ዮሃኒሳ 7
7
ዬሱሲ ዳሲያ ባላሲ ዬሩሳላሜ ቤዳ
1ሄዋፔ ጉዬ፥ ዬሱሲ ጋሊላን ያ ሃ ዩዬዳ፤ ኣዪሁዳቱ ኣ ዎናው ኮዪያ ዲራው፥ ዪሁዳን ዩያና ኮዪቤና። 2ኣዪሁዳቱ ቦንቺያ ዳሲያ ባላይ ጋኪ ኡቴዳ። #ዎግ 23፡34፤ ዛር 16፡13 3ሄዋ ዲራው፥ ዬሱሳ ኢሻቱ ኣ፥ «ኔና ካሊያዋንቱ ኔኒ ኦያዋ ቤዓና ማላ፥ ሃዋፔ ዴንዳዴ ዪሁዳ ጋዲያ ባ። 4ኣዪሲ ጎፔ፥ ባሬው ኤሬታናው ኮዪያ ኣሳይ ኦኒኔ ባሬ ኦሱዋ ጌንና። ኔኒ ሃዋንታ ኦና፥ ኔባ ኣላሚያ ኡባይ ኤሮ!» ያጌዲኖ። 5ኣዪሲ ጎፔ፥ ሃራይ ኣቶ ኣ ኢሻቱካ ኣ ኣማኒቤይኪኖ።
6ዬሱሲ ኡንቱንታ፥ «ታው ኢንጄቲያ ዎዲ ጋኪቤና፤ ሺን ሂንቴንቱሲ ኣይ ዎዴካ ኢንጄቴ። 7ሳዓይ ሂንቴንታ ኢፃናው ዳንዳዬና፤ ሺን ታኒ ሳዓ ኪታይ ኢታ ጊዲያዋ ማርካቲያ ዲራው፥ ታና ኢፄዳ። 8ባላ ቦንቺያሳ ሂንቴንቱ ቢቴ፤ ታው ኢንጄቲያ ዎዲ ጋኪቤና ዲራው፥ ታኒ ባላ ቦንቺያሳ ባናዌ ቢራ» ያጌዳ። 9ኢ ሃዋ ጊዴ፥ ጋሊላን ኣቴዳ።
ዬሱሲ ዳሲያ ባላሳን ቤቴዳ
10ሺን ኣ ኢሻቱ ባላ ጋላሳ ቦንቺያሳ ቤዳዋፔ ጉዪያን፥ ኢካ ኣሳይ ቤዔናን ጌማን ያ ቤዳ። 11ኣዪሁዳቱ ባላ ጋላሳ ቦንቺያሳን ኣ ኮዪኖኔ፥ «ኢ ሃቃን ዴዒ?» ያጊዴ፥ ኣ ላቢኖ።
12ኣሳ ጊዱዋን ዳሮ ዙዙንይ ዴንዴዳ። ኣማሬዳ ኣሳይ፥ «ኢ ሎዖ ኣሳ» ያጌ፤ ሃራቱ ቃሲ፥ «ኣ፥ ኢ ኣሳ ባሌ» ያጊኖ። 13ሺን ኣዪሁዳቱ ያዬዳ ዲራው፥ ኦኒኔ ኣባ ቆንጪያን ሃሳዬና።
14ባላ ቦንቺያ ጋላሳ ባጋን፥ ዬሱሲ ጌሻ ጎሊያ ቢዴ፥ ታማሪሱዋ ዶሜዳ። 15ኣዪሁዳቱ ማላሌሌቲዴ፥ «ሃ ቢታኒ ኣይኔ ታማሬናን ሃዋ ኬና ዋኒ ኤሬዴ?» ያጌዲኖ።
16ሄዋ ዲራው፥ ዬሱሲ ዛሪዴ፥ «ታና ታማሪሲያዌ ታና ኪቴዳ ፆሳ ማታፔ ዪያዋፔ ኣቲን፥ ታዋ ጊዴና። 17ፆሳ ሼኒያ ኦናው ዶሲያ ኦኒኔ ሃ ታኒ ታማሪሲያዌ ፆሳ ማታፔ ዪንቶ ዎይ ቃሲ ታኒ ታፔ ሃሳያዪታንቶ ኤራና። 18ባሬዋ ሃሳዪያ ኡራይ ባሬ ሁጲያሲ ቦንቹዋ ኮዬ፤ ሺን ባሬና ኪቴዳዌ ቦንቼታና ማላ ኮዪያ ኡራይ ቱማንቻ፤ ኣኒ ዎርዶባይ ባዋ። 19ሙሴ ሂንቴንቱሲ ሂጊያ ኢሚቤኔ? ሺን ሂንቴፔ ኢቱኔ ሂጊያ ናጌና። ታና ኣዪሲ ዎናው ኮዪቴ?» ያጌዳ።
20ኣሳይ ዛሪዴ፥ «ኔናን ፃላሂ ዴዔ፤ ኔና ዎናው ኦኔ ኮዬዳዌ?» ያጌዳ።
21ዬሱሲ፥ «ታኒ ኢቲ ዎልቃማባ ኦና፥ ሂንቴንቱ ኡባይ ማላሌቴዲታ። 22ሂንቴንቱ ናና ሂንቴንቱ ዶካላና ማላ፥ ሙሴ ሂንቴንታ ኣዛዜዳ። ሺን ዶካሉሳይ ሂንቴንቱ ኣዋቱዋና ዬዳዋፔ ኣቲን፥ ሙሴና ዪቤና፤ ሄዋሲ ሂንቴንቱ ሳምባታን ኣቱማ ናና ዶካሊታ። #ዶም 17፡10፤ ዎግ 12፡3 23ሙሴ ሂጊ ኣዛዜዳ ዲራው፥ ሂንቴንቱ ሳምባታን ዶካሊያዋ ጊዶፔ፥ ያቲና ታኒ ኢቲ ኣሳው ኩሜን ቦላ ፓዳ ዲራው፥ ታና ኣዪሲ ሃንቄቲቴ? 24ቱሙ ፒርዳ ፒርዲቴፔ ኣቲን፥ ኣሳ ዴሙዋ ፄሊዴ ፒርዶፒቴ» ያጌዳ።
ሃዌ ኪሪስቶሴ?
