2 مُلوك 13
13
يَهُوحَاز بِقي ملك في إسرائيل
1وَ فِي سَنِةْ 23 هَنَا حُكُمْ يُوَاشْ وِلَيْد أَخَزْيَا مَلِكْ مَمْلَكَةْ يَهُوذَا، يَهُوحَازْ وِلَيْد يَاهُو بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ هُو حَكَمْ 17 سَنَةْ. 2وَ يَهُوحَازْ سَوَّى الْفَسَالَةْ قِدَّامْ اللّٰهْ. هُو سَوَّى نَفْس الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ. وَ يَهُوحَازْ كُلَ مَا خَلَّى مِنَّهْ الذُّنُوبْ دَوْل. 3وَ اللّٰهْ غِضِبْ غَضَبْ شَدِيدْ لِنَاسْ مَمْلَكَةْ إِسْرَائِيلْ وَ سَلَّمَاهُمْ لِحَزَيِيلْ مَلِكْ بَلَدْ أَرَامْ وَ لِبَنْهَدَادْ وِلَيْد حَزَيِيلْ فِي كُلَّ وَكِتْهُمْ.
4وَ لَاكِنْ يَهُوحَازْ شَحَدْ اللّٰهْ وَ اللّٰهْ قِبِلْ سُؤَالَهْ أَشَانْ هُو شَافْ الظُّلُمْ الْقَاعِدْ يِسَوِّيهْ مَلِكْ أَرَامْ لِمَمْلَكَةْ إِسْرَائِيلْ. 5وَ اللّٰهْ جَابْ لِمَمْلَكَةْ إِسْرَائِيلْ مُنَجِّي. وَ هُو نَجَّاهُمْ مِنْ إِيدْ مَلِكْ بَلَدْ أَرَامْ. وَ نَاسْ مَمْلَكَةْ إِسْرَائِيلْ قِدْرَوْا عَاشَوْا بِالسَّلَامَةْ فِي بُيُوتْهُمْ مِثِلْ أَوَّلْ.
6وَ لَاكِنْ بَيْدَا كُلَ، نَاسْ مَمْلَكَةْ إِسْرَائِيلْ مَا خَلَّوْا مِنْهُمْ الذُّنُوبْ اللَّزَّاهُمْ فَوْقهُمْ يَرُبَعَامْ وَ عَايِلْتَهْ. وَ هُمَّنْ قَعَدَوْا فِي ذُنُوبْهُمْ حَتَّى خَلَّوْا فِي السَّامِرَةْ الْعُودْ الْغَزَّوْه لِعِبَادَةْ إِلٰـهَةْ أَشِيرَةْ. 7وَ فِي الأَخِيرْ، مِنْ عَسْكَرْ يَهُوحَازْ مَا فَضَّلْ لَيَّهْ إِلَّا 50 رُجَالْ سِيَادْ خَيْل وَ 10 عَرَبَاتْ هَنَا حَرِبْ وَ 10 000 عَسْكَرْ مَاشِينْ بِرِجْلَيْهُمْ. وَ دَا أَشَانْ مَلِكْ أَرَامْ دَمَّرْ الْآخَرِينْ وَ رِحِكَاهُمْ مَرَّةْ وَاحِدْ مِثِلْ الْعَجَاجْ تِحِتْ رِجِلَيْنَهْ.
8وَ الْبَاقِي مِنْ عَمَلْ يَهُوحَازْ وَ كُلَّ شَيّءْ السَّوَّاهْ وَ فَرَاسِيّتَهْ مَكْتُوبِينْ فِي كِتَابْ تَارِيخْ مُلُوكْ بَنِي إِسْرَائِيلْ. 9وَ يَهُوحَازْ مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ السَّامِرَةْ. وَ وِلَيْدَهْ يَهُآشْ حَكَمْ فِي بَدَلَهْ.
