Los Hechos 3

Attho Pedropaꞌ aꞌkrraterran ñeñth echarrtetsa

1Pamtharrpaꞌ xhap allempokma maꞌyochenet Parets paꞌpakllo, ateth ñerraꞌm allempopaꞌ ñatoꞌ oꞌ ellerrenmoch. Pedroñapaꞌ awoꞌ Parets paꞌpakllo epoet Juan, oꞌch maꞌyochoset all. 2Oꞌña xhapoet allpaꞌ aꞌtaposet Parets paꞌpakllo. Allempoña aꞌtapmochet allpaꞌ, allempokma wapachet ñamha poesheñarr ñeñth echarrtetsa paꞌtkoth, ama eshkayeꞌ chopeꞌcheno. Allempotheñ eñalleta ama chopeꞌcheno. Xhokmach pamoꞌtseshaꞌpaꞌ oꞌch aneñet allekma beꞌthenet Parets paꞌpakllo. Oꞌch naꞌnmet allothekma beꞌthoseteꞌth ñeñth oteteꞌth Ama Makoweno. Allñapaꞌ allchaꞌ enamareꞌtyenan kelle ñeñth beꞌthostseꞌth Parets paꞌpakllo. 3Ñeñthña echarrtetsapaꞌ entapan Pedro epoet Juan. Ñetpaꞌxhoꞌña beꞌthosmochet Parets paꞌpakllo. Ñañapaꞌ enamapanet kelle. 4Pedroñapaꞌ alla oꞌchet koweꞌ epoet Juan. Allempoña Pedropaꞌ ateth otan ñeñth ama chopeꞌchetso:

—Ñewa, pekwaꞌy alla.

5Ñeñthña echarrtetsapaꞌ alla eꞌñe kowanet, ñapaꞌ otapañtheꞌ oꞌch apet kelle. 6Tharraña Pedroñapaꞌ ateth och:

—Napaꞌ ama necheno kelle, tharraña ñeñth nechenpaꞌ ñeñthchaꞌña napaph. Oꞌch notaph, eꞌñe poꞌpartsoteñoth Jesucristo ñeñth nazaretoꞌmarneshaꞌ oꞌch notaph, pechopeꞌcherrepaꞌ.

7Pedroñapaꞌ cheteꞌ pototh poꞌkowenrothpaꞌ oꞌ echañch. Allempokma korraꞌwena paꞌtkoth, amaꞌt all meyaꞌnen yetakpaꞌ oꞌ korraꞌwena poktakma. 8Korraꞌwetsa paꞌtkothpaꞌ poksheñothpaꞌ omacha enoneth, oꞌ then eꞌñe kowen. Allempoñapaꞌ chopeñeꞌchen. Amaꞌt all chopeñeꞌchen omachmeꞌtetsa all ayeꞌchoxhtatenan Yompor. Attheñapaꞌ beꞌthos Parets paꞌpakllo epoet Pedro ñamha Juan. 9Allowen acheñeneshaꞌ ñeñth alloꞌtsaꞌyen, ñetpaꞌxhoꞌ enteñet attho paꞌyeꞌchoxhtateñeshaꞌ Yompor all chopeñeꞌchen. 10Ñetpaꞌ chemeꞌteñet añmapaꞌ ñeñthara ñeñth anorrtseꞌth allothekma beꞌthoseteꞌth Parets paꞌpakllo, ñeñth otenet Ama Makoweno, allekma enamareꞌteꞌth kelle. Ñetñapaꞌ attha kowanrrorteñet.

Attho Pedropaꞌ serrpareꞌtatan acheñeneshaꞌ Parets paꞌpakllo

11Añña ñeñth korrerrtsapaꞌ ama aꞌrroyen enterrano Pedro ñamha Juan. Allempoña all thomxhenet all oteñet Salomón Popellrraro. Acheñeneshaꞌ poꞌyorñothetpaꞌ matrraꞌtet alloꞌtsen Pedro ñamha Juan ñamha ñeñth aꞌkrraterr Pedro. 12Allempoña xhaxhaꞌtet all thomxhenetpaꞌ, añña Pedropaꞌ otapanet, ateth ot:

Oꞌch, masheñe israelneshachaꞌ, notas, esoꞌmartheꞌ sekwanrrorteney. Xhatheꞌ sotenapañ eꞌñetheꞌ ya yewamenkoth yechopeꞌchater, amapaꞌ xhatheꞌ sotenapañ eꞌñetheꞌ ya, yaꞌkowentateñoth yechopeꞌchater. Añmapaꞌ ama attheyaye. 13Añchaꞌña oꞌch notas: Añmapaꞌ Yompor orrtateneꞌ ñeñth oꞌ sentwa. Añña Yomporpaꞌ ñeñthara Poꞌyomporer peꞌth amaꞌt Abraham ñamha Isaac ñamha Jacob, ñamha allowen yatañneshañ. Yomporpaꞌ eꞌñe pokteꞌ eñch oꞌch kowentatan Poechemer Jesús. Ñeñthoꞌmarña oꞌ orrtatonas ñeñth oꞌ sentwa. Tharraña sa ñeñthara Jesúspaꞌ oꞌ sepomwe. Amaꞌt allempo Pilatopaꞌ pokteꞌ enteñeñ oꞌch aꞌrroyereñ, tharraña sañapaꞌ xha saꞌnasotampesya allowenes. 14Amaꞌt ñeñth nanak Parets, ñamha amaꞌt ñeñth eꞌñe pokteꞌ es pets, sañapaꞌ xha saꞌnasotampesya. Allempo Pilatopaꞌ amaꞌt moeneñ oꞌch aꞌrroyer, sañapaꞌ aña sanamh ñeñth amtsañ ñeñthchaꞌ aꞌrroyonaset. 15Ñañapaꞌ xhaña semtsach ñeñth alloch eꞌñe yokrra. Tharraña amaꞌt moetsetañpaꞌ añña Pomporpaꞌ oꞌ alla tantater. Tharroꞌmar yapaꞌ yeñoteñ yapaꞌ yenter amaꞌt allempo tantwerra. 16Ya yeyemteñoth eꞌñe Jesús oꞌ korrerra ñeñth ama chopeꞌchetso ñorraꞌ. Amaꞌt sapaꞌ señoteñ attho awañapaꞌ ama chopeꞌcheꞌthe. Tharraña theꞌpaꞌ oꞌ senter oꞌ chopeñeꞌcherr. Yapaꞌ oꞌ yameꞌñera Jesús ñeñth oꞌ aꞌkrrataterran ñeñth echarrtatseꞌth awaña. Theꞌña amaꞌt sapaꞌ oꞌ sentwer allowenes.

