ዮሃኒሳ 21

ዬሱሲ ላፑ ካሊያዋንቶ ቤቴዳ

1ሄዋፔ ጉዪያን፥ ዬሱሲ ፂቢሪያዶሳ ጌቴቲያ ኣባ ጋፃን ባሬ ካሊያዋንቱሲ ላዔንዋ ቤቴዳ። ኢ ኡንቱንቱሲ ሃዋዳን ቤቴዳ። 2ሲሞኒ ጴፂሮሲኔ ማንቲያ ጌቴቲያ ቶማሲ፥ ቃና ጋሊላፔ ዬዳ ናቲናዔሊ፥ ዛቢዲዮሳ ናናይኔ #21፡2 ዛቢዲዮሳ ናና፡ ኢሻቱዋ ጊዴዳ ያዪቆባኔ ዮሃኒሳ። ዬሱሳ ካሊያዋንቱፔ ሃራ ላዓቱ ኢቲፔ ዴዒኖ።

3ሲሞኒ ጴፂሮሴ ኡንቱንቱሲ፥ «ታኒ ሞሊያ ኦይቃናው ባይ» ያጌዳ።

ኡንቱንቱ፥ «ኑኒካ ኔናና ባና» ያጊዴ፥ ኬሲዴ ዎንጊሪያ ጊዶ ጌሌዲኖ፤ ሺን ኡንቱንቱ ሄ ጋላሲ ቃማ ሞሊያ ኣይኔ ኦይቂቤይኪኖ።

4ዎንቲያ ዎዴ ኣዋይ ኬሳናፔ ካሴ፥ ዬሱሲ ኣባ ጋፃን ኤቄዳ፤ ሺን ኣ ካሊያዋንቱ ዬሱሳ ጊዴዳዋ ኤሪቤይኪኖ። 5ዬሱሲ ኡንቱንታ፥ «ናቶ፥ ሞሊያ ኦይቂቤይኪቴዬ?» ያጌዳ።

ኡንቱንቱ ዛሪዴ፥ «ኣይኔ ኦይቂቤይኮ» ያጌዲኖ።

6ኢ ዛሪዴ፥ «ሂንቴንቱ ዳባ ዎንጊሪያፔ ኡሼቻ ባጋኮ ዬጊቴ፤ ኣማሬዳዋ ሂንቴንቱ ኦይቃና» ያጌዳ። ሄዋ ዲራው፥ ዳባ ኡሼቻ ባጋኮ ዬጊና፥ ሞሊ ዳሬዳ ዲራው፥ ጎቺ ኬሳናዌ ኡንቱንታ ፆኔዳ።

7ዬሱሲ ሲቂያ ኣ ካሊያዌ ጴፂሮሳ፥ «ሃዌ ጎዳቴኔ!» ያጌዳ። ሲሞኒ ጴፂሮሴ ጎዳ ኢ ጊዴዳዋ ሲሴዳ ዎዴ፥ ካሎ ዴዒያ ዲራው፥ ባሬ ማዩዋ ማዪዴ፥ ኣባ ጊዶ ጉፒ ጌሌዳ። 8ሺን ዮኮ ካሊያዋንቱ ሞሊ ኩሚ ኡቴዳ ዳባ ጎቺዴ፥ ዎንጊሪያን ኣባፔ ጋፃ ኬሴዲኖ፤ ኡንቱንቱ ኣባፔ ላዑ ፄቱ ዋ ኬና ሃኪዴ ዴዒኖፔ ኣቲን፥ ሎይ ሃኪዴ ዴዒኪኖ። 9ኡንቱንቱ ኣባፔ ጋፃ ኬሴዳ ዎዴ፥ ፂፁን ቦንቁዋን ሞሊ ዴዒያዋኔ ኡኪ ቤዔዲኖ።

10ዬሱሲ ኡንቱንታ፥ «ሃዒ ሂንቴንቱ ኦይቄዳ ሞሊያፔ ኣማሬዳዋ ሃሚቴ» ያጌዳ።

11ሲሞኒ ጴፂሮሴ ዎንጊሪያን ጌሊዴ፥ ፄታኔ ኢሻታማኔ ሄዙ ዎጋ ሞሌቱ ኩሚ ኡቴዳ ዳባ ጎቺዴ፥ ኣባፔ ጋፃ ኬሴዳ፤ ሞሊ ሄዋ ኬና ዳሮ ጊዲናካ ዳባይ ዳኬቲቤና።

12ዬሱሲ ኡንቱንታ፥ «ሃ ዪዴ፥ ቃንዒያ ቃንዒቴ» ያጌዳ። ዬሱሳ ካሊያዋንቱፔ ኢቱኔ፥ «ኔኒ ኦኔ?» ጊዴ ኣ ኦቻናው ፃሊቤና፤ ኣዪሲ ጎፔ፥ ጎዳ ኢ ጊዴዳዋ ኡንቱንቱ ኤሬዲኖ። 13ዬሱሲ ዪዴ፥ ኡኪ ኣኪዴ፥ ኡንቱንቱሲ ኢሜዳ፤ ሞሊያካ ሄዋዳን ኢሜዳ።

