2 مُلوك 11
11
عَتَلْيَا بِقت ملِكة في يَهُوذَا
1وَ وَكِتْ عَتَلْيَا أَمّ أَخَزْيَا شَافَتْ كَدَرْ وِلَيْدهَا مَاتْ، هِي قَمَّتْ تِدَمِّرْ كُلَّ ذُرِّيَّةْ الْمَلِكْ. 2وَ لَاكِنْ يُوشَبْعَةْ الْهِي بِنَيَّةْ مَلِكْ يَهُورَامْ وَ أَخُتْ أَخَزْيَا شَالَتْ يُوَاشْ وِلَيْد أَخَزْيَا وَ مَرَقَتَهْ بِسِرّ مِنْ لُبّ عِيَالْ الْمَلِكْ الْيِدَوْرُوا يَكْتُلُوهُمْ. وَ هِي خَطَّتَهْ مَعَ الْمَرَةْ التَّكُرْبَهْ فِي لُبّ مَخَزَنْ السَّرَايِرْ. وَ هِنَّ لَبَّدَنَّهْ مِنْ عَتَلْيَا وَ بَيْدَا، هُو نِجِي مِنْ الْمَوْت. 3وَ يُوَاشْ قَعَدْ مَعَاهَا مُلَبَّدْ فِي بَيْت اللّٰهْ لِمُدَّةْ سِتَّةْ سَنَةْ. وَ فِي الْوَكِتْ دَا، عَتَلْيَا قَاعِدَةْ تَحْكِمْ فِي الْبَلَدْ.
يُوَاش درّجوه ملك
4وَ فِي السَّنَةْ السَّابْعَةْ، رَاجِلْ الدِّينْ يَهُويَدَعْ رَسَّلْ لِقُيَّادْ الْمِيَاتْ هَنَا الْكَرِيِينْ وَ لِحُرَّاسْ قَصِرْ الْمَلِكْ وَ جَابَاهُمْ جَنْبَهْ فِي بَيْت اللّٰهْ. وَ هُو سَوَّى مَعَاهُمْ مُعَاهَدَةْ وَ حَلَّفَاهُمْ فِي بَيْت اللّٰهْ وَ وَصَّفَاهُمْ وِلَيْد الْمَلِكْ.
5وَ بَعَدْ دَا، هُو أَنْطَاهُمْ الْأَمُرْ وَ قَالْ: «دَاهُو الشَّيّءْ الْوَاجِبْ تِسَوُّوهْ. التِّلِتْ مِنْكُو الْيِشِيلُوا الْخِدْمَةْ فِي يَوْم السَّبْت يَحَرْسُوا قَصِرْ الْمَلِكْ 6وَ التِّلِتْ مِنْكُو يَقْعُدُوا فِي خَشُمْ بَابْ صُورْ وَ التِّلِتْ الْآخَرْ كَمَانْ يَحَرْسُوا الْبَابْ الْقَاعِدْ وَرَاءْ الْحُرَّاسْ. وَ الْمَجْمُوعَاتْ التَّلَاتَةْ دَوْل، وَاجِبْ يَحَرْسُوا قَصِرْ الْمَلِكْ الْوَاحِدْ بَعَدْ الْآخَرْ. 7وَ لِلْمَجْمُوعْتَيْن الْمَا يَخْدُمُوا فِي يَوْم السَّبْت، وَاجِبْ يَحَرْسُوا بَيْت اللّٰهْ الْبَكَانْ الْقَاعِدْ فَوْقَهْ الْمَلِكْ. 8وَ إِنْتُو تِحَوُّقُوهْ الْمَلِكْ مِنْ كُلِّ جِيهَةْ وَ أَيِّ وَاحِدْ مِنْكُو بِسِلَاحَهْ فِي إِيدَهْ. وَ أَيِّ نَادُمْ الْيِدَوْر يَدْخُلْ فِي صُفُوفْكُو، أَكْتُلُوهْ. وَ إِنْتُو تُكُونُوا مَعَ الْمَلِكْ فِي مَرِقِينَهْ وَ جَيْتَهْ.»
9وَ خَلَاصْ، قُيَّادْ الْمِيَاتْ سَوَّوْا كُلَّ شَيّءْ الْأَمَرَاهُمْ بَيَّهْ رَاجِلْ الدِّينْ يَهُويَدَعْ. وَ أَيِّ قَايِدْ مِنْهُمْ لَمَّ نَاسَهْ، النَّاسْ الْكَمَّلَوْا خِدْمِتْهُمْ فِي يَوْم السَّبْت وَ النَّاسْ الْيِشِيلُوا خِدْمِتْهُمْ فِي يَوْم السَّبْت كُلَ. وَ مَشَوْا بَكَانْ رَاجِلْ الدِّينْ يَهُويَدَعْ. 10وَ رَاجِلْ الدِّينْ أَنْطَى لِقُيَّادْ الْمِيَاتْ الْحُرَابْ وَ الدَّرَقْ هَنَا الْمَلِكْ دَاوُدْ الْقَاعِدِينْ فِي بَيْت اللّٰهْ. 11وَ الْحُرَّاسْ قَاعِدِينْ فِي بَكَانْهُمْ، أَيِّ وَاحِدْ بِسِلَاحَهْ فِي إِيدَهْ. وَ رَصَّوْا مِنْ نُصّ الزَّيْنَةْ هَنَا بَيْت اللّٰهْ لَحَدِّي نُصّ الْإِسْرَةْ قِدَّامْ الْبَيْت وَ الْمَدْبَحْ لِيِحَوُّقُوا الْمَلِكْ.
12وَ خَلَاصْ، يَهُويَدَعْ مَرَقْ وِلَيْد الْمَلِكْ وَ خَطَّ تَاجْ فِي رَاسَهْ وَ أَنْطَاهْ كِتَابْ الْمُعَاهَدَةْ وَ مَسَحَهْ وَ دَرَّجَهْ مَلِكْ. وَ بَعَدْ دَا، صَفَّقَوْا لَيَّهْ وَ قَالَوْا: «يِعِيشْ الْمَلِكْ!»
عَتَلْيَا ماتت
13وَ وَكِتْ الْمَلِكَةْ عَتَلْيَا سِمْعَتْ حَرَكَةْ الْحُرَّاسْ وَ الشَّعَبْ، جَرَتْ مَشَتْ لَيْهُمْ فِي بَيْت اللّٰهْ. 14وَ هِي شَافَتْ الْمَلِكْ وَاقِفْ جَنْب الْعَمُودْ فِي مَدَخَلْ بَيْت اللّٰهْ حَسَبْ الْعَادَةْ هَنَا الْمُلُوكْ. وَ الْقُيَّادْ وَ النَّاسْ الْيَضُرْبُوا بُرُنْجِي قَاعِدِينْ مَعَ الْمَلِكْ. وَ كُلَّ شَعَبْ الْبَلَدْ فَرْحَانِينْ مَرَّةْ وَاحِدْ وَ نَاسْ قَاعِدِينْ يَضُرْبُوا بُرُنْجِي. وَ فِي الْبَكَانْ دَا، عَتَلْيَا شَرَّطَتْ خُلْقَانْهَا مِنْ الزَّعَلْ وَ قَالَتْ: «دِي مُؤآمَرَةْ! دِي مُؤآمَرَةْ!»
15وَ رَاجِلْ الدِّينْ يَهُويَدَعْ أَنْطَى أَمُرْ لِقُيَّادْ الْمِيَاتْ الْمُكَلَّفِينْ بِالْعَسْكَرْ وَ قَالْ: «أَمُرْقُوهَا بَرَّا مِنْ صُفُوفْكُو. وَ أَيِّ نَادُمْ الْيِتَابِعْهَا، أَكْتُلُوهْ بِالْسَّيْف.» أَشَانْ هُو مَا دَوَّرْ يَكْتُلُوهَا فِي بَيْت اللّٰهْ. 16وَ هُمَّنْ كَرَبَوْهَا لِعَتَلْيَا وَ مَرَقَوْهَا. وَ وَكِتْ وَصَّلَوْا عَلَيْ قَصِرْ الْمَلِكْ فِي الدَّرِبْ هَنَا مَدَخَلْ الْخَيْل، خَلَاصْ كَتَلَوْهَا فِي الْبَكَانْ دَا.
17وَ يَهُويَدَعْ سَوَّى مُعَاهَدَةْ بَيْن اللّٰهْ وَ بَيْن الْمَلِكْ وَ شَعَبَهْ لِيَبْقَوْا شَعَبْ اللّٰهْ. وَ بَتَّانْ سَوَّى مُعَاهَدَةْ أَمْبَيْن الْمَلِكْ وَ الشَّعَبْ. 18وَ كُلَّ الشَّعَبْ مَشَوْا بَيْت الْعِبَادَةْ هَنَا بَعَلْ وَ هَدَّمَوْه وَ دَمَّرَوْا مَدَابْحَهْ وَ أَصْنَامَهْ كُلَ. وَ قِدَّامْ الْمَدَابِحْ، كَتَلَوْا مَتَّانْ رَاجِلْ الدِّينْ هَنَا بَعَلْ.
وَ بَعَدْ دَا، رَاجِلْ الدِّينْ يَهُويَدَعْ خَطَّ مُرَاقِبِينْ فِي بَيْت اللّٰهْ. 19وَ هُو لَمَّ قُيَّادْ الْمِيَاتْ وَ الْكَرِيِينْ وَ الْحُرَّاسْ وَ كُلَّ شَعَبْ الْبَلَدْ. وَ هُمَّنْ مَرَقَوْا الْمَلِكْ مِنْ بَيْت اللّٰهْ وَ وَدَّوْه لِقَصِرْ الْمَلِكْ بِدَرِبْ مَدَخَلْ الْحُرَّاسْ. وَ خَلَاصْ، يُوَاشْ قَعَدْ فِي كُرْسِي الْمُلُكْ. 20وَ كُلَّ شَعَبْ الْبَلَدْ فِرْحَوْا. وَ بَعَدْ كَتَلَوْهَا لِعَتَلْيَا جَنْب قَصِرْ الْمَلِكْ، الْمَدِينَةْ قَاعِدَةْ فِي السَّلَامَةْ.
يُوَاش بِقي ملك في يَهُوذَا
21 # 11:21 الفصُل 11 آية 21 بالعربي هو الفصُل 12 آية 1 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ يُوَاشْ عِنْدَهْ سَبْعَةْ سَنَةْ وَكِتْ بِقِي مَلِكْ.
Currently Selected:
2 مُلوك 11: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
