2 صَمُوِيل 11
11
دَاوُد و بَتْشَابَع
1وَ فِي السَّنَةْ الْجَدِيدَةْ، فِي وَكِتْ الْمُلُوكْ يَمْشُوا الْحَرِبْ، دَاوُدْ رَسَّلْ يُوَابْ قَايِدْ دَيْشَهْ وَ نَاسَهْ وَ كُلَّ بَنِي إِسْرَائِيلْ فِي الْحَرِبْ. وَ هُمَّنْ دَمَّرَوْا بَنِي عَمُّونْ وَ حَاصَرَوْا مَدِينَةْ رَبَّةْ عَاصِمَتْهُمْ. وَ لَاكِنْ دَاوُدْ قَعَدْ فِي أُورُشَلِيمْ.
2وَ يَوْم وَاحِدْ بِعَشِيَّةْ، دَاوُدْ قَمَّ مِنْ فُرَاشَهْ وَ قَاعِدْ يِحَوِّقْ فِي رَاسْ قَصْرَهْ وَ مِنْ فَوْق، شَافْ مَرَةْ قَاعِدَةْ تِلْبَرَّدْ. وَ هِي جَمِيلَةْ مَرَّةْ وَاحِدْ. 3وَ دَاوُدْ رَسَّلْ لِيِأَكُّدُوا مِنْ الْمَرَةْ دِي. وَ أَوْرَوْه قَالَوْا لَيَّهْ: «دِي بَتْشَابَعْ بِنَيَّةْ أَلِعَامْ. وَ هِي مَرِةْ أُرِيَّا الْمِنْ قَبِيلَةْ الْحِتِّيِّينْ.»
4وَ خَلَاصْ، دَاوُدْ رَسَّلْ نَاسْ لِيِجِيبُوهَا. وَ الْمَرَةْ دِي دَهَابْهَا غَسَّلَتْ وَ هِي جَاتْ فِي قَصْرَهْ وَ هُو رَقَدْ مَعَاهَا. وَ بَعَدْ دَا، هِي قَبَّلَتْ بَيْتهَا. 5وَ الْمَرَةْ دِي بِقَتْ غَلْبَانَةْ. وَ هِي رَسَّلَتْ لِدَاوُدْ وَ أَوْرَتَهْ وَ قَالَتْ كَدَرْ هِي غَلْبَانَةْ.
6وَ طَوَّالِي، دَاوُدْ رَسَّلْ لِيُوَابْ وَ قَالْ: «رَسِّلْ لَيِّ أُرِيَّا الْحِتِّي.» وَ خَلَاصْ، يُوَابْ رَسَّلَهْ لَيَّهْ. 7وَ وَكِتْ أُرِيَّا جَاءْ لِدَاوُدْ، هُو سَأَلَهْ مِنْ عَافِيَةْ يُوَابْ وَ الْعَسْكَرْ وَ خَبَرْ الْحَرِبْ. 8وَ بَعَدْ دَا، دَاوُدْ قَالْ لِأُرِيَّا: «أَمْشِي بَيْتَكْ وَ غَسِّلْ رِجِلَيْنَكْ.»
وَ أُرِيَّا مَرَقْ مِنْ قَصِرْ الْمَلِكْ وَ وَرَايَهْ الْمَلِكْ رَسَّلْ لَيَّهْ هَدِيَّةْ. 9وَ لَاكِنْ أُرِيَّا رَقَدْ فِي مَدَخَلْ قَصِرْ الْمَلِكْ مَعَ خَدَّامِينْ سِيدَهْ وَ مَا مَشَى بَيْتَهْ.
