ሉቃሳ 20

ዬሱሳ ማታ ቦላ ዴንዴዳ ኦሻ

(ማት 21፡23-27፤ ማር 11፡27-33)

1ኢቲ ጋላሲ ዬሱሲ ኣሳ ጌሻ ጎሊያን ታማሪሲዴኔ ሚሺራቹዋ ቃላ ኦዲዴ ዴዒያ ዎዴ፥ ቄሳቱዋ ካፓቱኔ ሙሴ ሂጊያ ታማሪሲያዋንቱ ጋዲያ ጪማቱዋና ኢቲፔ ዬሱሳኮ ዬዲኖ። 2ኡንቱንቱካ፥ «ሃ ዬዉዋ ኔኒ ኡዲያዌ ኣይ ማታኔንቶ ኦዳ፤ ሃ ማታካ ኔው ኢሜዳዌ ኢ ኦኔ?» ያጊዴ ኦቼዲኖ። 3ኢካ፥ «ታ ሂንቴና ኢቲ ኦሻ ኦቺያዌ ዴዒያዋ ኣኔ ዛሪቴ። 4ዮሃኒሳ ፂንቃታይ ፆሳፔ ዎይ ኣሳፔ?» ያጊ ኦቼዳ።

5ኡንቱንቱ ባሬ ጊዶን ማቄቲዴ፥ «ፆሳፔ ጎፔ፥ ሄዋ ጊዶፔ ‹ኣያው ኣማኒቤይኪቴ› ኑና ያጋናዋ፤ 6‹ኣሳፔ› ጎፔ፥ ኣሳይ ኡባይ ዮሃኒሲ ናቢያ ጊዲያዋ ኣማኒያ ዲራው ሹቻን ኑና ዴቻናዋንታ» ያጌዲኖ። 7ሃዋሲ፥ «ሃቃፔ ዬዴንቶ ኤሮኮ» ጊዴ ኣው ዛሬዲኖ። 8ዬሱሲካ፥ «ሃዋ ጊዶፔ ታካ፥ ታኒ ኦ ማታን ሃ ዬዉዋ ኦይታንቶ ሂንቴንቶ ኦዲኬ» ያጌዳ።

9ሃዋፔ ሲሚዴ ዬሱሲ ኣሳው ሃ ሌሚሱዋ ያጊ ኦዱዋ ዶሜዳ፡ #ኢሳ 5፡1 «ኢቲ ቢታኒ ዳሮ ዎዪኒያ ቱራቱዋ ቶኬዳ። ጎሻንቻቱዋሲ ኮው ኢሚዴ፥ ኢ ሂኒ ሃራ ጋዲያ ቢዴ ጮራ ዎዲያ ጋሚዔዳ። 10ዎዪኒ ኣይፊያ ኣይፎ ዎዴ፥ ዎዪኒያ ጎሻ ጎዳይ ባሬና ጋኪያዋ ኣሃናዳን ኢቲ ቆማ ኮዋቱዋኮ ኪቴዳ። ኪቴቲ ቤዳዋካ ቢዴ፥ ሜላ ኩሺያ ዬዴዲኖ። 11ሄዋፔ ሃራ ቆማ ኪቴዳ። ኡንቱንቱ ሄዋካ ቃሲ ቢዴ፥ ቶቺዴ፥ ሜላ ኩሺያ ዬዴዲኖ። 12ሃዒካ ሃራ ሄዜንያ ቆማ ኪቴዳ። ኡንቱንቱካ ቃሲ ኣ ማሱንዴ፥ ሂኒ ካሬ ኦሌዲኖ።

13«ሄ ዎዪኒያ ቱራ ጎዳይካ፥ ‹ሲሚ ኣያ ኡዶ? ኣኔ ሃዒ ታ ዶሲያ ናዓ ኪታና፤ ኦኒ ኤሪ ኣ ቦንቾፔኔ› ጌዳ። 14ጎሻንቻቱ ቃሲ ናዓ ቤዔዳ ዎዴ፥ ‹ሃዌ ኣ ላቲያዋ ጊዶ ዲራው፥ ሃዪቴ ዎይቴ፤ ሄዋፔ ጉዬ፥ ቢታይ ኑሳ ጊዳናዋ› ጊዴ ዞሬቴዲኖ። 15ዎዪኒያ ቱራ ሳዓፔ፥ ሂኒ ካሬው ኬሲዴ ኣ ዎዲኖ።

