ማርቆሳ 7

ዬሱሲ ኣሳ ዎጋፔ ኮሼናዋ ጳልቄዳ

(ማት 15፡1-9)

1ፓሪሳዋቱኔ ዬሩሳላሜፔ ዪዴ፥ ሙሴ ሂጊያ ታማሪሲያ ኣማሬዳ ኣሳቱ ዬሱሳኮ ሺቄዲኖ። 2ዬሱሳ ካሊያዋንቱፔ ኢቱ ኢቱ ቱና ኩሺያን፥ ሄዋ ጊያዌ ሜጬቴናን ቁማ ሚያዋንታ #7፡2 ሜጬቴናን ቁማ ሚያዋንታ፡ ኣዪሁዴ ኣሳቱዋ ዎጋን ሜጬቴና ኩሺያን ቁማ ሙሳይ ቱናዳን ፓይዴቴ። ሄዋሲ ቁማ ማናፔ ካሴና ኩሺያ ሜቻ ሎይ ሚኒሲኖ። ቤዔዲኖ።

3ኣዪሲ ጎፔ፥ ፓሪሳዋቱኔ ኣዪሁዳ ኣሳይ ኡባይ ባሬንቱ ኣዋቱዋ ዎጋ ናጊዴ፥ ባሬንቱ ኩሺያ ሎይ ሜጬቴናን ሚኪኖ። 4ቃሲ ጌያፔ ዪዴካ ሜጬቴናን ዴዒዴ ሚኪኖ። ቃሲ ኡንቱንቱ ባሬንቱ ኣዋቱዋፔ ኣኬዳ ሃራ ጮራ ዎጋይ ዴዔ፤ ሄዌካ ዋንጫ፥ ኬሪያ፥ ቢራታፔ ሜዳ ሚሻኔ ኣርሳ ሜጪያ ዎጋ።

5ፓሪሳዋቱኔ ሙሴ ሂጊያ ታማርሲያዋንቱ ዬሱሳ፥ «ኔና ካሊያዋንቱ ኣዪሲ ኑ ኣዋቱዋ ዎጋ ካሌናን ኢፂዴ፥ ባሬንቱ ኩሺያ ሜጬቴናን ቁማ ሚኖ?» ያጊዴ ኦቼዲኖ።

6-7ዬሱሲ ኡንቱንታ ሃዋዳን ያጌዳ፤ «ኢሲያሲ ቲምቢቲያ ኦዴዳ ዎዴ፥ ሂንቴንቱባ፥ ሎዓ ማላቲያ ኢታቱባ ፃፌዳዋዳንካ፥

‹ፆሳይ፥ «ሃዌ ኣሳይ ታና

ባሬ ቦላ ዶናን ቦንቼ።

ሺን ኡንቱንቱ ዎዛናይ ታፔ ሃኩዋን ዴዔ፤

ኣሳይ ታው ሜላ ጎዪኔ።

ኣዪሲ ጎፔ፥ ኣሳይ ኦዳ ኣዛዙዋ

ፆሳ ሂጊያ ማላቲሲዴ ታማርሴ» ጌዳ›

ያጊዴ ቲምቢቲያ ቱሙዋ ኦዴዳ። #ኢሳ 29፡13

8«ፆሳ ኣዛዙዋ ሂንቴ ኣጊዴ፥ ኣሳ ዎጋ ሚኒሲዴ ናጊታ» ያጌዳ።

9ቃሲካ ዬሱሲ፥ «ሂንቴንቱ ሂንቴ ዎጋ ናጋናው ፆሳ ኣዛዙዋ ኣጊታ። 10ኣዪሲ ጎፔ ሙሴ፥ ‹ኔ ኣባኔ ኔ ዳዮ ቦንቻ› ቃሲ፥ ‹ባሬ ኣባኔ ባሬ ኣቶ ቦሪያዌ ሃይቁዋን ሙሬቶ› ያጌዳ። #ኬስ 20፡12፤ 21፡17፤ ዎግ 20፡9፤ ዛር 5፡16 11ሺን ኢቲ ኡራው ባሬ ኣዉዋ ዎይ ባሬ ኣቶ ማዲያባይ ዴዒሺን ኢ፥ ‹ሃዌ ቁርባኒያ፤ ሃዋ ጉሳይ ፆሳባ ጊያዋ› ጎፔ፥ 12ኢ ባሬ ኣዉዋ ዎይ ባሬ ኣቶ ዎዴፔ ማዳናዋ ኣይኔ ኮዪኪታ። 13ሃ ሃኖታን ሂንቴ ሂንቴንቱ ዎጋ ናጋናው፥ ፆሳ ቃላ ኮሊዴ፥ ሄዋ ማላ ዳሮባ ኦታ» ያጌዳ።

