Samz 51
51
Pou chèf mizisyen-an
Sé an sam David apwé pwòfèt Nafann té palé ba li lè i té fè adiltè èk Bafchiba
An Lapwiyè Pou Mandé Bondyé Padon
1Bondyé, ni mizéwikòd asou mwen,
paski ou toujou enmen mwen.
Éfasi tout fòt mwen, paski ou ni an pil mizéwikòd.
2Lavé tout movèzté mwen byen,
èk nétwayé tout péché mwen!
3Mwen konnèt fòt mwen,
èk péché mwen toujou asou konsyans mwen.
4Mwen ja péché kont ou, èk sé kont ou yonn mwen ja péché,
èk sé douvanʼw menm mwen fè movèzté sala.
Kon sa ou ni wézon lè ou pasé jijman asou mwen,
èk ou byen jijé lè ou kondanné mwen.
5Mwen ni péché an tjè mwen dépi lè mwen fèt,
èk mwen ni movèzté andidan mwen dépi lè mwen té fòmé an bouden manman mwen.
6Ou enmen moun ki ka di lavéwité-a mannyè i yé an tjè yo,
kon sa plen lidé mwen èk lasajès ou.
7Tiwé péché mwen èk an bwanch hisòp,#51:7 Hisòp sété an ti pyé bwa yo té ka sèvi pou wouzé san ében dlo anlè bagay èk moun yo té mété apa pou Bondyé yonn. èk mwen kay vini nèt.
Lavé mwen, èk mwen kay vini blan pasé koton.
8Plen tjè mwen èk lajwa, épi ban mwen tjè kontan.
Magwé ou ja kwazé zo mwen, ou kay viwé fè mwen ni tjè kontan ankò.
9Tiwé péché mwen pou ou pa wè yo ankò,
èk éfasi tout méchansté mwen.
10Kwé an tjè nèt andidan mwen, Bondyé.
Ban mwen an lèspwi nèf ki kay fè mwen swiv ou.
11Pa kouwi dèyè mwen sòti douvanʼw,
èk pa pwan Lèspwiʼw viwé.
12Viwé ban mwen menm lajwa-a mwen té ni lè ou té sové mwen-an,
èk fè mwen pawé pou mwen sa obéyiʼw.
13Sé lè sala mwen kay sa moutwé sé péchè-a chimenʼw,
èk yo kay tounen viwé vin jwenn ou.
14Pawdonnen mwen pou san moun mwen mété dèwò, Bondyé, èk sové mwen,
èk mwen kay di moun ki otan bon ou bon.
15Mété pawòl ou an bouch mwen, Senyè,
èk mwen kay glowifyéʼw.
16Si ou té kay pwan plézi an sakwifis, mwen té kay ofèʼy baʼw,
mé ou pa mélé èk zannimo yo bwilé baʼw.
17Sakwifis ki ka fèʼw plézi, Bondyé, sé lè an moun abésé kòʼy douvanʼw.
Ou pa kay tounen doʼw asou an moun ki abésé kòʼy èk ki wépantiʼy pou sa i ja fè.
18Bondyé, fè an pil byen bay Zayonn paski ou ni bon tjè.
Viwé bati bawad wòch ho-a oliwon Jérouzalèm.
19Épi sé lè sala ou kay pwan plézi an sakwifis-la ou mandé-a,
lè yo bwilé zannimo tou antyè èk lézòt kado yo ofè baʼw,
èk yo kay sa ofè sakwifis towo bèf asou lotèl ou-a.
Currently Selected:
Samz 51: acfDBL
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
