تكوين 12
12
أَبْرَام حوّل من بلده
1وَ بَعَدْ دَا، اللّٰهْ قَالْ لِأَبْرَامْ: «أَمْرُقْ مِنْ بَلَدَكْ وَ مِنْ أَهَلَكْ وَ حَوِّلْ مِنْ بَيْت أَبُوكْ وَ أَمْشِي فِي الْبَلَدْ النِّوَصِّفْهَا لَيْك. 2أَنَا نِسَوِّيكْ أَبُو هَنَا أُمَّةْ كَبِيرَةْ وَ نِبَارِكَكْ وَ أُسْمَكْ يَبْقَى طَالِعْ. وَ تَبْقَى بَرَكَةْ كَبِيرَةْ لِنَاسْ كَتِيرِينْ. 3وَ نِبَارِكْ النَّاسْ الْيِبَارُكُوكْ وَ نَلْعَنْ النَّاسْ الْيَلْعَنَوْك. وَ بِسَبَبَكْ إِنْتَ، كُلَّ قَبَايِلْ الْأَرْض يَلْقَوْا بَرَكَةْ.»
4خَلَاصْ، أَبْرَامْ حَوَّلْ مِثِلْ اللّٰهْ قَالَهْ لَيَّهْ. وَ لُوطْ كُلَ مَشَى مَعَايَهْ. وَكِتْ أَبْرَامْ مَرَقْ مِنْ حِلَّةْ حَارَانْ، عُمْرَهْ 75 سَنَةْ. 5وَ شَالْ مَعَايَهْ مَرْتَهْ سَارَايْ وَ لُوطْ وِلَيْد أَخُوهْ وَ كُلَّ الْمَالْ وَ الْعَبِيدْ الشَّرَاهُمْ فِي حِلَّةْ حَارَانْ. وَ خَلَاصْ، شَالَوْا دَرِبْ بَلَدْ كَنْعَانْ.
أَبْرَام في بلد كَنْعَان و مَصِر
وَكِتْ وَصَّلَوْا فِي بَلَدْ كَنْعَانْ، 6أَبْرَامْ شَقَّ الْبَلَدْ لَحَدِّي وِصِلْ فِي الشَّدَرَةْ الْكَبِيرَةْ الْقَاعِدَةْ فِي حِلَّةْ مَوْرَةْ فِي تُرَابْ شَكِيمْ. وَ فِي الْوَكِتْ دَا، الْكَنْعَانِيِّينْ سَاكْنِينْ فِي الْبَلَدْ دِي. 7وَ اللّٰهْ بَانْ لِأَبْرَامْ وَ قَالْ: «الْبَلَدْ دِي نَنْطِيهَا لِذُرِّيّتَكْ.» وَ فِي الْبَكَانْ دَا، أَبْرَامْ بَنَى مَدْبَحْ لِيِقَدِّمْ فَوْقَهْ ضَحَايَا لِلّٰهْ الْبَانْ لَيَّهْ.
8وَ بَعَدْ دَا، أَبْرَامْ مَشَى عَلَيْ الْحُجَارْ الْقَاعِدِينْ صَبَاحْ لِحِلَّةْ بَيْت إِيلْ وَ سَوَّى فَرِيقَهْ غَرِبْ لِحِلَّةْ عَايْ وَ صَبَاحْ لِبَيْت إِيلْ. وَ هِنَاكْ كُلَ بَنَى مَدْبَحْ لِلّٰهْ وَ سَأَلْ بِأُسُمْ اللّٰهْ. 9وَ أَبْرَامْ قَاعِدْ يَرْحَلْ شِيَّةْ شِيَّةْ عَلَيْ الْجُنُوبْ.
10وَ بَعَدْ دَا، الْجُوعْ دَخَلْ فِي الْبَلَدْ دِي. وَ أَبْرَامْ مَشَى فِي مَصِرْ لِيَقْعُدْ مُدَّةْ هِنَاكْ أَشَانْ الْجُوعْ بِقِي شَدِيدْ. 11وَ وَكِتْ قَرَّبَوْا لِمَصِرْ، أَبْرَامْ قَالْ لِمَرْتَهْ سَارَايْ: «أَسْمَعَيْ! أَنَا نَعَرِفْ كَدَرْ إِنْتِ مَرَةْ سَمْحَةْ بِلْحَيْن. 12وَ كَنْ الْمَصْرِيِّينْ شَافَوْكِ، يُقُولُوا: ‹هِي دِي مَرْتَهْ.› وَ يَكْتُلُونِي وَ يِشِيلُوكِ. 13أَشَانْ دَا، نَطْلُبْ مِنْكِ قُولِي لَيْهُمْ إِنْتِ أَخْتِي. وَ بَيْدَا، يَكُرْبُونِي عَدِيلْ فِي شَانْكِ وَ مَا يَكْتُلُونِي.»
14وَ وَكِتْ أَبْرَامْ وِصِلْ فِي مَصِرْ، الْمَصْرِيِّينْ شَافَوْا مَرِةْ أَبْرَامْ سَمْحَةْ بِلْحَيْن. 15خَلَاصْ، مَسْؤُولِينْ هَنَا فِرْعَوْن مَلِكْ مَصِرْ شَافَوْهَا وَ شَكَرَوْا سَمَاحْهَا لِلْمَلِكْ وَ مَشَوْا شَالَوْهَا وَ وَدَّوْهَا لَيَّهْ فِي قَصْرَهْ. 16فِي شَانْ الْمَرَةْ دِي، فِرْعَوْن كَرَبْ أَبْرَامْ عَدِيلْ وَ أَنْطَاهْ غَنَمْ وَ بَقَرْ وَ حَمِيرْ أَنَاتِي وَ دُكُورْ وَ عَبِيدْ وَ خَدِيمْ وَ جُمَالْ.
17وَ لَاكِنْ اللّٰهْ نَزَّلْ وَبَاءْ شَدِيدْ فِي فِرْعَوْن مَلِكْ مَصِرْ وَ نَاسْ بَيْتَهْ فِي شَانْ سَارَايْ مَرِةْ أَبْرَامْ. 18-19وَ خَلَاصْ، فِرْعَوْن نَادَى أَبْرَامْ وَ قَالْ لَيَّهْ: «دَا شُنُو الْإِنْتَ سَوَّيْتَهْ لَيِّ دَا؟ وَ مَالَا مَا أَوْرَيْتنِي كَدَرْ هِي مَرْتَكْ؟ وَ مَالَا قُلْت لَيِّ هِي أَخْتَكْ؟ أَشَانْ دَا بَسْ، أَنَا شِلْتَهَا لِتَبْقَى لَيِّ مَرَةْ! خَلَاصْ! دِي هِي مَرْتَكْ! شِيلْهَا وَ يَلَّا فُوتْ!» 20وَ فِرْعَوْن أَمَرْ نَاسَهْ يِعَدُّوا أَبْرَامْ وَ مَرْتَهْ وَ كُلَّ مَالَهْ. وَ خَلَاصْ، هُمَّنْ مَرَقَوْا مِنْ مَصِرْ.
Currently Selected:
تكوين 12: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
