2 San Juan 1
1
Atthoch kowen yemorrentannena eꞌñe poꞌñoxh ateth oteney Yompor poꞌñoñ
1Napaꞌ na ñeñthen pompor pen allowen ñeñth ameꞌñenaya Yompor, theꞌpaꞌ oꞌch nekellkonas añ carta. Oꞌch nekellkonaph pha ñeñtheph eꞌñe noxheshaꞌ nepeneph, pha ñeñtheph oꞌ akrerr Yompor. Oꞌch nekellkonaph ñamha ora pechoyoreshowen ñeñth eꞌñe pachor pepeneꞌ. Napaꞌ eꞌñe poꞌñoxh atarr nemorrentensa, ama eꞌñe naptha nemorrentenso, elloña poꞌpotantañexhno ñeñth oꞌ enterran ñeñth eꞌñe poꞌñoxh Yompor poꞌñoñ, ñetpaꞌxhoꞌña eꞌñe morrentwenset. 2Tharroꞌmarña sapaꞌ atarr yemorrentensa attho yapaꞌ oꞌ eꞌñe xherrnaya ya yeyoxhro ñeñth eꞌñe poꞌñoxh Yompor poꞌñoñ. Ñeñthpaꞌ allach eꞌñe aꞌpoena yeyoxhro errponañowen. 3Eꞌñe newomhchaꞌteñothes sa napaꞌ oꞌch notas: Yomporepaꞌch sebensareꞌtampeneꞌ ñeñthara Parets epoet Poechemer Jesucristo ñeñth Yepartseshar yepen. Ñetepaꞌchña semoerenaya atthochña sapaꞌ eꞌñech kowen sokshena seyoxhro. Ñeñthpaꞌ añekop atthochña sapaꞌ señoterrñañ ñeñth eꞌñe poꞌñoxh Yompor poꞌñoñ atthochña sapaꞌ oꞌch semorrentannerra eꞌñe kowen allowenes.
4Theꞌpaꞌ oꞌch notaph, pha ñeñtheph eꞌñe noxheshaꞌ nepeneph na attho nentennaph poesheñaꞌtets ñeñth pechoyoreshaꞌ pepen, ñetpaꞌ xhokma eꞌñe kowen kothapeꞌcheññañet Yompor Parets poꞌñoñ ñeñth eꞌñe poꞌñoxh ateth oteney, napaꞌ ñeñthña atarr nokshateneꞌ. 5Oꞌch noxheshachaꞌ neyerpatapha, alloꞌnepaꞌch amorrentannaꞌtpoꞌ sentannena allowenes. Ñeñth ateth noteneph arr nekellkothpaꞌ ñeñthpaꞌ ama añeyaye ñoñets ñeñth ama seꞌmare. Amaꞌt allempotheñ eꞌñe errteꞌ sameꞌñerrapaꞌ allempotheñ seꞌmoerrña ñeñth ñoñets. 6Ñerraꞌm yemneñ yemorrentannaꞌtapaꞌ añchaꞌña ateth yephowerra ñeñth ateth oteney Yompor. Ñerraꞌm añ yemneñ oꞌch eꞌñe ateth yephowerra ñeñth ateth oteney Yomporpaꞌ xhochña eꞌñe kowen yemorrentannerra alloweney. Ñeñthpaꞌ eꞌñe awathotheñ ateth serrpareꞌtatyesaseteꞌth.
Ateth pena ashkañneshaꞌ ñeñth xhokma eꞌmoñeꞌteneꞌ Cristo
7Ñeñthoꞌmarña theꞌpaꞌ ateth notenes tharroꞌmar ñeñth shekëneꞌ acheñpaꞌ oꞌ epaꞌwa añ patsro. Shonteꞌch ñeñthchaꞌ shekëneꞌ acheñ, ñetpaꞌ ateth otyenet Jesucristo ama partsoyeꞌ acheñetostso. Ñeñth otets atethpaꞌ ñeñthña poꞌñoxh ashkaña ñeñthña eꞌmoñeꞌteneꞌ Cristo. 8Sapaꞌ eꞌñech señota allochñapaꞌ amach shekaso. Ñerraꞌm shekas allempopaꞌ eꞌñetheꞌ orrena sethorrerra Yomporekop. Añchaꞌña sethorrena atthochña sapaꞌ eꞌñech sagapwerr ora allpon ñeñth alloch tsaꞌtwerrsa ña.
9Ñerraꞌm erraꞌtsenchaꞌ ama atthekmayeꞌ yexhatatso ñeñth ateth yexhateney Cristo, ñerraꞌm xha aꞌpoꞌpoñeteññañ poꞌñoñ, ñeñth ateth petsapaꞌ amach Yomporeyeꞌ yemteno. Añchaꞌña erraꞌtseneytheꞌ alloꞌna kotheneꞌ Cristo poꞌñoñ yapaꞌ eꞌñe poꞌñoxh yeyemteña Yompor Parets eꞌñe Poechemereꞌna. 10Ñerraꞌm eseshaꞌch wapatsa sesho ñapaꞌ atethchaꞌ otos ñapaꞌxhoꞌ añoꞌ yexhaten Yompor poꞌñoñ tharraña ñapaꞌ ñerraꞌm ama attheyeꞌ yexhateno ateth yexhaten Cristopaꞌ ñewa, amach sagapatsche sepakllo. Amaꞌt sewomhchaꞌteñothapaꞌ amach sotatsche, “Yomporeꞌt phaꞌnatenaya.” 11Amach sewomhchaꞌtatsche tharroꞌmar ñerraꞌm sewomhchaꞌteñ, sapaꞌ ñeñthatheꞌ seyxhaprech ñeñth ama poꞌñoxhoyaye.
Attho soꞌterranet poꞌcartoth
12Shontemeñ poꞌpoñexhno ñeñthchaꞌ notaseñ tharraña ama nemno oꞌch eꞌñe notwas arr necartoth. Tharroꞌmar napaꞌ nesechena oꞌch nemoꞌtensaꞌ allempochña atthoch yeserrpareꞌt eꞌñe parro, atthochña eꞌñech kowen parro yoksherra.
13Añ pemoꞌnerr poechoyoreshaꞌpaꞌ ñetpaꞌ womhchaꞌtenpet ñamet arr necartoth. Ñetpaꞌxhoꞌña ñeñthet oꞌ akrerranet Yompor. Theꞌpaꞌ ñeñthach notas, Yomporepaꞌch saꞌnataya. Ñeñthpaꞌ atthetepaꞌch Nompore. Allowa.
Juan
Currently Selected:
2 San Juan 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.