ማቶሳ 23

ሂጌ ኣስታማሬታኔ ፋሪሳዌታ ኢታቴ

(ማር 12፡38-39፤ ሉቃ 11፡43-46፤ 20፡45-46)

1ሄሳፌ ጉዬ፥ ዬሱሲ ሺቂዳ ኣሳሲኔ ባ ታማሬታስ ሃይሳዳ ያጊስ። 2«ሂጌ ኣስታማሬቲኔ ፋሪሳዌቲ ሙሴ ሂጊያ ቢላናው ማታራ ዴዖሶና። 3ሄሳ ጊሾ፥ ኤንቲ ሂንቴና ኪቲያ ኡባ ኦቴኔ ናጊቴ። ሺን ኤንቲ ኦይሳዳ ኦፊቴ። ኣይስ ጊኮ፥ ኤንቲ ኦዴይሳዳ ኦኮና። 4ኤንቲ ቶካናው ዳንዳዔቶና ቶሆ ቃቺዲ ኣሳ ቶሶሶና። ሺን ባንታው ሃሪ ኣቶሺን፥ ሄ ቶሁዋ ኣሳይ ቶኪያ ዎዴ ቢራ ፄራን ቦቻናው ኮዮኮና።

5«ሺን ኤንቲ ባንታ ኦሶ ኡባ ኣሲ ቤዓና ሜላ ኦሶና። ባንታ ሶምዖኒኔ ቄሴን ቃቺያ ማፃፋ ፂቂሴይ ዴዒያ ኪታፌ ዳልጊሶሶና፥ ባንታ ማዑዋ ማጫራካ ኣዱሶሶና።#23፡5 ሶምዖኒኔ ቄሴን ቃቺያ ማፃፋ… ማዑዋ ማጫራ ኣዱሶሶና፡ ሄሳ ኤንቲ ኦይ ፆሳስ ታ ኢሜታስ ጊያ ማላ ቤሳናሳ (ዛሬ 15፡37-41)።#ማቶ 6፡1፤ ዛሬ 6፡8፤ ታይ 15፡38 6ሞኬቲያ ቤሳን ቦንቾ ቤሲኔ ኣይሁዴ ዎሳ ኬታን ዳሮ ሎዒያ ኦይዴ ዶሶሶና። 7ኣሳይ ጊያን ኤንታና ቦንቾን ሳሮናይሳኔ ‹ኣስታማሪያው› ጊዲ ፄጋናይሳ ኮዮሶና።

8«ሺን ሂንቴ ኣስታማሬይ ኢሱዋ ፃላላ ጊዲዳ ጊሾኔ ሂንቴ ኡባይ ኢሻታ ጊዲዳ ጊሾ ‹ኣስታማሪያው› ጌቴቲዲ ፄጌቶፊቴ። 9ሂንቴው ሳሎን ኢሲ ኣዋ ፃላሊ ዴዒያ ጊሾ ሃ ሳዓን ኦናካ ‹ኣዋው› ጊዲ ፄጎፒቴ። 10ሂንቴው ኢሲ ጎዳይ ኪሪስቶሳ ፃላሊ ዴዒያ ጊሾ ‹ጎዳው› ጌቴቲ ፄጌቶፊቴ። 11ሂንቴ ጊዶን ባይራቴይ ሂንቴ ኣይሌ ጊዶ።#ማቶ 20፡26 12ባና ጊታያ ኦኒካ ካዉያና፤ ባና ካዉሺያ ኦኒካ ጊታታና።#ሉቃ 14፡11፤ 18፡14

ሂጌ ኣስታማሬቲኔ ፋሪሳዌቲ ቦሬቲዶሶና

(ማር 12፡40፤ ሉቃ 11፡39-42፣ 44፣ 52፤ 20፡47)

13«ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ኣሳ ሲንን ሳሎ ካዎቴ ጎርዴይሳቶ ሂንቴና ኣዬ። ሂንቴ፥ ሂንቴ ሁዔን ጌሌኬታ ቃሲ ሃራታካ ጌልሴኬታ።

