San Lucas 18

Attho atmaꞌntatarethtena rrethorrnaneshaꞌ ñeñth xhokma enamareꞌteneꞌ juez atthoch yenpoeꞌ

1Allempoña Jesúspaꞌ alla serrpareꞌtaterraneterr tomaꞌnteñtso atthoch eñochet ñeñth poktetsa yokop xhokmach yemaꞌyochena amach yemoenmeꞌchatsche maꞌyochatsa. 2Ñeñthoꞌmarña allempopaꞌ ateth otanet:

—Patherr anetso alloꞌtsen poesheñarr juez ñeñth poꞌtarwas peneꞌ oꞌch eꞌñe kowen aꞌpoktatan ñoñets acheñeneshakop ñerraꞌm esempo eꞌmoñeꞌtannenet. Tharraña ñeñthña juezpaꞌ atarr atsrreꞌmñath. Amaꞌt Yomporpaꞌ ama amhchaꞌnaꞌtpawoyeꞌ enteñe amaꞌt eꞌñe mamesha. Acheñeneshaꞌpaꞌxhoꞌña amaꞌt poesheñarrapaꞌ ama akwaꞌpenayeꞌ entenaneto. 3Ñeñthña anetsropaꞌ all yexhena ñamha poesheñarr rrethorrnaneshaꞌ. Ñañapaꞌ eñall poꞌpsheñeñ ñeñth eꞌmoñeꞌteneꞌ, xhokmach erroth peññañ ñeñth ama pokteyaye. Rrethorrnaneshaꞌñapaꞌ xhokmach seneꞌth juezesho. Allchaꞌ xhokma ateth otareꞌtenan juez: “Theꞌpaꞌ nemneñ oꞌch eꞌñe kowen peyenpaꞌn atthoch phaꞌpoktaton kowen ñoñets añekop ñeñth neꞌmoñeꞌteneꞌ.” 4Juezñapaꞌ amaꞌt allponmat ama moeno oꞌch yenpoeꞌ. Tharraña rrethorrnaneshaꞌ ñapaꞌ xhokmach sen juezesho enamareꞌteneꞌ atthoch aꞌpoktatoñ ñoñets añekop ñeñth eꞌmoñeꞌteneꞌ. Attheñapaꞌ xhap allempo kothapeꞌch juezpaꞌ ateth ot: “Napaꞌ poꞌñoxh amaꞌt Parets ama nemhchaꞌteñe; acheñeneshaꞌpaꞌxhoꞌña amaꞌt mameshapaꞌ ama akwaꞌpenayeꞌ nentenaneto. 5Tharraña añ rrethorrnanesharpaꞌ atarr atsrreꞌmoxhtanaꞌtenen, epayeꞌ wapameꞌtennana, oꞌkaꞌye atarr aꞌmñechatna. Ñeñthoꞌmarña theꞌpaꞌ oꞌch neyenpoeꞌ allochñapaꞌ amach alla werrnaneꞌthe.”

6Allempoña Jesúspaꞌ ateth oterrerr:

—Amaꞌt seꞌmoeñeña ñeñth ateth oten juez ñeñth atarr atsrreꞌmñath. Theꞌpaꞌ oten awoꞌch aꞌpoktatan rrethorrnaneshakop amaꞌt ñapaꞌ ñeñth acheñer ñeñth atarr atsrreꞌmñath. 7-8Ñeñthoꞌmarña theꞌpaꞌ oꞌch noterrserr: Yomporpaꞌ elloña nanakchaꞌ kowen aꞌpoktatonay ñeñthey oꞌ akrerrey ya ñeñtheychaꞌ eꞌñe poechemer pen ñerraꞌm yapaꞌ xhokmach yexhoreꞌteñ amaꞌt yetho amaꞌt ñamha tsapo. Napaꞌ poꞌñoxh oꞌch notas, Yomporñapaꞌ amach atomato, xhoch yeꞌmhñoteꞌ; ñapaꞌ eꞌñechkaꞌye allorokma eꞌmhñotey oꞌch eꞌñe kowen aꞌpoktatonay ñeñth yokop. Tharraña theꞌpaꞌ oꞌch notas, ñerraꞌm esempoch newerra Ñeñthen Acheñetosets, errponsheñatheꞌña nentwerrña arr patsro ñeñth eꞌñe kowen nameꞌñenaya.

