مَتَّى 19

الزواج و الطلاق

1وَ وَكِتْ عِيسَى كَمَّلْ كَلَامَهْ دَا، هُو قَمَّ مِنْ دَارْ الْجَلِيلْ. وَ مَشَى فِي دَارْ الْيَهُودِيَّةْ وَ قَطَعْ بَحَرْ الْأُرْدُنْ. 2وَ نَاسْ كَتِيرِينْ مَرَّةْ وَاحِدْ تَابَعَوْه. وَ فِي الْبَكَانْ دَا، هُو دَاوَى الْمَرْضَانِينْ الْمَعَاهُمْ.

3وَ فَرِيزِيِّينْ وَاحِدِينْ جَوْا لِعِيسَى أَشَانْ يِجَرُّبُوهْ. وَ سَأَلَوْه وَ قَالَوْا: «حَلَالْ لِرَاجِلْ يِطَلِّقْ مَرْتَهْ بِأَيِّ سَبَبْ وَلَّا؟» 4وَ هُو رَدَّ لَيْهُمْ وَ قَالْ: «مَا قَرَيْتُوا الْكِتَابْ؟ بُقُولْ: <فِي الْأَوَّلْ، اللّٰهْ خَلَقْ الْإِنْسَانْ. رَاجِلْ وَ مَرَةْ، هُو خَلَقَاهُمْ.>#19‏:4 الكلام دا تلقوه في تكوين 1‏:27. 5وَ بُقُولْ: <بِسَبَبْ دَا، أَيِّ رَاجِلْ يِخَلِّي أَمَّهْ وَ أَبُوهْ وَ يِلِمّ مَعَ مَرْتَهْ وَ النَّاسَيْن يَبْقَوْا جِسِمْ وَاحِدْ.>#19‏:5 الكلام دا تلقوه في تكوين 2‏:24. 6وَ بِمِثِلْ دَا، هُمَّنْ مَا نَاسَيْن بَتَّانْ أَشَانْ بِقَوْا جِسِمْ وَاحِدْ. اللّٰهْ بَسْ رَبَطَاهُمْ وَ مَا وَاجِبْ الْإِنْسَانْ يِفَرِّقْهُمْ.»

7وَ سَأَلَوْه وَ قَالَوْا: «كَنْ مِثِلْ كَيْ، كِكَّيْف مُوسَى أَمَرَانَا وَ قَالْ رَاجِلْ وَاجِبْ يَنْطِي مَكْتُوبْ هَنَا طَلَاقْ لِمَرْتَهْ وَكِتْ يِطَلِّقْهَا؟» 8وَ عِيسَى رَدَّ لَيْهُمْ وَ قَالْ: «مُوسَى أَنْطَاكُو إِذِنْ تِطَلُّقُوا عَوِينْكُو أَشَانْ رَاسْكُو قَوِي. وَ لَاكِنْ مَا مِثِلْ دَا فِي الْأَوَّلْ. 9وَ نُقُولْ لَيْكُو أَيِّ نَادُمْ الْيِطَلِّقْ مَرْتَهْ مَا بِسَبَبْ الزِّنَى وَ يَاخُدْ مَرَةْ آخَرَةْ، هُو زَانِي.»

10وَ تَلَامِيذَهْ قَالَوْا لَيَّهْ: «كَنْ حَالَةْ الرَّاجِلْ مَعَ مَرْتَهْ مِثِلْ دَا، أَخَيْر لِرَاجِلْ مَا يَاخُدْ!» 11وَ عِيسَى رَدَّ لَيْهُمْ وَ قَالْ: «مَا كُلَّ النَّاسْ يَقْدَرَوْا يَقْبَلَوْا كَلَامْكُو دَا، إِلَّا النَّاسْ الْاللّٰهْ أَنْطَاهُمْ. 12نَاسْ وَاحِدِينْ مَا يَاخُدُوا أَشَانْ مِنْ وِلْدَوْهُمْ هُمَّنْ مِثِلْ خَصِيِينْ. وَ نَاسْ وَاحِدِينْ مَا يَاخُدُوا أَشَانْ النَّاسْ خَصَوْهُمْ. وَ نَاسْ آخَرِينْ يَبْقَوْا مِثِلْ خَصِيِينْ أَشَانْ شَالَوْا نِيَّةْ يَخْدُمُوا لِمَمْلَكَةْ اللّٰهْ. خَلَاصْ، أَيِّ نَادُمْ الْيَقْدَرْ يَقْبَلْ الْكَلَامْ دَا، خَلِّي يَقْبَلَهْ.»

المسيح صلّى للعيال

13وَ بَعَدَيْن نَاسْ وَاحِدِينْ قَدَّمَوْا عِيَالْهُمْ الدُّقَاقْ لِعِيسَى أَشَانْ يُخُطّ إِيدَيْنَهْ فَوْقهُمْ وَ يِصَلِّي لَيْهُمْ. وَ تَلَامِيذَهْ هَرَجَوْهُمْ. 14وَ لَاكِنْ عِيسَى قَالْ: «خَلُّوا الْعِيَالْ يَجُوا لَيِّ وَ مَا تَدْحَرَوْهُمْ أَشَانْ مَمْلَكَةْ اللّٰهْ هَنَا النَّاسْ الْمِثِلْهُمْ.» 15وَ بَعَدْ خَطَّ إِيدَيْنَهْ فَوْقهُمْ، هُو فَاتْ مِنْ الْبَكَانْ دَا.