ኣሳ ቱኒሲያዋንታ

(ማት 15፡10-20)

14ዬሱሲ ጮራ ኣሳ ቃሲካ ባሬኮ ፄሲዴ፥ «ኡባይ ታኒ ጊያዋ ሲሲቴኔ ኣኬኪቴ። 15ኣሳፔ ኬሲያዌ ኣሳ ቱኒሲያዋፔ ኣቲን፥ ካሬፔ ኣሳ ጊዶ ጌሊዴ፥ ኣሳ ቱኒሲያባይ ኣይኔ ባዋ፤ 16ሲሳናው ሃይይ ዴዒያ ኡራይ ኦኒኔ ሲሶ» ያጌዳ።

17ዬሱሲ ጮራ ኣሳ ኣጊዴ ሶይ ጌሌዳ ዎዴ፥ ኣ ካሊያዋንቱ ሄ ሌሚሱዋባ ኣ ኦቼዲኖ። 18ኢ ኡንቱንታ፥ «ሂንቴንቶካ ቃሲ ጌሊቤኔ? ካሬፔ ኣሳ ዎዛናን ጌሊያባይ ኣይኔ ኣሳ ቱኒሳናው ዳንዳዬናዋ ኣኬኪቴ? 19ኣዪሲ ጎፔ፥ ቁማይ ኣሳ ኡሉዋ ጊዶ ጌሊዴ፥ ካሬው ኬሲያዋፔ ኣቲን፥ ኣሳ ዎዛና ጊዶ ጌሌና» ያጌዳ። ሃዋዳንካ ዬሱሲ ቁማ ኡባይ ቱና ጊዴናዋ ኤሪሴዳ።

20ቃሲካ ዬሱሲ ሃዋዳን ያጌዳ፤ «ኣሳ ቱኒሲያባይ ኣሳ ዎዛና ጊዶፔ ኬሲያባ። 21ኣዪሲ ጎፔ፥ ኣሳ ዎዛና ጊዶፔ ኬሲያዌ ኢታ ቆፋ፤ ዎሹሚያዋ፤ ዉዒያዋ፤ ዎያዋ፤ ጫራቴ፤ 22ዮራቴ፤ ኡዚያ ዎይ ባሬና ዶሲያዋ፤ ኢታቴ ዎይ ጪሚያዋ፤ ጌኒያ፤ ማጫዋ ኣሞቲያዋ፤ ቃናቲያዋ፤ ቦሪያዋ ዎይ ዚጊሪያዋ፤ ኣዩዋ፤ ኤያቴ። 23ሃ ኢታባይ ኡባይ ኣሳ ዎዛና ጊዶፔ ኬሲዴ፥ ኣሳ ቱኒሴ» ያጌዳ።

ኢቲ ጊሪኬ ሚሺራቲ ኣማኑዋ

(ማት 15፡21-28)

24ዬሱሲ ሄዋፔ ኣጊዴ፥ ፂሮሳኔ ሲዶና ጊያ ካታማቱዋ ማታን ዴዒያ ጋዲያ ቢዴ፥ ኢቲ ጎሊያ ጌሌዳ፤ ቃሲ ኢ ያኒ ዴዒያዋ ኦኒኔ ኤራናዋ ኮዪቤና፤ ሺን ቆሴቲዴ ጋሚዓናው ዳንዳዪቤና። 25ሺን ባሬ ጉ ናቲ ቦላ ኢታ ኣያናይ ዴዒያ ኢቲ ሚሺራታ ዬሱሳባ ሲሳዴ፥ ኤሌካ ኣኮ ያኔ ኣ ጌዲያን ጉፋና ኣጋዱ። 26ሄ ሚሺራታ ኣዪሁዳ ኣሳ ጊዱኩ፤ ኣ ዬሌቴዳዌካ ሶሪያ ጊያ ጋዲያና፤ ኣ ባሬ ናቲፔ ፃላሂያ ኬሳና ማላ፥ ዬሱሳ ዎሳዱ።

27ሺን ዬሱሲ ዛሪዴ፥ «ናናይ ካሴቲዴ ቁማ ካሊኖ፤ ኣዪሲ ጎፔ፥ ናና ቁማ ኣኪዴ፥ ካናቱዋሲ #7፡27 ካናቱዋሲ፡ ሃ ቃላ ኢቲ ኢቲ ኣዪሁዴ ኣሳይ፥ ኣዪሁዴ ጊዴና ኣሳቱዋሲ ጎዔቲያዋ። ኦሊያዌ ሎዓ ጊዴና» ያጌዳ።

28ሚሺራታ ዛራዴ፥ «ቱማካ ታ ጎዳው፥ ሃራይ ኣቶ ሳምፓ ሚዪያን ዴዒያ ካናቱካ ናናቱዋፔ ኣቴዳ ሱፓ ሚኖ» ያጋዱ።

29ዬሱሲ ቃሲ ኢዞ፥ «ሃ ኔኒ ሃሳዬዳ ቃላ ዲራው፥ ፃላሂ ኔ ናቲፔ ኬሴዳ፤ ሲሚ ኔ ሶይ ባ» ያጌዳ።

30ሚሺራታ ባሬ ሶይ ቢያ ዎዴ፥ ኢዚ ናቲፔ ፃላሂ ኬሲና፥ ሂፃን ጊሴዳዉኖ ዴማዱ።

ዬሱሲ ቱሌኔ ዱዴ ጊዴዳ ኢቲ ቢታኒያ ፓዳ

31ዬሱሲ ፂሮሳ ጋዲያፔ ኬሲዴ፥ ሲዶናናኔ ታሙ ካታማ ጊያ ጋዲያና ካንዴ፥ ጋሊላ ኣባኮ ቤዳ። 32ኣሳይ ቱሌኔ ዱዴ ጊዴዳ ቢታኒያ ዬሱሳኮ ኣሂዴ፥ ባሬ ኩሺያ ኣ ቦላን ዎና ማላ፥ ዬሱሳ ዎሴዲኖ። 33ዬሱሲ ባሬካ ሄ ቢታኒያ ጮራ ኣሳፔ ጋፃ ኬሲዴ፥ ባሬ ቢራያ ኣ ሃይን ዬዴዳ፤ ቃሲ ጩቻ ጩቺዴ፥ ኣ ኢንፃርሳ ቦቼዳ። 34ሳሉዋ ፑዴ ፄሊዴ፥ ቶኪ ሼምፒዴ፥ «ኤፍታሂ» #7፡34 «ኤፍታሂ»፡ ሃ ቃላይ ዬሱሲ ሃ ኣላሚያን ዴዒዴ ታማሪሲያ ዎዴ፥ ጎዔቲያ ኣራማዪኬ ያጌቲያ ቃላን ሃሳዬዳዋ። ያጌዳ፤ ሄዋ ጊያዌ ዶዬታ ጊያዋ። 35ቢታኒያ ሃይይ ኤሌካ ዶዬቲ ኣጌዳ፤ ቃሲ ኣ ሃሳዬና ኢንፃርሳይካ ቢሌቲ ኣጌዳ፤ ቢታኒ ኣይኔ ዋዬቴናን ሃሳዪ ኣጌዳ።

36ዬሱሲ ኣሳው፥ «ሃዋ ኦሲኔ ኦዶፒቴ» ያጊዴ ኦዴዳ፤ ሺን ኢ ዳሪሲ ሚኒሲ ኦዲና፥ ኣሳይ ቃሲ ኦዱዋ ያ ዳሪሴዳ። 37ሄዋ ሲሴዳ ኣሳይ ኡባይ ዳሮ ማላሌቲዴ፥ «ኡባባካ ኢ ሎይ ኦ። ሃራይ ኣቶ ቱሊያካ ሲሴ፤ ቃሲ ዱዲያካ ሃሳዪሴ» ያጌዲኖ።

Currently Selected:

ማርቆሳ 7: dwrENT

Highlight

Copy