Ateth maꞌyochena fariseoneshaꞌ ñeñth eꞌñe kowen entetsa, all maꞌyocha ñamha poꞌpsheñeñ eꞌñe poellkëñeshaꞌ ñeñth atarr ochñath entetsa

9Poꞌpocheñoña Jesúspaꞌ ateth serrpareꞌtatan allpon acheñeneshaꞌ ñeñth eꞌñe ñeta yemtetset tharroꞌmar ñetpaꞌ eꞌñe kowen entyenet eꞌñe ñañeñeta. Ñetñapaꞌ amaꞌt mameshapaꞌ ama kowenayeꞌ enteñetoña poꞌpotantañ acheñeneshaꞌ. Ñeñthoꞌmarña Jesúspaꞌ alla tomaꞌntatanet, ñeñthpaꞌ ateth otanet:

10—Eñall epsheña acheñ ñeñth sets Parets paꞌpakllo allchaꞌ maꞌyochoset. Poesheñarr ñeñthpaꞌ fariseo ñeñth eꞌñe ñañeña kowen entetsa; poꞌpsheñeññapaꞌ ñeñth poeshkëñotheꞌna cobraꞌyenan acheñeneshaꞌ kelle ñeñth gobiernokop. 11Ñeñthña fariseopaꞌ thomos all maꞌyochosañ, ñeñthpaꞌ ateth otos: “Nompore, napaꞌ oꞌch neparasyosoꞌtoseph tharroꞌmar napaꞌ atarr kowen acheñren, napaꞌ ama attheyayno Nompore ñerraꞌm poꞌpotantañ acheñeneshaꞌ. Ñetpaꞌ atarr es poerratamphsannaꞌtyenet, ama pokteyeꞌ es phannaꞌtyeneto, atarrchaꞌ chetaꞌyeñet koyaneshaxhno ñeñth ama poethaporeyaye. Napaꞌ ama attheyeꞌ, Nompore, nepeno. Napaꞌ ama neshkareꞌteno ateth pena añ acheñer ñeñth poeshkëñotheꞌna cobraꞌyeneꞌ acheñeneshaꞌ kelle gobiernokop. 12Napaꞌ patheꞌtets semanapaꞌ epochchaꞌ nethoreꞌtena, Nompore, phokop, ñamha amaꞌt ora ñeñth allpon nagën xhokma napoeneph allpon poktetsa phokop amaꞌt nediezmo, Nompore.” Allowa wañ ateth maꞌyochena fariseo. 13Poꞌpsheñeñña ñeñth cobrets kelle ñañapaꞌ alla thomos aꞌyoth. Ñapaꞌ eñotena atarr ochñath ñeñthoꞌmarña ñapaꞌ ama kowoso enoneth Yomporeshoneth. Ña poellkëñothpaꞌ nosan pot poesomapo. Ña poemaꞌyocheñoth ateth otos: “Nompore, theꞌpaꞌ oꞌch pemorrenterrna atthoch eꞌñe pephretnaꞌwerrnan allowen noꞌchñar tharroꞌmar napaꞌ atarrkaꞌye ochñathen.”

14Jesúsñapaꞌ ateth oterraneterr:

—Napaꞌ oꞌch notas, ñeñthña ateth aꞌmetheneꞌ poꞌchñar ñeñthña acheñerpaꞌ eꞌñe pokteꞌ enteñ Yompor. Ñeñthoꞌmarña allempo maꞌyochwapaꞌ oꞌ awerr paꞌpakllo eꞌñe kowen aphretnaꞌwarethterra poꞌchñar. Poꞌpsheñeñña fariseo ñeñth ama aꞌmethosaye poꞌchñar, Yomporñapaꞌ arepaꞌtchaꞌ pokteyeꞌ eñche. Tharroꞌmar allowen ñeñth eꞌñe kowen entetsa eꞌñe pommoꞌcheñoth ñeñthña tsapathonethpaꞌ amach esosheꞌmayeꞌ entereto. Tharraña allowen ñeñth ama esosheꞌmayeꞌ entetso theꞌ, ñeñthña tsapathonethpaꞌ atarrchaꞌ kowen enteret.

