1 ዮሃኒሳ ኪታ 3

ፆሳ ናናቱዋ

1ኑኒ ፆሳ ናናቱዋ ጌቴቲዴ ፄሴታና ማላ፥ ፆሳይ ኑና ኣይ ኬና ሲቄዴንቶኔ ቤዒቴ። ኑኒ ቱሙካ ኣ ናናቱዋ። ሃ ኣላሚ ፆሳ ኤሬና ዲራው፥ ኑናካ ኤሬና። #ዮህ 1፡12 2ታ ሲቃቶ፥ ሃዒ ኑኒ ፆሳ ናናቱዋ፤ ኑኒ ኣያ ሃናኔንቶ ቢሮ ኤሬቲቤና፤ ሺን ኪሪስቶሲ ቆንጪያ ዎዴ፥ ኑኒ ኣ ማላታናዋ ኤሬቶ። ኣዪሲ ጎፔ፥ ኢ ቱሙ ኣ ጊዲያዋ ኑኒ ኩሜንን ቤዓና። 3ቃሲ ኪሪስቶሳ ቤዓና ጊዴ ናሼቻን ናጊያ ኦኒኔ ኪሪስቶሲ ጌሻ ጊዴዳዋዳን፥ ባሬና ጌሼ።

4ናጋራ ኦያ ኡባይ ፆሳ ሂጊያ ሜን፤ ኣዪሲ ጎፔ፥ ናጋራይ ፆሳ ሂጊያ ሜንሳ። 5ኪሪስቶሲ ኣሳ ናጋራ ዪሳናው ቆንጬዳዋ ሂንቴ ኤሪታ፤ ኣኒ ናጋራይ ባዋ። #ዮህ 1፡29 6ኪሪስቶሳን ዴዒያ ኦኒኔ ናጋራ ኦዴ ዴዔና፤ ቃሲ ናጋራ ኦዴ ዴዒያ ኦኒኔ ኣ ቤዒቤና ዎይ ኤሪቤና።

7ታ ናቶ፥ ኦኒኔ ሂንቴና ባሌፖ። ኪሪስቶሲ ፂሎ ጊዲያዋዳን፥ ፂሎባ ኦያ ኡራይ ፂሉዋ። 8ፃላሂያ ካፑ ኮዪሩዋፔ ናጋራ ኦዳ ዲራው፥ ናጋራ ኡባ ዎዴ ኦያ ኡራይ ፃላሂያ ካፑዋሳ፤ ሄዋ ዲራው፥ ፆሳ ናዓይ ፃላሂያ ካፑዋ ኦሱዋ ዪሳናው ቆንጬዳ። 9ፆሳ ናናቱዋ ጊዲያ ኡባይ ፆሳ ሜታይ ኡንቱንቱን ዴዒያ ዲራው፥ ናጋራ ኡባ ዎዴ ኦኪኖ፤ ቃሲ ፆሳይ ኡንቱንቱ ኣዉዋ ጊዲያ ዲራው፥ ናጋራ ኦናው ዳንዳዪኪኖ። 10ፆሳ ናናቱዋ ጊዱዋኒኔ ፃላሂያ ካፑዋ ናናቱዋ ጊዶን ዴዒያ ዱማቴይ ሃዋን ኤሬቴ፤ ፂሎባ ኦናዋንቱኔ ዎይ ባሬ ኢሻ ሲቄናዋንቱ ኦኒኔ ፆሳ ናናቱዋ ጊዲኪኖ።

ኢቱ ኢቱዋና ሲቄቲያዋ

11ኣዪሲ ጎፔ፥ ኮዪሩዋፔ ሂንቴ ሲሴዳ ኪታይ፥ «ኢቱ ኢቱዋና ሲቄታናው ቤሴ» ያጊያዋ። #ዮህ 13፡34 12ኑኒ ቃዬላ ማላ ጊዳናው ቤሴና። ቃዬሊ ፃላሂያ ካፑዋሳ፤ ሄዋ ጊዶ ዲራው፥ ባሬ ኢሻ ዎዳ። ኢ ባሬ ኢሻ ኣዪሲ ዎዴ? ኢ ኦዳ ኦሱ ኢታ ጊዲና፥ ኣ ኢሻይ ኦዳ ኦሱ ሎዓ ጊዴዳ ዲራው ዎዳ። #ዶም 4፡8

