زَبُور 105
105
1أَشْكُرُوا اللّٰهْ وَ أَطْرُوا أُسْمَهْ!
وَ عَرُّفُوا الشُّعُوبْ بِأَعْمَالَهْ.
2غَنُّوا لَيَّهْ وَ أَمْدَحَوْه
وَ فَكُّرُوا فِي كُلَّ عَجَايْبَهْ.
3أَنْبَسْطُوا أَشَانْ أُسْمَهْ الْمُقَدَّسْ
وَ خَلِّي قُلُوبْكُو يِنْمَلُوا بِفَرَحْ،
إِنْتُو الْقَاعِدِينْ تِتَابُعُوا اللّٰهْ.
4فَتُّشُوا اللّٰهْ وَ قُدُرْتَهْ
وَ وَجُّهُوا عَلَيَّهْ دَايْماً.
5أَذَّكَّرَوْا عَجَايْبَهْ السَّوَّاهُمْ،
أَيْوَى، عَجَايْبَهْ وَ قَوَانِينَهْ الْأَمَرْ بَيْهُمْ
6إِنْتُو، يَا ذُرِّيَّةْ إِبْرَاهِيمْ عَبْدَهْ
وَ إِنْتُو، يَا ذُرِّيَّةْ يَعْقُوبْ الْاللّٰهْ عَزَلَاكُو!
7اللّٰهْ هُو بَسْ إِلٰـهْنَا
الْيَحْكِمْ فِي كُلَّ الْأَرْض.
8هُو يِذَّكَّرْ دَايْماً فِي مُعَاهَدَتَهْ
وَ فِي كَلَامَهْ الْأَمَرْ بَيَّهْ لِأَلِفْ ذُرِّيَّةْ.
9وَ دِي مُعَاهَدَتَهْ السَّوَّاهَا مَعَ إِبْرَاهِيمْ#105:9 مُعَاهَدَتَهْ السَّوَّاهَا مَعَ إِبْرَاهِيمْ: التاريخ دا تلقوه في تكوين 12:7.
وَ أَكَّدْهَا بِحَلِيفَةْ لِإِسْحَاقْ.
10هُو ثَبَّتْ شَرْط لِذُرِّيَّةْ يَعْقُوبْ
وَ سَوَّى مُعَاهَدَةْ دَايْمَةْ مَعَ بَنِي إِسْرَائِيلْ.
11وَ قَالْ: «أَنَا نَنْطِيكُو بَلَدْ كَنْعَانْ
وَ دَا قِسِمْ التَّلْقَوْه وَرَثَةْ.»
12وَ فِي الزَّمَنْ دَا، عَدَدْ جُدُودْنَا شِيَّةْ،
هُمَّنْ شِيَّةْ مَرَّةْ وَاحِدْ
وَ سَاكْنِينْ فِي الْبَلَدْ دِي مِثِلْ أَجَانِبْ.
13هُمَّنْ رَايْغِينْ مِنْ أُمَّةْ لِأُمَّةْ
وَ مِنْ مَمْلَكَةْ لِشَعَبْ آخَرْ.
14لَاكِنْ اللّٰهْ مَا خَلَّى نَادُمْ يَظْلُمْهُمْ
وَ عَاقَبْ مُلُوكْ فِي شَانْهُمْ.
15وَ قَالْ: «مَا تِلَمُّسُوا النَّاسْ
الْأَنَا مَسَحْتُهُمْ وَ دَرَّجْتُهُمْ
وَ مَا تِسَوُّوا الْفَسَالَةْ
لِأَنْبِيَائِي.»
16وَ اللّٰهْ جَابْ الْجُوعْ فِي الْبَلَدْ
وَ قَلَّلْ فَوْقهَا الْمَعَاشْ.
17هُو رَسَّلْ قِدَّامْهُمْ نَادُمْ
وَ هُو يُوسُفْ الْبَاعَوْه مِثِلْ عَبِدْ.#105:17 يُوسُفْ الْبَاعَوْه مِثِلْ عَبِدْ: التاريخ دا تلقوه في تكوين 37:28.
18دَا هُو الْقَيَّدَوْا رِجِلَيْنَهْ
وَ دَسَّوْا لَيَّهْ جِنْزِيرْ فِي رَقَبَتَهْ
19لَحَدِّي كَلَامَهْ الْقَالَهْ أَلْحَقَّقْ
وَ اللّٰهْ كَشَفَهْ وَ لِقِيهْ صَافِي.
20مَلِكْ مَصِرْ أَنْطَى أَمُرْ لِيَطُلْقُوهْ
أَيْوَى، حَاكِمْ الشَّعَبْ فَكَّاهْ.
21هُو سَوَّاهْ سَيِّدْ فِي بَيْتَهْ
وَ حَاكِمْ فِي كُلَّ مَالَهْ.#105:21 مَلِكْ مَصِرْ سَوَّى يُوسُفْ حَاكِمْ: التاريخ دا تلقوه في تكوين 41:39-40.
22وَ جَبَرْ مَسَائِيلَهْ يَسْمَعَوْا كَلَامْ يُوسُفْ
وَ يُوسُفْ عَلَّمْ كُبَارَاتَهْ الْحِكْمَةْ.