Attho Jesúspaꞌ bensareꞌtamphsapan cheshaneshaꞌ ñeñth wapatoñet

(Mt. 19.13-15; Mr. 10.13-16)

15Ñamha allempopaꞌ shonteꞌ waxhaꞌtachet cheshatholleshaꞌ Jesúsesho. Ñetpaꞌ añekopña waxhaꞌtachet oꞌch aꞌphllaꞌyesapanet Jesús atthoch bensareꞌtamphsapanet. Jesúsña poeyochreshaꞌ allempo entapan ñeñth waxhaꞌtateꞌ cheshaneshaxhno, ñetñapaꞌ ama pokteyeꞌ eñcheto oꞌch anmoset cheshatholleshaꞌ Jesúsesho ñeñthoꞌmarña ama amnatarethtapoeto. 16Tharraña Jesúsñapaꞌ allentha xhoreꞌtapanet, ateth otapanet:

—Pokteꞌñaxhoꞌ semnachñakaꞌyeña cheshaneshaꞌ onosetepaꞌ eꞌñe nesho. Amachkaꞌye xha sepatareꞌtatstapaneto tharroꞌmar allowen ñeñth atarr neyemtenaya na eꞌñe atthet ñerraꞌmrratheꞌ cheshatholl, ñetchaꞌ oꞌpatenetña Yompor poꞌkowenña ñeñth attho ayochreshathtena ña poeꞌntañoth. 17Poꞌñoxhpaꞌ oꞌch notas, ñerraꞌm eseshaꞌ ama eꞌñeyeꞌ poeyemteñotheyeꞌ agëññañeto Yompor poꞌkowenña amach ateth perreto ñerraꞌm cheshatholl eꞌñech yemtenana ñeñth kowampeneꞌ, ñetñapaꞌ amach poeyochreshayeꞌ perraneto Yompor attho atarr ayochreshathtena ña.

Attho poesheñarr ñeñth wepoeshameñ ñeñth atarr ekhllayoreth ñañapaꞌ eñoranaꞌtosana Jesús

(Mt. 19.16-30; Mr. 10.17-31)

18Poꞌpocheñoña poesheñarr ñeñth atarr amhchaꞌtarethtetsa aꞌphthoꞌtosan Jesús, ateth otos:

—Maestro, phapaꞌ atarr kowen acheñreph, theꞌpaꞌ oꞌch photapoen ¿errothenaꞌtchaꞌ nephaña na eꞌñe kowen atthochña napaꞌ korretsanach eꞌñe thayotheñ amaꞌt errponañowen?

19Jesúsñapaꞌ ateth otaph:

—Esoꞌmareꞌt photenenña napaꞌ atarroꞌ kowen acheñren. Arr arromñatheneshaꞌ amaꞌt eꞌñe poesheñarrapaꞌ ama eñalleña ñeñth eꞌñe kowen acheñer. Ñapthaña Yompor ñeñth eꞌñe poꞌñoxh kowen. 20Phapaꞌ eꞌñe peñotwen Yompor poꞌñoñ all oteney ñeñthchaꞌ ateth yepena eꞌñe kowen; ñeñthpaꞌ ateth oteney: “Amach yechtapretyesatsto thaporets; amach yemtsannaꞌtatsto; amach yetyesatsto; amach yetomaꞌtamphsatsche yamoꞌts eꞌñe attha; ñamha yemorrenteñothpaꞌ yemhchaꞌnaꞌchchaꞌ yompor ñamha yachor.”

21Ñeñthña aꞌphthoꞌteneꞌpaꞌ ateth otererr:

—Napaꞌ eꞌñekaꞌye cheshotheñ ora añexhnopaꞌ eꞌñekaꞌye netsotweñ.

22Oꞌña ateth otwa Jesúsñapaꞌ alla otererr:

—Eñallmeñkaꞌye patherr ñeñth pepalltena ñeñth ama attheyeꞌ pepenaꞌ. Theꞌpaꞌ añchaꞌña ateth pepha oꞌch eꞌñe pepomwerr ora allpon ñeñth pechyen oꞌch phapaꞌyeraꞌ wokchañneshaxhno ñeñth atarr es palltaꞌyetsa atthochña phapaꞌ pecherrchaꞌ ñeñth atarr nanak sherbets Yompor poeꞌntaño. Allempochña pewerrapaꞌ oꞌch phoktherren atthoch eꞌñe neyochreshaꞌ neperreph eꞌñe poktakma.

