2 مُلوك 9
9
يَاهُو درّجوه ملك في إسرائيل
1وَ النَّبِي أَلْيَسَعْ نَادَى صَبِي وَاحِدْ مِنْ مَجْمُوعَةْ الْأَنْبِيَاء وَ قَالْ لَيَّهْ: «أَرْبُطْ صُلْبَكْ وَ شِيلْ الْقَزَّازَةْ هِنْت الدِّهِنْ دِي فِي إِيدَكْ وَ أَمْشِي حِلَّةْ رَامُوتْ الْفِي قِلْعَادْ. 2وَ هِنَاكْ، أَلْقَاهْ لِيَاهُو وِلَيْد يَهُوشَفَطْ وِلَيْد نِمْشِي. وَ قَوِّمَهْ وَ طَرِّفَهْ مِنْ رُفْقَانَهْ وَ وَدِّيهْ فِي غُرْفَةْ شِيَّةْ طَرَفْ. 3وَ شِيلْ الدِّهِنْ دَا وَ صُبَّهْ لَيَّهْ فِي رَاسَهْ وَ قُولْ لَيَّهْ: ‹دَاهُو اللّٰهْ قَالْ: ”بَيْدَا، أَنَا دَرَّجْتَكْ مَلِكْ فِي مَمْلَكَةْ إِسْرَائِيلْ!“› وَ بَعَدْ دَا، خَلَاصْ أَفْتَحْ الْبَابْ وَ عَرِّدْ مَا تِأَخِّرْ.»
4وَ النَّبِي الصَّبِي قَمَّ وَ مَشَى حِلَّةْ رَامُوتْ الْفِي قِلْعَادْ. 5وَ وَكِتْ النَّبِي دَا وَصَّلْ، لِقِي كُبَارَاتْ الْعَسْكَرْ قَاعِدِينْ سَوَا. وَ هُو قَالْ: «يَا كَبِيرْ الْعَسْكَرْ، عِنْدِي كَلَامْ نِدَوْر نِأَوْرِيكْ.» وَ يَاهُو سَأَلَهْ وَ قَالْ لَيَّهْ: «لِيَاتُو مِنِّنَا؟» وَ هُو رَدَّ وَ قَالْ: «لَيْك إِنْتَ، يَا كَبِيرْ الْعَسْكَرْ.»
6وَ يَاهُو قَمَّ وَ دَخَلْ فِي لُبّ الْبَيْت. وَ النَّبِي الصَّبِي صَبَّ الدِّهِنْ فِي رَاسَهْ وَ قَالْ لَيَّهْ: «دَاهُو اللّٰهْ إِلٰـهْ بَنِي إِسْرَائِيلْ قَالْ: ‹بَيْدَا، أَنَا دَرَّجْتَكْ مَلِكْ فِي شَعَبْ اللّٰهْ، فِي مَمْلَكَةْ إِسْرَائِيلْ. 7وَ تِدَمِّرْ عَايِلَةْ سِيدَكْ أَخَابْ. وَ أَنَا نِشِيلْ التَّارْ هَنَا عَبِيدِي الْأَنْبِيَاء وَ هَنَا خَدَّامِينِي الْآخَرِينْ الْكَتَلَتْهُمْ إِزَبِيلْ مَرِةْ أَخَابْ. 8أَيْوَى، كُلَّ عَايِلَةْ أَخَابْ يُمُوتُوا. نِدَمِّرْ كُلَّ الرُّجَالْ مِنْ عَايِلْتَهْ كَنْ عَبِيدْ وَلَّا حُرِّينْ كُلَ فِي لُبّ بَنِي إِسْرَائِيلْ. 9وَ نِسَوِّي عَايِلَةْ أَخَابْ تَبْقَى مِثِلْ عَايِلَةْ يَرُبَعَامْ وِلَيْد نَبَاتْ وَ مِثِلْ عَايِلَةْ بَعَاشَى وِلَيْد أَخِيَّا. 10وَ كَنْ لِإِزَبِيلْ كَمَانْ، الْكُلابْ يَاكُلُوهَا فِي أَرْض يَزْرَعِيلْ وَ نَادُمْ الْيَسْتُرْهَا كُلَ مَا فِيهْ.›» وَ خَلَاصْ، النَّبِي فَتَحْ الْبَابْ وَ عَرَّدْ.
