ማቶሳ 28

ዬሱሲ ሃይቁዋፔ ዴንዴዳ

(ማር 16፡1-10፤ ሉቅ 24፡1-12፤ ዮህ 20፡1-10)

1ሳምባታይ ኣና ዎጋ ጋላሲ ዎንታ ባካሊያን፥ ማግዳላ ጌቴቲያ ካታማፔ ዬዳ ማይራማኔ ዮኮ ማይራማ ዬሱሲ ሞጌቴዳ ጎንጎሉዋ ቤዓናው ቤዲኖ። 2ጎዳ ኪታንቻይ ሳሉዋፔ ዎዳ ዲራው፥ ሳዓይ ዳሮ ቃፄዳ፤ ሄ ኪታንቻይ ዪዴ፥ ሹቻ ጎንዶርሲ ኦሊዴ፥ ኣ ቦላ ኬሲ ኡቴዳ። 3ኣ ማላይ ዋልቃን ማላቴ፤ ኣ ማዩካ ሻቻዳን ቦ። 4ናጊያዋንቱ ኪታንቻው ያሻ ኮኮሪዴ፥ ሃይቄዳ ኣሳዳን ሃኔዲኖ።

5ኪታንቻይ ማጫዋንታ ሃዋዳን ያጌዳ፤ «ያዮፒቴ፤ ኣያው ጎፔ፥ ማስቃሊያ ቦላ ሚሲማሪያን ሺዴ ካቄዳ ዬሱሳ ሂንቴንቱ ኮዪያዋ ታኒ ኤራይ። 6ኢ ሃዋን ባዋ፤ ኣያው ጎፔ፥ ኢ ባሬ ጌዳዋዳንካ ሃይቁዋፔ ዴንዲ ዲጌዳ፤ ሃ ዪዴ፥ ኢ ሞጌቲ ጊሶሳ ቤዒቴ። 7ሂንቴንቱ ሃዒ ኤሌካ ቢዴ፥ ዬሱሳ ካሊያዋንቶ፥ ‹ዬሱሲ ሃይቁዋፔ ዴንዲ ዲጌዳ። ቃሲ ኢ ሂንቴፔ ካሴቲዴ፥ ጋሊላ ቤ፤ ሂንቴንቱ ኣ ያኒ ቤዓና› ያጊዴ ኦዲቴ። ቤዒቴ፥ ታኒ ሂንቴንቱሲ ኦዳዲ» ያጌዳ።

8ኡንቱንቱ ያዪዲኔ ቃሲ ዳሮ ናሼቲዴ፥ ዬሱሲ ሞጌቴዳ ጎንጎሉዋ ማታፔ ኤሌካ ኪቺዴ፥ ዬሱሳ ካሊያዋንቶ ኦዳናው ዎፄዲኖ።

9ሄ ማንዒያንካ ዬሱሲ ኡንቱንቱና ጋኬቲዴ ኡንቱንታ፥ «ሳሮ ዴዒቴ» ያጊ ኣጌዳ፤ ኡንቱንቱ ኣኮ ሺቂ ኣ ጌዲያ ኦይቂዴ፥ ኣው ጎዪኔዲኖ። 10ዬሱሲ ሄ ዎዴ ኡንቱንታ፥ «ያዮፒቴ፤ ታ ኢሻቱ ጋሊላ ባና ማላ፥ ቢዴ ኡንቱንቶ ኦዲቴ፤ ኡንቱንቱ ታና ያኒ ቤዓናዋንታ» ያጌዳ።

11ሄ ማጫዋንቱ ቢያ ዎዴ፥ ጎንጎሉዋ ናጊያ ዎታዳራቱዋፔ ኣማሬዳዋንቱ ካታማ ቢዴ፥ ሃኔዳዋ ኡባ ቄሳቱዋ ካፓቶ ኦዴዲኖ። 12ቄሳቱዋ ካፓቱ ጪማቱዋና ኢቲፔ ሺቂ ዞሬቲዴ፥ ዎታዳራቶ ዳሮ ሚሻ ኢሚዴ፥ 13« ‹ኑኒ ጌሚዒሹዋን ዴዒሺን ኣ ካሊያዋንቱ ቃማ ዪዴ፥ ኣ ኣኃ ዉዔዲኖ› ያጊቴ። 14ሃ ዬዉዋ ጋዲያ ኣዪሲያዌ ሲሶፔ፥ ኑኒ ኣው ኦዲ ኣማንና፤ ቃሲ ሂንቴንታ ኣይኔ ሂርጊሴናዳን ኦና» ያጌዲኖ።

15ዎታዳራቱ ሚሻ ኣኪዴ፥ ባሬንቶ ኦዴዳዋዳን ኦዲኖ። ሃ ዬዉ ኣዪሁዳቱዋ ማታን ሃቼ ጋካናው፥ ኦዴቲዴ ዴዔ።

ዬሱሲ ባሬና ካሊያዋንቶ ቤቴዳ

(ማር 16፡14-18፤ ሉቅ 24፡36-49፤ ዮህ 20፡19-23፤ ኪት 1፡6-8፤ 1ቆር 15፡3-8)

16-17ሺን ታማኔ ኢቲ ኣ ካሊያዋንቱ ዬሱሲ ባሬንታ ቢቴ ጌዳ ጋሊላ ጋዲያ ቢዴ ኣ ቤዔዳ ዎዴ፥ ኣው ጎዪኔዲኖ፤ ሺን ኡንቱንቱፔ ኢቱ ኢቱ ሲዲኖ። #ማት 26፡32፤ ማር 14፡28

18ዬሱሲ ኡንቱንቱኮ ሺቂዴ፥ ኡንቱንታ ሃዋዳን ያጌዳ፤ «ማታይ ኡባይ ሳሉዋኒኔ ሳዓን ታው ኢሜቴዳ። 19ሄዋ ዲራው፥ ሂንቴንቱ ቢዴ፥ ኣሳ ኡባ ታና ካሊያዋንታ ኦቴ፤ ኣዉዋ ሱንን፥ ናዓ ሱንኒኔ ጌሻ ኣያና ሱንን ኡንቱንታ ፃማቂቴ። #ኪት 1፡8 20ታኒ ሂንቴንታ ኣዛዜዳባ ኡባ ኡንቱንቱ ናጋና ማላ፥ ኡንቱንታ ታማሪሲቴ፤ ታኒ ዎዲያ ዉርሴይ ጋካናሲካ ኡባ ዎዴ ሂንቴንቱና ዴዒያዋ ኣኬኪቴ» ያጌዳ።

Currently Selected:

ማቶሳ 28: dwrENT

Highlight

Copy