23Oꞌña eꞌmwan ñeñth ateth och Jesúspaꞌ ñañapaꞌ xha atarr lleka tharroꞌmar ñapaꞌ atarr ekhllayoreth, shonteꞌ paꞌnamen echyen. 24Jesúsña eñch ñeñth ateth atarr llekapaꞌ ñañapaꞌ poellkapreteñothpaꞌ ateth ot:

—Ñeñth atarr ekhllayorethpaꞌ atarr nanak echarr atthoch agapoñet Yompor poꞌkowenña ñeñth attho ayochreshathtena ña. 25Ñewa, ñeñthpaꞌ atethchaꞌ netmaꞌntacha. Poꞌñoxh yapaꞌ yeñoteñ berr añekmoen allpon ñerraꞌm wakësh#18.25 Ñewa, Jesús añ tomaꞌntatanet camello ñeñth payara penet all paꞌnyo, ñeñth eꞌñe allpon ñerraꞌmrratheꞌ wakësh. atarrkaꞌye thorrapoꞌ oꞌch eshoꞌtosa añethollponathollo ateth ñerraꞌmrratheꞌ akosh poetathollo. Ñeñthpaꞌ atethkaꞌye penaña acheñ ñeñth ekhllayoreth ello atarr thorrapoꞌ oꞌch agapan ñamha Yompor poꞌkowenña ñeñth attho ayochreshathtena ña (tharroꞌmar ñetpaꞌ ama moeneñeto oꞌch sewanmoet ñeñth atarr morrentenet ñet atthoch poeyochreshaꞌ perranetañ Yompor).

26Ñeñthña eꞌmoeneꞌ ateth oten Jesús ñetñapaꞌ ateth ochet:

—Tharraña ñerraꞌm ateththeꞌpaꞌ amatheꞌ eseshaꞌ aꞌkeshphatarethterrtso amaꞌt poesheñarra tharroꞌmar yapaꞌ yeñoteñkaꞌye wakëshpaꞌ amakaꞌye eshoꞌtenoña aksheketo.

27Jesúsñapaꞌ ateth oterraneterr:

—Sa arromñatheneshaspaꞌ amach es errothenayeꞌ apen senteno. Tharraña Yomporpaꞌ ama eñalle ñokop ñeñth atarr thorrapoꞌ enten.

28Pedroñapaꞌ ateth och:

—Partseshachaꞌ poꞌñoxh yapaꞌ oꞌ eꞌñe yeswanom ora allowen amaꞌt yepakllowen atthoch eꞌñe yoktherreph.

29Jesúsñapaꞌ alla oterraneterr:

—Poꞌñoxhpaꞌ oꞌch notas, allowen erraꞌtsenchaꞌ acheñer ñeñthchaꞌ eꞌñe sewanmoeꞌ allowen amaꞌt paꞌpakllowen, ñatoꞌ poethapor, paꞌmoꞌnasheñneshaꞌ ñatoꞌ pompor, pachor, ñatoꞌ amaꞌt ñamha poechemereshaꞌ atthoch eꞌñe kowen sherbhaterrñañet Yompor poꞌkowenña attho ayochreshathtena ña, 30amaꞌt erraꞌtsenchaꞌ ñeñthchaꞌ sowanmoeꞌ allowen, elloña ñetpaꞌ oꞌch alla agërret shonteꞌ esokmañen ñeñth atarr kowen amaꞌt theꞌ allempo eꞌñe korrenet, elloña tsapathonethñapaꞌ oꞌch agërret ñeñth alloch ñetpaꞌ korretsetach beñekpoen.

