Gálatas 6

Añ pokteꞌ xhokmach yeyenpannaꞌta atthoch yemesha allowen topateñets

1Ñamha oꞌch masheñneshachaꞌ ñamha noxhaneshachaꞌ notas, ñerraꞌm esempo señoteñ poꞌpsheñeñ oꞌ phowa ñeñth ama pokteyeꞌ enteno Yomporpaꞌ sa ñeñthes oꞌ kothapeꞌchaterres kowen Yompor Poekamkëñpaꞌ sach alla kothapeꞌchaterrawet kowen atthoch alla tanterret Yomporekop. Tharraña eꞌñe semoereñothpaꞌ eꞌñech akopha sokthapeꞌchatanet kowen. Tharraña sapaꞌxhoꞌña eꞌñech señota, theꞌt sapaꞌxhoꞌña atthekma sepha samha ñerraꞌm esempo topatenes oneñeth oꞌch phatenes ñeñth ama pokteyeꞌ enteno Yompor. 2Ñamha añ poktetsa xhokmach yeyenpannaꞌta atthoch yaꞌwantaꞌwa allowen topateñets. Ñerraꞌm atethña yephowapaꞌ oꞌch yetsotwoñ Cristo poꞌñoñ ñeñth ateth oteney oꞌch yemorrentannaꞌta.

3Ñerraꞌm eseshaꞌ pommoꞌcheñoth oten, “napaꞌ ama xho es neyexhkateno Yomporekop ñeñth ama pokteyaye”, ñeñthpaꞌ ñañeñach shekëtsa, tharroꞌmar poꞌñoxh ñeñth ateth acheñpaꞌ amach es sherbeno Yomporekop. 4Tharroꞌmar poesheñaꞌttsoypaꞌ xhoch ñanom yeñota errothentheꞌña yokrrena. Ñerraꞌm yeñotena eꞌñe poꞌñoxh kowen yokthapeꞌchen yeyoxhropaꞌ ñeñthña nanak akshaꞌpoꞌ. Tharroꞌmar ama akshaꞌpawo ñerraꞌm esempo yeñch poꞌpsheñeñpaꞌ oꞌ phowa ñeñth ama pokteyeꞌ enteno Yompor. 5Ñamha añ pokteꞌ eꞌñe poesheñaꞌttsoy oꞌch yaꞌwanten topateñets ñeñth yewenoya.

6Ñamha theꞌpaꞌ oꞌch notas poꞌpoñ: Ñeñth eꞌmhñoteneꞌ Yompor poꞌñoñpaꞌ añ pokteꞌ oꞌch es kowen apaꞌyeset ñeñth yexhatenawet Yompor poꞌñoñ.

7Amach sepantatsche, oꞌch señoch poꞌñoxh Yomporpaꞌ ama allokchameꞌtpawo. Tharroꞌmar ñerraꞌm yeyexhkaten ñeñth kowentetsa Yomporekop arr partsropaꞌ ñach yapoerreꞌ ñeñthchaꞌ yokshaterreꞌ tsapathoneth. Tharraña ñerraꞌm yephaꞌyes ñeñth ama kowenayaye, ñeñthpaꞌxhoꞌña ñach yetsaꞌtaterraya esempowañen. Ñatoꞌ oꞌch netmaꞌntacha ateth. Ñerraꞌm es yenareꞌtpaꞌ ñeñthchaꞌxhoꞌ emereꞌtats tsapathoneth. 8Atthekma ñamha ñerraꞌm aña yephatseꞌtyen ñeñth ateth moenatseꞌtyen yechetspaꞌ ñeñthara ñeñth yephaꞌyenapaꞌ aꞌchenkataterreychaꞌ. Tharraña ñerraꞌm añ yokthapeꞌchen kowen ñeñth ateth kothapeꞌchateney Parets Poekamkëñpaꞌ ñeñthara Poekamkëñothpaꞌ yokrrerrach esempowañen. Ñatoꞌ oꞌch netmaꞌntatererr ateth: Ñerraꞌm theꞌpaꞌ eꞌñe kowen yenareꞌten, tsapathonethpaꞌ nanakchaꞌ koshaterrey. Tharraña ñerraꞌm theꞌpaꞌ ama kowenayeꞌ yenareꞌteno, tsapathonethñapaꞌ nanakchaꞌ llekaterrey. 9Ñamha amach yemoenmeꞌchatsche phaꞌyeseꞌ ñeñth kowenetyetsa Yomporekop. Tharroꞌmar esempowañen allempoch eꞌñe pokteꞌ enteñ Yomporpaꞌ apoerreychaꞌ ñeñthchaꞌ yokshaterreꞌ ñerraꞌm amach xha yekexhpoere. Ñatoꞌ oꞌch netmaꞌntatererr ateth: Ñerraꞌm theꞌpaꞌ ama yemoenmeꞌcheñe nareꞌtatspaꞌ tsapathonethñapaꞌ nanakchaꞌ shonteꞌ meꞌtarsats. 10Ñeñthoꞌmarña theꞌpaꞌ oꞌch notas: Xhokmach yeyenpaꞌyes allowen yamoꞌtseshaꞌ thayepaꞌtña orameñ atthoch yeyenpannaꞌta. Ñamha añña nanak kowen ñerraꞌm xho yeyenpoeñ yamoꞌts ñeñth parro oꞌ yameꞌñera Cristo.

