞌmarneshaꞌña ama kowenayeꞌ agapaseto tharroꞌmar ñetpaꞌ amach moeneto oꞌch eꞌmhñotapaset ñeñth ateth seserrpareꞌten, sañapaꞌ oꞌch semhterrerr ñamha alloth. Ñerraꞌm allempo semhterrerrña ñamha alloth, ñeñthña setkoꞌtsaꞌyen pañeꞌteꞌ patspaꞌ xhoch sepaꞌshetkaꞌtyesnomña setak. Atthochña alloꞌmarneshaꞌpaꞌ oꞌch señotatnomanet ñetpaꞌ amakaꞌye pokteyeꞌ entenanetoña Yompor. 15Poꞌñoxh theꞌpaꞌ oꞌch notas: Esempowañen allempoch akrarethetwerra allowen acheñeneshaꞌpaꞌ añ anetsoꞌmarneshaꞌ ñeñthchaꞌ ama kowenayeꞌ sagapaye theꞌ, ñetñapaꞌ nanakchaꞌ aꞌkoñchatarethterretña allempo. Amaꞌt sodomoꞌmarneshaꞌ ñamha gomorroꞌmarneshaꞌ ñetpaꞌ amach tama aꞌkoñchatarethterreto ateth ñerraꞌm ñeñth anetsoꞌmarneshaꞌ ñeñthchaꞌ ama kowenayeꞌ sagapaye theꞌ.

Allempo Jesúspaꞌ eñotatenan poeyochreshaꞌ xhokmach eñall ñeñthchaꞌ eꞌmoñeꞌtawet

16‘Ñamha sapaꞌ ñerraꞌm oꞌch awes theꞌpaꞌ señochchaꞌ poꞌñoxh xhokmach eñall ñeñthchaꞌ seꞌmoñeꞌteꞌ amaꞌt sapaꞌ amach xho erroth sepenaneto ñet. Ñeñthoꞌmarña notenes theꞌpaꞌ oꞌch nemñas eꞌñech atthes ñerraꞌmrratheꞌ carnero oꞌch awoꞌ alloꞌtsaꞌyen maꞌyarroxhno. Ñeñthoꞌmarña sapaꞌ señotaꞌthach ateth ñerraꞌm shechephpaꞌ atarr eñoteꞌ. Tharraña sapaꞌ amach erroth aphañso ateth ñerraꞌm yephpaꞌ ama erroth aphañeyaye. 17Ñeñthoꞌmarña notenes: Señotaꞌthach tharroꞌmar acheñeneshaꞌpaꞌ errothwanenchaꞌ perrset, sanmarethterrach amhchaꞌtarethesho allchaꞌ otteñeꞌcherrset. Nalleꞌtyerrsetchaꞌ all judioneshaꞌ poꞌprawoꞌmar. 18Poꞌñoxh eꞌñe noꞌmarpaꞌ rremanaterrsetchaꞌ atthoch moeroxhtatyerrset, sanmarethterrach amhchaꞌtarethesho ñamha alloꞌtsaꞌyen ñeñth nanak amhchaꞌtarethexhno allchaꞌña saꞌmethaꞌyesosnanchaꞌ neñoñ. Ñamha arrchaꞌ saꞌmetherrnan neñoñ alloꞌtsaꞌyen ñeñth ama judioneshayaye. 19Ñamha allempoch sanmarethetyesapaꞌ amaꞌt mameshapaꞌ amach xha sellkaꞌphsatsto, amach sotaphsaꞌtatsto: Errothwachkaꞌye notostheꞌ amhchaꞌtarethesho ñerraꞌm oꞌch aꞌphthoꞌtareꞌtapoen. Tharroꞌmar allempopaꞌ Somporchaꞌña Poekamkëñ señotatyesoseꞌña all. 20Atthoña amach eꞌñe sochaya seꞌñoraꞌyesoso, añchaꞌña Sompor Poekamkëñ ñeñthchaꞌña seꞌñoratyeseꞌ.