Allempo Jesúspaꞌ alla eñotaterraneterr ñapaꞌ xhokmach amtsarethterra

(Mt. 20.17-19; Mr. 10.32-34)

31Ñeñth poeyochreshaꞌ ñeñth xharraꞌ poechena epsheña, Jesúsñapaꞌ awanmanet elloneth, allñapaꞌ ateth otosanet:

—Theꞌ poꞌñoxhpaꞌ oꞌch aweney Jerusaléño. All ora allpon kellkaꞌyesoneꞌth ñeñth aꞌmhtaꞌyesayeꞌth Yompor poꞌñoñ awath ñeñthchaꞌ ateth naꞌpharethterra na Ñeñthenchaꞌ Acheñetosets, theꞌñapaꞌ oꞌch eꞌñe etsotwerra ñeñth ateth anareth nokop. 32Tharroꞌmar theꞌpaꞌ pomoerrnetchaꞌ poꞌpoñ acheñesho ñeñth ama judioneshayaye. Allowen acheñeneshaꞌpaꞌ oꞌch achmhareꞌterrnet, oꞌch atserrphatseꞌterrnet, poeꞌmoñeꞌteñothetanpaꞌ oꞌch aꞌkoshareꞌterrnet. 33Oꞌch nashtarethterra, atthothchaꞌña moetserrnet. Tharraña pomaꞌpamtañoñapaꞌ oꞌch alla netanterra.

34Amaꞌt ateth otwanet, ñetñapaꞌ ama eseshayeꞌ eñotaye ñeñth ateth serrpareꞌtatanet. Amaꞌt poesheñarrothetapaꞌ amaꞌt mameshapaꞌ ama xhapanetoña poeyoxhreto ñeñth ateth otenanet.

Attho Jesúspaꞌ kowaterran poesheñarr aporoꞌyeth ñeñth jericoꞌmarneshaꞌ

(Mt. 20.29-34; Mr. 10.46-52)

35All oñenet oꞌña xhapmochet anetso Jericópaꞌ allña eꞌñe thoñetophñopaꞌ all anen poesheñarr aporoꞌyeth ñeñth xhokma enamoets kelle. 36Ñeñthña aporoꞌyethpaꞌ oꞌ eꞌmapan shonteꞌ acheñeneshaꞌ ñeñth metaxhets all thoño, ñañapaꞌ allentha aꞌphthoꞌtanet:

—¿Esoꞌmareꞌt shonteꞌ metaxhenña acheñeneshaꞌ?

37Ñetñapaꞌ ateth ochet:

—Añkaꞌye wetsa Jesús ñeñth nazaretoꞌmarneshaꞌ.

38Ñañapaꞌ allentha rrana womenkpaꞌ ateth otapan Jesús:

—Pemoerayeꞌchnomna, Jesúsochaꞌ, namha. Phapaꞌ ñeñtheph Davidnaꞌtareph.

39Acheñeneshaꞌ ñeñth otaxhetsa ñetñapaꞌ xha moeneꞌ cheꞌptareꞌtnomet, ateth otoset:

—Oꞌwa pemma.

Aporoꞌyethñapaꞌ elloña alla rranerrerr ateth oterranerr Jesús:

—Ñeñtheph Davidnaꞌtareph, pemoerayeꞌchnomnañakaꞌye.

40Allempoña Jesús alla thomos otosan acheñeneshaꞌ:

—Sanmon arr nesho.

Oꞌ wapapaꞌ Jesúsñapaꞌ ateth otaph:

41—¿Esoꞌtña penmen ñeñthchaꞌ ateth nephoseph?

Ñañapaꞌ ateth och:

—Añkaꞌye, Ayochreshathe, nemnen oꞌch pekwatnomoen atthoch oꞌch kowen nenterrapa.

42Jesúsñapaꞌ alla otererr:

—Pekwerrepaꞌch, tharroꞌmar attho atarr peyemtapna na ñeñthkaꞌyeña oꞌ eꞌñe aꞌkrraterreph.

43Eꞌñepaꞌtchaꞌ allorokma eꞌñe kowen enterra. Eꞌñe kowerrtsapaꞌ xha kothaꞌnmoeꞌ ñamha Jesús, allentha atarr ayeꞌchoxhtatnoman Yompor all kothaꞌnenan Jesús. Atthoꞌ enteñ allowen acheñeneshaꞌ ñetpaꞌxhoꞌña eꞌñe kowen ayeꞌchoxhtatneññañet Yompor.

Currently Selected:

San Lucas 18: ame

Highlight

Copy