«ዎዪኒያ ቱራ ጎዳይካ ኡንቱንታ ኣያ ኦንዴሻ? 16ዮፔ ሄ ጎሻንቻቱዋ፥ ዎናዋ፤ ዎዪኒያ ቱራ ሳዓካ ሃራንቶ ኢማናዋ» ያጌዲኖ።

ኣሳቱካ ሃዋ ሲሶ ዎዴ፥ «ሃዋ ማላባ ኣሆፖ» ያጌዲኖ። 17ዬሱሲካ ሂኒ ኡንቱንቱኮ ፄሊዴ፥

« ‹ሲሚ ሹቻ ጎሊያ ኬፂያዋንቱ ካዳ ሹቻይ፥

ኢ ዋና ጎሊያ ሚኒሲያ ሁጴ ሹቻ ጊዴዳ›

ጌቴቲዴ ፃፌቴዳዋ ቢሌይ ኣዬ? #ማዝ 118፡22 18ሃ ሹቻ ቦላን ኩንዲያ ኡባይ ሜዔሬቴ፤ ሹቻይካ ኣ ቦላን ኩንዲያ ኡባይ ቡንቼታናዋ» ያጌዳ።

ጊራ፥ ጊራኔ ኣጋኔ ጊያ ኦሻ

(ማት 22፡15-22፤ ማር 12፡13-17)

19ሙሴ ሂጊያ ፃፊያዋንቱኔ ቄሳቱዋ ካፓቱ ዬሱሲ ሃሳዬዳ ሌሚሱ፥ ኡንቱንቱ ቦላን ጌቴቶዋ ኤሮ ዲራው፥ ሄ ሳቲያንካ ኣ ኦይቃናው ኮዬዲኖ። ሺን ኣሳው ያዬዲኖ። 20ዬሱሳ፥ ሄ ጋዲያ ሞዲያዋሲኔ ኣ ማታሲ ኣዴ ኢማናው ኣ ዶናፔ ኬሲያ ቃላን ኦይቃናው ኢንጄቲያ ዎዲያ ናጊኖ። ሄዋ ዲራው ጌሻ ማላቲዴ ኦይናው ዎቺያዋንታ ኪቴዲኖ። 21ሄ ኪቴቶዋንቱካ ዬሱሳ፥ «ታማሪሲያዎ፥ ኔኒ ቱማ ዬዉዋ ሃሳዪያዋኔ ታማሪሲያዋ፥ ሄዋዳንካ ቃይ ፆሳ ኦጊያ ቱማቴን ታማሪሲያዋኔ ኦሲኔ ዱማዬናዋ ኑኒ ኤሬቶ። 22ቃሲካ ኡንቱንቱ፥ ሮማ ካቲያ ቄሳሬው ጊራ ጪጋናው ኮሺ ዎይ ኮሼኔ?» ያጊ ኦቼዲኖ።

23ኢ ቃሲ ኡንቱንቱ ዴሻቴ ኤሪዴ፥ 24«ኣኔ ታና ኢቲ ዲናሪያ #20፡24 ዲናሪያ፡ ሄዎዴ ሮማ ቢታ ኣሳይ ጎዔቲያ ሚሻ። ቤሲቴ፤ ሄዋ ቦላን ዴዒያ ሚሲሊኔ ፃፌቶዌ ኦና ቤሲ?» ጌዳ። 25ኡንቱንቱካ፥ «ቄሳሬዋ» ጊዴ ዛሬዲኖ። ኢኔካ፥ «ሄዋ ጊዶፔ፡ ቄሳሬዋ፥ ቄሳሬው ኢሚቴ፤ ፆሳዋ፥ ፆሳው ኢሚቴ» ያጌዳ። 26ኡንቱንቱካ፥ ኢ ሃሳዬዳ ቃላን ኣሳ ሲንን ኦይቃናው ዳንዳዪ ቤይኪኖ። ኣ ዛሩዋን ማላሌቲዴ ጮዑ ጌዲኖ።

ሃይቁዋፔ ዴንዱዋባ ኦሻ

(ማት 22፡23-33፤ ማር 12፡18-27)

27ሳዱቃዋናቱፔ ኢቱ ኢቱ ዬሱሳኮ ዪዴ፥ ኦሻ ኣው ሺሼዲኖ። #ኪት 23፡8 28ኡንቱንቱካ ዬሱሳ፥ #ዛር 25፡5 «ታማሪሲያዎ፥ ኢቲ ቢታኒ ማቻቶ ኣኪዴ ናዓ ዬሌናን ሃዪያዋ ጊዶፔ፥ ሚሺራቶ ሄዋ ኢሻይ ላታ ኣኪ ናዓ ዬሊዴ ባሬ ኢሻው ዜሬ ዎና ማላ ሙሴ ኑሲ ፃፌዳ። 29ኢቲ ዎዲያን ላፑ ኢሻቱ ዴዒያዋንቱፔ፥ ባይራይ ማቻቶ ኣኪዴ ዬሌናን ሃይቂ ኣጌዳ። 30ላዔያዌካ ኢዞ ላቴዳ። 31ሄዜንያዌካ ቃሲ ኢዞ ኣኬዳ፤ ላፑናቱካ ኢዞ ኣኪዴ ናዓ ዬሌናን ሃይቄዲኖ። 32ዉርሴን ሚሺራታካ ሃይቃ ኣጋዱ። 33ሲሚ ላፑናቱካ ሄ ሚሺራቶ ኣኬዳ ዲራው፥ ሃይቁዋፔ ዴንዴዳ ዎዴ፥ ኢዛ ኦሲ ማቼ ጊዳኔ?» ያጊ ኦቼዲኖ።

