1 San Juan 4

Atthoch yeñoch erraꞌtsentheꞌña ñeñth eꞌñe poꞌñoxh eñoraten Yompor Poekamkëñ; atthoch yeñoch ñamha ñeñth epatareꞌteneꞌ Yompor pokthaphña

1Ñamha theꞌpaꞌ oꞌch, masheñneshachaꞌ ñamha noxhaneshachaꞌ, noterrserr: sapaꞌ ñatoꞌt sameꞌñenaꞌña allowen paꞌnamen kothaphñats tharroꞌmar ñetpaꞌ amaꞌt otenetañ Partsoꞌ Poekamkëñ eñoratenawet, sapaꞌ xhochña señotyesña ñeñth paꞌnamen kothaphñatser atthochña sapaꞌ eꞌñe señoch erraꞌtsentheꞌña ñeñth eꞌñe poꞌñoxh wetsa Yomporeshoth. Tharroꞌmar shonteñ ñeñth otetseñ ñetpaꞌ Yomporoꞌ poꞌñoñ aꞌmhtenet tharraña ñeñthpaꞌ ama Yomporeyaye poꞌñoñ. Ñeñthpaꞌ errapharen oꞌ orretyesa añ patsro. 2Arr sapaꞌ alloch señoch erraꞌtsentheꞌña eꞌñe poꞌñoxh eñoratenña Parets Poekamkëñ: Erraꞌtsenchaꞌ otats Jesucristopaꞌ ña poꞌñoxh partsoth acheñetos arr patsro, ñeñthña kothaphñatserpaꞌ eꞌñe poꞌñoxh Parets Poekamkëñ eñorateneꞌ. 3Erraꞌtsenchaꞌ ñeñth amach attheyeꞌ otetso Jesúsokop, ñeñthña kothaphñatserpaꞌ ama poꞌñoxh Parets Poekamkëñ eñoratenaweto. Ñeñthpaꞌ ñeñthña poꞌñoxh eꞌmoñeꞌteneꞌña Cristo ñeñth ateth seꞌmareꞌtyeseꞌth oꞌch wapa. Theꞌñapaꞌ oꞌ orrtonaya añ patsro.

4Saña poꞌñoxh nechemerneshachaꞌ eꞌñe poꞌñoxh Yomporenaꞌtares tharroꞌmar sapaꞌ ama aña seꞌmhñoteno attho paꞌnamenoth shekareꞌtyensetañ. Yompor Poekamkëñ ñeñth sechorrenayapaꞌ ñeñthña sapaꞌ atarr awamenkathtatenes. Ñeñthña chorrenaya añ patsoꞌmarneshaꞌpaꞌ ñapaꞌ ama eꞌñeyeꞌ awamenkathtatenaneto. 5Ñeñthña shekareꞌtyets eꞌñe ñet pokthaphñothet poꞌñoxhpaꞌ patsoꞌmarnesheta. Ñeñthoꞌmarña ñerraꞌm eñosetpaꞌ añach serrpareꞌtyenet ñeñth patsoꞌmarekpa. Ñeñthoꞌmarña ñetpaꞌ patsoꞌmarneshach eꞌmhñotenawet. 6Yaña poꞌñoxhpaꞌ Yomporenaꞌtarey. Ñeñth poꞌñoxh eñoteneꞌ Yompor, ñetñapaꞌ eꞌñech kowen eꞌmhñotenyet ya. Ñeñthña ama Yomporenaꞌtareyaye, ñetñapaꞌ amach eꞌmhñotenyeto. Yapaꞌ alloña yeñotenña kothaphñats ñeñth poꞌñoxh wetsa Yomporeshoth atthoña yeñotenña ñamha kothaphñats ñeñth shekëñets.

Attho Yomporpaꞌ ña atarr amorrentañtetsa

7Masheñneshachaꞌ ñamha noxhaneshachaꞌ amoerannaꞌtpawepaꞌch alloweney tharroꞌmar ñeñthpaꞌ Yomporeshoth wena. Allowen amorrentñapaꞌ ñetpaꞌ oꞌ eñalleterret Yomporoth, poꞌñoxh oꞌ eñoteret ñeñth ateth pena Yompor. 8Ñeñthña ama amorrentñopaꞌ ñokpoetpaꞌ ama eñoteñetoña ateth penaña Yompor, tharroꞌmar Yompor ñapaꞌ ña atarr amorrentañtetsa. 9Añpaꞌ Yompor orrtateꞌ yokop allochñapaꞌ yapaꞌ oꞌch yeñoter Yomporpaꞌ atarr morrentenya. Atthoña moeñan Poechemer arr patsro ñeñth poꞌpathrror pen atthochña yapaꞌ korretsayach eꞌñe ñeshoth. 10Arrpaꞌ all orrtatonay Yompor ñeñth eꞌñe poꞌñoxh morrenteñets: Allempo ya amaꞌt mameshapaꞌ ama yemorrentpeño Yompor, ñañapaꞌ allempotheñ atarr morrentenya ya. Ñeñthoꞌmarña ñapaꞌ moeñonay Poechemer ñeñthchaꞌ yetsaꞌterroya yoꞌchñar.