25ሄዋ ዲራው፥ ዬሩሳላሜ ኣሳፔ ኢቱ ኢቱ፥ «ኡንቱንቱ ዎናው ኮዪያ ቢታኒ ሃዋ ጊዴኔ? 26ቤዒቴ፥ ቆንጪያን ኢ ሃሳዬ፤ ኡንቱንቱ ኣ ኣይኔ ጊኪኖ። ሃዌ ኪሪስቶሳ ጊዲያዋ ኑ ካፓቱ ቱሙ ኤሪኖሻ? 27ሺን ኑኒ ኣ ሃቃፔ ዬዴንቶ ኤሮይቴ፤ ኪሪስቶሲ ዪያ ዎዴ፥ ኢ ሃቃፔ ዪንቶኔ ኦኒኔ ኤሬና» ያጌዲኖ።
28ሄዋፔ ጉዪያን፥ ዬሱሲ ጌሻ ጎሊያን ታማሪሲዴ፥ ባሬ ቃላ ቁ ኡዲዴ፥ «ሂንቴንቱ ታና ኤሪታ፤ ቃሲ ታኒ ሃቃፔ ዬዴንቶካ ኤሪታ። ታኒ ታ ሼኒያን ያቤይኬ፤ ሺን ታና ኪቴዳዌ ቱማንቻ፤ ሂንቴንቱ ኣ ኤሪኪታ። 29ሺን ታኒ ኣ ኤራይ፤ ኣዪሲ ጎፔ፥ ኢ ታና ኪቲና፥ ታኒ ኣ ማታፔ ያዲ» ያጌዳ።
30ሄዋ ዲራው፥ ኡንቱንቱ ኣ ኦይቃናው ኮዬዲኖ፤ ሺን ኣ ዎዲ ቢሮ ጋኪቤና ዲራው፥ ኦኒኔ ኣ ቦላ ኩሺያ ዎቤና። 31ሺን ዳሮ ኣሳይ ዬሱሳ ኣማኒዴ፥ «ኪሪስቶሲ ዪያ ዎዴ፥ ሃ ቢታኒ ኦዳ ማላታፔ ዳሪያዋ ኦኔዬ?» ያጌዲኖ።
ዬሱሳ ኦይቃናው ዎታዳራቱ ኪቴቴዲኖ
32ፓሪሳዋቱ ዳሮ ኣሳይ ዬሱሳባ ዙዙሚያዋ ሲሴዲኖ፤ ቄሳቱዋ ካፓቱኔ ፓሪሳዋቱ ኣ ኦይቂ ቃሺሳናው ኣማሬዳ ዎታዳራቱዋ ኪቴዲኖ።
33ዬሱሲ፥ «ታኒ ሂንቴናና ላፋ ጋሚዓና፤ ሄዋፔ ጉዪያን፥ ታና ኪቴዳዋኮ ባና። 34ሂንቴንቱ ታና ኮያና፤ ሺን ዴሚኪታ፤ ኣዪሲ ጎፔ፥ ታኒ ዴዒያ ሳዓ ሂንቴንቱ ባናው ዳንዳዪኪታ» ያጌዳ።
35ኣዪሁዳቱ ኢቱ ኢቱዋና፥ «ሃዌ ኑኒ ኣ ዴሜናሳ ሃቃ ባና ሃኒ? ኣዪሁዳቱ ዴዒያ ጊሪኬ ካታማ ቢዴ፥ ጊሪኬ ኣሳቱዋ ታማሪሳና ሃኒ? 36ኢ፥ ‹ሂንቴ ታና ኮያና፤ ሺን ዴሚኪታ› ቃሲ፥ ‹ታኒ ዴዒያሳ ሂንቴንቱ ባናው ዳንዳዪኪታ› ያጌ፤ ሄዋ ጊያዌ ዋጊያዌ?» ያጌዲኖ።
ዴዑዋ ኢሚያ ሃ
37ሄ ባላ ጋላሳ ቦንቺያ ጋላሳፔ ዋናቲያ ዉርሴ ጋላሳኒ ዬሱሲ ዴንዲ ኤቂዴ፥ ባሬ ቃላ ቁ ኡዲዴ፥ «ሳሜቴዳ ኡራይ ኦኒኔ ታኮ ዪዴ ኡሾ። #ዎግ 23፡36 38ታናን ኣማኒያዎ፥ ፆሳ ማፃፋይ ጊያዋዳን፥ ኣ ኡሉዋፔ ዴዑዋ ኢሚያ ሃ ፑልቱ ጎጋናዋ» ያጌዳ። #ሂዝ 47፡1፤ ዛክ 