ሉቃሳ 18
18
ሚኒዲ ዎሳና ሜላ ታማርሲስ
1ዬሱሲ ባ ታማሬታ ኣዛሎና ኡባ ዎዴ ዎሳና ሜላ ታማርሳናው ኮዪዲ ያጊዲ ሌሚሶ ኦዲስ፡ 2«ኢሲ ካታማን ፆሳስ ያሼቶና ኣሳስካ ዬላቶና ኢሲ ዳይኒ ዴዔስ 3ሄ ካታማን ኢሲ ኣምዒያ ዳዓዉሱ። ኢያካ፥ ‹ታዉኔ ታ ሞርኪያስ ጊዶን ዴዒያ ሞቱዋ ፒርዳ› ያጋዳ ኡባ ዎዴ ሄ ዳይናኮ ሲሜሬታዉሱ። 4ዳይናይ ጉ ዎዴስ ኢ ኦዳ ሲዖና ኢፂስ፥ ሺን ጉዬፔ ባ ዎዛናን፥ ‹ታኒ ፆሳስ ያዮና፥ ኣሳስ ዬላቶና ኢፂኮካ፥ 5ሃ ኣምዒያ ታና ዋይሲያ ጊሾ ኢው ፒርዳና፤ ያቶና ኢፂኮ ኡባ ዎዴ ያዳ ታና ሳሌና› ያጊዲ ቆፒስ» ያጊስ።
6ጎዳይካ፥ «ጌላ ዳይናይ ጊዳይሳ ሲዒዴታ፤ 7ፆሳይ ቃማኔ ጋላስ ኢያኮ ዋሲያ ባ ዶሪዳይሳታስ ፒርዴኔዬ? ኤንታና ማዳናው ጋምዒዬ? 8ታ ሂንቴው ኦዴይሳ ሲዒቴ፥ ኤሌሲዲ ፒርዳና። ጊዶሺን፥ ኣሳ ናዓይ ያ ዎዴ ሳዓ ቦላ ኣማኖ ዴማንዴሻ?» ያጊስ።
ፋሪሳዊያኔ ቃራፃ ቃንፂሴይሳ
9ቃሲ ዛሪዲ፥ ዬሱሲ፥ ባንታና ፂሎ ኣሳዳ ኦዲ ጬቄቴይሳታሲኔ ሃራታ ካይሳታስ ሃይሳዳ ያጊዲ ሌሚሶ ኦዲስ፡ 10«ናምዑ ኣሳቲ ዎሳናው ፆሳ ኬ ቢዶሶና። ኢሶይ ፋሪሳዌ ሃንኮይ ቃሲ ቃራፃ ቃንፂሲያ ኣሲ። 11ፋሪሳዌይ ኤቂዲ ባው ዎሲሼ፥ ‹ፆሳው ታኒ ሃራታ ሜላ ቦንቃንቾ፥ ጌላኔ ላይማቲያ ኣሲ፥ ኣዳ ቃሲ ሃ ቃራፃ ቃንፂሲያ ኡራ ሜላ ጊዶና ጊሾ ኔና ጋላታይስ። 12ሳሚንታፌ ናምዑ ቶሆ ፆማይስ፥ ታ ዴሚያባ ኡባፌ ኣሲራታ ኬሳይስ› ያጊስ።
13«ሺን ቃራፃ ቃንፂሴይሲ ቃሲ ሃሆን ኤቂዲ ሃሪ ኣቶሺን ሳሎ ቁ ጊዲ ፄላናዉካ ያዪዲ ባ ቲራ ኢጪሼ ‹ፆሳው፥ ታና ናጋራንቹዋ ማራርኪ› ጊዲ ዎሲስ። 14ታ ሂንቴው ኦዴይሳ ሲዒቴ፤ ፋሪሳዊያፔ ሃይሲ ቃራፃ ቃንፂሴይሲ ፆሳ ሲንን ፂሎ ጊዲዲ ባ ሶ ሲሚስ። ኣይስ ጊኮ፥ ባና ቁ ቁ ኦያ ኣሲ ካዉያና፥ ባና ካዉሺያ ኣሲ ቁ ቁ ጋና» ያጊስ።#ማቶ 23፡12፤ ሉቃ 14፡11
ዬሱሳኔ ዮጋ ናይታ
(ማቶ 19፡13-30፤ ማር 10፡13-31)
15ዬሱሲ ዮጋ ናይታ ቦላ ባ ኩሺያ ዎዲ ኣንጃና ሜላ ኣሳይ ኢያኮ ኤሆሶና። ዬሱሳ ታማሬቲ ሄሳ ቤዒዲ ኣይስ ዬሱሳኮ ኤሄቲ ያጊዲ ካጪዶሶና። 16ሺን ዬሱሲ ናይታ ባኮ ፄጊዲ፥ «ዮጋ ናይቲ ታኮ ያናይሳ ዲጎፊቴ፤ ዮ ጊቴ። ኣይስ ጊኮ፥ ፆሳ ካዎቴይ ኤንታዳ ሃኒዳይሳታሳ። 17ታኒ ሂንቴው ቱማ ኦዳይስ፤ ፆሳ ካዎቴ ዮጋ ናይታ ኤኮናይ ኦኒካ ያ ጌሌና» ያጊስ።
ዱሬ ኡራ ኦይሻ
(ማቶ 19፡16-30፤ ማር 10፡17-31)
18ኣይሁዴ ሃላቃታፔ ኢሶይ፥ «ኬሃ ኣስታማሪያው፥ ሜሪና ዴዑዋ ዴማናው ኣይ ኦ?» ያጊዲ ኦይቺስ።
19ዬሱሲ ኢያኮ፥ «ኣይስ ታና ኬሃው ያጋዳ ፄጋይ? ኢሲ ፆሳፌ ኣቲን ሃሪ ኬሂ ባዋ። 20ላሞፋ፥ ዎፓ፥ ካይሶቶፓ፥ ዎርዶ ማርካቶፋ፥ ኔ ኣዋኔ ኔ ኣዪው ቦንቻ ያጊያ ኪታ ኤራይ» ያጊዲ ኦይቺስ።#ኬሳ 20፡12-16፤ ዛሬ 5፡16-20