21‘Allempoch ateth perrsetpaꞌ ñeñth eꞌñe semoꞌnasheñ sepen ñatoꞌ ñeñthachkaꞌye sepomoerreꞌ atthoch moetsaterres tharroꞌmar ñapaꞌ amakaꞌye ameꞌñenno. Amapaꞌ ñatoꞌ pomporpaꞌ oꞌch pomoerran ñamha poechemer. Amaꞌt ñamha poechemerpaꞌ ñatoꞌ pathparñothpaꞌ oꞌpaterranach pamoꞌmteꞌ atthoch moetsatater. 22Shonteꞌch acheñeneshaꞌ ñeñthchaꞌ seꞌmoñeꞌterreꞌ tharroꞌmar sapaꞌ nakaꞌye eꞌñe sameꞌñena. Amaꞌtchaꞌ atarr moeroxhtaterrsetpaꞌ tharraña eseshaꞌch eꞌñe awantaꞌwanmoeꞌ eꞌñe poeyemteñothen na, ñeñthchaꞌña aꞌkeshphatarethterrtsa. 23Ñerraꞌm esempo eꞌmoñeꞌterrset ñeñth anetsro alloꞌtsenes oꞌch seyetamphsanetpaꞌ oꞌch sawanma poꞌpoñ anetso. Allpaꞌxhoꞌña ñerraꞌm atthekma eꞌmoñeꞌterrseterrpaꞌ oꞌch seyetamperraneterr oꞌch sawanerrerr ñamha poꞌpoñ anetso. Eꞌñe poꞌñoxh notenes: Amach eꞌñe sepaꞌwenaꞌ ora allowen israelneshaꞌ paꞌnetsropaꞌ na Ñeñthen Acheñetosets oꞌch alla norrterra.

24‘Ñamha oꞌch noterrserr: Ñeñth yochreshatspaꞌ ñerraꞌm eꞌmoñeꞌteññañet poꞌmaestror, eꞌñech atthekma eꞌmoñeꞌterrñañet ñamha ñeñth poeyochreshaxhno pen. Ñamha ñeñth ñañretsotyets ñerraꞌm eꞌmoñeꞌteññañet pamoꞌmteꞌ eꞌñech atthekma eꞌmoñeꞌterrñañet ñamha poeñañreshaxhno. 25Ñeñth yochreshatsoxhnopaꞌ eꞌñepaꞌchña pokteꞌ entyeñet oꞌch ateth apharethterret ateth ñerraꞌm poꞌmaestroret. Ñamha ñeñth ñañretsoxhnopaꞌ eꞌñepaꞌchña pokteꞌ entyeñet ñamha oꞌch ateth apharethterret ateth ñerraꞌm pamoꞌmteꞌ. Ñamha señochepaꞌch ñerraꞌm na poesochatseꞌteñothetan otennet napaꞌ oneñethoꞌ pomporen ñeñth otenet Beelzebú, sapaꞌxhoꞌña ellochña atarr sochatseꞌterrset. Amaꞌt na ñeñthen eꞌñe samoꞌmteꞌ sepenen attho atarr sochatseꞌtennet na, sapaꞌxhoꞌña ñeñthes nechemereshaxhno nepen, elloña sapaꞌ atarrchaꞌ nanak sochatseꞌterrset samha.

Attho amach yemhchaꞌtatsto ñeñthchaꞌ moetseꞌ yechets, añchaꞌña yemhchaꞌnaꞌt Yompor

(Lc. 12.2-9)

26‘Amaꞌt attheñpaꞌ tharraña sapaꞌ amach semhchaꞌtatstaneto tharroꞌmar yapaꞌ yeñoteñ allowen ñeñth attho eꞌñe aꞌnawa shekareꞌtyenet theꞌ, esempowañenñapaꞌ aꞌmethamphsarethterretchaꞌ. Amaꞌt allowen ñeñth eꞌñe aꞌnasotyenet theꞌpaꞌ esempowañenñapaꞌ eꞌñech eñotatarethetwerret. 27Ñeñthoꞌmarña amaꞌt erraꞌtsena neserrpareꞌtatyenes theꞌ eꞌñe sapthocheꞌ, esempoña sapaꞌ eꞌñech señotatwer ora allowen acheñeneshaꞌ. Amaꞌt erraꞌtsen ñeñth ateth neserrpareꞌtatyenes theꞌ eꞌñe aꞌnawa oꞌpono pokollo, esempoña sapaꞌ seserrpareꞌterrchaꞌ allchaꞌ eꞌñe kowen eꞌmoerres allowen acheñeneshaꞌ ateth ñerraꞌmrratheꞌ enoth seserrpareꞌten shelletoth. 28Amach aña semhchaꞌtatsto ñeñthchaꞌ semtseꞌ. Tharroꞌmar añach moetsonaset sechets, sekamkëññapaꞌ amach errothenoth moetsonaseto. Añchaꞌña semhchaꞌnaꞌt Yompor tharroꞌmar ñerraꞌm ña moenatspaꞌ eꞌñe ña poꞌwamenkothpaꞌ oꞌch aꞌchenkatonay yeꞌchets yekamkëñpaꞌxhoꞌña oꞌch aꞌchenkatonay koñchaꞌpoetso all parraren tsoꞌ.

