2 صَمُوِيل 24
24
دَاوُد حسب شعب بني إسرائيل
1وَ يَوْم وَاحِدْ، اللّٰهْ غِضِبْ بَتَّانْ لِبَنِي إِسْرَائِيلْ وَ لَزَّ دَاوُدْ يِسَوِّي شَيّءْ الْمَا بِوَافِقْ وَ قَالْ لَيَّهْ: «قُمّ أَحْسِبْ بَنِي إِسْرَائِيلْ وَ بَنِي يَهُوذَا.» 2وَ خَلَاصْ، الْمَلِكْ دَاوُدْ قَالْ لِيُوَابْ قَايِدْ دَيْشَهْ: «أَمْشِي فِي كُلَّ قَبَايِلْ بَنِي إِسْرَائِيلْ مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي وَ أَحْسِبْ كُلَّ الشَّعَبْ لِنَعَرِفْ عَدَدْهُمْ.» 3وَ يُوَابْ قَالْ لِلْمَلِكْ: «خَلِّي اللّٰهْ إِلٰـهَكْ يِزِيدْ عَدَدْ الشَّعَبْ مِيَةْ مَرَّةْ وَ خَلِّي إِنْتَ سِيدِي الْمَلِكْ تِشِيفَهْ بِعَيْنَكْ. وَ لَاكِنْ مَالَا، يَا سِيدِي الْمَلِكْ، تِدَوْر تِسَوِّي الشَّيّءْ دَا؟»
4وَ لَاكِنْ أَمُرْ الْمَلِكْ بِقِي شَدِيدْ بِلْحَيْن فِي يُوَابْ وَ الْقُيَّادْ الْآخَرِينْ هَنَا الدَّيْش. وَ خَلَاصْ، هُمَّنْ مَرَقَوْا مِنْ بَكَانْ الْمَلِكْ لِيَمْشُوا يَحْسُبُوا شَعَبْ بَنِي إِسْرَائِيلْ. 5هُمَّنْ شَقَّوْا بَحَرْ الْأُرْدُنْ وَ مَشَوْا فِي حِلَّةْ عَرُوعِرْ وَ الْحِلَّةْ دِي قَاعِدَةْ فِي أُسْط الْوَادِي. وَ مَشَوْا لِقَبِيلَةْ قَادْ وَ وَجَّهَوْا عَلَيْ حِلَّةْ يَعْزِيرْ. 6وَ وَصَّلَوْا حِلَّةْ قِلْعَادْ فِي مَنْطَقَةْ تَحْتِيمْ قَادِشْ وَ مَشَوْا لَحَدِّي دَانْ يَعَنْ وَ عَلَيْ حَوَالَيْ صَيْدَا. 7وَ دَخَلَوْا فِي صُورْ الْمَدِينَةْ الْقَوِيَّةْ وَ فِي كُلَّ مُدُنْ الْحِوِّيِّينْ وَ الْكَنْعَانِيِّينْ. وَ فِي الْآخِرْ، مَشَوْا وَطِي بَلَدْ يَهُوذَا فِي حِلَّةْ بِيرْ سَبْعَةْ. 8وَ بَعَدْ رَاغَوْا فِي كُلَّ الْبَلَدْ فِي مُدَّةْ 9 شَهَرْ وَ 20 يَوْم، قَبَّلَوْا فِي أُورُشَلِيمْ.
9وَ خَلَاصْ، يُوَابْ أَنْطَى عَدَدْ حِسَابْ الشَّعَبْ لِلْمَلِكْ. وَ رُجَالْ بَنِي إِسْرَائِيلْ عَدَدْهُمْ 800 000 عَسْكَرْ الْيَعَرْفُوا حَرْب السُّيُوفْ وَ مِنْ بَنِي يَهُوذَا كَمَانْ 500 000. 10وَ بَعَدْ حَسَبْ الشَّعَبْ، طَوَّالِي دَاوُدْ هَسَّعْ قَلْبَهْ قَاعِدْ يَضْرُبْ. وَ قَالْ: «أَنَا سَوَّيْت ذَنِبْ كَبِيرْ أَشَانْ حَسَبْت الشَّعَبْ. هَسَّعْ دَا، يَا اللّٰهْ، أَغْفِرْ لَيِّ خَطَايِ أَنَا عَبْدَكْ. أَشَانْ أَنَا سَوَّيْت الشَّيّءْ دَا مِثِلْ نَادُمْ مَطْمُوسْ.»
11وَ وَكِتْ دَاوُدْ قَمَّ بِفَجُرْ، اللّٰهْ حَجَّى لِلنَّبِي قَادْ الْيِشِيفْ رُؤْيَةْ لِدَاوُدْ وَ قَالْ لَيَّهْ: 12«أَمْشِي قُولْ لِدَاوُدْ: ‹دَاهُو اللّٰهْ قَالْ: ”أَنَا نِنَزِّلْ لَيْك تَلَاتَةْ نَفَرْ هَنَا مَصَايِبْ. وَ أَعَزِلْ مِنْهُمْ وَاحِدْ وَ أَنَا نِنَزِّلَهْ.“›»
13وَ خَلَاصْ، قَادْ مَشَى لِدَاوُدْ وَ قَالْ لَيَّهْ: «تِدَوْر سَبْعَةْ سَنَةْ هَنَا جُوعْ فِي بَلَدَكْ؟ أَوْ تِدَوْر تَجْرِي قِدَّامْ عُدْوَانَكْ وَ هُمَّنْ يَطُرْدُوكْ لِمُدَّةْ تَلَاتَةْ شَهَرْ؟ أَوْ تِدَوْر وَبَاءْ يَنْزِلْ لِمُدَّةْ تَلَاتَةْ يَوْم فِي بَلَدَكْ؟ هَسَّعْ دَا، فَكِّرْ وَ أَوْرِينِي الرَّدّ النُّقُولَهْ لِلّٰهْ الرَّسَّلَانِي.» 14وَ دَاوُدْ قَالْ لِقَادْ: «أَنَا أَضَّايَقْت مَرَّةْ وَاحِدْ! خَلِّي نَقَعْ فِي إِيدْ اللّٰهْ أَشَانْ رَحْمَتَهْ وَسِيعَةْ. وَ خَلِّي مَا نَقَعْ فِي إِيدْ إِنْسَانْ.»