10وَ خَبَّرَوْه لِدَاوُدْ وَ قَالَوْا لَيَّهْ: «دَاهُو أُرِيَّا مَا مَشَى بَيْتَهْ.» وَ دَاوُدْ سَأَلَهْ وَ قَالْ: «إِنْتَ مَا دَهَابَكْ جِيتْ مِنْ السَّفَرْ؟ وَ مَالَا مَا مَشَيْت بَيْتَكْ؟» 11وَ أُرِيَّا رَدَّ لِدَاوُدْ وَ قَالْ: «صَنْدُوقْ اللّٰهْ وَ عَسْكَرْ بَنِي إِسْرَائِيلْ وَ بَنِي يَهُوذَا سَاكْنِينْ فِي خِيَمْ وَ سِيدِي يُوَابْ وَ نَاسَكْ الْآخَرِينْ قَاعِدِينْ بَرَّا فِي الْكَدَادَةْ. وَ بَيْدَا، كِكَّيْف نَمْشِي بَيْتِي وَ نَاكُلْ وَ نَشْرَبْ وَ نَرْقُدْ مَعَ مَرْتِي؟ دَا مَا مُمْكِنْ! نَحْلِفْ لَيْك بِحَيَاتَكْ إِنْتَ كَدَرْ شَيّءْ مِثِلْ دَا، أَبَداً مَا نِسَوِّيهْ.» 12وَ دَاوُدْ قَالْ لِأُرِيَّا: «خَلَاصْ، الْيَوْم كُلَ أَقْعُدْ هِنِي. وَ أَمْبَاكِرْ كَمَانْ، نِخَلِّيكْ تَمْشِي.»
وَ أُرِيَّا قَعَدْ فِي أُورُشَلِيمْ فِي الْيَوْم دَا وَ أَمْبَاكِرْ كُلَ. 13وَ دَاوُدْ عَزَمَهْ فِي قَصْرَهْ لِيَاكُلْ وَ يَشْرَبْ وَ سَكَّرَهْ. وَ بِاللَّيْل، أُرِيَّا مَرَقْ وَ مَشَى رَقَدْ فِي فُرَاشَهْ مَعَ خَدَّامِينْ الْمَلِكْ. لَاكِنْ مَا مَشَى بَيْتَهْ. 14وَ بِفَجُرْ، دَاوُدْ كَتَبْ جَوَابْ لِيُوَابْ وَ رَسَّلَهْ لَيَّهْ بِوَاسِطَةْ أُرِيَّا. 15وَ فِي الْجَوَابْ دَا، دَاوُدْ كَتَبْ وَ قَالْ: «قَدِّمْ أُرِيَّا وَ خُطَّهْ فِي الْبَكَانْ الْخَطَرِي مَرَّةْ وَاحِدْ هَنَا الْحَرِبْ الشَّدِيدْ. وَ إِنْتُو بَعُّدُوا مِنَّهْ. وَ بَيْدَا، الْعَدُو يَضُرْبَهْ وَ هُو يُمُوتْ.»
مَوْت أُرِيَّا راجِلها لبَتْشَابَع
16وَ يُوَابْ قَاعِدْ يِرَاقِبْ فِي الْحِلَّةْ الْحَاصَرْهَا. خَلَاصْ، خَطَّ أُرِيَّا فِي الْبَكَانْ الْيَعَرْفَهْ قَاعِدِينْ فَوْقَهْ عُدْوَانْهُمْ الْفَحَلِينْ. 17وَ عَسْكَرْ الْحِلَّةْ دِي مَرَقَوْا وَ هَجَمَوْا يُوَابْ وَ كَتَلَوْا وَاحِدِينْ مِنْ عَسْكَرَهْ وَ نَاسْ دَاوُدْ. وَ أُرِيَّا الْحِتِّي كُلَ مَاتْ.