الصبي سيد المال

16وَ نَادُمْ وَاحِدْ جَاءْ لِعِيسَى سَأَلَهْ وَ قَالْ: «يَا سَيِّدْنَا، شُنُو الْعَمَلْ الْعَدِيلْ الْوَاجِبْ نِسَوِّيهْ أَشَانْ نَلْقَى الْحَيَاةْ الْأَبَدِيَّةْ؟» 17وَ عِيسَى رَدَّ لَيَّهْ وَ قَالْ: «مَالَا تَسْأَلْنِي بِالْعَمَلْ الْعَدِيلْ؟ وَاحِدْ بَسْ عَدِيلْ وَ هُو اللّٰهْ. وَ لَاكِنْ كَنْ تِدَوْر تَدْخُلْ فِي الْحَيَاةْ الْأَبَدِيَّةْ، طَبِّقْ الْوَصَايَا.» 18وَ الصَّبِي سَأَلَهْ وَ قَالْ: «وَيْن هُمَّنْ؟» وَ عِيسَى رَدَّ لَيَّهْ وَ قَالْ: «<مَا تَكْتُلْ دِمَّةْ وَ مَا تَزْنَى وَ مَا تَسْرِقْ وَ مَا تَشْهَدْ بِكِدِبْ. 19وَ كَرِّمْ أَمَّكْ وَ أَبُوكْ>#19‏:19 الكلام دا تلقوه في خُروج 20‏:12‏-16. وَ <حِبّ أَخُوكْ مِثِلْ تِحِبّ نَفْسَكْ.>»#19‏:19 الكلام دا تلقوه في لاوِيِّين 19‏:18.

20وَ الصَّبِي قَالْ: «مِنْ وَكِتْ أَنَا صَغَيَّرْ، نِتَابِعْ كُلَّ الْوَصَايَا دَوْل. وَ شُنُو قَصَّرْ لَيِّ؟» 21وَ عِيسَى رَدَّ لَيَّهْ وَ قَالْ: «كَنْ تِدَوْر تَبْقَى نَادُمْ بَلَا عَيْب، أَمْشِي بِيعْ كُلَّ شَيّءْ الْعِنْدَكْ وَ أَنْطِي تَمَنَهْ لِلْمَسَاكِينْ وَ مِثِلْ دَا، تَلْقَاهْ قِدَّامَكْ. وَ خَلَاصْ تَعَالْ تَابِعْنِي.»

22وَ وَكِتْ الصَّبِي سِمِعْ الْكَلَامْ دَا، هُو بِقِي حَزْنَانْ وَ فَاتْ أَشَانْ عِنْدَهْ مَالْ كَتِيرْ. 23وَ عِيسَى قَالْ لِتَلَامِيذَهْ: «نُقُولْ لَيْكُو الْحَقّ، الدَّخُولْ فِي مَمْلَكَةْ اللّٰهْ قَاسِي لِلنَّادُمْ الْعِنْدَهْ مَالْ كَتِيرْ. 24وَ بَتَّانْ نُقُولْ لَيْكُو، دَخُولْ الْجَمَلْ فِي قَدّ الْإِبْرَةْ هَيِّنْ مِنْ دَخُولْ سِيدْ الْمَالْ فِي مَمْلَكَةْ اللّٰهْ.»

25وَ التَّلَامِيذ أَلْعَجَّبَوْا بِلْحَيْن مِنْ الْكَلَامْ دَا وَ سَأَلَوْه وَ قَالَوْا: «كَنْ مِثِلْ دَا، يَاتُو يَقْدَرْ يَنْجَى؟» 26وَ عِيسَى شَافَاهُمْ عَدِيلْ وَ قَالْ لَيْهُمْ: «دَا قَاسِي مَرَّةْ وَاحِدْ لِلنَّاسْ وَ لَاكِنْ مَا فِي شَيّءْ قَاسِي لِلّٰهْ.»

27وَ بُطْرُسْ قَالْ: «وَ أَنِحْنَ، خَلَّيْنَا كُلَّ شَيّءْ الْعِنْدِنَا أَشَانْ نِتَابُعُوكْ. وَ أَنِحْنَ نَلْقَوْا شُنُو؟» 28عِيسَى رَدَّ لَيْهُمْ وَ قَالْ: «نُقُولْ لَيْكُو الْحَقّ، وَكِتْ أَنَا إِبْن الْإِنْسَانْ نَقْعُدْ فِي الْكُرْسِي الْعَظِيمْ فِي الزَّمَنْ الْفَوْقَهْ اللّٰهْ يِسَوِّي كُلَّ شَيّءْ جَدِيدْ، إِنْتُو التَّابَعْتُونِي تَقْعُدُوا فِي كَرَاسِي 12 وَ تَحْكُمُوا قَبَايِلْ بَنِي إِسْرَائِيلْ الْأَتْنَا عَشَرْ. 29وَ أَيِّ نَادُمْ الْقَمَّ فِي شَانْ أُسْمِي وَ خَلَّى بَيْتَهْ أَوْ أَخْوَانَهْ أَوْ أَخْوَاتَهْ أَوْ أَبُوهْ أَوْ أَمَّهْ أَوْ عِيَالَهْ أَوْ زِرَاعْتَهْ، اللّٰهْ يَنْطِيهْ 100 مَرَّةْ زِيَادَةْ وَ يَنْطِيهْ الْحَيَاةْ الْأَبَدِيَّةْ. 30وَ لَاكِنْ نَاسْ كَتِيرِينْ الْقَاعِدِينْ وَرَاءْ، يَبْقَوْا قِدَّامْ. وَ نَاسْ كَتِيرِينْ الْقَاعِدِينْ قِدَّامْ كَمَانْ يَبْقَوْا وَرَاءْ.»

Currently Selected:

مَتَّى 19: ع.د.ت19

Highlight

Copy