1 مُلوك 12
12
ملمّة شَكِيم
1وَ رَحَبْعَامْ قَمَّ مَشَى حِلَّةْ شَكِيمْ أَشَانْ كُلَّ بَنِي إِسْرَائِيلْ قَاعِدِينْ يَرْجَوْه هِنَاكْ لِيِدَرُّجُوهْ مَلِكْ. 2وَ وَكِتْ يَرُبَعَامْ وِلَيْد نَبَاتْ سِمِعْ الْخَبَرْ دَا، هُو لِسَّاعْ قَاعِدْ فِي مَصِرْ. أَشَانْ أَوَّلْ هُو عَرَّدْ مِنْ الْمَلِكْ سُلَيْمَانْ وَ مَشَى مَصِرْ وَ سَكَنْ هِنَاكْ. 3وَ رَسَّلَوْا نَادَوْه لِيَرُبَعَامْ وَ هُو جَاءْ. وَ هُو مَعَ كُلَّ جَمَاعَةْ بَنِي إِسْرَائِيلْ قَمَّوْا حَجَّوْا لِرَحَبْعَامْ وَ قَالَوْا لَيَّهْ: 4«أَبُوكْ سَوَّانَا مِثِلْ عَبِيدْ وَ خَطَّ فَوْقنَا خِدْمَةْ قَاسِيَةْ مِثِلْ دَامِي تَقِيلْ فِي رَقَبَتْنَا. وَ هَسَّعْ، نِدَوْرُوا مِنَّكْ إِنْتَ تِخَفِّفْ لَيْنَا تَقَلَةْ الدَّامِي الْأَبُوكْ خَطَّاهْ فَوْقنَا وَ أَنِحْنَ نَخْدُمُوا تِحْتَكْ.» 5وَ رَحَبْعَامْ قَالْ لَيْهُمْ: «قَبُّلُوا وَ بَعَدْ تَلَاتَةْ يَوْم تَعَالُوا لَيِّ.» وَ خَلَاصْ، الشَّعَبْ قَبَّلَوْا بُيُوتْهُمْ.
6وَ الْمَلِكْ رَحَبْعَامْ شَاوَرْ الشُّيُوخْ الْأَوَّلْ قَاعِدِينْ مَعَ أَبُوهْ سُلَيْمَانْ وَكِتْ هُو حَيّ. وَ قَالْ لَيْهُمْ: «شُنُو وَصِيِّتْكُو لَيِّ فِي كَلَامْ الشَّعَبْ دَا؟» 7وَ الشُّيُوخْ رَدَّوْا لَيَّهْ وَ قَالَوْا: «كَنْ الْيَوْم إِنْتَ تَخْدِمْ لِلشَّعَبْ وَ تِسَوِّي لَيْهُمْ الْخَيْر وَ تُرُدّ لَيْهُمْ بِكَلَامْ حَلُو، خَلَاصْ هُمَّنْ يَخْدُمُوا دَايْماً تِحْتَكْ.»