11وَ يَاهُو مَرَقْ جَاءْ لِمَسَائِيلْ سِيدَهْ الْمَلِكْ وَ هُمَّنْ سَأَلَوْه وَ قَالَوْا لَيَّهْ: «هَلْ عَافَيْ بَسْ؟ مَالَا الْمُشَوْطِنْ دَا جَاءْ لَيْك؟» وَ يَاهُو رَدَّ لَيْهُمْ وَ قَالْ: «إِنْتُو تَعَرْفُوا النَّاسْ الْمِثِلْ دَوْل وَ كَلَامْهُمْ السَّاكِتْ بَسْ.» 12وَ لَاكِنْ هُمَّنْ قَالَوْا لَيَّهْ: «كَلَامَكْ دَا مَا صَحِيحْ! أَوْرِينَا الْكَلَامْ الْهُو قَالَهْ لَيْك.» وَ هُو قَالْ لَيْهُمْ: «دَاهُو الْكَلَامْ الْكَلَّمَانِي. هُو قَالْ: ‹دَاهُو اللّٰهْ قَالْ: ”بِصَبِّينْ دِهِنْ فِي رَاسَكْ دَا، أَنَا دَرَّجْتَكْ مَلِكْ فِي مَمْلَكَةْ إِسْرَائِيلْ.“›»
13وَ طَوَّالِي، أَيِّ وَاحِدْ شَالْ خَلَقَهْ وَ خَطَّاهْ فِي الْعَتَبَةْ تِحِتْ رِجِلَيْن يَاهُو. وَ ضَرَبَوْا الْبُوقْ وَ قَالَوْا: «يِعِيشْ الْمَلِكْ يَاهُو!»
يَاهُو أتْمرّد ضِدّ يُورَام
14وَ بَيْدَا، يَاهُو وِلَيْد يَهُوشَفَطْ وِلَيْد نِمْشِي أَتْمَرَّدْ ضِدّ مَلِكَهْ يُورَامْ.
وَ يُورَامْ وَ كُلَّ مَمْلَكَةْ إِسْرَائِيلْ قَاعِدِينْ يَحْفَضَوْا حِلَّةْ رَامُوتْ الْفِي قِلْعَادْ مِنْ هُجُومْ حَزَيِيلْ مَلِكْ بَلَدْ أَرَامْ. 15وَ الْمَلِكْ يُورَامْ جَاءْ لِيِعَالِجْ نَفْسَهْ فِي حِلَّةْ يَزْرَعِيلْ مِنْ الْجِرَاحْ الْجَرَحَوْه لَيَّهْ الْأَرَامِيَّيْن.
وَ خَلَاصْ، يَاهُو قَالْ لِكُبَارَاتْ الْعَسْكَرْ الْمَعَايَهْ: «كَنْ إِنْتُو مُقَصِّدِينْ مَعَايِ، خَلِّي نَادُمْ مَا يَمْرُقْ مِنْ هِنِي لِيَمْشِي يِأَوْرُوهُمْ فِي حِلَّةْ يَزْرَعِيلْ كَدَرْ مَسَحَوْنِي مَلِكْ.» 16وَ يَاهُو رِكِبْ فِي عَرَبَتَهْ وَ مَشَى حِلَّةْ يَزْرَعِيلْ.
وَ هِنَاكْ، يُورَامْ رَاقِدْ فِي سَرِيرَهْ وَ أَخَزْيَا مَلِكْ مَمْلَكَةْ يَهُوذَا جَاءْ لِيِشِيفَهْ. 17وَ الْحَرَسْ الْقَاعِدْ فِي بَيْت الْمُرَاقَبَةْ هَنَا حِلَّةْ يَزْرَعِيلْ شَافْ يَاهُو وَ نَاسَهْ جَايِينْ وَ قَمَّ قَالْ: «قَاعِدْ نِشِيفْ نَاسْ جَايِينْ.» وَ يُورَامْ قَالْ لَيَّهْ: «رَسِّلْ سِيدْ جُوَادْ وَ خَلِّي يِلَاقِيهُمْ وَ يَسْأَلْهُمْ كَنْ جَيِّتْهُمْ دِي عَافَيْ بَسْ.» 18وَ سِيدْ الْجُوَادْ وَصَّلَاهُمْ لِيَاهُو وَ نَاسَهْ وَ قَالْ لَيْهُمْ: «دَاهُو سِيدِي الْمَلِكْ قَالْ: ‹جَيِّتْكُو دِي عَافَيْ بَسْ؟›» وَ يَاهُو رَدَّ لَيَّهْ وَ قَالْ: «لَمَّاكْ شُنُو بِالْعَافَيْ؟ تَعَالْ قَبِّلْ مَعَايِ.»