29-31‘Elloña theꞌpaꞌ napaꞌ oꞌch notas: Xhokmach seyemcha Yompor, poꞌñoxh ñapaꞌ ñach sekwampeneꞌ. Amaꞌt othetholleshaꞌpaꞌxhoꞌña xhokma kowampeñ. Ñewa, amaꞌt yapaꞌ yeñoteñ othethollpaꞌ ama tama sherbeno. Amaꞌt yepomatset epa othetholleshaꞌpaꞌ ñeñthpaꞌ ama tsaꞌteyaye, eꞌñe poetallarratholla centavo tsaꞌtena. Tharraña amaꞌt attheñpaꞌ amaꞌt pathrra othetholl amach rromo atthoch shoraꞌnom ñerraꞌm ama Sompor moenataye ateth. Ñeñthoꞌmarña notenes: Amaꞌt mameshapaꞌ amach semhchaꞌtatsto, Yomporchaꞌña eꞌñe seyemta. Attho atarr morrentenana othetholleshaꞌ elloña sapaꞌ atarr nanak morrentensa. Ñewa, amaꞌt allpon sechetholleshaꞌ allpon soñoꞌtsen ñapaꞌ eꞌñe eñotennas.

Attho ama aꞌnasotpawo Jesucristo acheñeshoꞌmar

(Lc. 12.8-9)

32‘Elloña napaꞌ oꞌch noterrserr: Allowen amaꞌt erraꞌtsenchaꞌ ñeñthchaꞌ ama naꞌnasotenaye acheñeneshesho, napaꞌxhoꞌña Ñeñthen Acheñetosetspaꞌ amach naꞌnasotwerraneto namha Nomporesho all poeꞌntaño. 33Tharraña ñerraꞌm eseshaꞌ naꞌnasotenaya na arr patsro acheñeneshesho, napaꞌxhoꞌña naꞌnasoterranetchaꞌ Nomporesho all poeꞌntaño.

Attho Jesúspaꞌ orrtatosan eꞌñe ñoꞌmar elloptannaꞌteñets

(Lc. 12.51-53; 14.26-27)

34‘Sapaꞌ xhatheꞌ sotenapañ añekoptheꞌ nowapa oꞌch eꞌñe kowen namoꞌtstannaꞌtatera acheñeneshaꞌ arr patsro. Ñeñthpaꞌ ama attheyaye. Añekpaꞌnaña nowapa allochñapaꞌ eꞌñe noꞌmarpaꞌ acheñeneshaꞌñapaꞌ oꞌch attha elloptannaꞌtyeset. 35-36Ñewa, ñeñth noten theꞌ amaꞌt ñeñth eꞌñe pamoꞌtsnaꞌtarekmoet ñatoꞌ noꞌmarach eꞌmoñeꞌtannerret. Tharroꞌmar ñatoꞌ eñallchaꞌ ñeñthchaꞌ nameꞌñerraya, pamoꞌtseshetñapaꞌ ñatoꞌ amach ameꞌñerrneto. Ñeñthoꞌmarña notenes eꞌñe noꞌmarpaꞌ ñatoꞌ poechemerpaꞌ oꞌch epatareꞌtenan pompor, ñamha ñatoꞌ poechoyorpaꞌ oꞌch epatareꞌtenan pachor, ñamha ñatoꞌ ñeñth paꞌthoꞌñen pen oꞌch epatareꞌtenan ñamha paꞌsoꞌmoe.

