1 أخبار 26
26
مجْموعات الحُرّاس
1وَ مَجْمُوعَاتْ الْحُرَّاسْ هَنَا الْبِيبَانْ، شَالَوْهُمْ مِنْ ذُرِّيَّةْ قُورَحْ وَ فِي رَاسْهُمْ مَشَلَامْيَا وِلَيْد قُورِي مِنْ ذُرِّيَّةْ أَسَافْ. 2وَ أَوْلَادْ مَشَلَامْيَا هُمَّنْ زَكَرِيَّا الْبِكِرْ وَ يَدِيَعِيلْ التَّانِي وَ زَبَدْيَا التَّالِتْ وَ يَتْنِيِيلْ الرَّابِعْ 3وَ عِلَامْ الْخَامِسْ وَ يُوحَنَانْ السَّادِسْ وَ أَلِيُعْنَايْ السَّابِعْ.
4وَ أَوْلَادْ عُبَيْد أَدَوْم هُمَّنْ شَمَعْيَا الْبِكِرْ وَ يَهُزَبَادْ التَّانِي وَ يُوَاخْ التَّالِتْ وَ سَاكَرْ الرَّابِعْ وَ نَتَنِيلْ الْخَامِسْ 5وَ عَمِيِيلْ السَّادِسْ وَ يَسَّاكَرْ السَّابِعْ وَ فَعُلَّتَايْ التَّامِنْ، أَشَانْ الرَّبّ بَارَكْ عُبَيْد أَدَوْم.
6وَ شَمَعْيَا الْبِكِرْ جَابْ عِيَالْ الْبِقَوْا مُمَثِّلِينْ عَايِلَاتْهُمْ أَشَانْ هُمَّنْ رُجَالْ فُرَّاسْ وَ قَادْرِينْ. 7وَ أَوْلَادْ شَمَعْيَا هُمَّنْ عُتْنِي وَ رَفَيِيلْ وَ عُبَيْد وَ أَلْزَبَدْ وَ أَخْوَانْهُمْ الْفَحَلِينْ أَلِيهُو وَ سَمَكْيَا.
8وَ كُلَّ النَّاسْ دَوْل مِنْ ذُرِّيَّةْ عُبَيْد أَدَوْم مَعَ أَوْلَادْهُمْ وَ عَايِلَاتْهُمْ، كُلُّهُمْ كَيْ رُجَالْ فَحَلِينْ وَ قَادْرِينْ فِي خِدْمِتْهُمْ وَ عَدَدْهُمْ 62.
9وَ مَجْمُوعَةْ مَشَلَامْيَا بِعِيَالَهْ وَ أَخْوَانَهْ عَدَدْهُمْ 18 كُلُّهُمْ رُجَالْ فَحَلِينْ.
10وَ حُوسَا الْمِنْ ذُرِّيَّةْ مَرَارِي عِنْدَهْ أَوْلَادْ. وَ وِلَيْدَهْ شِمْرِي مَا بِكِرْ أَبُوهْ وَ لَاكِنْ خَطَّاهْ كَبِيرْ الْعَايِلَةْ. 11وَ حِلْقِيَّا وِلَيْدَهْ التَّانِي وَ طَبَلْيَا التَّالِتْ وَ زَكَرِيَّا الرَّابِعْ. وَ كُلَّ أَوْلَادْ حُوسَا وَ أَخْوَانْ عَدَدْهُمْ 13.
12وَ كُلَّ رُجَالْ هَنَا مَجْمُوعَاتْ الْحُرَّاسْ وَ كُبَارَاتْهُمْ قَاعِدِينْ يَخْدُمُوا سَوَا فِي بَيْت اللّٰهْ. 13وَ هُمَّنْ قَسَّمَوْا حَرَاسَةْ الْبِيبَانْ بِأَمْ عِيَيْدَاتْ، مِنْ الْكُبَارْ لِلدُّقَاقْ حَسَبْ عَايِلَاتْهُمْ. 14وَ الْأَمْ عِيَيْدَاتْ لِحَرَاسَةْ الْبَابْ الصَّبْحَانِي وَقَعَتْ فِي شَلَمْيَا. وَ الْأَمْ عِيَيْدَاتْ لِحَرَاسَةْ الْبَابْ الْمُنْشَاقِي وَقَعْ لِوِلَيْدَهْ زَكَرِيَّا الْمُسْتَشَارْ الْعِنْدَهْ عَقُلْ. 15وَ عُبَيْد أَدَوْم حَفَضْ الْبَابْ الْوَطِيَانِي وَ عِيَالَهْ كَمَانْ حَفَضَوْا الْمَخَازِنْ. 16وَ شُفِّمْ وَ حُوسَا هُمَّنْ حَفَضَوْا الْبَابْ الْغَرْبَانِي وَ الْبَابْ الْبِنَادُوهْ شَلَّكَةْ هُو الْفَاتِحْ عَلَيْ دَرِبْ الطَّالِعْ فَوْق.
وَ دَاهُو كِكَّيْف نَظَّمَوْا الْحَرَاسَةْ. 17فِي الْبَابْ الصَّبْحَانِي، سِتَّةْ لَاوِيِّينْ فِي الْيَوْم وَ فِي الْبَابْ الْمُنْشَاقِي أَرْبَعَةْ لَاوِيِّينْ فِي الْيَوْم وَ فِي الْبَابْ الْوَطِيَانِي أَرْبَعَةْ لَاوِيِّينْ فِي الْيَوْم وَ لِلْمَخَازِنْ كَمَانْ إِتْنَيْن إِتْنَيْن فِي بَكَانَاتْ شِقْ شِقْ. 18وَ لِلْبَيْت الْغَرْبَانِي أَرْبَعَةْ رُجَالْ حَفَضَوْا الدَّرِبْ وَ إِتْنَيْن كَمَانْ حَفَضَوْا الْبَيْت ذَاتَهْ.