8وَ لَاكِنْ رَحَبْعَامْ أَبَى وَصِيَّةْ الشُّيُوخْ الْأَنْطَوْهَا لَيَّهْ. وَ هُو شَاوَرْ وَصِيَّةْ الصُّبْيَانْ الْكِبْرَوْا مَعَايَهْ سَوَا وَ قَاعِدِينْ يَخْدُمُوا لَيَّهْ. 9وَ هُو سَأَلَاهُمْ لِلصُّبْيَانْ دَوْل وَ قَالْ: «شُنُو وَصِيِّتْكُو فِي الشَّعَبْ الْبِدَوْرُوا نِخَفِّفْ لَيْهُمْ تَقَلَةْ الدَّامِي الْأَبُويِ خَطَّاهْ فَوْقهُمْ؟» 10وَ الصُّبْيَانْ الْكِبْرَوْا مَعَايَهْ قَالَوْا: «دَاهُو الْكَلَامْ التُّقُولَهْ لِلشَّعَبْ الْيَشْكُوا كَدَرْ أَبُوكْ خَطَّ فَوْقهُمْ دَامِي تَقِيلْ وَ يِدَوْرُوا إِنْتَ تِخَفِّفَهْ لَيْهُمْ. وَ دَاهُو الْكَلَامْ التُّقُولَهْ لَيْهُمْ: ‹أُصْبَعِي الصَّغَيَّرْ دَا كَبِيرْ مِنْ صُلُبْ أَبُويِ. 11صَحِيحْ، أَبُويِ خَطَّ فَوْقكُو دَامِي تَقِيلْ وَ هَسَّعْ دَا، أَنَا نِزِيدْ فَوْقكُو تَقَلَةْ آخَرَةْ! أَبُويِ جَلَدَاكُو بِسَوْط هَنَا فَرْوَةْ وَ لَاكِنْ أَنَا نَجْلِدْكُو بِسَوْط الْعِنْدَهْ حَدِيدْ مِثِلْ دَنَبْ الْعَقْرَبْ.›»
12وَ بَعَدْ تَلَاتَةْ يَوْم، يَرُبَعَامْ وَ كُلَّ الشَّعَبْ قَبَّلَوْا جَوْا لِرَحَبْعَامْ مِثِلْ هُو قَالَهْ لَيْهُمْ: «قَبُّلُوا وَ بَعَدْ تَلَاتَةْ يَوْم، تَعَالُوا لَيِّ.» 13وَ الْمَلِكْ رَحَبْعَامْ أَبَى وَصِيَّةْ الشُّيُوخْ الْأَنْطَوْهَا لَيَّهْ وَ حَجَّى لِلشَّعَبْ بِكَلَامْ قَوِي. 14وَ رَدَّ لَيْهُمْ حَسَبْ وَصِيَّةْ الصُّبْيَانْ وَ قَالْ لَيْهُمْ: «أَبُويِ خَطَّ فَوْقكُو دَامِي تَقِيلْ وَ هَسَّعْ أَنَا نِزِيدْ فَوْقكُو تَقَلَةْ آخَرَةْ. أَبُويِ جَلَدَاكُو بِسَوْط هَنَا فَرْوَةْ لَاكِنْ أَنَا نَجْلِدْكُو بِسَوْط الْعِنْدَهْ حَدِيدْ مِثِلْ دَنَبْ الْعَقْرَبْ.»
15وَ الْمَلِكْ مَا سِمِعْ كَلَامْ الشَّعَبْ. وَ دَا جَايِ مِنْ اللّٰهْ، أَشَانْ اللّٰهْ دَوَّرْ يِحَقِّقْ كَلَامَهْ الْقَالَهْ لِيَرُبَعَامْ وِلَيْد نَبَاتْ بِوَاسِطَةْ النَّبِي أَخِيَّا الْمِنْ حِلَّةْ شِيلَوْه.
بني إسرائيل أنْقسموا ممْلكتَيْن
16وَ وَكِتْ كُلَّ قَبَايِلْ بَنِي إِسْرَائِيلْ شَافَوْا كَدَرْ الْمَلِكْ مَا سِمِعْ كَلَامْهُمْ دَا، قَالَوْا لَيَّهْ: «شُنُو الْيِلِمِّنَا مَعَ ذُرِّيَّةْ دَاوُدْ؟ أَنِحْنَ مَا عِنْدِنَا وَرَثَةْ مَعَ عِيَالْ يَسَّى! يَلَّا، يَا قَبَايِلْ إِسْرَائِيلْ، خَلِّي أَيِّ وَاحِدْ يِقَبِّلْ بَيْتَهْ! وَ هَسَّعْ دَا، يَا ذُرِّيَّةْ دَاوُدْ، هِمُّوا بِنُفُوسْكُو.» وَ بَنِي إِسْرَائِيلْ شَتَّوْا وَ قَبَّلَوْا بُيُوتْهُمْ.