يَهُآش بِقي ملك في إسرائيل
10وَ فِي سَنِةْ 37 هَنَا حُكُمْ يُوَاشْ مَلِكْ مَمْلَكَةْ يَهُوذَا، يَهُآشْ وِلَيْد يَهُوحَازْ بِقِي مَلِكْ فِي مَمْلَكَةْ إِسْرَائِيلْ فِي مَدِينَةْ السَّامِرَةْ. وَ حَكَمْ 16 سَنَةْ. 11وَ هُو سَوَّى الْفَسَالَةْ قِدَّامْ اللّٰهْ. وَ هُو مَا خَلَّى مِنَّهْ كُلَّ الذُّنُوبْ السَّوَّاهُمْ يَرُبَعَامْ وِلَيْد نَبَاتْ اللَّزَّ نَاسْ مَمْلَكَةْ إِسْرَائِيلْ فِي الذُّنُوبْ.
12وَ الْبَاقِي مِنْ عَمَلْ يَهُآشْ وَ كُلَّ شَيّءْ السَّوَّاهْ وَ فَرَاسِيّتَهْ وَ الْحُرُوبْ السَّوَّاهُمْ ضِدّ أَمَصْيَا مَلِكْ مَمْلَكَةْ يَهُوذَا، كُلَّ الشَّيّءْ دَا مَكْتُوبْ فِي كِتَابْ تَارِيخْ مُلُوكْ بَنِي إِسْرَائِيلْ. 13وَ يَهُآشْ مَاتْ وَ لِحِقْ أَبَّهَاتَهْ وَ دَفَنَوْه فِي مَدِينَةْ السَّامِرَةْ مَعَ مُلُوكْ مَمْلَكَةْ إِسْرَائِيلْ. وَ وِلَيْدَهْ يَرُبَعَامْ حَكَمْ فِي بَدَلَهْ.
النبي أَلْيَسَع يتْنبّأ آخِر مرّة
14وَكِتْ أَلْيَسَعْ مِرِضْ مَرَضْ الْيَكْتُلَهْ، يَهُآشْ مَلِكْ مَمْلَكَةْ إِسْرَائِيلْ مَشَى قِدَّامَهْ وَ بَكَى لَيَّهْ وَ قَالْ: «يَا أَبُويِ! يَا أَبُويِ! إِنْتَ مُهِمّ لِبَنِي إِسْرَائِيلْ زِيَادَةْ مِنْ كُلَّ عَرَبَاتْهُمْ وَ كُلَّ سِيَادْ خَيْلهُمْ.»
15وَ أَلْيَسَعْ قَالْ لَيَّهْ: «شِيلْ لَيْك نُبَّالْ وَ نُشَّابْ.» وَ يَهُآشْ شَالْ نُبَّالْ وَ نُشَّابْ. 16وَ أَلْيَسَعْ قَالْ لِمَلِكْ مَمْلَكَةْ إِسْرَائِيلْ: «أَجْبِدْ النُّبَّالْ.» وَ وَكِتْ يَهُآشْ جَبَدْ النُّبَّالْ، أَلْيَسَعْ خَطَّ إِيدَيْنَهْ فِي إِيدَيْن الْمَلِكْ وَ قَالْ: 17«أَفْتَحْ الشُّبَّاكْ الْبِالنُّصّ الصَّبْحَانِي.» وَ يَهُآشْ فَتَحَهْ. وَ أَلْيَسَعْ قَالْ لَيَّهْ: «أَزُرْقَهْ!» وَ يَهُآشْ زَرَقَهْ. وَ أَلْيَسَعْ قَالْ لَيَّهْ: «دَا نُشَّابْ النَّصُرْ الْجَايِ مِنْ اللّٰهْ، نُشَّابْ النَّصُرْ ضِدّ الْأَرَامِيَّيْن. إِنْتَ تِحَارِبْهُمْ لِلْأَرَامِيَّيْن فِي حِلَّةْ أَفِيقْ وَ تِدَمِّرْهُمْ مَرَّةْ وَاحِدْ.»