11Ñeñthoꞌmar masheñneshachaꞌ attho Yomporpaꞌ atarr nanak morrentenya, yapaꞌxhoꞌña eꞌñepaꞌchña yemorrentannaꞌtwena alloweney. 12Yomporpaꞌ ama eseshaꞌ poentare. Tharraña ñerraꞌm eꞌñe yemorrentannena alloweney, poꞌñoxhpaꞌ eꞌñe yeparrokmaten epay Yompor. Ña poemorrenteñapaꞌ eꞌñech chorrenya poktakma. 13Ña attho apoerrey eꞌñe ña Poekamkëñ ñeñthña yeñotateneꞌña yapaꞌ eꞌñe yeparrokmaten epay Yompor. 14Ñamha yapaꞌ eꞌñe yentwoñeꞌth Yompor Poechemer ñeñthoꞌmarña ya theꞌpaꞌ oꞌ yaꞌpothonas samha attho Yompor poꞌñoxhpaꞌ moeñonay Poechemer ñeñthchaꞌ yaꞌkeshphaterreꞌ ya ñeñthey yexhaꞌyetsa añ patsro. 15Ñeñth ameꞌñenaya Jesús ñapaꞌ poꞌñoxh eꞌñe Yomporo Poechemer, ñetñapaꞌ eꞌñe parrokmatenet epoet Yompor.

16Atthoña ya theꞌpaꞌ eꞌñe yeñoteñ ñamha yameꞌñeña attho Yomporpaꞌ atarr morrentenya. Yompor ñapaꞌ ña atarr amorrentañtetsa. Ñerraꞌm eꞌñe poꞌñoxh yemorrentannena poꞌñoxhpaꞌ oꞌ yeparrokmaterr epay Yompor. 17Atthoña yapaꞌ eꞌñech kowen yemorrenteña Yompor eꞌñe poktakma, allochñapaꞌ yapaꞌ amach yemhchaꞌnañothayaya yeyemtero Yompor ñerraꞌm esempowañen eñotatyeswerrey eꞌñe errothenchaꞌ entyeswerrey. Tharroꞌmar eꞌñe ateth pena Jesucristo, yapaꞌxhoꞌña eꞌñech ateth yepena yamha arr patsro. 18Ñerraꞌm poꞌñoxh yemorrenteña Yomporpaꞌ amachña xha yemhchaꞌteñe. Tharroꞌmar attho eꞌñe poktakma kowen yemorrentannena epay Yompor, ñeñthña poꞌñoxh yewaporeꞌtampeneꞌña yemhchañ. Ñerraꞌm esempo xha es yemhchaꞌtenpaꞌ atthoña eꞌñe yañeña koñchatetsa. Ñamha ñerraꞌm orameñ yemhchaꞌten amakaꞌye eꞌñe yeyxhenaꞌña atthoch eꞌñe kowen yemorrentannena eꞌñe poktakma.

19Yomporpaꞌ oꞌ eꞌñe morrenterrya yanom, ñeñthoꞌmarña yapaꞌxhoꞌña theꞌpaꞌ oꞌch eꞌñe yemorrentera yamha. 20Ñerraꞌm eseshaꞌ otets, ñapaꞌxhoꞌña eꞌñoꞌ kowen morrentenana Yompor, tharraña ñerraꞌm xha eꞌmoñeꞌtyenan pamoꞌts, ñeñthña ateth otetspaꞌ atthakaꞌye shekën. Attho ama morrentenano pamoꞌts amaꞌt ñeñthpaꞌ eꞌñe enteñ, amach errothenoth morrentanoña ñamha Yomporñaꞌ tharroꞌmar ñeñthpaꞌ amakaꞌye xhoyeꞌ enteñe. 21Yompor poꞌñoñ ñeñth yoteneꞌ: Ñerraꞌm poꞌñoxh yemorrenteña Yompor, yamoꞌtspaꞌxhoꞌña eꞌñepaꞌchña kowen yemorrentenanet.

Currently Selected:

1 San Juan 4: ame

Highlight

Copy