14ዬሱሲ ሃይቁዋፔ ዴንዴዳዋፔ ጉዪያን፥ ባሬ ካሊያዋንቱሲ ቤቲሺን ሃዌ ሄዜንዋ።

ዬሱሳኔ ጴፂሮሳ

15ኡንቱንቱ ቁማ ሜዳዋፔ ጉዪያን፥ ዬሱሲ ሲሞኒ ጴፂሮሳ፥ «ዮሃኒሳ ናዓ ሲሞና፥ ታና ሃዋንቱፔ ኣዴ ሲቃይ?» #21፡15 « … ታና ሃዋንቱፔ ኣዴ ሲቃይ?» ሃዋ ጉሳይ፥ «ታና ሃ ዬዋቱዋ ሲቂያዋፔ ኣዴ ሲቃይ?» ጉሳ። ያጌዳ።

ሲሞኒ ጴፂሮሴ፥ «ኤ ጎዳው፥ ታኒ ኔና ዶሲያዋ ኔኒ ኤራሳ» ያጌዳ።

ዬሱሲ ኣ፥ «ታ ዶርሳ ማራቱዋ ሄማ» ያጌዳ።

16ዬሱሲ ቃሲካ፥ «ዮሃኒሳ ናዓ ሲሞና፥ ታና ሲቃይ?» ያጌዳ።

ሲሞኒ ጴፂሮሴ፥ «ኤ ጎዳው፥ ታኒ ኔና ዶሲያዋ ኔኒ ኤራሳ» ያጌዳ።

ዬሱሲ፥ «ታ ዶርሳቱዋ ሄማ» ያጌዳ።

17ዬሱሲ ሄዜንዋ፥ «ዮሃኒሳ ናዓ ሲሞና፥ ታና ዶሳይ?» ያጌዳ።

ዬሱሲ ሄዜንዋ ሲሞኒ ጴፂሮሳ፥ «ታና ዶሳይ?» ያጊዴ ኦቼዳ ዲራው፥ ጴፂሮሴ ኣዛኒዴ፥ «ጎዳው፥ ኔኒ ኡባባ ኤራሳ፤ ታኒ ኔና ዶሲያዋ ኔኒ ኤራሳ» ያጌዳ።

ዬሱሲ፥ «ታ ዶርሳቱዋ ሄማ። 18ታኒ ኔው ቱሙዋ ኦዳይ፤ ኔኒ ዎዳላቴን ዴዒያ ዎዴ፥ ኔ ፄሳን ሳቂያ ኔሬካ ዳንጫዴ፥ ኔኒ ኮዬዳሳ ባሳ። ሺን ጪሜዳዋፔ ጉዪያን፥ ኔ ኩሺያ ሚጫ ቤሳሳ። ኔና ሃራ ኡራይ ዳንጪሳናዋ፤ ኔኒ ዶሴናሳካ ኣፌ» ያጌዳ። 19ዬሱሲ ሄዋ ጴፂሮሴ ኣይ ማላ ሃይቁዋ ሃይቂዴ፥ ፆሳ ቦንቺሳኔንቶኔ ኤሪሳናው ጌዳ፤ ቃሲ ሄዋ ጌዳዋፔ ጉዪያን፥ ዬሱሲ ጴፂሮሳ፥ «ታና ካላ» ያጌዳ።

ዬሱሳኔ ዮኮ ካሊያዋ

20ጴፂሮሴ ጉዬ ሲሚዴ፥ ዬሱሲ ሲቂያ ካሊያዌ ባሬፔ ጉዬና ዪያዋ ቤዔዳ፤ ሄ ካሊያዌ ካዉዋ ሚያ ሳዓን ዬሱሳኮ ሺቂዴ ኣ፥ «ጎዳው፥ ኔና ኣ ኢማናዌ ኦኔ?» ያጌዳዋ። 21ጴፂሮሴ ሄ ካሊያዋ ቤዒዴ ዬሱሳ፥ «ጎዳው፥ ሃ ቢታኒ ቃሲ ዋናኔ?» ያጌዳ።

22ዬሱሲ ኣ፥ «ታኒ ያና ጋካናው ኢ ዴዓና ማላ ታኒ ኮዮፔ፥ ሄዌ ኔና ኣያ ሜቲ? ኔኒ ታና ካላ» ያጌዳ።

23ሄዋ ዲራው፥ ሄ ካሊያዌ ሃይቄና ጊያ ሃሳያይ ኢሻቱዋ ኡባኮ ጋኬዳ፤ ሺን ዬሱሲ፥ «ታኒ ያና ጋካናው፥ ኢ ዴዓና ማላ፥ ታኒ ኮዮፔ፥ ኔና ኣያ ሜቲ?» ጌዳዋፔ ኣቲን፥ «ሃይቄና» ጊቤና።

24ሄ ዬዉዋባ ማርካቴዳዌኔ ቃሲ ሄዋ ፃፌዳዌ ሄ ካሊያዋ ኣ ማርካቴይ ቱማ ጊዲያዋ ኑኒ ኤሬቶ።

25ዬሱሲ ኦዳ ሃራ ዳሮባይካ ዴዔ፤ ኡባባይ ሁጲያን ሁጲያን ፃፌቲንቶ፥ ፃፌቲያ ማፃፋቶ ሃ ሙሌ ኣላሚ ጊዳናዋ ታው ማላቴና።

Currently Selected:

ዮሃኒሳ 21: dwrENT

Highlight

Copy