14[«ሂንቴኖ ጩቦቶ፥ ሂጌ ኣስታማሬቶኔ፥ ፋሪሳዌቶ፥ ኣምዔታ ኬ ሂንቴ ቦንቂሼ፥ ኣሲ ቤዖ ጊዲ ዎሳ ኣዱሴታ። ሄሳ ጊሾ፥ ሂንቴና ኣዬ። ኡባፌ ኣያ ፒርዳይ ሂንቴና ናጌስ።] #23፡14 ኢሲ ኢሲ ቤኒ ማፃፋቲ ፓይዶ 14 ጉጆሶና።

15«ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴ ኢሲ ኡራ ኣማንናው ኣባራኔ ሳዓራ ዩዬታ። ሺን ሂንቴ ኢያ ኣማንዳ ዎዴ ሄ ኡራ ሂንቴፌ ኣዲ ጋናሜስ ጊጌቲዳይሳ ኦያ ጊሾ ሂንቴና ኣዬ።

16«ኦኒካ ፆሳ ኬን ጫቂኮ ኣይኮይካ ባዋ። ሺን ፆሳ ኬን ዴዒያ ዎርቃን ጫቂኮ፥ ሄ ጫቆይ ኢያ ጎማና ጊያ ቆቄቶ፥ ሂንቴው ቆቂዲ ሃራታ ካሌይሳቶ፥ ሂንቴና ኣዬ። 17ሂንቴኖ፥ ኤያቶ፥ ቆቄቶ፥ ዎርቃይ ኣዬ? ዎርቂያ ፆሳስ ዱማያ ፆሳ ኬይ ኣ? 18ቃሲ ‹ኦኒካ ያርሾ ያርሺያ ቤሳን ጫቂኮ፥ ኣይኮይካ ባዋ። ሺን ኦኒካ ኢያ ቦላ ዴዒያ ያርሹዋን ጫቂኮ፥ ሄ ጫቆይ ኢያ ጎማና› ያጊዲ ታማርሴታ። 19ሂንቴኖ፥ ቆቄቶ፥ ያርሾይ ኣዬ? ያርሹዋ ፆሳስ ዱማያ ቤሳይ ኣ? 20ሄሳ ጊሾ፥ ያርሾ ቤሳን ጫቂያ ኡራይ፥ ሄ ያርሾ ቤሳኒኔ ኢያ ቦላ ዴዒያ ኡባባን ጫቄስ። 21ፆሳ ኬን ጫቂያ ኡራይ፥ ሄ ፆሳ ኬኒኔ ኢያን ዴዒያ ፆሳን ጫቄስ። 22ሳሎን ጫቂያ ኡራይ ፆሳ ኣራታኒኔ ሄ ኣራታ ቦላ ኡቲያ ፆሳን ጫቄስ።#ኢሳ 66፡1፤ ማቶ 5፡34

23«ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ሂንቴ ካሬ ሳዎፔ፥ ናቲሮፔኔ ኦካሼፔ ኣስራታ ኬሴታ። ሺን ሂጊያን ዴዒያ ኣ ኮሼይሳታ ኣጊዴታ። ሄሲካ ሱሬ ፒርዳ፥ ቃቴኔ ኡባባን ኣማኔቴ። ሃራታካ ኣጎናሺን ሃይሳታ ሂንቴ ኦናው ቤሴስ።#ሌዌ 27፡30 24ሂንቴው ቆቂዲ ሃራ ኣሲ ካሌይሳቶ፥ ሂንቴ ኡሻፌ ኡዱንፄ ኬሲዲ ጊማሌ ሚቴታ።

25«ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ሂንቴ ሻቲያሲኔ ኬሪያስ ቦላ ባጋ ጌሼታ። ሺን ኤንታው ጋርሳን ቦንቄይኔ ኡዜቴ ኩሚ ኡቲስ። 26ኔኖ ቆቄ ፋሪሳዊያው፥ ሻቲያሲኔ ኬሪያስ ጋርሳ ካሴታዳ ጌሻ። ሄሳፌ ጉዬ፥ ቦላ ባጋይካ ጌሺ ጊዳና።