19وَ دَوْل مَجْمُوعَاتْ الْحَرَاسَةْ الشَّالَوْهُمْ مِنْ ذُرِّيَّةْ قُورَحْ وَ مَرَارِي.
مسْؤوليّة اللاوِيِّين الآخرين
20وَ مِنْ اللَّاوِيِّينْ كَلَّفَوْا أَخِيَّا بِالْمَخَازِنْ هَنَا بَيْت اللّٰهْ وَ بِالْمَخَازِنْ هَنَا الْمُعِدَّاتْ الْمُخَصَّصِينْ لِلّٰهْ. 21وَ أَوْلَادْ لَعْدَانْ مِنْ ذُرِّيَّةْ قِرْشُونْ كَبِيرْ عَايِلَاتْهُمْ يَحِيِيلْ 22وَ أَوْلَادْ يَحِيِيلْ هُمَّنْ زِتَامْ وَ أَخُوهْ يُوِيلْ. وَ هُمَّنْ دَوْل كَلَّفَوْهُمْ بِمَخَازِنْ بَيْت اللّٰهْ. 23وَ كَنْ لِذُرِّيَّةْ عَمْرَامْ وَ يِصْهَارْ وَ حَبْرُونْ وَ عُزِّيِيلْ، 24شَبُوِيلْ مِنْ ذُرِّيَّةْ قِرْشُومْ وِلَيْد مُوسَى، هُو بَسْ الْمُرَاقِبْ الْعَامّ فِي الْمَخَازِنْ دَوْل. 25وَ مِنْ عَايِلْتَهْ فِي نَاسْ مِنْ ذُرِّيَّةْ أَلِعَازَرْ.
وَ أَلِعَازَرْ دَا هُو أَخُو قِرْشُومْ وِلَيْد رَحَبْيَا
وَ رَحَبْيَا وِلَيْد أَلِعَازَرْ
وَ يَشَعْيَا وِلَيْد رَحَبْيَا
وَ يُورَامْ وِلَيْد يَشَعْيَا
وَ زِكْرِي وِلَيْد يُورَامْ
وَ شَلُومِتْ وِلَيْد زِكْرِي.
26وَ شَلُومِتْ وَ أَخْوَانَهْ كَلَّفَوْهُمْ بِالْمَخَازِنْ هَنَا الْمُعِدَّاتْ الْخَصَّصَوْهُمْ الْمَلِكْ دَاوُدْ وَ كُبَارَاتْ الْعَايِلَاتْ وَ قُيَّادْ الْآلَافْ وَ قُيَّادْ الْمِيَاتْ وَ كُبَارَاتْ الْعَسْكَرْ الْآخَرِينْ. 27وَ الْكُبَارَاتْ دَوْل خَصَّصَوْا مِنْ الْغَنِيمَةْ الشَّالَوْهَا فِي الْحَرِبْ لِيِعَدُّلُوا بَيْهَا بَيْت اللّٰهْ. 28وَ شَلُومِتْ وَ أَخْوَانَهْ مَسْؤُولِينْ مِنْ كُلَّ الْمُعِدَّاتْ الْمُقَدَّسِينْ الْخَصَّصَوْهُمْ صَمُوِيلْ النَّبِي وَ شَاوُولْ وِلَيْد قِيشْ وَ أَبْنِيرْ وِلَيْد نِيرْ وَ يُوَابْ وِلَيْدهَا لِصَرُويَةْ. وَ كُلَّ أَشْيَاءْ الْخَصَّصَوْهُمْ.
29مِنْ ذُرِّيَّةْ يِصْهَارْ، كَنَنْيَا وَ أَوْلَادَهْ كَلَّفَوْهُمْ مُرَاقِبِينْ وَ قُضْيَاءْ بِخِدْمَةْ شُؤُونْ الْخَارِجِيَّةْ هَنَا بَنِي إِسْرَائِيلْ.
30وَ مِنْ ذُرِّيَّةْ حَبْرُونْ، حَشَبْيَا وَ 1 700 رُجَالْ فَحَلِينْ كَلَّفَوْهُمْ بِمُرَاقَبَةْ كُلَّ بَلَدْ إِسْرَائِيلْ مِنْ جِيهَةْ الْغَرِبْ عَلَيْ أُرْدُنْ. وَ كَلَّفَوْهُمْ بِكُلَّ الْخِدْمَةْ التُّخُصّ اللّٰهْ وَ الْمَلِكْ. 31وَ يَرِيَّا هُو بَسْ كَبِيرْهُمْ لِنَاسْ ذُرِّيَّةْ حَبْرُونْ. وَ فِي سَنِةْ 40 هَنَا حُكُمْ الْمَلِكْ دَاوُدْ، فَتَّشَوْا قُرْمَةْ عَايِلَاتْهُمْ. وَ لِقَوْا مِنْهُمْ رُجَالْ فُرَّاسْ فِي حِلَّةْ يَعْزِيرْ مِنْ بَلَدْ قِلْعَادْ. 32وَ الْمَلِكْ دَاوُدْ شَالْ 2 700 رُجَالْ فَحَلِينْ مِنْ ذُرِّيَّةْ يَرِيَّا وَ كُلُّهُمْ كُبَارَاتْ الْعَايِلَاتْ. وَ كَلَّفْ بَيْهُمْ قَبِيلَةْ رَأُوبِينْ وَ قَادْ وَ نُصّ قَبِيلَةْ مَنَسَّى فِي كُلَّ الْخِدْمَةْ التُّخُصّ الرَّبّ وَ الْمَلِكْ.
Currently Selected:
1 أخبار 26: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