18وَ يُوَابْ رَسَّلْ خَبَّرَهْ لِدَاوُدْ بِكُلَّ شَيّءْ الْكَانْ فِي الدُّوَاسْ. 19وَ أَنْطَى أَمُرْ لِلْمُرْسَالْ دَا وَ قَالْ: «بَعَدْ كَمَّلْت حِجَيْك لِلْمَلِكْ بِكُلَّ شَيّءْ الْكَانْ فِي الدُّوَاسْ دَا، 20أَكُونْ الْمَلِكْ يَزْعَلْ وَ يُقُولْ لَيْك: ‹مَالَا إِنْتُو قَرَّبْتُوا لِلْحِلَّةْ حَتَّى دَاوَسْتُوا؟ مَا تَعَرْفُوا كَدَرْ هُمَّنْ يَضُرْبُوكُو مِنْ الدُّرْدُرْ وَلَّا؟ 21وَ مَا فَكَّرْتُوا زَمَانْ يَاتُو الْكَتَلْ أَبِيمَلِكْ وِلَيْد يَرْبُوشَتْ فِي حِلَّةْ تِيبِصْ؟ مَا مَرَةْ بَسْ زَقَلَتْ فَوْقَهْ مُرْحَاكَةْ مِنْ الدُّرْدُرْ وَ كَتَلَتَهْ.#11:21 مَرَةْ زَقَلَتْ فَوْقَهْ مُرْحَاكَةْ: التاريخ دا تلقوه في قُضياء 9:53. وَ بَيْدَا، مَالَا إِنْتُو قَرَّبْتُوا لِلدُّرْدُرْ؟› وَ كَنْ الْمَلِكْ حَجَّى لَيْك مِثِلْ دَا، إِنْتَ رُدّ لَيَّهْ وَ قُولْ: ‹خَدَّامَكْ أُرِيَّا الْحِتِّي كُلَ مَاتْ.›»
22وَ الْمُرْسَالْ مَشَى. وَ وَكِتْ وَصَّلْ بَكَانْ دَاوُدْ، كَلَّمَهْ بِكُلَّ شَيّءْ الْيُوَابْ كَلَّفَهْ بَيَّهْ. 23وَ قَالْ لِدَاوُدْ: «بَنِي عَمُّونْ دَوْل بِقَوْا شُدَادْ مِنِّنَا وَ مَرَقَوْا بَرَّا مِنْ الْحِلَّةْ وَ هَجَمَوْنَا. وَ لَاكِنْ أَنِحْنَ دَاوَسْنَاهُمْ لَحَدِّي خَشُمْ بَابْ الْحِلَّةْ. 24وَ فِي الْوَكِتْ دَا، سِيَادْ النُّشَّابْ زَرَّقَوْا فِي عَسْكَرَكْ مِنْ فَوْق لِلدُّرْدُرْ. وَ وَاحِدِينْ مِنْ عَسْكَرَكْ مَاتَوْا وَ خَدَّامَكْ أُرِيَّا الْحِتِّي كُلَ مَاتْ.»
25وَ دَاوُدْ قَالْ لِلْمُرْسَالْ: «أَمْشِي شَجِّعَهْ لِيُوَابْ وَ قُولْ لَيَّهْ مَا يِهِمّ فِي الشَّيّءْ دَا أَشَانْ فِي الْحَرْبَةْ، دَايْماً فِي مَوْت مِنْ هِنِي وَ مِنْ هِنَاكْ كُلَ. خَلِّي يِحَارِبْهُمْ بِشِدَّةْ وَ يِدَمِّرْ الْحِلَّةْ دِي.»
26وَ وَكِتْ بَتْشَابَعْ مَرِةْ أُرِيَّا سِمْعَتْ بِمَوْت رَاجِلْهَا، هِي حِزْنَتْ لِزَوْجهَا. 27وَ بَعَدْ وَكْت الْحِزِنْ كَمَّلْ خَلَاصْ، دَاوُدْ رَسَّلْ جَابَوْهَا لَيَّهْ وَ هُو خَطَّاهَا فِي بَيْتَهْ. وَ هِي بِقَتْ لَيَّهْ مَرْتَهْ وَ وِلْدَتْ لَيَّهْ وِلَيْد. وَ لَاكِنْ اللّٰهْ غِضِبْ لِدَاوُدْ بِسَبَبْ الشَّيّءْ الْهُو سَوَّاهْ.
Currently Selected:
2 صَمُوِيل 11: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