17وَ بَيْدَا، رَحَبْعَامْ قَاعِدْ يَحْكِمْ فِي قَبَايِلْ إِسْرَائِيلْ السَّاكْنِينْ فِي حِلَّالْ بَلَدْ يَهُوذَا بَسْ. 18وَ الْمَلِكْ رَحَبْعَامْ رَسَّلْ أَدُرَامْ مُرَاقِبْ هَنَا الْخِدْمَةْ الْإِجْبَارِيَّةْ لِقَبَايِلْ بَنِي إِسْرَائِيلْ السَّاكْنِينْ فِي مُنْشَاقْ الْبَلَدْ. لَاكِنْ كُلُّهُمْ لَمَّوْا فَوْقَهْ وَ رَجَمَوْه وَ مَاتْ. وَ الْمَلِكْ رَحَبْعَامْ ذَاتَهْ يَلَّا يَلَّا رِكِبْ فِي عَرَبَتَهْ وَ عَرَّدْ مَشَى مَدِينَةْ الْقُدُسْ. 19وَ بِمِثِلْ دَا، قَبَايِلْ إِسْرَائِيلْ السَّاكْنِينْ فِي الْمُنْشَاقْ أَتْمَرَّدَوْا ضِدّ ذُرِّيَّةْ دَاوُدْ لَحَدِّي الْيَوْم.
20وَ وَكِتْ بَنِي إِسْرَائِيلْ سِمْعَوْا كَدَرْ يَرُبَعَامْ قَبَّلْ مِنْ مَصِرْ، نَادَوْه قِدَّامْ الْمُجْتَمَعْ وَ دَرَّجَوْه مَلِكْ فِي وَاحِدِينْ مِنْ قَبَايِلْ إِسْرَائِيلْ. وَ إِلَّا قَبِيلَةْ يَهُوذَا وِحَيْدهَا بَسْ تَابَعَتْ ذُرِّيَّةْ دَاوُدْ.
رَحَبْعَام يدَوْر المُلُك بدواس
21وَ وَكِتْ رَحَبْعَامْ وَصَّلْ مَدِينَةْ الْقُدُسْ، لَمَّ كُلَّ قَبِيلَةْ يَهُوذَا وَ قَبِيلَةْ بَنْيَامِينْ وَ عَزَلْ مِنْهُمْ 180 000 رُجَالْ مُحَارِبِينْ لِيَمْشُوا يِحَارُبُوا قَبَايِلْ إِسْرَائِيلْ فِي الْمُنْشَاقْ وَ يِقَبُّلُوا الْمُلُكْ بَتَّانْ لِرَحَبْعَامْ وِلَيْد سُلَيْمَانْ. 22وَ لَاكِنْ الرَّبّ حَجَّى لِلنَّبِي شَمَعْيَا وَ قَالْ لَيَّهْ: 23«حَجِّي لِرَحَبْعَامْ وِلَيْد سُلَيْمَانْ مَلِكْ بَنِي يَهُوذَا وَ لِكُلَّ قَبِيلَةْ يَهُوذَا وَ قَبِيلَةْ بَنْيَامِينْ وَ لِكُلَّ الشَّعَبْ الْآخَرِينْ وَ قُولْ لَيْهُمْ: 24‹دَاهُو اللّٰهْ قَالْ: ”مَا تَمْشُوا تِحَارُبُوا أَخْوَانْكُو قَبَايِلْ إِسْرَائِيلْ. خَلِّي أَيِّ وَاحِدْ يِقَبِّلْ بَيْتَهْ أَشَانْ أَنَا بَسْ أَسَّسْت الْبَرْجَلَةْ دِي.“›» وَ بَيْدَا، خَلَاصْ هُمَّنْ سِمْعَوْا كَلَامْ اللّٰهْ وَ قَبَّلَوْا بُيُوتْهُمْ حَسَبْ كَلَامْ اللّٰهْ.