17‘Theꞌña masheñneshachaꞌ napaꞌ neñotenes awaña sapaꞌ ama es sexhapoyo seyoxhro allempo semtsach Jesús. Amaꞌt ñeñth saꞌmhchaꞌtaretherneshaꞌ ama es xhapaweto poeyoxhreto ñamet. 18Tharraña ñeñth ateth sephowa theꞌpaꞌ oꞌ etsoterra Yompor poꞌñoñ. Tharroꞌmar allowen ñeñth aꞌmhtayeꞌth Yompor poꞌñoñpaꞌ atthekma oteteꞌth, ñeñthchaꞌ Cristotats Partsokoppaꞌ moeroxhtachetchaꞌ esempo. Ñeñthoꞌmarña theꞌpaꞌ oꞌ etsota Yompor poꞌñoñ ñeñth akellkareth. 19Ñeñthoꞌmarña theꞌpaꞌ añ poktetsa eꞌñe sa sellkëñothpaꞌ oꞌch sokthapeꞌcherr ello kowen Yomporekop. Oꞌch seswanom ñeñth awathotheñ sokthaphña. Atthothchaꞌ Yomporpaꞌ eꞌshowerrnaschaꞌ soꞌchñar. 20Atthochña separrokmateñoth epas Yomporpaꞌ soksherrach seyoxhro. Ñamha Yomporpaꞌ oꞌch alla moeñerrnaserr Cristo Jesús ñeñth anarethtatsa ñamha sokop. 21Tharraña theꞌpaꞌ eꞌñe pokteꞌ allach poeꞌntaño tharrempowa esempowañenchaꞌ aꞌpoktatarethetwa ora allowen ñeñth ateth eñoseꞌth Yompor awath. Amaꞌt awath Yomporpaꞌ eñoranaꞌtaneꞌth acheñ ñeñth eꞌñe pokteꞌ enteꞌth Parets ñeñthchaꞌ aꞌmhteꞌ poꞌñoñ, ñeñthchaꞌ etsoterrtsa esempowañen. 22Añmapaꞌ ñeñth ateth oteꞌth awath Moisés: “Yompor Paretspaꞌ orrtatonaschaꞌ ñeñthchaꞌ aꞌpotheꞌ poꞌñoñ, ñeñthara sa samoꞌtsnaꞌtarothpaꞌ orrtatonaschaꞌ, ateth ñerraꞌm na, Yomporpaꞌ oꞌ orrtaterren na namoꞌtsnaꞌtarneshakop. Tharraña sokoppaꞌ añ poktetsa xhokmach seꞌmhñoter errothenchaꞌ oterres. 23Tharraña ñerraꞌm eseshaꞌ amach eꞌmhñoterraye ñeñthchaꞌ orrterrtsa, ñeñthña acheñerpaꞌ awoꞌch aꞌchenkatarethterrach. Pamoꞌtseshaꞌña israelneshaꞌpaꞌ amach alloꞌna entneñeto.” Añpaꞌ allowa ateth oteꞌth Moisés awath.

24Alla oterrerr Pedro:

—Amaꞌt allowen ñeñth aꞌmhtayeꞌth Yompor poꞌñoñ awathpaꞌ, eñoseteꞌth ñeñth oꞌ etsotwerra theꞌ. Amaꞌt Samoel ñeñth aꞌmhtayeꞌth Yompor poꞌñoñ awath, ñamha allowen ñeñth allempotheñ aꞌmhtayeꞌth Yompor poꞌñoñ, añña eñoseteꞌth ñeñth oꞌ etsotwerra theꞌ. 25Añña ñeñth aꞌmhtayeꞌth Yompor poꞌñoñ awathpaꞌ ñeñthara samoꞌtsnaꞌtar sepeꞌth amaꞌt sa. Ateth Yompor aꞌpoktatan ñoñets awath satañneshakoppaꞌ añ ñeñthara ñoñets atthekma aꞌpoktatarethta ñamha sokop. Ateth ñerraꞌm awath ateth otan Yompor satoꞌ Abraham: “Ñeñth poesheñarroth pemhrenñothpaꞌ norrtatanetchaꞌ ñeñthchaꞌ amaꞌt allowen paꞌnamen acheñeneshaꞌpaꞌ koshaprechetchaꞌ.” 26Yomporpaꞌ oꞌ orrtatonay Poechemer oꞌ moeñonay ñeñthey judioneshay yanom. Allochñapaꞌ ña oꞌch koshaterrey nanak ateth ñerraꞌm allempo oꞌ kothapeꞌchaterrey eꞌñe kowen, ñamha allempotheñ oꞌ yekexhpaꞌwerr ñeñth ama pokteyaye Yomporekop.

Currently Selected:

Los Hechos 3: ame

Highlight

Copy