2 صَمُوِيل 5
5
دَاوُد بِقي ملك في كل إسرائيل
1وَ كُلَّ قَبَايِلْ بَنِي إِسْرَائِيلْ جَوْا لِدَاوُدْ فِي حِبْرُونْ وَ قَالَوْا لَيَّهْ: «شِيفْ! أَنِحْنَ مِنْ دَمَّكْ وَ لَحَمَكْ. 2وَ زَمَانْ وَكِتْ شَاوُولْ مَلِكْنَا، إِنْتَ قَاعِدْ تُقُودْ دَيْش بَنِي إِسْرَائِيلْ. وَ فِي الْوَكِتْ دَاكْ بَسْ، اللّٰهْ قَالْ لَيْك: ‹إِنْتَ تَبْقَى رَاعِي لِشَعَبِي بَنِي إِسْرَائِيلْ وَ تَحْكِمْ فَوْقهُمْ.›»
3وَ كُلَّ شُيُوخْ بَنِي إِسْرَائِيلْ جَوْا لِدَاوُدْ فِي حِبْرُونْ وَ هُو سَوَّى مَعَاهُمْ مُعَاهَدَةْ قِدَّامْ اللّٰهْ. وَ هُمَّنْ مَسَحَوْه وَ دَرَّجَوْه مَلِكْ فِي بَنِي إِسْرَائِيلْ.
4وَ دَاوُدْ عِنْدَهْ 30 سَنَةْ وَكِتْ بِقِي مَلِكْ وَ حَكَمْ 40 سَنَةْ. 5وَ هُو حَكَمْ فِي بَنِي يَهُوذَا 7 سَنَةْ وَ نُصّ فِي حِبْرُونْ. وَ بَعَدْ دَا، حَكَمْ فِي كُلَّ بَنِي إِسْرَائِيلْ وَ بَنِي يَهُوذَا 33 سَنَةْ فِي أُورُشَلِيمْ.
دَاوُد شال حِلّة أُورُشَلِيم
6وَ يَوْم وَاحِدْ، دَاوُدْ وَ نَاسَهْ قَمَّوْا مِنْ حِبْرُونْ وَ مَشَوْا أُورُشَلِيمْ لِيِحَارُبُوا الْيَبُوسِيِّينْ السَّاكْنِينْ فِيهَا. وَ الْيَبُوسِيِّينْ قَالَوْا لِدَاوُدْ: «إِنْتَ مَا تَقْدَرْ تَدْخُلْ فِي الْحِلَّةْ دِي! حَتَّى الْعَمْيَانِينْ وَ الْمُكَرْسَحِينْ كُلَ يَقْدَرَوْا يَدْحَرَوْك.» وَ بِالْكَلَامْ دَا، هُمَّنْ يَحْسُبُوا دَاوُدْ مَا يَقْدَرْ يِشِيلْ الْحِلَّةْ. 7وَ بَيْدَا كُلَ، دَاوُدْ شَالْ بَكَانْهُمْ الْقَوِي الْأُسْمَهْ صَهْيُون. وَ الْبَكَانْ دَا، سَمَّوْه مَدِينَةْ دَاوُدْ.
8وَ فِي الْيَوْم دَا، دَاوُدْ قَالْ لِنَاسَهْ: «كَنْ أَيِّ نَادُمْ يِدَوْر يَهْجِمْ الْيَبُوسِيِّينْ، خَلِّي يَدْخُلْ لَيْهُمْ بِالْمَجْرَةْ الْيَدْخُلْ بَيَّهْ الْأَلْمِي الْفِي تِحِتْ الْأَرْض وَ يَلْحَقْهُمْ. وَ كَنْ لِلْمُكَرْسَحِينْ وَ الْعَمْيَانِينْ دَوْل، أَنَا نَكْرَهُّمْ.» وَ فِي شَانْ دَا، الْمَثَلْ بُقُولْ: «الْعَمْيَانِينْ وَ الْمُكَرْسَحِينْ مَا يَدْخُلُوا بَيْت اللّٰهْ.»
9وَ دَاوُدْ سَكَنْ فِي الْبَكَانْ الْقَوِي دَا وَ سَمَّاهْ مَدِينَةْ دَاوُدْ. وَ بَعَدْ دَا، بَنَى دُرْدُرْ الدِّفَاعْ السَّمَّوْه مِلُّو الْقَاعِدْ أَمْبَيْن الزِّرَاعَةْ وَ مَسْكَنَهْ. 10وَ قُدْرَةْ دَاوُدْ قَاعِدَةْ تِزِيدْ بِزِيَادَةْ أَشَانْ اللّٰهْ الْإِلٰـهْ الْقَادِرْ قَاعِدْ مَعَايَهْ.
11وَ حِيرَامْ مَلِكْ بَلَدْ صُورْ رَسَّلْ نَاسْ لِدَاوُدْ وَ وَدَّوْا لَيَّهْ حَطَبْ الْأَرْز. وَ رَسَّلْ نَجَّارِينْ الْحَطَبْ وَ نَاسْ الْيَقْطَعَوْا الْحَجَرْ لِيَبْنُوا بَيْت لِدَاوُدْ. 12وَ بَيْدَا، دَاوُدْ عِرِفْ كَدَرْ اللّٰهْ ثَبَّتَهْ مَلِكْ فِي بَنِي إِسْرَائِيلْ. وَ اللّٰهْ زَادْ دَرَجَةْ مُلْكَهْ فِي شَانْ شَعَبَهْ بَنِي إِسْرَائِيلْ.