23وَ بَيْدَا، بَنِي إِسْرَائِيلْ دَخَلَوْا فِي مَصِرْ#105:23 بَنِي إِسْرَائِيلْ دَخَلَوْا فِي مَصِرْ: التاريخ دا تلقوه في تكوين 46:6.
أَيْوَى، ذُرِّيَّةْ يَعْقُوبْ سَكَنَوْا فِي بَلَدْ حَامْ.
24وَ اللّٰهْ سَوَّى شَعَبَهْ يَلْدَوْا كَتِيرْ
وَ سَوَّاهُمْ شُدَادْ مِنْ خُصْمَانْهُمْ.
25هُو غَيَّرْ قُلُوبْ خُصْمَانْهُمْ
لِيَكْرَهَوْا شَعَبَهْ
وَ يِلآمَرَوْا ضِدّ عَبِيدَهْ.
26بَعَدْ دَا، رَسَّلْ عَبْدَهْ مُوسَى
وَ هَارُونْ الْهُو عَزَلَهْ.
27وَ هُمَّنْ سَوَّوْا عَلَامَاتْ فِي مَصِرْ#105:27 سَوَّوْا عَلَامَاتْ فِي مَصِرْ: التاريخ دا تلقوه في خُروج 7–11.
أَيْوَى، سَوَّوْا عَجَايِبْ فِي بَلَدْ حَامْ.
28هُو رَسَّلْ الضَّلَامْ وَ الضَّلَامْ جَاءْ
أَشَانْ مُوسَى وَ هَارُونْ مَا عِصَوْا كَلَامَهْ.
29هُو غَيَّرْ أَلْمِيهُمْ بِدَمّ
وَ كَتَلْ حُوتْهُمْ.
30وَ بَلَدْهُمْ أَنْمَلَتْ بِضِفْدَعْ
لَحَدِّي فِي لُبّ غُرَفْ مُلُوكْهُمْ.
31وَ اللّٰهْ أَنْطَى أَمُرْ
وَ دُبَّانْ أَمْ بَوْجَنِي وَ أَمْ بَاعُوضَةْ
جَوْا فِي كُلَّ بَلَدْهُمْ.
32هُو نَزَّلْ فَوْقهُمْ مَطَرَةْ هَنَا بَرَدْ
وَ نَارْ أَمْ بَلْبَالَةْ فِي بَلَدْهُمْ.
33هُو دَمَّرْ عِنَبْهُمْ وَ تِينْهُمْ
وَ كَسَّرْ شَدَرْ بَلَدْهُمْ.
34هُو أَنْطَى أَمُرْ
وَ سَارْ اللَّيْل وَ جَرَادْ آخَرْ
جَوْا بِكَتَرَةْ.
35هُمَّنْ أَكَلَوْا كُلَّ قَشّ بَلَدْهُمْ
وَ أَكَلَوْا إِنْتَاجْ أَرْضُهُمْ.
36هُو كَتَلْ كُلَّ أَوْلَادْ الْبِكِرْ فِي بَلَدْهُمْ
وَ هُمَّنْ نَتِيجَةْ أَوَّلْ قُدْرِتْهُمْ.
37هُو مَرَقْ شَعَبَهْ إِيدَيْهُمْ مَلَانِينْ
بِفُضَّةْ وَ دَهَبْ
وَ مَا فِي نَادُمْ أَتَّرْتَعْ مِنْ قَبَايِلْهُمْ.
38وَ نَاسْ مَصِرْ فِرْحَوْا بِمَرِقِينْهُمْ
أَشَانْ الْخَوْف كَرَبْهُمْ.
39اللّٰهْ مَدَّ سَحَابَايْ لِيِدَارِقْهُمْ
وَ نَارْ لِيِضَوِّي لَيْهُمْ بِلَيْل.
40وَ فِي طَلَبْهُمْ،
هُو نَزَّلْ لَيْهُمْ السَّلْوَى#105:40 نَزَّلْ لَيْهُمْ السَّلْوَى: التاريخ دا تلقوه في خُروج 16:13-18.
أَيْوَى، شَبَّعَاهُمْ
بِأَكِلْ مِنْ السَّمَاءْ.
41هُو فَتَحْ الْحَجَرْ وَ أَلْمِي سَالْ
وَ جَرَى فِي الْأَرْض الْجَفَافْ مِثِلْ بَحَرْ.#105:41 أَلْمِي جَرَى فِي الْأَرْض الْجَفَافْ: التاريخ دا تلقوه في خُروج 17:1-7.
42هُو يِذَّكَّرْ فِي وَعَدَهْ الْمُقَدَّسْ
السَّوَّاهْ مَعَ عَبْدَهْ إِبْرَاهِيمْ.
43هُو مَرَقْ شَعَبَهْ بِفَرَحْ
وَ مَرَقْ الْعَزَّلَاهُمْ بِزَغْرَاطْ.
44وَ هُو أَنْطَاهُمْ أَرْض الْأُمَمْ
وَ وَرَثَوْا النَّتِيجَةْ هِنْت خِدْمَةْ شُعُوبْ آخَرِينْ.
45أَشَانْ يَحْفَضَوْا قَوَانِينَهْ
وَ يِطَبُّقُوا تَوْرَاتَهْ.
الْحَمْدُ للّٰهْ!
Currently Selected:
زَبُور 105: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
