ሮሚያ 15
15
ኣሳ ናሼቻናው ቤሲያ ኦጊያ
1ኑኒ ኣማኑዋን ሚኔዳዋንቱ ዳቡራንቻቱዋ ቶኩዋ ቶካናው ቤሴ፤ ኑኒ ኑ ፃላላ ናሼቻናው ቤሴና። 2ኑኒ ሁጲያን ሁጲያን ኑ ኢሻ ማዳናው፥ ኣማኑዋን ኣ ሚኒሳናዉኔ ናሼቻናው ቤሴ። 3ኣዪሲ ጎፔ፥ ሃራይ ኣቶ ኪሪስቶሲካ ባሬና ናሼቺቤና። ሺን ፆሳ ማፃፋይ፥ «ኔና ቦሬዳዋንቱ ቦሬዳ ቦሪ ታ ቦላ ዎዳ» ጌዳዋዳን ሃኔዳ። #ማዝ 69፡9 4ፆሳ ማፃፋይ ኑሲ ኢሚያ ጌንጫኒኔ ሚኖታን ኑኒ ዴማና ጊዴ ናሼቻን ናጊ ኡቴዳዌ ዴዓና ማላ፥ ፆሳ ማፃፋን ፃፌቴዳ ኡባባይ ኑና ታማርሳናው ፃፌቴዳ።
5-6ሂንቴንቱ ኡባይ ኢቲ ዎዛና ጊዲዴ፥ ኢቲ ቃላን ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ቦንቻና ማላ፥ ጌንጩዋኔ ሚኖቴ ኢሚያ ፆሳይ፥ ሂንቴንቶ ኪሪስቶሲ ዬሱሲ ኦዳዋዳን፥ ኢቱ ኢቱዋና ኢቲፔ ዴዒያ ኢቲ ቆፋ ኢሞ።
ጳዉሎሳ ኦሱዋኔ ኣማኔና ኣሳው ጋኬዳ ሚሺራቹዋ ቃላ
7ሄዋ ዲራው፥ ኪሪስቶሲ ሂንቴንታ ሞኬዳዋዳን፥ ፆሳ ቦንቾ ኢቱ ኢቱዋ ሞኪቴ። 8-9ኣዪሲ ጎፔ፥ ፆሳይ ኣማኔቴዳዋ ጊዲያዋ ኤሪሳናው፥ ፆሳይ ኣዋቶ ኢማና ጌዳዋ ቱማያናዉኔ ኣዪሁዳ ጊዴና ኣሳይ ፆሳ ኣ ማሮቴ ዲራው ቦንቻናው ኪሪስቶሲ ኣዪሁዳቶ ቆማ ጊዴዳዋ ሂንቴንቶ ኦዳይ። ሄዋ ፆሳ ማፃፋይ፥
«ሄዋ ዲራው፥ ታኒ ኔና
ኣዪሁዳ ጊዴና ኣሳ ጊዶን ጋላታና፤
ኔ ሱንካ ሳባና»
ያጌ። #2ሳም 22፡50፤ ማዝ 18፡49
10ቃሲካ፥
«ኣዪሁዳ ጊዴና ኣሳቶ፥
ፆሳ ኣሳቱዋና ናሼቲቴ»
ያጌ። #ዛር 32፡43
11ቃሲካ ጉጂዴ፥
«ሂንቴንቶ፥ ኣዪሁዳ ጊዴና ኣሳቶ ኡባቶ፥
ጎዳ ጋላቲቴ፤ ኣሳው ኡባው፥ ኣ ጋላቲቴ»
ያጌ። #ማዝ 117፡1
12ቃሲካ ኢሲያሲ፥
«ኢሴይ ዜሬይ ዪዴ
ኣዪሁዳ ጊዴና ኣሳ ሞዳናው ዴንዳና።
ቃሲ ኡንቱንቱ ኣ ባጋና ዴማና
ጊዴ ናሼቻን ናጋና»
ያጌ። #ኢሳ 11፡10
13ሂንቴንቱ ኣካና ጊዴ ናሼቻን ናጊያዌ ጌሻ ኣያና ዎልቃን ዲጫናዳን፥ ሂንቴንቶ ኢማና ጌዳ ፆሳይ፥ ሂንቴ ኣ ኣማኒያ ዲራው፥ ሂንቴንቶ ናሼቻኔ ሳሮቴ ኩንዴ ኢሞ።
ጳዉሎሲ ፃሊዴ ፃፌዳ ጋሱዋ
14ታናዳን ኣማኒያዋንቶ፥ ሂንቴንቱን ሎዖቴይኔ ኤራቴይ ኡባይ ኩሜዳዋኔ ቃሲ ኢቱ ኢቱዋ ዞራናው ዳንዳዪያዋ ታኒ ታ ሁጴው ኤራዲ። 15-16ሺን ታኒ ሂንቴንታ ኢቲባ ኢቲባ ጉጃ ቆፊሳናው፥ ሃ ዳቢዳቢያ ጊዶን ኣይኔ ያዬናን ሂንቴንቶ ፃፋዲ። ታኒ ኪሪስቶሳ ዬሱሳ ቆማ ጊዳዴ፥ ኣዪሁዳ ጊዴና ኣሳው ኦናዳን፥ ፆሳይ ታው ኣ ኬካቴ ኢሜዳ ዲራው፥ ታኒ ኣይኔ ያያቤይኬ፤ ኣዪሁዳ ጊዴና ኣሳይ ጌሻ ኣያና ባጋና ፆሳው ጌሻ ጊዲዴ፥ ኣ ናሼቺያ ያርሹዋ ጊዳናዳን፥ ፆሳ ዎንጋላ ሚሺራቹዋ ኦዲያዋን ጌሻቴን ኦይ።
