1 أخبار 29
29
الهدايا لبُنى بيت اللّه
1وَ الْمَلِكْ دَاوُدْ قَالْ لِكُلَّ الشَّعَبْ اللَّمِّينْ: «الرَّبّ عَزَلْ وِلَيْدِي سُلَيْمَانْ بَسْ وَ لَاكِنْ هُو لِسَّاعْ صَبِي وَ مَا عِنْدَهْ عِرْفَةْ. وَ الْخِدْمَةْ دِي، هِي كَبِيرَةْ أَشَانْ الْبَيْت الْمُقَدَّسْ دَا، مَا يَبْنُوهْ لِإِنْسَانِي بَسْ لَاكِنْ لِلّٰهْ الرَّبّ. 2وَ أَنَا قَمَّيْت بِكُلَّ قُدُرْتِي وَ جَهَّزْت لِبُنَى بَيْت إِلٰـهِي دَهَبْ لِأَيِّ شَيّءْ الْيَصْنَعَوْه بِدَهَبْ وَ فُضَّةْ لِأَيِّ شَيّءْ الْيَصْنَعَوْه بِفُضَّةْ وَ نَحَاسْ لِأَيِّ شَيّءْ الْيَصْنَعَوْه بِنَحَاسْ وَ حَدِيدْ لِأَيِّ شَيّءْ الْيَصْنَعَوْه بِحَدِيدْ وَ حَطَبْ لِأَيِّ شَيّءْ الْيِسَوُّوهْ بِحَطَبْ. وَ أَنَا جَهَّزْت حَجَرْ غَالِي الْأُسْمَهْ عَقِيقْ وَ نَفَرْ آخَرِينْ مِنْ الْحُجَارْ الْغَالِيِّينْ لِيِجَمُّلُوا بَيْهُمْ. وَ حُجَارْ غَالِيِّينْ اللَّوْنهُمْ زُرُقْ وَ خُضُرْ وَ بَتَّانْ جَهَّزْت رُخَامْ بِكَتَرَةْ. 3وَ دَا أَشَانْ أَنَا نِحِبّ بَيْت إِلٰـهِي، نَنْطِي مِنْ الدَّهَبْ وَ الْفُضَّةْ الْحَقِّي حَلَالِي لِبَيْت إِلٰـهِي. وَ دَا زِيَادَةْ فِي الشَّيّءْ الْجَهَّزْتَهْ لِلْبَيْت الْمُقَدَّسْ. 4أَنَا نَنْطِي 100 000 كِيلَوْ هَنَا دَهَبْ صَافِي وَ 240 000 كِيلَوْ هَنَا فُضَّةْ صَافِي لِيِغَطُّوا بَيَّهْ دَرَادِرْ الْبَيْت. 5وَ كُلَّ الدَّهَبْ دَا لِلْأَشْيَاءْ الْبِدَهَبْ وَ الْفُضَّةْ لِلْأَشْيَاءْ الْبِفُضَّةْ الْيِسَوُّوهُمْ الصِّنَاعِيِينْ لِبَيْت اللّٰهْ. وَ يَاتُو مِنْكُو الْيَوْم بِنِيّتَهْ يِجِيبْ هَدِيَّةْ لِلّٰهْ؟»
6وَ خَلَاصْ، كُبَارَاتْ الْعَايِلَاتْ وَ كُبَارَاتْ قَبَايِلْ بَنِي إِسْرَائِيلْ وَ قُيَّادْ الْآلَافْ وَ قُيَّادْ الْمِيَاتْ وَ مَسَائِيلْ الْمَلِكْ جَابَوْا هَدَايَاهُمْ. 7وَ هُمَّنْ أَنْطَوْا لِخِدْمَةْ بَيْت اللّٰهْ 170 000 كِيلَوْ هَنَا دَهَبْ وَ 10 000 جِنَيْه هَنَا دَهَبْ وَ 340 000 كِيلَوْ هَنَا فُضَّةْ وَ قَرِيبْ 600 000 كِيلَوْ هَنَا نَحَاسْ وَ زِيَادَةْ مِنْ 3 مَلْيُونْ كِيلَوْ هَنَا حَدِيدْ. 8وَ هُمَّنْ الْعِنْدُهُمْ فِي بُيُوتْهُمْ حُجَارْ غَالِيِّينْ جَابَوْهُمْ لِمَخَزَنْ هَنَا بَيْت اللّٰهْ وَ أَمَّنَوْهُمْ فِي إِيدْ يَحِيِيلْ الْمِنْ قَبِيلَةْ قِرْشُونْ. 9وَ الشَّعَبْ فِرْحَوْا بِالْهَدَايَا دَوْل أَشَانْ هُمَّنْ قَدَّمَوْهُمْ بِقَلِبْ مُخْلِصْ لِلّٰهْ. وَ الْمَلِكْ دَاوُدْ كُلَ فِرِحْ فَرْحَةْ شَدِيدَةْ.