أسامَي أوْلاد دَاوُد
13وَ وَكِتْ دَاوُدْ قَمَّ مِنْ حِبْرُونْ وَ جَاءْ فِي أُورُشَلِيمْ، أَخَدْ عَوِينْ آخَرَاتْ وَ شَالْ سِرِّيَّاتْ. وَ هِنَّ وِلْدَنْ لَيَّهْ أَوْلَادْ وَ بَنَاتْ. 14وَ دَاهُو أَسَامَيْ أَوْلَادْ دَاوُدْ الْوِلْدَوْهُمْ لَيَّهْ فِي أُورُشَلِيمْ. هُمَّنْ شَمُّوعْ وَ شُوبَابْ وَ نَاتَانْ وَ سُلَيْمَانْ 15وَ يِبْحَارْ وَ أَلِشُوعْ وَ نَفَقْ وَ يَفِيعَ 16وَ أَلِشَمَعْ وَ أَلِيَادَعْ وَ أَلِفَالَطْ.
دَاوُد أنّصر في الفِلِسْطيّين
17وَ وَكِتْ الْفِلِسْطِيِّينْ سِمْعَوْا كَدَرْ دَاوُدْ مَسَحَوْه وَ دَرَّجَوْه مَلِكْ فِي بَنِي إِسْرَائِيلْ، كُلُّهُمْ قَمَّوْا مَشَوْا لِيِفَتُّشُوهْ. وَ لَاكِنْ دَاوُدْ سِمِعْ بَيْهُمْ وَ مَشَى قَعَدْ فِي بَكَانَهْ الْقَوِي. 18وَ الْفِلِسْطِيِّينْ جَوْا لِلْحَرِبْ وَ رَصَّوْا فِي وَادِي رَفَايِينْ. 19وَ دَاوُدْ سَأَلْ اللّٰهْ وَ قَالْ: «نَمْشِي نِحَارِبْ الْفِلِسْطِيِّينْ وَلَّا؟ إِنْتَ تِسَلِّمْهُمْ فِي إِيدِي وَلَّا؟» وَ اللّٰهْ رَدَّ لِدَاوُدْ وَ قَالْ: «أَمْشِي حَارِبْهُمْ وَ أَكِيدْ أَنَا نِسَلِّمْهُمْ لَيْك فِي إِيدَكْ.»
20وَ دَاوُدْ مَشَى حِلَّةْ بَعَلْ فَرَاصِيمْ وَ حَارَبَاهُمْ لِلْفِلِسْطِيِّينْ هِنَاكْ وَ أَنَّصَرْ فَوْقهُمْ. وَ قَالْ: «اللّٰهْ فَتَحْ لَيِّ دَرِبْ وَ ضَرَبْت عُدْوَانِي مِثِلْ السَّيْل.» وَ بِسَبَبْ دَا بَسْ، الْبَكَانْ دَا سَمَّوْه بَعَلْ فَرَاصِيمْ (مَعَنَاتَهْ الرَّبّ الضَّرَبْ). 21وَ الْفِلِسْطِيِّينْ خَلَّوْا أَصْنَامْهُمْ فِي الْبَكَانْ دَا وَ دَاوُدْ وَ نَاسَهْ شَالَوْهُمْ.
22وَ بَتَّانْ الْفِلِسْطِيِّينْ جَوْا لِلْحَرِبْ وَ رَصَّوْا فِي وَادِي رَفَايِينْ. 23وَ دَاوُدْ سَأَلْ اللّٰهْ. وَ اللّٰهْ قَالْ لَيَّهْ: «مَا تَمْشِي تَهْجِمْهُمْ بِقِدَّامْ لَاكِنْ حَوِّقْ لَيْهُمْ بِوَرَاءْ مِنْ جِيهَةْ الشَّدَرْ وَ قَرِّبْ لَيْهُمْ. 24وَ وَكِتْ سِمِعْت حَرَكَةْ مِثِلْ خَطْوَاتْ الرِّجِلْ فِي رَاسْ الشَّدَرْ، طَوَّالِي أَمْشِي أَهْجِمْهُمْ! أَشَانْ اللّٰهْ مَشَى قِدَّامَكْ لِيَضْرُبْ عَسْكَرْ الْفِلِسْطِيِّينْ.»
25وَ دَاوُدْ سَوَّى كُلَّ شَيّءْ مِثِلْ اللّٰهْ أَمَرَهْ بَيَّهْ. وَ خَلَاصْ، حَارَبْ الْفِلِسْطِيِّينْ وَ طَرَدَاهُمْ مِنْ حِلَّةْ قَبَعْ لَحَدِّي مَدَخَلْ حِلَّةْ قَازَرْ.
Currently Selected:
2 صَمُوِيل 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
