نَاحُوم 2
2
مدينة نِينَوَى تقع
1يَا سُكَّانْ نِينَوَى،
فِي مُهَاجِمِينْ جَايِينْ لَيْكُو!
أَحَرْسُوا بَكَانْكُو الْقَوِي
وَ رَاقُبُوا فِي الدُّرُوبْ.
أَرْبُطُوا صُلُبْكُو
وَ أَبْقَوْا قَوِيِّينْ لِلْحَرِبْ.
2حَتَّى كَانْ الْمُخَرِّبِينْ خَرَّبَوْا ذُرِّيَّةْ يَعْقُوبْ
وَ دَمَّرَوْا شَدَرْهُمْ كُلَ،
اللّٰهْ يِقَبِّلْ لَيْهُمْ شَرَفْهُمْ
مِثِلْ يِقَبِّلْ شَرَفْ بَنِي إِسْرَائِيلْ.
3وَ دَرَقْ فُرَّاسَهْ الْعَدُو
مَمْسُوحْ بِبُهْيَةْ حَمْرَةْ
وَ عَسْكَرَهْ لَابْسِينْ خُلْقَانْ حُمُرْ.
وَ وَكِتْ جَاهِزِينْ لِلْحَرِبْ،
عَرَبَاتَهْ يَمُرْقُوا شَرَارْ
وَ الْحُرَابْ يِنْهَزَّوْا.
4وَ عَرَبَاتْ الْحَرِبْ يَجْرُوا فِي الشَّوَارِعْ بِشِدَّةْ
وَ جَارِيِينْ فِي أُسْط الْمَدِينَةْ
مِثِلْ ضَيّ الْبَرَّاقَةْ التَّشْلَعْ.
5وَ مَلِكْ نِينَوَى نَادَى قُيَّادَهْ
وَ لَاكِنْ هُمَّنْ يِتَّرْتَعَوْا فِي مَشِيهُمْ.
يَجْرُوا لِلدُّرْدُرْ
وَ يِجَهُّزُوا نُفُوسْهُمْ لِيَحْمُوهْ.
سُكّان نِينَوَى يعرُّدوا
6طَوَّالِي، السَّدّ اللَّازْمِينْ بَيَّهْ أَلْمِي الْبَحَرْ أَنْكَسَرْ
وَ قَصِرْ الْمَلِكْ وَقَعْ.
7وَ الْمَلِكَةْ سَلَّبَوْهَا وَ شَالَوْهَا
وَ خَدَّامَاتْهَا كَارْبَاتْ دُيُودْهِنْ
وَ يُنُوحَنْ حِسِّهِنْ مِثِلْ الْحَمَامْ.
8وَ نِينَوَى بِقَتْ
مِثِلْ خَزَّانْ أَلْمِي الْيِنَقِّطْ
وَ سُكَّانْهَا عَرَّدَوْا
مِثِلْ أَلْمِي الْجَارِي.
وَكِتْ يُقُولُوا لَيْهُمْ:
«أَقِيفُوا! أَقِيفُوا» كُلَ،
مَا فِي نَادُمْ مِنْهُمْ يِنْلَفِتْ.
9أَنْهَبَوْا الْفُضَّةْ
وَ أَنْهَبَوْا الدَّهَبْ!
غُنَى الْمَدِينَةْ أَبَداً مَا يِكَمِّلْ
وَ خُمَامْهَا الْغَالِي كُلَ كَتِيرْ.
10نِينَوَى بِقَتْ نَقَعَةْ فَاضِيَةْ
وَ خَرَابْ.
وَ نَاسْهَا قُلُوبْهُمْ أَنْقَطَعَوْا
وَ رِجْلَيْهُمْ بَرَدَوْا.
وَ بُطُونْهُمْ كُلَ يَرْجُفُوا
وَ وُجُوهُّمْ بِقَوْا ضُلُمْ.
فُرّاس نِينَوَى طردوهم
11وَ وَيْن مَرْبَطْ الدِّيدَانْ
وَ مَرْقَدْ عِيَالْهُمْ؟
كَنْ الدُّودْ وَ مَرْتَهْ مَرَقَوْا كُلَ،
نَادُمْ مَا يِبَشْتِنْ عِيَالْهُمْ.
12الدُّودْ يَقْنُصْ لِعِيَالَهْ
وَ يَخَنِقْ لِمَرْتَهْ.
وَ يَمْلَا مَرْبَطَهْ بِالصَّيْد الْهُو كَتَلَهْ
وَ بِالرِّمَمْ الْهُو شَرَّطَاهُمْ.
13وَ دَاهُو كَلَامْ اللّٰهْ الْقَادِرْ:
«أَكِيدْ نُقُمّ ضِدِّكِ،
يَا مَدِينَةْ نِينَوَى.
أَيْوَى، عَرَبَاتْكِ هَنَا الْحَرِبْ،
نِسَوِّيهُمْ رُمَادْ.
وَ فُرَّاسْكِ الْمِثِلْ الدِّيدَانْ،
السَّيْف يَكْتُلْهُمْ.
وَ أَنَا نِوَقِّفْ قَنِيصْكِ فِي الْبَلَدْ
وَ حِسّ رُسُلْكِ بَتَّانْ مَا يِنْسَمِعْ.»
Currently Selected:
نَاحُوم 2: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