21ኡራይካ፥ «ሄሳታ ኡባ ታኒ ናዓቴፌ ዶማዳ ናጋሼ ጋምዓስ» ያጊስ።
22ዬሱሲ ሄሳ ሲዒዳ ዎዴ «ሂዛ፥ ኔው ኢሲባይ ፓጬስ፤ ኔው ዴዒያባ ኡባ ባይዛዳ ማንቆታስ ኢማ፤ ሳሎን ኔና ሻሎይ ናጌስ። ያታ ሲማዳ ታና ካላ» ያጊስ። 23ሺን ኡራይ ሄሳ ሲዒዳ ዎዴ ኢያው ዳሮ ሻሎይ ዴዒያ ጊሾ ዳሮ ቂሮቲስ።
24ዬሱሲ ኡራ ቤዒዲ፥ «ዱሬ ኣሳስ ፆሳ ካዎቴ ጌሎይ ዋኒዲ ኡንዓንዴሻ? 25ዱሬይ ፆሳ ካዎቴ ጌላናይሳፌ ጊማሌይ ናርፔ ሉሆራ ካንይሲ ካዉዬስ» ያጊስ።
26ሄሳ ሲዒዳ ኣሳይ፥ «ሄሳ ጊዲኮ ኦኒ ኣታኔ?» ያጊዶሶና።
27ዬሱሲ፥ «ኣሳስ ዳንዳዔቶናባይ ፆሳስ ዳንዳዔቴስ» ያጊስ።
28ጴፂሮሲ፥ «ሄኮ ኑኒ ኑባ ኡባ ኣጊዲ ኔና ካሊዳ» ያጊስ።
29«ዬሱሲ ቱማ ታ ሂንቴው ኦዳይስ፤ ፆሳ ካዎቴስ ጊዲ ባ ኬ ዎይኮ ባ ማቺው ዎይኮ ባ ኢሻታ ዎይኮ ባ ኣዋኔ ባ ኣዪው ዎይኮ ባ ናይታ ኣጊዳይ፤ 30ሃ ዎዲያን ዳኮ ዳሮ፥ ያና ኣላሚያን ሜሪና ዴዑዋ ኤኮናይ ኦኒካ ባዋ» ያጊስ።
ዬሱሲ ባ ሃይቁዋባ ዛሪ ኦዲስ
(ማቶ 20፡17-19፤ ማር 10፡32-34)
31ዬሱሲ ታማኔ ናምዓታ ባኮ ፄጊዲ፥ «ኣኔ ዬሩሳላሜ ቦስ፥ ናቤቲ ኣሳ ናዓባ ፃፊዳባ ኡባይ ያን ፖሌታና። 32ኢ ኣይሁዴ ጊዶና ኣሳስ ኣዲ ኢሜታና። ኤንቲ ኢያ ቶቻና፥ ጫያናኔ ኢያ ቦላ ጩታና። 33ኢያ ጋራፊዳፔ ጉዬ ዎና፥ ሺን ሄን ጋላሳን ኢ ሃይቆፔ ዴንዳና» ያጊስ።
34ሺን ኢያ ታማሬቲ ሄሳ ኡባፌ ኢሲባካ ኣኬኪቦኮና። ኢያ ፁራይ ኤንታው ቆሴቲዳ ጊሾ ኢ ዎይጊዳኮ ኤሪቦኮና።
ቆቄ ኡራይ ፄሊስ
(ማቶ 20፡29-34፤ ማር 10፡46-52)
35ዬሱሲ ኢያርኮ ማታቲያ ዎዴ ኢሲ ቆቄ ኡራይ ኦጌ ጋፃን ኡቲዲ ዎሴስ። 36ቆቄ ኡራይ ኣሳይ ሄ ቤሳራ ኣሺን ሲዒዲ፥ «ኢ ኣይቤ?» ጊዲ ኦይቺስ። 37ኤንቲ፥ «ናዚሬቴ ዬሱሲ ሃይሳራ ኣስ» ያጊዶሶና።
38ኢ፥ «ዳዊቴ ናዓው፥ ዬሱሳ፥ ታና ማራርኪ» ያጊዲ ዋሲስ።
39ሲን ሲን ቢያ ኣሳቲ፥ «ሲዒ ጋ» ጊዲ ሃንቄቲዶሶና። ሺን ኢ፥ «ዳዊቴ ናዓው፥ ታና ማራ» ያጊዲ ዳርሲ ዋሲስ።
40ዬሱሲ ኤቂዲ ኡራ ባኮ ኤሃና ሜላ ኪቲስ። ኡራይካ፥ ኢያኮ ሺቂን፥ 41«ታ ኔው ኣይ ኦና ሜላ ኮያይ?» ያጊዲ ኦይቺስ።
ቆቄይ፥ «ጎዳው ታ ፄላናው ኮያይስ» ያጊስ።
42ዬሱሲ፥ «ፄላ፥ ኔ ኣማኖይ ኔና ፓስ» ያጊስ። 43ኡራይ ሶሁዋራ ፄሊ ኣጊስ። ፆሳ ቦንቺሼ ዬሱሳ ካሊስ። ኣሳ ኡባይ ሄሳ ቤዒዲ ፆሳ ጋላቲዶሶና።
Currently Selected:
ሉቃሳ 18: gofENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About ኦራ ጫቁዋ ጎፋ
