2 أخبار 2

سُلَيْمَان يجيب مُعِدّات البُنى

1 # 2‏:1 الفصُل 2 آية 1 بالعربي هو الفصُل 1 آية 18 بالفرنساوي. لاكن ما زاد و لا نقص شيّء إلّا النِمر بس ألبدّلوا. وَ الْمَلِكْ سُلَيْمَانْ أَمَرْ يَبْنُوا بَيْت لِلّٰهْ وَ قَصِرْ لَيَّهْ هُو. 2وَ سُلَيْمَانْ شَالْ 70 000 نَقَّالِينْ وَ 80 000 نَاسْ قَاعِدِينْ فِي الْجِبَالْ أَشَانْ يَقْطَعَوْا الْحَجَرْ وَ 3 600 مُرَاقِبِينْ. 3وَ سُلَيْمَانْ رَسَّلْ لِحِيرَامْ مَلِكْ بَلَدْ صُورْ وَ قَالْ لَيَّهْ: «مِنْ فَضْلَكْ، رَسِّلْ لَيِّ أَنَا كُلَ مِثِلْ إِنْتَ رَسَّلْت لِأَبُويِ دَاوُدْ حَطَبْ الْأَرْز لِيَبْنُوا لَيَّهْ بَيْت الْيَسْكُنْ فَوْقَهْ. 4شِيفْ، أَنَا نِدَوْر نَبْنِي بَيْت لِلّٰهْ إِلٰـهِي وَ نِخَصِّصَهْ أَشَانْ يِحَرُّقُوا قِدَّامَهْ الْبَخُورْ الْمُعَطَّرْ وَ يِقَدُّمُوا دَايْماً الْخُبْزَةْ وَ الضَّحَايَا الْمُحَرَّقِينْ هَنَا الْفَجُرْ وَ الْعَشِيَّةْ وَ كُلِّ يَوْم سَبْت وَ أَوَّلْ يَوْم فِي كُلِّ شَهَرْ وَ كُلِّ عِيدْ هَنَا اللّٰهْ إِلٰـهْنَا. وَ دَا بُخُصّ بَنِي إِسْرَائِيلْ دَايْماً. 5وَ الْبَيْت الْأَنَا نِدَوْر نَبْنِيهْ هُو كَبِيرْ أَشَانْ إِلٰـهْنَا هُو كَبِيرْ مِنْ كُلَّ الْإِلٰـهَاتْ. 6وَ يَاتُو يَقْدَرْ يَبْنِي لَيَّهْ بَيْت؟ أَشَانْ السَّمَاءْ وَ كُلَّ السَّمَاوَاتْ الْوَسِيعِينْ دَوْل مَا يَقْدَرَوْا يِشِيلُوهْ. وَ أَنَا نِسَاوِي شَيّءْ لِنَبْنِي لَيَّهْ بَيْت؟ نِدَوْر بَسْ نَبْنِي بَكَانْ يِحَرُّقُوا فَوْقَهْ بَخُورْ قِدَّامَهْ.

7«وَ هَسَّعْ دَا، رَسِّلْ لَيِّ نَادُمْ الْعِنْدَهْ خِبْرَةْ فِي خِدْمَةْ الدَّهَبْ وَ الْفُضَّةْ وَ النَّحَاسْ وَ الْحَدِيدْ وَ الْقُمَاشْ الْقَرَضِي وَ الْأَحْمَرْ وَ الظَّهْرِي وَ يَعَرِفْ النَّقِشِينْ. وَ هُو يَخْدِمْ مَعَ الْخَدَّامِينْ الْعِنْدُهُمْ خِبْرَةْ الْأَبُويِ دَاوُدْ جَهَّزَاهُمْ وَ قَاعِدِينْ مَعَايِ فِي بَلَدْ يَهُوذَا وَ فِي أُورُشَلِيمْ. 8وَ رَسِّلْ لَيِّ مِنْ لُبْنَانْ حَطَبْ الْأَرْز وَ حَطَبْ السَّرْوِي وَ حَطَبْ الصَّنْدَلْ أَشَانْ أَنَا نَعَرِفْ كَدَرْ خَدَّامِينَكْ يَعَرْفُوا يَقْطَعَوْا شَدَرْ لُبْنَانْ. وَ خَدَّامِينِي يَخْدُمُوا مَعَ خَدَّامِينَكْ 9لِيِجَهُّزُوا لَيِّ حَطَبْ بِكَتَرَةْ أَشَانْ الْبَيْت النِّدَوْر نَبْنِيهْ دَا كَبِيرْ وَ عَجِيبْ. 10وَ دَاهُو نِكَفِّي خَدَّامِينَكْ الْيَقْطَعَوْا الْحَطَبْ 50 000 شُوَالْ هَنَا قَمَحْ أَحْمَرْ وَ 50 000 شُوَالْ هَنَا قَمَحْ أَبْيَضْ وَ 2 000 بِرْمِيلْ هَنَا خَمَرْ وَ 2 000 بِرْمِيلْ هَنَا دِهِنْ.»

11وَ حِيرَامْ مَلِكْ بَلَدْ صُورْ كَتَبْ مَكْتُوبْ وَ رَدَّ لِسُلَيْمَانْ وَ قَالْ: «أَشَانْ اللّٰهْ يِحِبّ شَعَبَهْ دَا بَسْ، هُو خَطَّاكْ فَوْقهُمْ مَلِكْ.» 12وَ بَتَّانْ حِيرَامْ قَالْ: «بَارَكْ اللّٰهْ إِلٰـهْ بَنِي إِسْرَائِيلْ الْخَلَقْ السَّمَاوَاتْ وَ الْأَرْض وَ أَنْطَى لِلْمَلِكْ دَاوُدْ وِلَيْد حَكِيمْ عِنْدَهْ عَقُلْ وَ فِهِمْ. وَ يَبْنِي بَيْت لِلّٰهْ وَ قَصِرْ لَيَّهْ هُو كُلَ. 13وَ هَسَّعْ دَا، نِرَسِّلْ لَيْك رَاجِلْ الْعِنْدَهْ خِبْرَةْ وَ مَعْرَفَةْ وَ هُو حُورَامْ أَبِي 14وِلَيْد هَنَا مَرَةْ وَاحِدَةْ الْمِنْ قَبِيلَةْ دَانْ وَ أَبُوهْ مِنْ بَلَدْ صُورْ. هُو دَا يَعَرِفْ يَخْدِمْ الدَّهَبْ وَ الْفُضَّةْ وَ النَّحَاسْ وَ الْحَدِيدْ وَ الْحَجَرْ وَ الْحَطَبْ وَ الْقُمَاشْ الْقَرَضِي وَ الظَّهْرِي وَ الْأَحْمَرْ وَ كَتَّانْ. وَ عِنْدَهْ خِبْرَةْ فِي نَقِشِينْ الْأَشْيَاءْ الْيَنْقُشُوهُمْ وَ يِعَدِّلْ كُلَّ شَيّءْ الْيَنْطُوهْ لِيَخْدِمَهْ. وَ هُو يَخْدِمْ مَعَ نَاسَكْ الْعِنْدُهُمْ خِبْرَةْ وَ مَعَ الْخُبَرَء هَنَا سِيدِي دَاوُدْ أَبُوكْ. 15وَ هَسَّعْ دَا، يَا سِيدِي، رَسِّلْ لَيْنَا الْقَمَحْ الْأَحْمَرْ وَ الْقَمَحْ الْأَبْيَضْ وَ الدِّهِنْ وَ الْخَمَرْ مِثِلْ إِنْتَ قُلْتَهْ. 16وَ أَنِحْنَ كَمَانْ نَقْطَعَوْا حَطَبْ لُبْنَانْ الْوَاجِبْ لَيْك. وَ نِلِمُّوهْ وَ نَرْبُطُوهْ وَ نِعَوُّمُوهْ فِي الْبَحَرْ لَحَدِّي حِلَّةْ يَافَا وَ إِنْتَ كَمَانْ تَنْقُلَهْ مِنْ هِنَاكْ وَ تِوَدِّيهْ أُورُشَلِيمْ.»

17وَ خَلَاصْ، الْمَلِكْ سُلَيْمَانْ حَسَبْ كُلَّ الْأَجَانِبْ الْقَاعِدِينْ فِي بَلَدْ إِسْرَائِيلْ وَ دَا بَعَدْ الْحِسَابْ السَّوَّاهْ دَاوُدْ أَبُوهْ. وَ لِقِي عَدَدْهُمْ 153 600. 18وَ هُو شَالْ مِنْهُمْ 70 000 نَقَّالِينْ وَ 80 000 نَاسْ قَاعِدِينْ فِي الْجِبَالْ أَشَانْ يَقْطَعَوْا الْحَجَرْ وَ 3 600 مُرَاقِبِينْ الْيِخَدُّمُوا الشَّعَبْ.

Currently Selected:

2 أخبار 2: ع.د.ت19

Highlight

Copy