مِيخا 1
1
1وَ دَاهُو كَلَامْ اللّٰهْ الْقَالَهْ فِي رُؤْيَةْ لِمِيخَا الْمِنْ حِلَّةْ مُورَشَتْ الْبُخُصّ مُدُنْ السَّامِرَةْ وَ مَدِينَةْ الْقُدُسْ. وَ دَا فِي أَيَّامْ حُكُمْ يُوتَامْ وَ أَحَازْ وَ حِزْقِيَّا مُلُوكْ مَمْلَكَةْ يَهُوذَا.
اللّه يلوم شعبه
2أَسْمَعَوْا، يَا كُلَّ الشُّعُوبْ!
أَسْمَعَيْ، يَا الْأَرْض
وَ كُلَّ شَيّءْ الْفَوْقكِ.
اللّٰهْ الرَّبّ يَشْهَدْ ضِدُّكُو.
أَيْوَى، الرَّبّ يُلُومْكُو مِنْ بَيْتَهْ الْمُقَدَّسْ.
3دَاهُو اللّٰهْ مَارِقْ مِنْ بَكَانَهْ
وَ يَنْزِلْ وَ يَمْشِي
فِي الْبَكَانَاتْ الْعَالِيِينْ هَنَا الْأَرْض.
4وَ الْجِبَالْ يُمُوعُوا تِحْتَهْ
وَ حُجَارْ خُشُومْ الْوُدْيَانْ يِنْقَطْعُوا
مِثِلْ الشَّمْعَةْ فِي النَّارْ
وَ مِثِلْ أَلْمِي الصَّبَّوْه فِي دِلَّيَّةْ.
5وَ دَا كُلَّ فِي شَانْ عِصْيَانْ ذُرِّيَّةْ يَعْقُوبْ
وَ فِي شَانْ ذُنُوبْ بَنِي إِسْرَائِيلْ.
وَ يَاتُو اللَّزَّ ذُرِّيَّةْ يَعْقُوبْ
فِي الْعِصْيَانْ؟
دِي مَا مَدِينَةْ السَّامِرَةْ وَلَّا؟
وَ يَاتُو الْحَرَّشْ بَنِي يَهُوذَا
لِيَعَبُدُوا إِلٰـهَاتْ فِي الْبَكَانَاتْ الْعَالِيِينْ؟
دِي مَا مَدِينَةْ الْقُدُسْ وَلَّا؟
6وَ اللّٰهْ قَالْ:
«السَّامِرَةْ نِسَوِّيهَا كَوْم هَنَا تُرَابْ
وَ كَدَادَةْ الْيَزْرَعَوْا فَوْقهَا جِنَيْنَاتْ الْعِنَبْ.
وَ الْحُجَارْ الْبَنَوْهَا بَيْهُمْ،
نِدَفِّقْهُمْ فِي الْوَادِي
وَ أَسَاسْهَا، نِخَلِّيهْ يِبِينْ.
7وَ كُلَّ أَصْنَامْهَا يِلْكَسَّرَوْا
وَ كُلَّ مَالْ بَيْتهُمْ،
نِحَرِّقَهْ بِنَارْ.
وَ نِخَرِّبْ كُلَّ أَصْنَامْهَا
أَشَانْ هِي صَنَعَتْهُمْ
بِمَالْ أُجْرَةْ شَرْمَطَتْهَا.
وَ هَسَّعْ بِحَدِيدْ الْأَصْنَامْ دَوْل
يِأَجُّرُوا شَرَامِيطْ آخَرَاتْ.»
النواح لحِلّال بلد يَهُوذَا
8وَ فِي شَانْ دَا، أَنَا مِيخَا نَحْزَنْ
وَ نَبْكِي بِحِزِنْ
وَ نَمْشِي بَلَا نِعْلَيْ وَ عَرْيَانْ.
وَ نَبْكِي مِثِلْ الْبَعَشَوْم
وَ نِكِرّ مِثِلْ النَّعَامْ.
9مَرَضْ السَّامِرَةْ مَا عِنْدَهْ عِلَاجْ
وَ هُو لِحِقْ لَحَدِّي بَلَدْ يَهُوذَا.
وَ لِحِقْ بِيبَانْ مَدِينَةْ شَعَبِي
أَيْوَى، لِحِقْ أُسُطْ مَدِينَةْ الْقُدُسْ.
10مَا تِخَبُّرُوا عُدْوَانَّا فِي قَاتْ
وَ مَا تَبْكُوا قِدَّامْهُمْ.
وَ فِي بَيْت أَفْرَحْ،
أَلْمَرْمَغَوْا فِي الْعَجَاجْ مِنْ الْحِزِنْ.
11وَ سُكَّانْ شَافِيرْ، يِوَدُّوهُمْ فِي الْغُرْبَةْ
فِي الْعَيْب وَ الْعِرَيْ.
وَ سُكَّانْ صَنَانْ يَخَافَوْا،
مَا يَمُرْقُوا مِنْ حِلِّتْهُمْ.
نَاسْ بَيْت إِصَالْ يَبْكُوا مِنْ الْحِزِنْ
وَ مَا يَفْزَعَوْكُو.
12وَ سُكَّانْ مَرُوتْ يَخَافَوْا مِنْ خَيْرهُمْ يِوَدِّرْ
أَشَانْ الشَّرّ نَزَلْ مِنْ اللّٰهْ
وَ وَصَّلْ بِيبَانْ مَدِينَةْ الْقُدُسْ.
13يَا سُكَّانْ لَكِيشْ، أَرْبُطُوا عَرَبَاتْ الْحَرِبْ
فِي الْخَيْل
أَشَانْ إِنْتُو لَزَّيْتُوا فِي الذَّنِبْ
صَهْيُون الْمِثِلْ بِنَيَّةْ
وَ فِيكُو أَنْلَقَى عِصْيَانْ بَنِي إِسْرَائِيلْ.
14وَ فِي شَانْ دَا، وَاجِبْ إِنْتُو تِنْفَرْقُوا
مِنْ مُورَشَتْ قَاتْ.
وَ حِلَّةْ أَكْزِيبْ تَكْدِبْ،
مَا تِجِيبْ فَزَعْ لِمُلُوكْ إِسْرَائِيلْ.
15يَا سُكَّانْ مَرِيشَةْ،
نِجِيبْ لَيْكُو بَتَّانْ نَادُمْ يِشِيلْ بَلَدْكُو.
وَ كُبَارَاتْ بَنِي إِسْرَائِيلْ الْعِنْدُهُمْ شَرَفْ
يِعَرُّدُوا وَ يِلَّبَّدَوْا فِي عَدُلَّامْ.
16يَا مَدِينَةْ الْقُدُسْ الْمِثِلْ مَرَةْ،
أَقْطَعَيْ شَعَرْكِ وَ زَيِّنِي رَاسْكِ
أَشَانْ عِيَالْكِ التِّحِبِّيهُمْ.
أَبْقَيْ مُوَلِّعَةْ مِثِلْ الصَّقُرْ
أَشَانْ يِوَدُّوا عِيَالْكِ فِي الْغُرْبَةْ بَعِيدْ مِنْكِ.
Currently Selected:
مِيخا 1: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