دَاوُد شكر اللّه
10وَ دَاوُدْ شَكَرْ اللّٰهْ قِدَّامْ كُلَّ الشَّعَبْ وَ قَالْ: «يَا اللّٰهْ إِلٰـهْ جِدِّنَا إِسْرَائِيلْ خَلِّي يِبَارُكُوا دَايْماً وَ إِلَى الْأَبَدْ. 11وَ لَيْك إِنْتَ، يَا اللّٰهْ، الْعَظَمَةْ وَ الْقُدْرَةْ وَ الْجَلَالْ وَ الْمَجْد وَ النُّورْ أَشَانْ كُلَّ شَيّءْ الْفِي السَّمَاءْ وَ فِي الْأَرْض، هَنَاكْ إِنْتَ. وَ يَا اللّٰهْ، إِنْتَ بَسْ مَالِكْ فِي كُلَّ الْمَخْلُوقِينْ. 12الْغُنَى وَ الْمَجْد يَجُوا مِنَّكْ وَ إِنْتَ بَسْ الْمَالِكْ فِي كُلَّ شَيّءْ. وَ عِنْدَكْ قُدْرَةْ وَ عِزّ وَ إِنْتَ بَسْ التِّكَبِّرْ وَ تِقَوِّي. 13وَ هَسَّعْ، يَا إِلٰـهْنَا، نَشْكُرُوكْ وَ نَحْمُدُوا أُسْمَكْ الْجَلِيلْ.
14«لَاكِنْ أَنَا كَيْ يَاتُو؟ وَ شَعَبِي يِسَاوِي شُنُو؟ وَ كِكَّيْف لِقِينَا قُدْرَةْ لِنِقَدُّمُوا هَدَايَا مِثِلْ دَوْل؟ أَيِّ شَيّءْ الْعِنْدِنَا جَايِ مِنَّكْ إِنْتَ وَ كُلَّ شَيّءْ الْقَدَّمْنَاهْ لَيْك، إِنْتَ بَسْ أَنْطَيْتنَا. 15وَ أَنِحْنَ نِعِيشُوا مِثِلْ أَجَانِبْ وَ ضِيفَانْ قِدَّامَكْ مِثِلْ كُلَّ جُدُودْنَا. وَ حَيَاتْنَا فِي الدُّنْيَا دِي مِثِلْ ضُلّ الضَّحَى الزَّوَّالْ. هَلْ الضُّلّ عِنْدَهْ عَشَمْ يَقْعُدْ وَلَّا؟
16«يَا اللّٰهْ إِلٰـهْنَا! كُلَّ الْأَشْيَاءْ دَوْل لَمَّيْنَاهُمْ بِكَتَرَةْ وَ جَهَّزْنَاهُمْ لِنَبْنُوا لَيْك بَيْت لِأُسْمَكْ الْمُقَدَّسْ. وَ لَاكِنْ كُلَّ الْأَشْيَاءْ دَوْل جَايِينْ مِنَّكْ وَ هِنَيْك. 17وَ أَنَا نَعَرِفْ، يَا إِلٰـهِي، كَدَرْ إِنْتَ تَكْشِفْ الْفِي الْقَلِبْ وَ تِحِبّ الْعَدَالَةْ. وَ بِنِيَّةْ وَاحِدَةْ، أَنَا قَدَّمْت لَيْك كُلَّ الْأَشْيَاءْ دَوْل. وَ هَسَّعْ، دَاهُو شَعَبَكْ لَمَّوْا بِفَرْحَةْ وَ قَاعِدِينْ يِقَدُّمُوا لَيْك بِنِيَّةْ وَاحِدَةْ الْهَدَايَا دَوْل.
18«يَا اللّٰهْ رَبّ جُدُودْنَا إِبْرَاهِيمْ وَ إِسْحَاقْ وَ يَعْقُوبْ! أَحْفَضْ دَايْماً الْفِكْرَةْ هَنَا قَدِّمِينْ الْهَدَايَا دِي فِي قُلُوبْ شَعَبَكْ. وَ ثَبِّتْ قُلُوبْهُمْ فَوْقَكْ. 19وَ لِوِلَيْدِي سُلَيْمَانْ دَا، أَنْطِيهْ قَلِبْ مُخْلِصْ لِيَحْفَضْ وَصِيَّاتَكْ وَ تَعْلِيمَكْ وَ شُرُوطَكْ وَ يِطَبِّقْهُمْ وَ يَبْنِي الْبَيْت الْمُقَدَّسْ الْأَنَا جَهَّزْت لَيَّهْ.»
