مَتَّى 14
14
مَوْت النبي يَحْيَى
1وَ فِي الْوَكِتْ دَاكْ، هِرُودُسْ مُحَافِظْ دَارْ الْجَلِيلْ سِمِعْ خَبَرْ عِيسَى. 2وَ قَالْ لِخَدَّامِينَهْ: «دَا يَحْيَى الْمُغَطِّسْ! هُو بَعَثْ مِنْ أُسْط الْمَيْتِينْ! أَشَانْ دَا بَسْ عِنْدَهْ الْقُدْرَةْ لِيِسَوِّي الْعَجَايِبْ.»
3وَ قَبُلْ دَا، هِرُودُسْ كَرَبْ يَحْيَى فِي السِّجِنْ وَ رَبَطَهْ بِجَنَازِيرْ فِي شَانْ مَرْتَهْ هِرُودِيَّةْ. وَ أَوَّلْ هِرُودِيَّةْ هِي مَرِةْ فِلِبُّسْ أَخُوهْ لِهِرُودُسْ 4وَ يَحْيَى قَالْ لَيَّهْ: «هِي مَا حَلَالَةْ لَيْك لِتَاخُدْهَا.» 5وَ هِرُودُسْ دَوَّرْ يَكْتُلْ يَحْيَى لَاكِنْ هُو خَايِفْ مِنْ زَعَلْ النَّاسْ أَشَانْ فِي فِكِرْهُمْ يَحْيَى نَبِي.
6وَ فِي يَوْم عِيدْ مَوْلِدْ هِرُودُسْ، قَاعِدِينْ يِعَيُّدُوا وَ بِنَيَّةْ هِرُودِيَّةْ لِعِبَتْ قِدَّامْهُمْ وَ هِرُودُسْ فَرْحَانْ بِلْحَيْن مِنْهَا. 7وَ هُو حَلَفْ يَنْطِيهَا أَيِّ شَيّءْ التَّطُلْبَهْ مِنَّهْ. 8وَ الْبِنَيَّةْ أَوَّلْ شَاوَرَتْ أَمَّهَا وَ بَعَدْ دَا، قَالَتْ: «أَنْطِينِي رَاسْ يَحْيَى الْمُغَطِّسْ هَسَّعْ هِنِي فِي صُفْرَةْ.»
9وَ الْمَلِكْ نِدِمْ لِحَلِيفْتَهْ الْحَلَفْهَا قِدَّامْ كُلَّ ضِيفَانَهْ وَ لَاكِنْ أَنْطَى إِذِنْ لِعَسْكَرَهْ يِجِيبُوهْ لَيْهَا. 10وَ عَسْكَرِي وَاحِدْ مَشَى فِي السِّجِنْ وَ قَطَعْ رَاسْ يَحْيَى. 11وَ جَابْ الرَّاسْ فِي صُفْرَةْ وَ أَنْطَاهْ لِلْبِنَيَّةْ وَ هِي وَدَّتَهْ لِأَمَّهَا. 12وَ تَلَامِيذ يَحْيَى جَوْا وَ شَالَوْا جَنَازْتَهْ وَ دَفَنَوْهَا وَ خَلَاصْ مَشَوْا أَوْرَوْا عِيسَى.
المسيح أنْطى أكِل لـ 5 000 ناس
13وَ عِيسَى سِمِعْ الْخَبَرْ دَا وَ رِكِبْ فِي الْمَرْكَبَةْ وَ مَشَى وِحَيْدَهْ فِي الْخَلَاءْ. وَ لَاكِنْ نَاسْ كَتِيرِينْ سِمْعَوْا هُو مَشَى هِنَاكْ وَ مَرَقَوْا مِنْ حِلَّالْهُمْ وَ مَشَوْا وَرَايَهْ بِرِجْلَيْهُمْ. 14وَ وَكِتْ عِيسَى دَلَّى مِنْ الْمَرْكَبَةْ، هُو شَافْ نَاسْ كَتِيرِينْ مَرَّةْ وَاحِدْ قَاعِدِينْ يَرْجَوْه وَ هُو حَنَّ فَوْقهُمْ وَ شَفَى الْمَرْضَانِينْ الْمَعَاهُمْ.
15وَ فِي الْعَشِيَّةْ التَّلَامِيذ جَوْا لَيَّهْ وَ قَالَوْا: «الْبَكَانْ دَا خَلَاءْ وَ الْوَكِتْ أَخَّرْ. خَلِّي النَّاسْ يَمْشُوا فِي الْحِلَّالْ وَ يَشْرُوا شَيّءْ يَاكُلُوهْ.» 16وَ لَاكِنْ عِيسَى قَالْ لِتَلَامِيذَهْ: «مَا وَاجِبْ لَيْهُمْ يَمْشُوا. إِنْتُو بَسْ أَنْطُوهُمْ أَكِلْ.» 17وَ قَالَوْا: «مَا عِنْدِنَا شَيّءْ إِلَّا خَمْسَةْ خُبْزَةْ وَ حُوتْ إِتْنَيْن بَسْ!» 18وَ عِيسَى قَالْ لَيْهُمْ: «جِيبُوهُمْ لَيِّ هِنِي.»