Arrpaꞌ all soꞌterranet añ cartoth

11Theꞌpaꞌ eꞌñe na notothpaꞌ oꞌch nekellkonas mameꞌ. Sapaꞌ oꞌch sent ñeñth ateshaklloꞌyerr kellekpaꞌ ñeñthpaꞌ na kellkëneꞌ. 12Oꞌch alla noterrserr: Ñeñth moeneneꞌ oꞌch tsorrataspaꞌ añekpa moeneñet atthoch judioneshaꞌpaꞌ oꞌch kowen entanet. Tharroꞌmar ñetpaꞌ ama moeneñeto oꞌch eꞌmoñeꞌtanet judioneshaꞌ. Ñetpaꞌ eñoteñet ñerraꞌm oꞌch serrpareꞌtet attho eꞌñe yameꞌñeñotha Cristo ñeñth rromats yokop oꞌch yekeshphapaꞌ añña judioneshaꞌpaꞌ oꞌch eꞌmoñeꞌtanetpaꞌ oꞌch kothareꞌtanet. 13Tharraña amaꞌt ñeñth oꞌ atsorrarethetwapaꞌ ama ameꞌñaꞌweneto allowen ñoñets ñeñth ateth anareth judioneshakop. Ñetpaꞌ aña moenenet eꞌñe sameꞌñeñoth ñetpaꞌ oꞌch tsorratatenset atthoch ñetpaꞌ oꞌch ommoꞌchwerrnaset judioneshesho sechets. 14Tharraña napaꞌ amaꞌt awathapaꞌ ama nemno oꞌch ateth nommoꞌchena. Napaꞌ aña nemnen xhokmach naꞌyeꞌchoxhtatoñ Yepartseshar Jesucristo ñeñth rromats korsocho yokop. Ñeñthña nameꞌñeñoth oꞌ newnerr ñeñth ateth nemnatseꞌtyeseꞌth awañmoꞌcha ñeñth patsoꞌmarekpa. Theꞌpaꞌ oꞌwañ nommoꞌcha ñeñth patsoꞌmarekpa. Napaꞌ ateth nentena ñerraꞌm akorsoꞌtamphsarethen. 15Amaꞌt yaꞌtsorrarethtatstapaꞌ ñeñthpaꞌ ama es sherbeno. Ñamha amaꞌt ama yaꞌtsorrarethtatstopaꞌ ñeñthpaꞌxhoꞌña ama es sherbeno. Añña nanak sherbets Yomporekop, oꞌch yetserrataterr yokthaphña, oꞌch yeyexhkërra etserra Yomporekop. 16Yomporepaꞌchña saꞌnataya allowenes ñeñthes ateth petsa ñeñth ateth oꞌ notwas ñeñth kowentetsa Yomporekop. Ñamha Yomporepaꞌchña semoeraya allowenes ñeñthes poꞌñoxh Yomporenaꞌtares.

17Theꞌpaꞌ ama pokteyaye amaꞌt poesheñarrapaꞌ oꞌch alla orrtaterrnanerr ñeñth atarr echarr nenten nokop tharroꞌmar ñeñth ateth neyxhatenpaꞌ ñeñthña poꞌñoxh Yompor pokthaphña. Tharroꞌmar themeꞌttsen orretyena nechets all marethaꞌyena all atserrphatseꞌtyesnet awañmoꞌcha. Theꞌpaꞌ ñeñthña eñotatyenawet poꞌñoxh napaꞌ nethorrena Jesúsokop ñeñth Yepartseshar yepen.

18Theꞌpaꞌ ñeñthach masheñneshachaꞌ ñamha noxhaneshachaꞌ notas, Yepartsesharepaꞌchña saꞌnataya, ñeñthara Jesucristopaꞌ ñepaꞌchña semoeraya. Ñeñthpaꞌ atthetepaꞌchña Nompore. Allowa.

Pablo

Currently Selected:

Gálatas 6: ame

Highlight

Copy