20وَ بَعَدْ دَا، دَاوُدْ قَالْ لِكُلَّ الشَّعَبْ: «بَارُكُوا اللّٰهْ إِلٰـهْكُو.» وَ كُلَّ الشَّعَبْ بَارَكَوْا اللّٰهْ رَبّ جُدُودْهُمْ. وَ دَنْقَرَوْا وَ سَجَدَوْا لِلّٰهْ وَ لِلْمَلِكْ.
سُلَيْمَان درّجوه ملك
21وَ فِي الْيَوْم التَّانِي مِنْ الْيَوْم دَا، هُمَّنْ دَبَحَوْا ضَحَايَا وَ قَدَّمَوْا ضَحَايَا مُحَرَّقِينْ لِلّٰهْ. وَ هُمَّنْ قَدَّمَوْا 1 000 تَوْر وَ 1 000 كَبِشْ وَ 1 000 حَمَلْ بِهَدَايَاهُمْ هَنَا الشَّرَابْ. وَ الضَّحَايَا الْقَدَّمَوْهُمْ كَتِيرِينْ لِحْقَوْا لِكُلَّ بَنِي إِسْرَائِيلْ. 22وَ فِي الْيَوْم دَا، هُمَّنْ أَكَلَوْا وَ شِرْبَوْا قِدَّامْ اللّٰهْ بِفَرْحَةْ كَبِيرَةْ.
وَ لِتَانِي مَرَّةْ، هُمَّنْ شَالَوْا سُلَيْمَانْ وِلَيْد دَاوُدْ وَ مَسَحَوْه وَ دَرَّجَوْه مَلِكْ وَ خَصَّصَوْا لِلّٰهْ. وَ مَسَحَوْا صَدُوقْ رَاجِلْ دِينْ كَبِيرْ. 23وَ سُلَيْمَانْ قَعَدْ فِي كُرْسِي الْمُلُكْ هَنَا اللّٰهْ وَ بِقِي مَلِكْ فِي بَدَلْ أَبُوهْ دَاوُدْ. وَ هُو قَاعِدْ يَنْجَحْ وَ كُلَّ بَنِي إِسْرَائِيلْ يِكَرُّمُوهْ. 24وَ كُلَّ الْكُبَارَاتْ وَ الرُّجَالْ الْفَحَلِينْ وَ كُلَّ الْعِيَالْ الْآخَرِينْ هَنَا الْمَلِكْ دَاوُدْ قَعَدَوْا تِحِتْ حُكُمْ سُلَيْمَانْ. 25وَ اللّٰهْ سَوَّاهْ لِسُلَيْمَانْ عَالِي مَرَّةْ وَاحِدْ فِي عُيُونْ كُلَّ بَنِي إِسْرَائِيلْ وَ أَنْطَى عَظَمَةْ لِمَمْلَكَتَهْ الْأَبَداً مَا أَنْطَاهَا لِأَيِّ مَلِكْ الْقَبْلَهْ فِي بَلَدْ إِسْرَائِيلْ.
مَوْت دَاوُد
26وَ دَاوُدْ وِلَيْد يَسَّى حَكَمْ فِي كُلَّ بَلَدْ إِسْرَائِيلْ. 27وَ مُدَّةْ حُكْمَهْ فِي كُلَّ بَلَدْ إِسْرَائِيلْ 40 سَنَةْ. هُو حَكَمْ 7 سَنَةْ فِي حِبْرُونْ وَ 33 سَنَةْ فِي أُورُشَلِيمْ. 28وَ مَاتْ وَكِتْ شَيَّبْ مَرَّةْ وَاحِدْ وَ شِبِعْ مِنْ الدُّنْيَا. وَ قَبُلْ مَوْتَهْ، هُو عَاشْ فِي غُنَى وَ شَرَفْ. وَ خَلَاصْ، وِلَيْدَهْ سُلَيْمَانْ حَكَمْ فِي بَدَلَهْ.
29وَ كُلَّ عَمَلْ الْمَلِكْ دَاوُدْ مِنْ الْبِدَايَةْ لِلنِّهَايَةْ مَكْتُوبْ فِي كُتُبْ الْبِنَادُوهُمْ أَعْمَالْ النَّبِي صَمُوِيلْ وَ أَعْمَالْ النَّبِي نَاتَانْ وَ أَعْمَالْ النَّبِي قَادْ. 30وَ الْكُتُبْ دَوْل، مَكْتُوبْ فَوْقهُمْ كُلَّ تَارِيخْ مُلْكَهْ وَ فَرَاسِيّتَهْ وَ كُلَّ شَيّءْ الْكَانْ فَوْقَهْ هُو وَ فَوْق بَنِي إِسْرَائِيلْ وَ فَوْق كُلَّ مَمَالِكْ هَنَا بُلْدَانْ آخَرِينْ.
Currently Selected:
1 أخبار 29: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