18وَ أَلْيَسَعْ قَالْ بَتَّانْ: «شِيلْ النُّشَّابْ!» وَ يَهُآشْ شَالْ النُّشَّابْ. وَ أَلْيَسَعْ قَالْ لِمَلِكْ مَمْلَكَةْ إِسْرَائِيلْ: «أَضْرُبْ بَيَّهْ الْأَرْض!» وَ هُو ضَرَبْ الْأَرْض تَلَاتَةْ مَرَّاتْ وَ وَقَفْ. 19وَ نَبِي اللّٰهْ زِعِلْ مِنَّهْ وَ قَالْ لَيَّهْ: «وَاجِبْ تَضْرُبْ الْأَرْض خَمْسَةْ أَوْ سِتَّةْ مَرَّةْ وَ بَيْدَا، تَقْدَرْ تِنَّصِرْ فِي الْأَرَامِيَّيْن لَحَدِّي تِدَمِّرْهُمْ. وَ لَاكِنْ هَسَّعْ دَا، إِنْتَ تِنَّصِرْ فَوْقهُمْ تَلَاتَةْ مَرَّاتْ بَسْ.»
20وَ أَلْيَسَعْ مَاتْ وَ دَفَنَوْه. وَ أَيِّ بِدَايَةْ السَّنَةْ، نَهَّابِينْ مِنْ بَلَدْ مُوَابْ يَدْخُلُوا فِي بَلَدْ إِسْرَائِيلْ. 21وَ يَوْم وَاحِدْ، فِيَّهْ نَاسْ وَاحِدِينْ قَاعِدِينْ يَدْفُنُوا نَادُمْ مَيِّتْ وَ شَافَوْا النَّهَّابِينْ دَوْل. وَ طَوَّالِي، النَّاسْ دَوْل زَقَلَوْا الْجَنَازَةْ فِي قَبُرْ أَلْيَسَعْ وَ فَاتَوْا. وَ وَكِتْ الْجَنَازَةْ وَقَعَتْ فِي رَاسْ عُضَامْ أَلْيَسَعْ، الْمَيِّتْ دَا حِيِي وَ قَمَّ بِطُولَهْ.
يَهُآش أنّصر في الأراميَّيْن
22وَ حَزَيِيلْ مَلِكْ بَلَدْ أَرَامْ قَاعِدْ يَظْلُمْ مَمْلَكَةْ إِسْرَائِيلْ فِي كُلَّ وَكِتْ حُكُمْ يَهُوحَازْ. 23وَ لَاكِنْ اللّٰهْ حَنَّ فَوْق نَاسْ مَمْلَكَةْ إِسْرَائِيلْ وَ وَصَّفْ لَيْهُمْ رَحْمَتَهْ بِسَبَبْ الْمُعَاهَدَةْ السَّوَّاهَا مَعَ إِبْرَاهِيمْ وَ إِسْحَاقْ وَ يَعْقُوبْ وَ مَا دَوَّرْ يِدَمِّرْهُمْ. وَ مِثِلْ دَا، مَا بَعَّدَاهُمْ مِنْ قِدَّامَهْ لَحَدِّي الْيَوْم.
24وَ حَزَيِيلْ مَلِكْ أَرَامْ مَاتْ وَ وِلَيْدَهْ بَنْهَدَادْ حَكَمْ فِي بَدَلَهْ. 25وَ يَهُآشْ وِلَيْد يَهُوحَازْ شَالْ مِنْ بَنْهَدَادْ كُلَّ الْحِلَّالْ الشَّالَاهُمْ أَبُوهْ حَزَيِيلْ فِي وَكْت الدُّوَاسْ. وَ يَهُآشْ حَارَبَهْ لِبَنْهَدَادْ تَلَاتَةْ مَرَّاتْ وَ شَالْ مِنَّهْ حِلَّالْ مَمْلَكَةْ إِسْرَائِيلْ.
Currently Selected:
2 مُلوك 13: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