25وَ يَرُبَعَامْ بَنَى حِلَّةْ شَكِيمْ فِي جِبَالْ أَفْرَايِمْ وَ سَكَنْ هِنَاكْ. وَ بَعَدْ دَا، مَشَى بَنَى حِلَّةْ فَنُوِيلْ.
العجّال الإتْنَيْن هنا الدهب
26وَ يَرُبَعَامْ قَالْ فِي نَفْسَهْ: «فِي الْحَالَةْ دِي، مُمْكِنْ الْمُلُكْ دَا يِقَبِّلْ لِذُرِّيَّةْ دَاوُدْ. 27كَنْ الشَّعَبْ يَمْشُوا دَايْماً يِقَدُّمُوا ضَحَايَا فِي بَيْت اللّٰهْ فِي مَدِينَةْ الْقُدُسْ، يَوْم وَاحِدْ قُلُوبْهُمْ يِقَبُّلُوا وَ يِتَابُعُوا سِيدْهُمْ رَحَبْعَامْ مَلِكْ مَمْلَكَةْ يَهُوذَا. وَ أَنَا دَا يَكْتُلُونِي وَ يِقَبُّلُوا لِرَحَبْعَامْ مَلِكْ مَمْلَكَةْ يَهُوذَا.» 28وَ خَلَاصْ، الْمَلِكْ يَرُبَعَامْ لِقِي فِكْرَةْ وَ صَنَعْ عَجَّالْ إِتْنَيْن هَنَا دَهَبْ وَ قَالْ لِلشَّعَبْ: «إِنْتُو مَشَيْتُوا عِدَّةْ مَرَّاتْ فِي مَدِينَةْ الْقُدُسْ. وَ هَسَّعْ دَا، يَا بَنِي إِسْرَائِيلْ، دَوْل بَسْ إِلٰـهَاتْكُو الْمَرَقَوْكُو مِنْ بَلَدْ مَصِرْ.»
29وَ خَطَّ الْأَصْنَامْ دَوْل وَاحِدْ فِي حِلَّةْ بَيْت إِيلْ وَ الْآخَرْ فِي حِلَّةْ دَانْ. 30وَ لَزَّ الشَّعَبْ فِي الذَّنِبْ. هُمَّنْ مَشَوْا مَعَ الصَّنَمْ الْوَاحِدْ دَا لَحَدِّي حِلَّةْ دَانْ. 31وَ يَرُبَعَامْ بَنَى بَكَانَاتْ عَالِيِينْ هَنَا عِبَادَةْ. وَ مِنْ الشَّعَبْ، هُو دَرَّجْ رُجَالْ دِينْ الْمَا مِنْ قَبِيلَةْ لَاوِي. 32وَ يَرُبَعَامْ أَسَّسْ عِيدْ فِي يَوْم 15 هَنَا الشَّهَرْ التَّامِنْ مِثِلْ الْعِيدْ الْقَاعِدِينْ يِعَيُّدُوهْ فِي مَمْلَكَةْ يَهُوذَا. وَ الْمَلِكْ ذَاتَهْ مَشَى وَ قَدَّمْ ضَحَايَا فِي الْمَدْبَحْ. وَ فِي بَيْت إِيلْ كُلَ، هُو قَدَّمْ ضَحَايَا لِلْعَجَّالْ الصَّنَعَاهُمْ. وَ فِي بَيْت إِيلْ، خَطَّ رُجَالْ دِينْ فِي الْبَكَانَاتْ الْعَالِيِينْ الْبَنَاهُمْ لِلْعِبَادَةْ. 33وَ دَا فِي يَوْم 15 هَنَا الشَّهَرْ التَّامِنْ، الْيَوْم الْهُو بَسْ قَطَعَهْ، هُو مَشَى بَيْت إِيلْ فِي بَكَانْ الْمَدْبَحْ الْبَنَاهْ. وَ أَسَّسْ عِيدْ لِبَنِي إِسْرَائِيلْ وَ هُو ذَاتَهْ قَدَّمْ ضَحَايَا فِي الْمَدْبَحْ دَا.
Currently Selected:
1 مُلوك 12: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