13ታናዳን ፆሳ ካሊያዋንቶ፥ ሃ ሳዓ ኣሳይ ሂንቴና ኢፆፔ፥ ኦራባ ጎፒቴ። 14ኑኒ ኣማኒያዋንታ ሲቂያ ዲራው፥ ሃዪቁዋፔ ዴዖ ፒኔዳዋ ኤሬቶ፤ ኣማኒያዋንታ ሲቄና ኡራይ ኦኒኔ ሃዪቁዋ ጊዶን ዴዔ። 15ኣማኒያዋንታ ኢፂያ ኦኒኔ ሼምፑዋ ዎዳዋ፤ ቃሲ ሼምፑዋ ዎዳዋን ሜና ዴዑ ባዪናዋ ሂንቴ ኤሪታ። 16ኪሪስቶሲ ባሬ ሼምፑዋ ኑ ዲራው ኣዴ ኢሜዳዋን ሲቁ ኣዬንቶ ኑኒ ኤሬዶ፤ ኑኒካ ኣማኒያዋንቱ ዲራው፥ ኑ ሼምፑዋ ኣዴ ኢማናው ቤሴ። 17ሺን ዱሬ ኣሳይ ኦኒኔ ባሬ ኢሻይ ሜቶቲያዋ ቤዒዴ፥ ኣው ቃሬቴናን ኢፆፔ፥ ባሬ ዎዛናን ፆሳ ሲቃይ ጋናው ዋኒ ዳንዳዪ? 18ታ ናቶ፥ ኑኒ ኦሱዋኒኔ ቱማቴን ሲቄቶይቴፔ ኣቲን፥ ጮ ሃሳያን ዎይ ቦላ ዶናን ሲቄታናው ቤሴና።

ፆሳ ሲንን ኣማኔቲዴ ኤቂያዋ

19-20ኑኒ ቱሙዋ ባጋን ዴዒያዋ ሄዋን ኤራና፤ ቃሲ ኑ ዎዛናይ ኑ ቦላ ፒርዲያ ዎዴ ኡባን፥ ፆሳ ሲንን ቱማቴ ኑና ሄዋን ኤሪሴ። ኣዪሲ ጎፔ፥ ፆሳይ ኑ ዎዛናፔ ዎልቃማ፤ ቃሲ ኢ ኡባባ ኤሬ።

21ታ ሲቃቶ፥ ኑ ዎዛናይ ኑ ቦላ ፒርዴናዋ ጊዶፔ፥ ኑኒ ፆሳ ሲንን ያዮኮ። 22ኑኒ ኣ ኣዛዙዋ ናጊያ ዲራዉኔ ኣ ናሼቺያባ ኦያ ዲራው፥ ዎሲያ ኡባባ ኣፔ ኣኬቶ። 23ፆሳ ኣዛዙ ሃዋ፡ ኪሪስቶሲ ኑና ኣዛዜዳዋዳንካ፥ ፆሳ ናዓ ዬሱሲ ኪሪስቶሳ ሱንን ኑኒ ኣማናናዳኒኔ ኢቱ ኢቱዋና ሲቄታናዳን ፆሳይ ኑና ኣዛዜዳ። 24ፆሳ ኣዛዙዋ ናጊያ ኦኒኔ ፆሳ ጊዶን ዴዔ፤ ፆሳይካ ኣ ጊዶን ዴዔ፤ ፆሳይ ኑሲ ኢሜዳ ኣ ኣያና ባጋና ኢ ኑ ጊዶን ዴዒያዋ ኑኒ ኤሬቶ።

Currently Selected:

1 ዮሃኒሳ ኪታ 3: dwrENT

Highlight

Copy