34ዬሱሲካ፥ «ሃ ኣላሚያ ናናይ ኣኪኖኔ ኣኬቲኖ። 35ሺን ሃይቁዋፔ ዴንዲዴ፥ ሲንፔ ዪያ ዎዲያን ዴዓናው ቤሲያዋንቱ ኣኪኪኖኔ ኣኬቲኪኖ። 36ኡንቱንቱ ፆሳ ኪታንቻ ማላቲዴ ዴዒያ ዲራው፥ ሄዋፔ ሲሚዴ ሃይቂኪኖ። ሃይቁዋፔ ዴንዲያዋንታ ጊዲያ ዲራው ኡንቱንቱ ፆሳ ናና። 37ሙሴ፥ ፆሳይ ኣው ቆንጬዳ ዎራባ ፃፌዳ ታሪኪያ ጋርሳን፥ ጎዳ ፆሳ፥ «ኣብራሃሞ ፆሳ፥ ዪሳቃ ፆሳ፥ ያዪቆባ ፆሳ» ያጊዴ ፄሱሳይ፥ ሃይቃዋንቱ ዴንዲያዋ ቤሴ። #ኬስ 3፡6 38ኡባይካ ኣው ሃይቂ ቤናዋንታ ጊዲያ ዲራው፥ ኢ ሃይቂቤናዋንቱ ፆሳፔ ኣቲን፥ ሃይቆዋንቱዋ ጊዴና» ያጌዳ።

39ኢቲ ኢቲ ሙሴ ሂጊያ ፃፌዳዋንቱካ፥ «ታማሪሲያዎ፥ ሎዑዋ ሃሳያዳ» ያጌዲኖ። 40ሃዋፔ ሲሚዴ፥ ኢቱካ ኣ ኦቻናው ፃሎዌ ባዋ።

ዬሱሲ ኦኔ ጊያ ኦሻ

(ማት 22፡41-46፤ ማር 12፡35-37)

41ሃዋፔ ካላ ዬሱሲ ኡንቱንታ፥ «ኣሳይ ኪሪስቶሳ ዎቲ ‹ዳዊቴ ናዓ› ያጊኖ? 42-43ጋሶቴይኔካ፥ ዳዊቴ ባሬ ሁጴው ማዚሙሬ ማፃፋ ጋርሳን፥

‹ጎዳይ ታ ጎዳ፥ «ታኒ ኔ ሞርኬቱዋ

ኔ ጌዲያፔ ጋርሳና ዴዓናዳን ኦና ጋካናው፥

ታ ኡሼቻን ኡታ» ጌዳ›

ያጌዳ።

44«ሲሚ ዳዊቴ ኪሪስቶሳ፥ ‹ጎዳ›፥ ጊዴ ፄሲያዋ ጊዶፔ፥ ዎቲ ኣው ናዓ ጊዳና ዳንዳዪ?» ያጌዳ።

ሙሴ ሂጊያ ታማሪሲያዋንቱፔ ናጌታና ማላ፥ ዬሱሲ ሴሬዳ ሴራ

(ማት 23፡1-36፤ ማር 12፡38-40)

45ኣሳይ ኡባይ ሲሲሺን ባሬና ካሊያዋንቶ፥ 46«ሙሴ ሂጊያ ታማሪሲያዋንቱፔ ናጌቲቴ፤ ኡንቱንቱካ፥ ኣዱሳ ቃሚሺያ ማዪዴ ዩያናው፥ ጌያይ ዴዒያሳን ቦንቾ ሳሮታ ኣካናው፥ ዎሲያ ጎሌን ቦንቾ ኦይዲያን ኡታናው፥ ሾቤቴዳሳን ቦንቾሳ ኮዪያዋንታ። 47ሄዋንቱካ ኣምዓቱዋ ጎሊያ ካሎዪያዋንታ፤ ባሬንታ ቤሳናው ዎሳ ኣዱሲያዋንታ፤ ኡንቱንታ ኢታ ፒርዳይ ናጌ» ያጌዳ።

Currently Selected:

ሉቃሳ 20: dwrENT

Highlight

Copy