15وَ خَلَاصْ، اللّٰهْ نَزَّلْ وَبَاءْ فِي بَلَدْ إِسْرَائِيلْ. وَ مِنْ الْفَجُرْ لَحَدِّي الْوَكِتْ الْمُحَدَّدْ، مَاتَوْا 70 000 نَاسْ مِنْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي. 16وَ الْمَلَكْ الْمُدَمِّرْ مَدَّ إِيدَهْ عَلَيْ أُورُشَلِيمْ لِيِدَمِّرْهَا. لَاكِنْ اللّٰهْ مَا دَوَّرْ الدَّمَارْ دَا وَ قَالْ لِلْمَلَكْ: «خَلَاصْ، كَفَى! أَرْفَعْ إِيدَكْ.» وَ الْمَلَكْ دَا قَاعِدْ فِي الْمَدَقّ هَنَا أَرَوْنَى الْيَبُوسِي. 17وَ وَكِتْ دَاوُدْ شَافْ الْمَلَكْ الْكَتَلْ الشَّعَبْ دَا، قَالْ لِلّٰهْ: «أَنَا بَسْ أَذْنَبْت وَ سَوَّيْت الْخَطَا دَا. لَاكِنْ الشَّعَبْ دَوْل الْمِثِلْ الْغَنَمْ سَوَّوْا شُنُو؟ عَاقِبْنِي أَنَا وَ عَايِلْتِي.»
18وَ فِي نَفْس الْيَوْم دَا، النَّبِي قَادْ مَشَى لِدَاوُدْ وَ قَالْ لَيَّهْ: «أَمْشِي أَبْنِي مَدْبَحْ لِلّٰهْ فِي الْمَدَقّ هَنَا أَرَوْنَى الْيَبُوسِي.» 19وَ خَلَاصْ، دَاوُدْ مَشَى مِثِلْ اللّٰهْ أَمَرَهْ بَيَّهْ بِوَاسِطَةْ النَّبِي قَادْ. 20وَ وَكِتْ أَرَوْنَى رَفَعْ رَاسَهْ وَ شَافْ الْمَلِكْ وَ خَدَّامِينَهْ جَايِينْ عَلَيَّهْ، هُو جَاءْ وَ وَقَعْ فِي الْأَرْض وَ سَجَدْ قِدَّامْ الْمَلِكْ. 21وَ قَالْ: «مَالَا سِيدِي الْمَلِكْ جَايِ بَكَانْ عَبْدَهْ؟» وَ دَاوُدْ رَدَّ لَيَّهْ وَ قَالْ: «أَنَا جِيتْ لِنَشْرِي مِنَّكْ الْمَدَقّ وَ نَبْنِي فَوْقَهْ مَدْبَحْ لِلّٰهْ أَشَانْ الْوَبَاءْ دَا يَقِيفْ مِنْ الشَّعَبْ.» 22وَ أَرَوْنَى قَالْ بَتَّانْ لِدَاوُدْ: «خَلِّي سِيدِي الْمَلِكْ يِشِيلْ الْمَدَقّ وَ يِسَوِّي بَيَّهْ أَيِّ شَيّءْ الْيِدَوْرَهْ. شِيفْ! دَاهُو بَقَرْ لِلضَّحِيَّةْ الْمُحَرَّقَةْ. وَ الْكَارَّوْ الْيِفَجُّقُوا بَيَّهْ الْقَمَحْ وَ آلَاتَهْ كَمَانْ يَبْقَوْا لَيْك حَطَبْ. 23يَا الْمَلِكْ، أَنَا أَرَوْنَى أَنْطَيْتَكْ كُلَّ الْأَشْيَاءْ دَوْل. خَلِّي اللّٰهْ إِلٰـهَكْ يَقْبَلْ ضَحِيّتَكْ.» 24وَ لَاكِنْ الْمَلِكْ قَالْ لِأَرَوْنَى: «لَا! أَنَا نَشْرِيهْ مِنَّكْ وَ نِكَفِّي تَمَنَهْ. أَشَانْ مَا نِدَوْر نِقَدِّمْ ضَحِيَّةْ لِلّٰهْ إِلٰـهِي الْمَا تِكَلِّفْنِي شَيّءْ.» وَ خَلَاصْ، دَاوُدْ شَرَى الْمَدَقّ وَ الْبَقَرْ بِـ 50 حَجَرْ فُضَّةْ.
25وَ فِي الْبَكَانْ دَا، دَاوُدْ بَنَى مَدْبَحْ لِلّٰهْ وَ قَدَّمْ فَوْقَهْ ضَحَايَا مُحَرَّقِينْ وَ ضَحَايَا سَلَامَةْ. وَ بَيْدَا، اللّٰهْ رَحَمْ الْبَلَدْ وَ الْوَبَاءْ وَقَفْ مِنْ بَنِي إِسْرَائِيلْ.
Currently Selected:
2 صَمُوِيل 24: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