وَ خَلَاصْ، الْحَرَسْ قَالْ لِلْمَلِكْ يُورَامْ: «قَاعِدْ نِشِيفْ الْمُرْسَالْ وَصَّلَاهُمْ وَ لَاكِنْ مَا قَبَّلْ هِنِي.» 19وَ الْمَلِكْ رَسَّلْ سِيدْ جُوَادْ آخَرْ. وَ هُو وَصَّلَاهُمْ وَ قَالْ لَيْهُمْ: «دَاهُو سِيدِي الْمَلِكْ قَالْ: ‹جَيِّتْكُو دِي عَافَيْ بَسْ؟›» وَ يَاهُو رَدَّ لَيَّهْ وَ قَالْ: «لَمَّاكْ شُنُو بِالْعَافَيْ؟ تَعَالْ قَبِّلْ مَعَايِ.»
20وَ الْحَرَسْ قَالْ: «قَاعِدْ نِشِيفْ الْمُرْسَالْ وَصَّلَاهُمْ وَ لَاكِنْ مَا قَبَّلْ هِنِي. وَ أَنَا عِرِفْت السُّوَاقَةْ هِنْت الْعَرَبَةْ، دِي سُوَاقَةْ هِنْت يَاهُو وِلَيْد نِمْشِي أَشَانْ هُو يُسُوقْ مِثِلْ مَجْنُونْ.»
21وَ خَلَاصْ، مَلِكْ يُورَامْ قَالْ يِجَهُّزُوا لَيَّهْ عَرَبَتَهْ. وَ هُمَّنْ جَهَّزَوْا لَيَّهْ عَرَبَتَهْ وَ يُورَامْ مَلِكْ مَمْلَكَةْ إِسْرَائِيلْ وَ أَخَزْيَا مَلِكْ مَمْلَكَةْ يَهُوذَا أَيِّ وَاحِدْ رِكِبْ فِي عَرَبَتَهْ وَ مَشَوْا لِيِلَاقُوا يَاهُو. وَ هُمَّنْ لِحْقَوْه فِي زَرَعْ هَنَا نَابُوتْ الْمِنْ حِلَّةْ يَزْرَعِيلْ. 22وَ مِنْ يُورَامْ شَافْ يَاهُو، قَالْ لَيَّهْ: «جَيْتَكْ دِي عَافَيْ بَسْ، يَا يَاهُو؟» وَ يَاهُو رَدَّ لَيَّهْ وَ قَالْ: «عَافَيْ هِنْت شُنُو؟ أَشَانْ أَمَّكْ إِزَبِيلْ قَاعِدَةْ تِشَّرْمَطْ مَعَ الْأَصْنَامْ وَ تِسَوِّي سِحِرْ كَتِيرْ كُلَ.»
23وَ طَوَّالِي، يُورَامْ لَفَّ عَرَبَتَهْ وَ عَرَّدْ وَ قَالْ لِأَخَزْيَا: «دِي الْخِيَانَةْ، يَا أَخَزْيَا!» 24وَ لَاكِنْ يَاهُو شَالْ نُبَّالَهْ وَ زَرَقْ نُشَّابْ وَ طَعَنَهْ لِيُورَامْ أَمْبَيْن كَتَافَيْه. وَ النُّشَّابْ شَقَّ قَلْبَهْ وَ مَرَقْ. وَ هُو مَاتْ فِي لُبّ عَرَبَتَهْ.
25وَ يَاهُو قَالْ لِبِدْقَرْ قَايِدْ دَيْشَهْ: «أَرْفَعْ جَنَازْتَهْ وَ أَزْقُلْهَا فِي زَرَعْ هَنَا نَابُوتْ الْمِنْ حِلَّةْ يَزْرَعِيلْ. وَ فَكِّرْ فِي كَلَامْ اللّٰهْ الْقَالَهْ ضِدّ أَبُوهْ الْمَلِكْ أَخَابْ وَكِتْ أَنَا وَ إِنْتَ مَاشِينْ بِعَرَبَةْ وَرَايَهْ. 26وَ دَاهُو كَلَامْ اللّٰهْ: ‹أَمِسْ، أَنَا شِفْت مَوْت نَابُوتْ وَ عِيَالَهْ. وَ هَسَّعْ، أَنَا نِلْكَفَّى فَوْقَكْ نَفْس الشَّيّءْ فِي الزَّرَعْ دَا.›» وَ يَاهُو قَالْ: «هَسَّعْ دَا، شِيلْهَا لِجَنَازَةْ يُورَامْ وَ أَزْقُلْهَا فِي الزَّرَعْ دَا حَسَبْ كَلَامْ اللّٰهْ الْقَالَهْ.»
