Samz 95
95
An Chanté Pou Glowifyé Senyè-a
1Vini èk annou lévé vwa nou pou glowifyé Bondyé Senyè-a!
Annou chanté fò èk tjè kontan pou kayè salvasyon nou!
2Annou vini douvanʼy èk wimèsyéʼy,
annou chanté fò èk tjè kontan pou glowifyéʼy.
3Paski Bondyé Senyè-a sé an Bondyé ki ni an pil pouvwa,
i sé an gwan wa ki anho tout sé lézòt bondyé-a.
4Sé li ki ka kondwi tout latè-a,
dépi koté-a ki pli fon-an pou wivé anlè mòn-an ki pli ho-a.
5Lanmè-a sé sa li paski sé li ki fèʼy,
èk i fòmé tè-a èk lanmenʼy menm.
6Vini èk annou tonbé an pyéʼy èk adowéʼy,
annou ajounou an pyé Bondyé Senyè-a ki fè nou-an!
7Sé li ki Bondyé nou,
nou sé moun li, sé li ki ka otjipé nou
menm kon mouton ki an savann li.
Kouté jòdi-a ki sa i ka di, i di,
8“Sé pa pou zòt fè tèt wèd kon gwan gwanpapa lontan zòt té fè lè yo té Mèriba,
kon yo té fè jou sala bò gwan savann sèk Masa-a.
9Lè sala, yo tanté mwen pou yo té wè si mwen té kay fè sa mwen té di-a,
magwé yo té ja wè tout sa mwen té ja fè ba yo.
10Pou kawant (40) lanné, mwen té las èk sé moun sala.
Mwen di, ‘Sé moun sala tounen tjè yo kont mwen!
Yo wifizé obéyi konmandman mwen.’
11Mwen té faché èk mwen fè sèman, mwen di,
‘Zòt pa kay janmen antwé an tè-a
koté mwen té kay mennen zòt pozé-a.’ ”
Currently Selected:
Samz 95: acfDBL
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
