IPERIU 4
4
Sa yalataki vei keda nai vakavakacegu ka yalataki vei ira na Isireli eliu; ia ko ira sa sega ni vakabauta era na sega ni yaco kina, 1-13. Sa qai tukuna ko Paula nai valavala ni noda Bete Levu, 14-16.
1O koya oqo me da qai rere, ni sa soli tu na vosa ni yalayala me da curu ki na nonai vakavakacegu, de sega beka ni yaco dina kina koi kemudou eso. 2Ni sa tukuni mai vei keda e dua na ka vinaka, me vaka talega vei ira: ia ka sega ni yaga vei ira na vosa era sa rogoca, ni ra sa sega ni dua vata e na vakabauta kei ira era sa vakarogoca. 3Ni da sa qai curu ki nai vakavakacegu, koi keda sa vakabauta, me vaka sa vosa kina ko koya, Me vaka ka'u a bubului kina e na noqu cudru, Era na sega sara ni curu ki na noqu i vakavakacegu: ia sa dina sa oti na cakacaka ni sa tauyavutaki oti ko vuravura. 4Ni sa dua na tikina sa vosataka vakaoqo ko koya nai kavitu ni siga, A sa vakacegu na Kalou mai na nona cakacaka kecega e na kenai kavitu ni siga. 5Ia oqo talega, Era na sega sara ni curu ki na noqu i vakavakacegu. 6Ia ni sa qai macala me curu kina eso, ia ko ira ka tukuni taumada vei ira na ka vinaka era sa sega ni curu kina, e na vuku ni nodra talaidredre: 7a sa qai lokuca tale e dua na siga ko koya, ka sa tukuna ko Tevita ka kaya, E na siga oqo, ni sa oti na gauna dede; me vaka sa kainaki,
E na siga oqo, kevaka dou sa via rogoca na domona,
kakua ni vakaukauwataka na yalomudou.
8Io, kevaka sa solia vei ira nai vakavakacegu ko Josua, ena sega ni vosataka tale ko koya e dua tani na siga. 9O koya oqo sa vo tiko e dua nai vakavakacegu me nodra na tamata ni Kalou. 10Ia ko koya sa curu ki na nonai vakavakacegu, sa vakacegu mai na nona cakacaka, me vaka sa vakacegu na Kalou mai na nona.
11O koya oqo me da qai gumatua sara me da curu ki nai vakavakacegu ko ya, de bale e dua na tamata ni sa talaidredre vakakina. 12Ni sa bula na vosa ni Kalou, ka kaukauwa, ka gata vakalevu ka mucu ga nai seleiwau batirua, ka suaka me wasea rua kina na lomada kei na yaloda, kei na nodai sema kei na uto ni sui, a sa vakalewa sara na nanuma kei nai naki ni yaloda. 13A sa sega talega e dua na ka e sega ni rairai e matana: ia sa luvawale ga na ka kecega, ka vakarairaitaki sara, e na mata i koya eda na vakatusai keda vua.
14Ia ni sa dua na noda bete levu, o koya ka curu ki lomalagi, o Jisu na Luve ni Kalou, tou taura matua na noda lotu. 15Ni sa sega ni noda bete levu ko koya sa sega ni lomani keda rawa ni da sa malumalumu; ia sa dauveretaki vakatautauvata e na ka kecega ko koya, ia ka sega na nona cala. 16E na vuku ni ka oqori tou toro doudou kina ki nai tikotiko-vakaturaga loloma, me da vinakati kina, me da lomani talega ka vukei e na gauna e yaga kina.
Currently Selected:
IPERIU 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