19وَ حَجَّى لِكُلَّ النَّاسْ وَ قَالْ: «أَقْعُدُوا تِحِتْ فِي الْقَشّ.» وَ شَالْ الْخَمْسَةْ خُبْزَةْ وَ الْحُوتْ الْإِتْنَيْن وَ رَفَعْ رَاسَهْ عَلَيْ السَّمَاءْ وَ شَكَرْ اللّٰهْ وَ كَسَّرْ الْخُبْزَةْ وَ أَنْطَاهُمْ لِتَلَامِيذَهْ وَ قَسَّمَوْهُمْ لِلنَّاسْ. 20وَ كُلَّ النَّاسْ أَكَلَوْا لَحَدِّي شِبْعَوْا. وَ خَلَاصْ التَّلَامِيذ لَمَّوْا الْأَكِلْ الْفَضَّلْ وَ مَلَوْا بَيَّهْ 12 قُفَّةْ. 21وَ عَدَدْ النَّاسْ الْأَكَلَوْا حَوَالَيْ 5 000 رُجَالْ. وَ دَا بَلَا الْعَوِينْ وَ الْعِيَالْ.
المسيح راغ في راس الألْمي
22وَ طَوَّالِي عِيسَى أَمَرْ التَّلَامِيذ يَرْكَبَوْا فِي الْمَرْكَبَةْ أَشَانْ يَقْطَعَوْا الْبَحَرْ وَ يَمْشُوا قِدَّامَهْ. وَ هُو يُقُولْ لِلنَّاسْ خَلِّي يَمْشُوا. 23وَ وَكِتْ النَّاسْ مَشَوْا خَلَاصْ، عِيسَى طَلَعْ فِي رَاسْ الْحَجَرْ لِيِصَلِّي وِحَيْدَهْ. وَ بَعَدْ الْمَغْرِبْ، هُو قَاعِدْ هِنَاكْ وِحَيْدَهْ.
24وَ مَرْكَبَةْ التَّلَامِيذ لِحْقَتْ أُسْط الْبَحَرْ وَ الرِّيحْ قَاعِدَةْ تُسُوقْ عَلَيْهُمْ مِنْ قِدَّامْ وَ الشَّلَّالْ قَاعِدْ يِهِزّ الْمَرْكَبَةْ. 25وَ بِوَرَدَّيْ، عِيسَى جَاءْ لَيْهُمْ رَايِغْ مِنْ فَوْق لِلْأَلْمِي. 26وَ وَكِتْ التَّلَامِيذ شَافَوْا عِيسَى رَايِغْ مِنْ فَوْق لِلْأَلْمِي، خَافَوْا خَوْف شَدِيدْ وَ قَالَوْا: «دَا ضُلّ!» وَ صَرَخَوْا مِنْ الْخَوْف. 27وَ طَوَّالِي عِيسَى حَجَّى لَيْهُمْ وَ قَالْ: «شِدُّوا حَيْلكُو، دَا أَنَا بَسْ. مَا تَخَافَوْا!»
28وَ بُطْرُسْ قَالْ لَيَّهْ: «سَيِّدْنَا! كَنْ صَحِيحْ دَا إِنْتَ، خَلَاصْ نَادِينِي أَشَانْ نَجِي لَيْك رَايِغْ مِنْ فَوْق لِلْأَلْمِي.» 29وَ عِيسَى قَالْ لَيَّهْ: «تَعَالْ!» وَ بُطْرُسْ دَلَّى مِنْ الْمَرْكَبَةْ وَ بَدَا يَمْشِي لِعِيسَى رَايِغْ مِنْ فَوْق لِلْأَلْمِي. 30وَ لَاكِنْ وَكِتْ بُطْرُسْ حَسَّ قُدْرَةْ الرِّيحْ، هُو خَافْ بِلْحَيْن وَ بَدَا يَطْمُسْ. وَ صَرَخْ وَ قَالْ: «سَيِّدْنَا! نَجِّينِي!» 31وَ عِيسَى مَدَّ إِيدَهْ عَجَلَةْ وَ كَرَبَهْ وَ قَالْ: «إِيمَانَكْ لِسَّاعْ ضَعِيفْ. مَالَا شَكَّكْت؟» 32وَ وَكِتْ رِكْبَوْا فِي الْمَرْكَبَةْ، خَلَاصْ الرِّيحْ وَقَفَتْ. 33وَ فِي الْمَرْكَبَةْ التَّلَامِيذ جَوْا سَجَدَوْا لَيَّهْ وَ قَالَوْا: «صَحِيحْ، إِنْتَ إِبْن اللّٰهْ!»
34وَ وَكِتْ قَطَعَوْا الْبَحَرْ خَلَاصْ، نَزَلَوْا فِي بَلَدْ قِنِّيْسَرَتْ. 35وَ نَاسْ الْبَكَانْ دَاكْ عِرْفَوْا عِيسَى وَ بَلَّغَوْا الْخَبَرْ دَا فِي كُلَ بَلَدْهُمْ وَ جَابَوْا لَيَّهْ كُلَّ الْمَرْضَانِينْ. 36وَ شَحَدَوْا عِيسَى أَشَانْ يَلْمَسَوْا طَرَفْ خَلَقَهْ وَ كُلَّ نَادُمْ اللِّمْسَهْ لِقِي الْعَافَيْ.
Currently Selected:
مَتَّى 14: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019