37‘Tharraña ñerraꞌm erraꞌtsenchaꞌ nemorrenterrayañ ñerraꞌm ñetña pompora atarr morrentenet ñamet pachoret ñeñthña acheñerpaꞌ ama eꞌñeyeꞌ pokteꞌ nenteñe atthoch neyochreshaꞌ neperranet. Ñamha poꞌpotantañ ñeñthchaꞌ nemorrenterrayañ ñetpaꞌxhoꞌña ñerraꞌm poechemera atarr morrentenetpaꞌ ñamha poꞌsñet ñeñthpaꞌxhoꞌña acheñerpaꞌ ama eꞌñeyeꞌ pokteꞌ nenteñe atthoch eꞌñe neyochreshaꞌ neperranet. 38Tharroꞌmar ñerraꞌm erraꞌtsen ama eꞌñeyeꞌ sewanmaye ñeñth ateth moenenet eꞌñe ñokpoeta atthoch kotherrnet eꞌñe poktakma, nañapaꞌ amach pokteꞌ nenteñe oꞌch neyochreshaꞌ neperranet. Ñeñthpaꞌ añ tomaꞌntena ateth ñerraꞌmrratheꞌ xho sechechnen sekorsoch alloch semoeroxhta samha. 39Tharraña ñerraꞌm eseshaꞌ eꞌñe aña eꞌnenet oꞌch korrena atomat atthoch eꞌñe koshenet arr patsro, ñetñapaꞌ aꞌchenkaterretchaꞌ ñañeñeta. Tharraña ñerraꞌm eseshaꞌ eꞌñe pokteꞌ enteneꞌ oꞌch es sewanmoet nokop ñeñth ateth moenenet ñeñth eꞌñe ñokpoeta arr patsro ñeñthña acheñerpaꞌ korretsach poksheñeshokmañen eꞌñe thayotheñ errponañowen.

Ñeñthchaꞌ apoerrey Yompor atthoch atarr koshaterrey

(Mr. 9.41)

40Jesúspaꞌ alla oterranerr poeyochreshaꞌ:

—Ñerraꞌm oꞌch sawanma, ñerraꞌm eseshaꞌch eꞌñe kowen sagapoeꞌ sa, ñetpaꞌ naꞌnakaꞌyeña agënet eꞌñe kowen. Ñamha ñeñth eꞌñe kowen nagëneꞌ na, ñetpaꞌ Nomporeꞌnakaꞌyeña agënet ñeñth nellsenseneꞌ na. 41Amaꞌt erraꞌtsena ñeñth eꞌñe kowen agëneꞌ ñeñth aꞌmhteneꞌ Yompor poꞌñoñ tharroꞌmar ñapaꞌ Yomporkaꞌye poꞌñoñ aꞌmhten, ñeñthña acheñer ñeñth eꞌñe kowen agëneꞌpaꞌ Yomporchaꞌña apoerreꞌ ñeñthchaꞌ atarr koshaterreꞌ. Eꞌñech atthekma apoer ñeñth ateth koshatenan ñeñth aꞌmhteneꞌ poꞌñoñ. Ñamha amaꞌt erraꞌtsena ñeñth eꞌñe kowen agëneꞌ ñeñth eꞌñe pokteꞌ es orrtatyets Yomporekop tharroꞌmar ñapaꞌ Yomporekopkaꞌye eꞌñe pokteꞌ es orrtatyen, Yomporchaꞌña apoerreꞌ ñeñthchaꞌ atarr koshaterreꞌ. Eꞌñech atthekma apoer ñeñth ateth koshatenan ñeñth eꞌñe pokteꞌ es orrtatyets Yomporekop. 42Ñamha añ ñeñth ama esosheꞌmayeꞌ enteneto, erraꞌtsenchaꞌ apapoeꞌ ñeñthchaꞌ orros tharroꞌmar ñapaꞌ nokaꞌye neyochreshaꞌ, amaꞌt koñeꞌtha oñ apapet, napaꞌ poꞌñoxh oꞌch notas, Yomporchaꞌkaꞌyeña apoerrawetña ñeñthchaꞌ atarr koshaterrawet.

Currently Selected:

San Mateo 10: ame

Highlight

Copy