27«ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ካሬ ባጋራ ቃላሜ ቲዬቲዲ ሎዒዲ፥ ጊዶን ሜቄኔ ዎቂዳባይ ኩሚዳ ዱፎታ ዳኔታ።#ሃ.ኦ 23፡3 28ሄሳዳካ፥ ቦላ ባጋራ ኣሳስ ሎዖ ዳኔታ። ሺን ሂንቴ ጋርሳን ጩቦቴኔ ኢታቴ ኩሚስ።

29«ሂንቴኖ፥ ጩቦቶ፥ ሂጌ ኣስታማሬቶኔ ፋሪሳዌቶ፥ ሂንቴና ኣዬ። ሂንቴ ናቤታስ ዱፎ ኬፄታ፥ ቃሲ ፂሎታ ዱፉዋካ ሎይታ። 30ቃሲ ሂንቴ፥ ‹ኑኒ ቤኒ ኑ ኣዋታ ዎዴ ዴዒዳባ ጊዲያኮ፥ ኤንታራ ኢሲፌ ናቤታ ሱ ጉሶኮሺን› ያጌታ። 31ሄሳ ጊሾ፥ ሂንቴ ናቤታ ዎዳ ኣሳ ናይታ ጊዴይሳ ሂንቴ ሂንቴ ሁዔን ማርካቴታ። 32ሂዛ፥ ሂንቴ ኣዋቲ ዶሚዳይሳ ሂንቴ ፖሊቴ።

33«ሃ ሾሻቶ፥ ሾሻ ናይቶ፥ ሂንቴ ጋናሜ ፒርዳፌ ዋኒዲ ኣታኔ?#ማቶ 3፡7፤ 12፡34፤ ሉቃ 3፡7 34ሄሳ ጊሾ፥ ታ ኦዴይሳ ሲዒቴ፤ ታኒ ናቤታ፥ ጪንጫ ኣሳታኔ ኣስታማሬታ ሂንቴኮ ኪታና። ኤንታፌ ኢሶታ ኢሶታ ሂንቴ ዎናኔ ማስቃሊያ ቦላ ካቃና። ባጋታ ኣይሁዴ ዎሳ ኬታን ሊሶን ጋራፋናኔ ካታማፔ ካታማ ጎዳና። 35ሄሳ ጊሾ፥ ፂሉዋ ኣቤላ ዎዳ ዎዲያፔ ዶሚዲ፥ ፆሳ ኬሲኔ ያርሾ ቤሳፌ ጊዶን ሂንቴ ዎዳ ባራኪያ ናዓ ዛካሪያሳ ዎዴ ጋካናው ሃይቂዳ ፂሎ ኣሳ ኡባ ጊሾ ሂንቴ ሴሬታና።#ሜ 4፡8፤ 2ታሪ 24፡20 36ታኒ ሂንቴው ቱማ ኦዳይስ፤ ሂንቴኔ ሂንቴ ኣዋቲ ኦዳ ባላስ ሃ ፒርዳ ኡባይ ሃ ዬሌቴ ቦላ ጋካና።

ዬሱሲ ዬሩሳላሜስ ዬኪስ

(ሉቃ 13፡34-35)

37«ዬሩሳላሜ፥ ዬሩሳላሜ፥ ናቤታ ዎያሬ! ፆሳይ ኔኮ ኪቲዳይሳታ ሹቻን ጫዲያሬ! ኩቶይ ባ ናይታ ባ ቄፌን ሃጴይሳዳ ታኒ ኔ ኣሳ ታ ቄሲያን ጌቻናው ኣፑን ቶሆ ኮያዲና! ሺን ታና ዲጋዳሳ። 38ሂዛ፥ ሂንቴ ፆሳ ኬይ ካይሲ ጊዳና።#ኤር 22፡5 39ታኒ ሂንቴው ኦዳይስ፤ ‹ጎዳ ሱንን ዬይሲ ኣንጄቲዳይሳ› ሂንቴ ጋና ጋካናው ናምዓን ታና ቤዔኬታ» ያጊስ።#ማዝ 118፡26

Currently Selected:

ማቶሳ 23: gofENT

Highlight

Copy