يَاهُو كتل أَخَزْيَا ملك يَهُوذَا
27وَ وَكِتْ أَخَزْيَا مَلِكْ مَمْلَكَةْ يَهُوذَا شَافْ الشَّيّءْ دَا، قَمَّ عَرَّدْ وَ شَالْ دَرِبْ هَنَا حِلَّةْ بَيْت هَقَّانْ. وَ يَاهُو طَرَدَهْ وَ قَالْ: «أَكْتُلُوهْ هُو كُلَ!» وَ وَكِتْ أَخَزْيَا طَالِعْ عَلَيْ قِيزَانْ قُورْ الْقَرِيبْ لِحِلَّةْ يِبْلَعَامْ دَا، ضَرَبَوْه فِي لُبّ عَرَبَتَهْ. وَ هُو عَرَّدْ لَحَدِّي وِصِلْ مَدِينَةْ مَقِدُّو وَ مَاتْ فَوْقهَا. 28وَ مَسَائِيلَهْ شَالَوْه فِي عَرَبَةْ وَ وَدَّوْه مَدِينَةْ الْقُدُسْ وَ دَفَنَوْه فِي قَبُرْ جُدُودَهْ فِي مَدِينَةْ دَاوُدْ.
29أَخَزْيَا بِقِي مَلِكْ فِي مَمْلَكَةْ يَهُوذَا فِي سَنِةْ 11 هَنَا حُكُمْ يُورَامْ وِلَيْد أَخَابْ مَلِكْ مَمْلَكَةْ إِسْرَائِيلْ.
يَاهُو كتل المَيْرم إِزَبِيل
30وَ وَكِتْ يَاهُو جَايِ دَاخِلْ فِي حِلَّةْ يَزْرَعِيلْ، إِزَبِيلْ سِمْعَتْ بَيَّهْ. وَ هِي كَحَّلَتْ عُيُونْهَا وَ جَمَّلَتْ رَاسْهَا وَ قَاعِدَةْ تِشِيفْ مِنْ شُبَّاكْ الْقَصِرْ. 31وَ وَكِتْ هُو وَصَّلْ بَابْ الْحِلَّةْ، هِي قَالَتْ لَيَّهْ: «جَيْتَكْ دِي عَافَيْ بَسْ، يَا زِمْرِي كَتَّالْ سِيدَكْ؟» 32وَ هُو رَفَعْ عُيُونَهْ عَلَيْ الشُّبَّاكْ وَ قَالْ: «يَاتُو الْمَعَايِ؟ يَاتُو؟» وَ نَاسَيْن أَوْ تَلَاتَةْ مِنْ خَدَّامِينْ الْمَيْرَمْ دَنْقَرَوْا لَيَّهْ مِنْ الشُّبَّاكْ. 33وَ أَمَرَاهُمْ وَ قَالْ: «أَزْقُلُوهَا تِحِتْ!» وَ خَلَاصْ، زَقَلَوْهَا مِنْ الشُّبَّاكْ وَ دَمَّهَا رَشَّ فِي الدُّرْدُرْ وَ فِي الْخَيْل. وَ يَاهُو رِكِبْ فِي جَنَازِتْهَا بِعَرَبَتَهْ.
34وَ يَاهُو دَخَلْ فِي قَصِرْ الْمَلِكْ أَكَلْ وَ شِرِبْ. وَ بَعَدْ دَا، قَالْ: «فَكُّرُوا فَوْق الْمَلْعُونَةْ دِي وَ أَسْتُرُوهَا أَشَانْ هِي بِنَيَّةْ مَلِكْ.» 35وَ وَكِتْ الرُّجَالْ مَشَوْا لِيَسْتُرُوهَا، مَا لِقَوْا إِلَّا عَضُمْ الرَّاسْ وَ الْإِيدَيْنهَا وَ الرِّجِلَيْنهَا. 36وَ هُمَّنْ قَبَّلَوْا وَ أَوْرَوْه لِيَاهُو. وَ هُو قَالْ: «دَا بِقِي حَسَبْ كَلَامْ اللّٰهْ الْقَالَهْ بِوَاسِطَةْ عَبْدَهْ إِلِيَاسْ الْمِنْ حِلَّةْ تِشْبِي. هُو قَالْ: ‹الْكُلابْ يَاكُلُوا جَنَازَةْ إِزَبِيلْ#9:36 الْكُلابْ يَاكُلُوا جَنَازَةْ إِزَبِيلْ: الكلام دا تلقوه في 1 مُلوك 21:23. فِي أَرْض يَزْرَعِيلْ 37وَ الْفَضْلَةْ هَنَا جِسِمْهَا كَمَانْ تَبْقَى مِثِلْ الْبَعَرْ الدَّيَّرَوْا بَيَّهْ زَرَعْ فِي أَرْض يَزْرَعِيلْ. وَ نَادُمْ مَا يَقْدَرْ يَعَرِفْهَا وَ يُقُولْ: ”دِي إِزَبِيلْ.“›»
Currently Selected:
2 مُلوك 9: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