17ሄዋ ዲራው፥ ታኒ ኪሪስቶሳ ዬሱሳን ጊዳዴ ፆሳው ኦያባን ጬቄታናው ዳንዳያይ። 18-19ኣዪሁዳ ጊዴና ኣሳይ ፆሳው ኣዛዜታናዳን፥ ኪሪስቶሲ ታ ባጋና ቃላን፥ ኦሱዋን፥ ማላን፥ ማላታ ዎልቃኒኔ ጌሻ ኣያና ዎልቃን ኦዳዋ ፃላላ ታኒ ኦዳናፔ ኣቲን፥ ሃራባ ኦዳናው ፃሊኬ። ሄዋ ዲራው፥ ዬሩሳላሜፔ ዶማዴ፥ ኢሊዋሪቆና ጌቴቲያ ጋዲያ ጋካናው ዩያዴ፥ ኪሪስቶሳ ዎንጋላ ሚሺራቹዋ ዉርሳ ኦዳዲ። 20ሃዋዳንካ፥ ታኒ ሃራ ኣሳይ ዶሜዳዋ ቦላን ዶሜናዳን፥ ኪሪስቶሳ ሱንይ ፄሴቲቤናሳን ዎንጋላ ሚሺራቹዋ ኦዳናው ኣሞታዲ። 21ሺን ፆሳ ማፃፋይ፥
«ኣባይ ሃዋ ጋካናው ኦዴቲቤናዋንቱ ኣ ቤዓናዋንታ፤
ቃሲ ኣባ ሲሲቤናዋንቱ ኣኬካናዋንታ»
ያጌ። #ኢሳ 52፡15
ጳዉሎሲ ሮሜ ባናው ቆፔዳ
22ሄዋ ዲራው፥ ታኒ ጮራ ዎዴ ሂንቴንቱኮ ያናው ኮያይ፤ ሺን ያናው ዳንዳያቤይኬ። 23ሺን ታኒ ሃዒ ሃ ሄራን ታ ኦሱዋ ዉርሴዳ ዲራዉኔ ጮራ ላይፔ ዶማዴ ሂንቴንታ ባዴ ቤዓናው ላሞቴዳ ዲራው 24ሃዒካ ሂንቴንቱኮ ባና ጋዴ ቆፓይ፤ ታኒ ኢሲፔኔ ጌቴቲያ ጋዲያ ባዴ ሂንቴንታ ቤዓናው ኮያይ፤ ቃሲ ኣማሬዳ ዎዲያ ሂንቴንታ ቤዓዴ ናሼቶዋፔ ጉዪያን፥ ኢሲፔኔ ቢሺን፥ ሂንቴ ታና ማዳና ማላ ኮያይ።
25ሺን ሃዒ ታኒ ፆሳ ኣሳቱዋ ማዳናው፥ ዬሩሳላሜ ባይ። 26ኣዪሲ ጎፔ፥ ማቂዶኒያኔ ኣካዪያ ጌቴቲያ ጋዲያን ዴዒያ ዎሳ ጎሌ ኣሳቱ ዬሩሳላሜን ዴዒያ ሂዬሳቱዋሲ ሚሻ ኢማናው ኮዬዲኖ። 27ኡንቱንቱ ባሬንቱ ሁጴው ሃዋ ኦናው ቆፋ ቃቼዲኖ። ኡንቱንቱ ሄ ሂዬሳቱዋ ማዳናዌ ኡንቱንቶ ኣጩ ዴዔ፤ ኣዪሲ ጎፔ፥ ኣዪሁዳቱ ባሬንቱ ኣያና ኣንጁዋ ኣዪሁዳ ጊዴና ኣሳቱዋና ሻኬዳዋ ጊዶፔ፥ ኣዪሁዳ ጊዴና ኣሳቱካ ቃሲ ባሬንቶ ዴዔዳባን ኣዪሁዳቱዋ ማዳናው ቤሴ። 28ሄዋ ዲራው፥ ታኒ ሃ ኦሱዋ ዉርሴዳዋፔ ጉዪያኒኔ ኡንቱንቶ ሺቄዳ ሚሻ ኡባ ኢሜዳዋፔ ጉዪያን፥ ኢሲፔኔ ባዴ ሂንቴ ማታና ኣና። 29ታኒ ሂንቴንቱኮ ቢያ ዎዴ፥ ኪሪስቶሳ ኣንጁ ታናን ኩሚና ባናዋ ኤራይ።
30ታናዳን ኣማኒያዋንቶ፥ ታው ፆሳ ሂንቴ ዎሲዴ፥ ዎሳን ሂንቴ ታናና ሚናናዳን፥ ጎዳ ዬሱሲ ኪሪስቶሳ ባጋናኔ ጌሻ ኣያናይ ኢሚያ ሲቆቴን ታኒ ሂንቴንታ ዎሳይ። 31ታኒ ዪሁዳን ዴዒያ ኣማኔናዋንቱፔ ኣታናዳኒኔ ቃሲ ታኒ ዬሩሳላሜን ኦያ ኦሱ ያኒ ዴዒያ ፆሳ ኣሳቱዋ ናሼቺያዋ ጊዳናዳን፥ ፆሳ ዎሲቴ። 32ቃሲ ፆሳይ ጎፔ፥ ታኒ ሂንቴንቱኮ ናሼቻን ባዴ፥ ሂንቴ ማታን ሼምፓና። 33ሳሮቴ ፆሳይ ሂንቴንቱና ኡባና ጊዶ። ኣሜንዒ።
Currently Selected:
ሮሚያ 15: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa