1 مُلوك 19
19
إِلِيَاس عرّد و مشى حُورِيب
1وَ الْمَلِكْ أَخَابْ خَبَّرْ مَرْتَهْ إِزَبِيلْ بِكُلَّ شَيّءْ الْإِلِيَاسْ سَوَّاهْ وَ كِكَّيْف كَتَلْ كُلَّ أَنْبِيَاء بَعَلْ بِالْسَّيْف. 2وَ خَلَاصْ، إِزَبِيلْ رَسَّلَتْ لِإِلِيَاسْ وَ قَالَتْ: «خَلِّي الْإِلٰـهَاتْ يِعَاقُبُونِي كَدَرْ لِأَمْبَاكِرْ فِي نَفْس السَّاعَةْ دِي كَنْ مَا سَوَّيْت فِي حَيَاتَكْ مِثِلْ إِنْتَ سَوَّيْت فِي حَيَاةْ الْأَنْبِيَاء دَوْل.»
3وَ مِنْ سِمِعْ الْكَلَامْ دَا، إِلِيَاسْ عَرَّدْ لِيِنَجِّي نَفْسَهْ. وَ قَمَّ مَشَى بِيرْ سَبْعَةْ فِي بَلَدْ يَهُوذَا وَ خَلَّى خَدَّامَهْ هِنَاكْ. 4وَ إِلِيَاسْ مَشَى فِي الصَّحَرَاء وَ رَاغْ رُوَاغَةْ هَنَا يَوْم كَامِلْ. وَ مَشَى قَعَدْ فِي قَعَرْ شِدَيْرَةْ رَتَمْ. وَ طَلَبْ الْمَوْت لِنَفْسَهْ وَ قَالْ: «هَسَّعْ دَا، تَمَّانِي. يَا اللّٰهْ، شِيلْ رُوحِي أَشَانْ أَنَا مَا أَخَيْر مِنْ جُدُودِي.» 5وَ هُو رَقَدْ وَ نَامْ فِي تِحِتْ الشِّدَيْرَةْ دِي. وَ طَوَّالِي فِي الْبَكَانْ دَا، مَلَكْ جَاءْ لِمْسَهْ وَ قَالْ لَيَّهْ: «قُمّ وَ آكُلْ.» 6وَ خَلَاصْ، إِلِيَاسْ قَمَّ وَ شَافْ عَلَيْ رَاسَهْ خُبْزَةْ حَامِيَةْ وَ جَرّ هَنَا أَلْمِي. وَ هُو أَكَلْ وَ شِرِبْ وَ قَبَّلْ رَقَدْ.
7وَ مَلَكْ اللّٰهْ جَاءْ لَيَّهْ لِتَانِي مَرَّةْ لِمْسَهْ وَ قَالْ لَيَّهْ: «قُمّ وَ آكُلْ أَشَانْ السَّفَرْ يَبْقَى لَيْك طَوِيلْ زِيَادَةْ.» 8وَ إِلِيَاسْ قَمَّ أَكَلْ وَ شِرِبْ. وَ بَعَدْ لِقِي قُدْرَةْ مِنْ الْأَكِلْ دَا، رَاغْ مُدَّةْ 40 لَيْلَةْ وَ 40 نَهَارْ لَحَدِّي وِصِلْ فِي جَبَلْ اللّٰهْ الْأُسْمَهْ حُورِيبْ.
اللّه بان لإِلِيَاس في جبل حُورِيب
9وَ وَكِتْ إِلِيَاسْ وِصِلْ هِنَاكْ، دَخَلْ فِي كَرْكُورْ وَ رَقَدْ فِي الْبَكَانْ دَا لَيْلَةْ وَاحِدَةْ. وَ لَاكِنْ اللّٰهْ حَجَّى لَيَّهْ وَ قَالْ: «يَا إِلِيَاسْ، إِنْتَ قَاعِدْ تِسَوِّي شُنُو هِنِي؟» 10وَ إِلِيَاسْ رَدَّ لَيَّهْ وَ قَالْ: «يَا اللّٰهْ الْإِلٰـهْ الْقَادِرْ، عِنْدِي مَحَبَّةْ شَدِيدَةْ لَيْك. وَ بَنِي إِسْرَائِيلْ نَقَضَوْا مُعَاهَدَتَكْ وَ كَسَّرَوْا كُلَّ مَدَابْحَكْ وَ كَتَلَوْا أَنْبِيَائَكْ بِالْسَّيْف. وَ أَنَا فَضَّلْت وِحَيْدِي وَ هُمَّنْ قَاعِدِينْ يِفَتُّشُونِي لِيَكْتُلُونِي.» 11وَ اللّٰهْ قَالْ لَيَّهْ: «أَمْرُقْ وَ أَقِيفْ فِي الْحَجَرْ فِي قِدَّامِي أَنَا اللّٰهْ. وَ أَنَا نُفُوتْ قِدَّامَكْ.»
وَ رِيحْ شَدِيدَةْ قَمَّتْ قِدَّامْ اللّٰهْ وَ شَقَّقَتْ الْجِبَالْ وَ كَسَّرَتْ الْحُجَارْ. وَ لَاكِنْ اللّٰهْ مَا قَاعِدْ فِي الرِّيحْ دِي. وَ بَعَدْ الرِّيحْ، جَاءْ زِلْزَالْ. وَ لَاكِنْ اللّٰهْ مَا قَاعِدْ فِي الزِّلْزَالْ دَا. 12وَ بَعَدْ الزِّلْزَالْ، جَاتْ نَارْ. وَ لَاكِنْ اللّٰهْ مَا قَاعِدْ فِي النَّارْ دِي. وَ بَعَدْ النَّارْ، جَاتْ حَرَكَةْ هَنَا حِسّ بَارِدْ. 13وَ وَكِتْ إِلِيَاسْ سِمِعْ الْحِسّ الْبَارِدْ دَا، غَطَّى وِجْهَهْ بِخَلَقَهْ وَ مَرَقْ وَقَفْ فِي خَشُمْ الْكَرْكُورْ.
وَ سِمِعْ حِسّ بُقُولْ لَيَّهْ: «يَا إِلِيَاسْ، إِنْتَ قَاعِدْ تِسَوِّي شُنُو هِنِي؟» 14وَ إِلِيَاسْ رَدَّ لَيَّهْ وَ قَالْ: «يَا اللّٰهْ الْإِلٰـهْ الْقَادِرْ، عِنْدِي مَحَبَّةْ شَدِيدَةْ لَيْك. وَ لَاكِنْ بَنِي إِسْرَائِيلْ نَقَضَوْا مُعَاهَدَتَكْ وَ كَسَّرَوْا كُلَّ مَدَابْحَكْ وَ كَتَلَوْا أَنْبِيَائَكْ بِالْسَّيْف. وَ أَنَا فَضَّلْت وِحَيْدِي وَ هُمَّنْ قَاعِدِينْ يِفَتُّشُونِي لِيَكْتُلُونِي.» 15وَ اللّٰهْ قَالْ لَيَّهْ: «قَبِّلْ بِدَرِبْ الصَّحَرَاء وَ أَمْشِي لَحَدِّي مَدِينَةْ دِمَشْق. وَ هِنَاكْ، أَمْسَحَهْ لِحَزَيِيلْ وَ دَرِّجَهْ مَلِكْ فِي بَلَدْ أَرَامْ. 16وَ أَمْسَحَهْ لِيَاهُو وِلَيْد نِمْشِي وَ دَرِّجَهْ مَلِكْ فِي مَمْلَكَةْ إِسْرَائِيلْ. وَ أَمْسَحْ أَلْيَسَعْ وِلَيْد شَافَاطْ الْمِنْ حِلَّةْ آبِلْ مَحُولَى أَشَانْ يَبْقَى نَبِي فِي بَدَلَكْ. 17وَ أَيِّ نَادُمْ النِّجِي مِنْ سَيْف حَزَيِيلْ، يَاهُو يَكْتُلَهْ. وَ أَيِّ نَادُمْ النِّجِي مِنْ سَيْف يَاهُو، أَلْيَسَعْ يَكْتُلَهْ. 18وَ لَاكِنْ نِخَلِّي 7 000 نَاسْ مِنْ بَنِي إِسْرَائِيلْ هُمَّنْ الْمَا سَجَدَوْا وَ لَا حَبَّوْا إِلٰـهْ بَعَلْ.»
اللّه كلّف أَلْيَسَع ليِبدِّل إِلِيَاس
19وَ خَلَاصْ، إِلِيَاسْ قَمَّ مِنْ الْبَكَانْ دَا وَ مَشَى لِقِي أَلْيَسَعْ وِلَيْد شَافَاطْ. هُو قَاعِدْ يَحْرِتْ فِي زَرْعَهْ بِـ 12 حَرَّاتَةْ وَ أَيِّ حَرَّاتَةْ يُكُرُّوهَا تِيرَانْ إِتْنَيْن. وَ أَلْيَسَعْ ذَاتَهْ قَاعِدْ يُسُوقْ تِيرَانْ الْحَرَّاتَةْ الْأَخِيرَةْ. وَ إِلِيَاسْ قَرَّبْ لَيَّهْ وَ خَطَّ خَلَقَهْ فَوْقَهْ. 20وَ أَلْيَسَعْ خَلَّى التِّيرَانْ وَ جَرَى وَرَاءْ إِلِيَاسْ وَ قَالْ لَيَّهْ: «خَلِّينِي نَمْشِي نِحِبّ أَبُويِ وَ أَمِّي وَ بَعَدْ دَا، نِتَابِعَكْ.» وَ إِلِيَاسْ رَدَّ لَيَّهْ وَ قَالْ: «أَمْشِي وَ قَبِّلْ تَعَالْ أَشَانْ إِنْتَ تَعَرِفْ الشَّيّءْ الْأَنَا سَوَّيْتَهْ لَيْك.»
21وَ خَلَاصْ، أَلْيَسَعْ قَبَّلْ مِنْ وَرَاءْ إِلِيَاسْ وَ شَالْ تِيرَانَهْ الْإِتْنَيْن وَ دَبَحَاهُمْ وَ قَدَّمَاهُمْ ضَحِيَّةْ. وَ بِحَطَبْ الْحَرَّاتَةْ دِي، أَوْقَدْ نَارْ وَ رَكَّبْ اللَّحَمْ وَ أَنْطَاهْ لِلنَّاسْ الْقَاعِدِينْ مَعَايَهْ وَ هُمَّنْ أَكَلَوْه. وَ بَعَدْ دَا، هُو تَابَعَهْ لِإِلِيَاسْ وَ بِقِي خَدَّامَهْ.
Currently Selected:
1 مُلوك 19: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
