حَبَقُوق 1
1
1دَاهُو كَلَامْ الْمُحَاكَمَةْ الْجَاءْ لِلنَّبِي حَبَقُوقْ فِي رُؤْيَةْ.
النبي دوّر الفزع من اللّه
2يَا اللّٰهْ، أَنَا كَوْرَكْت لَيْك
وَ مَتَى إِنْتَ تَسْمَعْنِي؟
وَ أَنَا صَرَخْت لَيْك مِنْ الْعُنُفْ
وَ مَتَى إِنْتَ تِنَجِّينِي؟
3مَالَا تِوَصِّفْنِي الْفَسَالَةْ
وَ التَّعَبْ؟
وَ هَلْ تِشِيفْ الْخَرَابْ وَ الْعُنُفْ
الْقَاعِدِينْ دَايْماً قِدَّامِي؟
وَ الْمَشَاكِلْ وَ الْهُرَاجْ كُلَ زَادَوْا.
4وَ أَشَانْ دَا، مَا طَبَّقَوْا شُرُوطْ التَّوْرَاةْ
وَ الْعَدَالَةْ أَبَداً مَا تِنْشَافْ.
وَ الْعَاصِي قِدِرْ فِي الصَّالِحْ
وَ أَشَانْ دَا بَسْ، الشَّرِيعَةْ بِقَتْ عَوْجَةْ.
عسْكر بَابِل يقُمّوا ضِدّ الشعب
5«يَا شَعَبِي، شِيفُوا بَيْن الْأُمَمْ
وَ أَلْعَجَّبَوْا وَ أَخَافَوْا.
أَشَانْ فِي وَكِتْكُو دَا،
أَنَا نِسَوِّي فَوْقكُو شَيّءْ
وَ كَنْ حَجَّوْكُو بَيَّهْ،
مَا تِصَدُّقُوهْ.
6دَاهُو أَنَا نِقَوِّمْ عَسْكَرْ بَابِلْ#1:6 عَسْكَرْ بَابِلْ: التاريخ دا تلقوه في 2 مُلوك 24:2.
وَ هُمَّنْ نَاسْ قَلِبْهُمْ مُرّ
وَ مَا عِنْدُهُمْ صَبُرْ.
يَمْشُوا فِي كُلَّ بَكَانْ فِي الْأَرْض
وَ يَقْلَعَوْا بُيُوتْ الْمَا هِنَيْهُمْ.
7هُمَّنْ نَاسْ شُدَادْ وَ بِخَوُّفُوا.
يُخُطُّوا شَرِيعِتْهُمْ
وَ يِكَبُّرُوا نُفُوسْهُمْ.
8خَيْلهُمْ عَجِيلِينْ مِثِلْ النُّمُورَةْ
وَ سَرِيعِينْ مِثِلْ مَرَافْعِينْ الْمَغْرِبْ.
وَ سِيَادْ الْخَيْل دَوْل
جَايِينْ مِنْ بَعِيدْ.
يِطِيرُوا مِثِلْ الصَّقُرْ
الْيِدَوْر يَضْرُبْ صَيْدِتَهْ.
9كُلَّ الشَّعَبْ مَاطِّينْ رِقَابْهُمْ قِدَّامْ
وَ جَارِيِينْ لِلْعُنُفْ.
وَ يَكُرْبُوا نَاسْ عَبِيدْ
وَ يِلِمُّوهُمْ كَتِيرِينْ مِثِلْ الرَّمْلَةْ.
10وَ يَحْقُرُوا الْمُلُوكْ
وَ يِشَّمَّتَوْا لِلْحُكَّامْ.
وَ يَضْحَكَوْا لِلْمُدُنْ الْقَوِيِّينْ
وَ يِحَوُّقُوهُمْ بِرَدْمِيَّةْ
وَ يِشِيلُوهُمْ.
11وَ يَجُوا وَ يُفُوتُوا
مِثِلْ الرِّيحْ.
فِي خَطَاهُمْ، يِشِيفُوا قُوِّتْهُمْ
مِثِلْ إِلٰـهُّمْ.»
النبي بتان نادى اللّه
12وَ مِنْ زَمَانْ،
إِنْتَ بَسْ مَا اللّٰهْ إِلٰـهِي الْقُدُّوسْ؟
أَشَانْ دَا، أَنِحْنَ مَا نُمُوتُوا.
يَا اللّٰهْ، إِنْتَ كَلَّفْت الْعَسْكَرْ دَوْل
لِيِحَاكُمُونَا.
يَا جَبَلْنَا الْيَحْمِينَا،
إِنْتَ بَسْ جِبْتُهُمْ لِيِعَاقُبُونَا.
13وَ لَاكِنْ إِنْتَ قُدُّوسْ!
مَا تَقْدَرْ تِشِيفْ الشَّرّ
وَ لَا تَحْمَلْ تِشِيفْ التَّعَبْ يَجِي فِي شَعَبَكْ.
وَ مَالَا إِنْتَ تِشِيفْ
الْخَايْنِينْ دَوْل؟
وَ مَالَا تَسْكُتْ
وَكِتْ الشَّرِيرْ يَزْرُطْ الصَّالِحْ
الْهُو أَخَيْر مِنَّهْ؟
14إِنْتَ سَوَّيْت بَنِي آدَم
مِثِلْ حُوتْ الْبَحَرْ
وَ مِثِلْ الزَّوَاحِفْ الْمَا عِنْدُهُمْ سِيدْ.
15وَ الْعَدُو يَرْمِيهُمْ فِي شَرَكَهْ
وَ يَمْرُقْهُمْ كُلُّهُمْ بِالْجَنْبَاتْ
وَ يِلِمُّهُمْ فِي شَبَكَتَهْ.
وَ خَلَاصْ، يَفْرَحْ
وَ يِنْبَسِطْ.
16وَ فِي شَانْ دَا، هُو دَبَحْ ضَحِيَّةْ لِشَرَكَهْ
وَ حَرَّقْ بَخُورْ لِشَبَكَتَهْ.
أَشَانْ بَيْهُمْ بَسْ، هُو كَبَّرْ قِسْمَهْ
وَ كَتَّرْ مَعَاشَهْ.
17وَ بَيْدَا، يَمْرُقْ سَيْفَهْ مِنْ بَيْتَهْ
وَ يَكْتُلْ الْأُمَمْ بَلَا مَحَنَّةْ إِلَى الْأَبَدْ.
Currently Selected:
حَبَقُوق 1: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