14፡8 39ኢ ሄዋ ኣ ኣማኔዳዋንቱ ኣካና ጌሻ ኣያናባ ሃሳዬዳ። ዬሱሲ ቢሮ ባሬ ቦንቹዋኮ ኬሲቤና #7፡39 ዬሱሲ ቢሮ ባሬ ቦንቹዋኮ ኬሲቤና፡ ዮሃኒሳ ሚሺራቹዋ ቃላን፥ ዬሱሳው ኩሜን ቦንቹ ኢሜቴዳዌ፥ ኢ ማስቃሊያ ቦላን ካቄቴዳ ዎዴኔ ባሬ ኣቡ ኡሼቻ ባጋን ኡታናው ሃይቁዋ ፆኒዴ ዴንዴዳ ዎዲያና ጊዲያዋ ቆንጪሴ። ዲራው፥ ሄ ዎዴ ጌሻ ኣያናይ ኡንቱንቶ ኢሜቲቤና።
ኣሳ ጊዶን ሜቴዳ ጳልቄ
40ሄ ኣሳፔ ዳሪያ ባጋይ ኢ ጊያዋ ሲሲዴ፥ «ቱሙ ሃዌ ናጌቲያ ናቢያ» ያጌዲኖ።
41ሃራንቱ፥ «ሃዌ ኪሪስቶሳ» ያጌዲኖ።
ሺን ሃራንቱ ቃሲ፥ «ኪሪስቶሲ ጋሊላፔ ዬና። 42ፆሳ ማፃፋይ፥ ‹ኪሪስቶሲ ዳዊቴ ዛሪያፔ፥ ዳዊቴ ዴዔዳ ቤቴሊሄሜ ካታማፔ ያና› ጌኔዬ?» ያጌዲኖ። #2ሳም 7፡12፤ ሚክ 5፡2 43ዬሱሳ ጋሱዋን ኣሳይ ባሬ ጊዱዋን ሻኬቴዳ። 44ሄ ኣሳፔ ኢቱ ኢቱ ኣ ኦይቃናው ኮዬዲኖ፤ ሺን ኩሺያኒኔ ኣ ቦቺቤይኪኖ።
45ጌሻ ጎሊያ ናጊያዋንቱ ቄሳቱዋ ካፓቱዋኮኔ ፓሪሳዋቱዋኮ ሲሚ ዬዳ ዎዴ ኡንቱንቱ ናጊያዋንታ፥ «ኣዪሲ ኣ ኣሂቤይኪቴ?» ያጊዴ ኦቼዲኖ።
46ጌሻ ጎሊያ ናጊያዋንቱ ኡንቱንቱሲ፥ «ሃ ቢታኒ ሃሳዬዳዋዳን፥ ኡባካ ኦኒኔ ሃሳዪቤና!» ያጊዴ ዛሬዲኖ።
47ፓሪሳዋቱ ዛሪዴ፥ «ኢ ሂንቴናካ ባሌዋ? 48ካፓቱዋፔ ዎይ ፓሪሳዋቱዋፔ ኣ ኣማኔዳ ኣሳይ ዴዒ? 49ሺን ሂጊያ ኤሬና ሃ ኣሳይ ሼቄቴዳዋ» ያጌዲኖ።
50ኡንቱንቱፔ ኢቱ ካሴና ዬሱሳኮ ቤዳ ኒቆዲሞሲ ኡንቱንታ፥ 51«ኢቲ ኡራይ ጊያባ ሲሴናን ዎይ ኢ ኣያ ኦዴንቶ ኤሬናን ዴዒዴ፥ ካሴቲዴ ኣ ቦላ ፒርዲያዌ ኑ ሂጊያን ዴዒ?» ያጌዳ።
52ኡንቱንቱ ዛሪዴ ኣ፥ «ኔኒካ ቃሲ ጋሊላ ጋዲያ ኣሴ? ጋሊላ ጋዲያፔ ናቢ ቤቴናዋ ፆሳ ማፃፋቱዋ ቢዳዴ ኤራ» ያጌዲኖ።
ዎሹማዴ ኦይቄቴዳ ሚሺራቶ
53ኣሳይ ኡባይ ኣጊዴ፥ ባሬ ሶይ ባሬ ሶይ ቤዳ።
Currently Selected:
ዮሃኒሳ 7: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
