ያዪቆባ ኪታ 5
5
ዱሬ ኣሳሲ ኢሜቴዳ ሚኖ ዞሪያ
1ሃዒካ ሂንቴኖ ዱሬ ኣሳቶ፥ ሂንቴ ቦላ ዪያ ቱጋው «ኣዬ! ኣዬ!» ያጊዴ ዬኪቴኔ ዚላሊቴ። 2ሂንቴ ዱሬቴይ ባይዲጌዳ፤ ቃሲ ሂንቴ ኣፊላካ ቢልዓይ ሚዲጌዳ። 3ሂንቴ ዎርቃይኔ ሂንቴ ቢራይ ሺዒ ዲጌዳ። ቃሲ ሄ ሺዓይ ሂንቴ ቦላ ማርካታና፤ ሂንቴ ቦላካ ታማዳን ማና። ሂንቴ ሂንቴ ሚሻ ሲንው ዳጋይ ዴዒታ። 4ኣኬኪቴ፤ ሂንቴ ጋዴን ካ ቆይጬዳ ኣሳቶ ጪጊቤና ኪራ ሚሻይ ዋሴ፤ ኡንቱንቱ ዋሱ ዎልቃማ ጎዳ ሃዪን ሲሴቴዳ። #ዛር 24፡14-15 5ሂንቴው ኢንጄቲና፥ ሳዓን ኢሻሊዴ ዴዔዲታ፤ ሹካ ጋላሳው ኪያዋዳን፥ ሂንቴ ቦላ ኬዲታ። 6ፂሎ ኣሳ ቦላ ፒርዴዲታ፤ ቃሲ ኣ ዎዲታ፤ ኢ ሂንቴናና ኤቄቴና።
ጎዳ ላዔን ዩሳ ዳንዳያን ናጊያዋ
7ሄዋ ዲራው፥ ታናዳን ፆሳ ካሊያዋንቶ፥ ጎዳይ ያና ጋካናው ጌንጪቴ፤ ቢታ ጎሺያዌ ኣዲሊያ ኢራይኔ ኣሱራ ኢራይ ያና ጋካናው ጌንጪዴ፥ ኣልዖ ካ ኢ ዎቲ ናጊዴ ጋ ኣኪንቶ ቤዒቴ። 8ሂንቴካ ቃሲ ጌንጪቴ፤ ሂንቴ ዎዛና ሚኒሲቴ። ኣዪሲ ጎፔ፥ ጎዳ ዩሳይ ማታቴዳ።
9ታናዳን ፆሳ ካሊያዋንቶ፥ ፆሳይ ሂንቴ ቦላ ፒርዴና ማላ፥ ኢቱ ኢቱዋ ቦላ ዙዙሞፒቴ። ቤዒቴ፥ ፒርዲያዌ ፔንጊያን ኤቄዳ። 10ታናዳን ፆሳ ካሊያዋንቶ፥ ዋዪያሲኔ ጌንጫሲ ሌሚሱዋ ጊዴዳዋንታ፥ ጎዳ ሱንን ሃሳዬዳ ናባቱዋ ሃሳዪቴ። 11ቤዒቴ፥ ዳንዳዪዴ ጌንጬዳዋንታ ኑኒ ኣንጄቴዳዋንታ ጌቶ። ኢዮባ ጌንጫ ሂንቴ ሲሴዲታ፤ ቃሲ ጎዳይ ኣው ዉርሴን ኢሜዳዋካ ቤዔዲታ። ኣዪሲ ጎፔ፥ ጎዳይ ማሮታይኔ ቃሬታይ ኩሜዳዋ። #ዮብ 1፡21-22፤ 2፡10፤ ማዝ 103፡8
12ሺን ኡባፔ ካሴ፥ ታናዳን ፆሳ ካሊያዋንቶ፥ ሳሉዋን ጊዲና፥ ዎይ ሳዓን ጊዲና፥ ዎይ ሃራ ጫቁዋን ጊዲና፥ ኣያንካ ጫቆፒቴ። ሺን ፆሳ ፒርዳን ሂንቴ ጌሌናዳን፥ ሂንቴ ዬዉ ኤ ጊያዋ ጊዶፔ፥ «ኤ» ጊቴ፤ ጊዴና ጊያዋ ጊዶፔ፥ «ጊዴና» ጊቴ።
13ሂንቴ ጊዶን ዋዬቲያ ኡራይ ኦኒኔ ዴዖፔ፥ ፆሳ ዎሶ፤ ናሼቲያ ኡራይ ኦኒኔ ዴዖፔ፥ ዬፂዴ ጋላቶ። 14ሂንቴፔ ሳኬቲያ ኡራይ ኦኒኔ ዴዖፔ፥ ኣማኒያ ኣሳ ካሌያ ጪማቱዋ ባሬኮ ፄሶ፤ ኡንቱንቱ ጎዳ ሱንን ዛይቲያ ኣ ኦኪዴ፥ ኣው ፆሳ ዎሲኖ። 15ኣማኑዋን ፆሳ ዎሴዳ ዎሳይ ሃርጋንቻ ፓና፤ ጎዳይካ ኣ ሃርጊያፔ ዴንና፤ ቃሲ ናጋራ ኢ ኦዳዋ ጊዶፔካ ጎዳይ ኣው ኣቶ ጋና። 16ሄዋ ዲራው፥ ሂንቴ ፓፃና ማላ፥ ሂንቴ ናጋራ ኢቱ ኢቶ ፓፂቴኔ ኢቱ ኢቶ ፆሳ ዎሲቴ፤ ፂሎ ኣሳ ዎሳይ ዎልቃማ ኦሱዋ ኦ። 17ኤላስ ኑ ማላ ኣሳ። ኢራይ ሳዓን ቡኬናዳን፥ ኢ ሚኒሲዴ፥ ፆሳ ዎሲና ሄዙ ላይኔ ኡሱፑን ኣጌና ሳዓን ኢራይ ቡኪቤና። #1ካት 17፡1፤ 18፡1 18ላዔንዋ ፆሳ ኢ ዎሲና፥ ሳሉዋፔ ኢራይ ቡኬዳ፤ ሳዓይካ ባሬ ካ ሞኬዳ። #1ካት 18፡42-45
19ታናዳን ፆሳ ካሊያዋንቶ፥ ሂንቴፔ ኦኒኔ ቱሙዋፔ ዎራ ቦፔ፥ ቃሲ ኢቱ ኣ ጉዬ ሄ ቱሙዋኮ ዛሮፔ፥ 20ናጋራንቻ ኣ ባላ ኦጊያፔ ዛሪያ ኦኒኔ ኣ ሼምፑዋ ሃዪቁዋፔ ኣሻናዋኔ ዳሮ ናጋራ ካማናዋ ኤሮ። #ሌም 10፡12፤ 1ጵፅ 4፡8
Currently Selected:
ያዪቆባ ኪታ 5: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa