1 أخبار 13
13
دَاوُد جاب صنْدوق المُعاهدة
1وَ دَاوُدْ شَاوَرْ مَعَ قُيَّادْ الْآلَافْ وَ مَعَ قُيَّادْ الْمِيَاتْ وَ مَعَ كُلَّ الشُّيُوخْ. 2وَ بَعَدْ دَا، هُو قَالْ لِكُلَّ جَمَاعَةْ بَنِي إِسْرَائِيلْ: «كَنْ تِقَصُّدُوا وَ كَنْ اللّٰهْ إِلٰـهْنَا يَرْضَى بَيَّهْ، خَلِّي نِرَسُّلُوا لِأَخْوَانَّا الْقَاعِدِينْ فِي كُلَّ بَلَدْ إِسْرَائِيلْ وَ لِرُجَالْ الدِّينْ وَ اللَّاوِيِّينْ الْفِي مُدُنْهُمْ وَ الْفِي حِلَّالْهُمْ السَّاكْنِينْ فَوْقَهْ أَشَانْ يَجُوا يِلِمُّوا مَعَانَا. 3وَ خَلَاصْ نِقَبُّلُوا صَنْدُوقْ الرَّبّ وَ نِجِيبُوهْ فِي بَكَانَّا أَشَانْ أَنِحْنَ مَا جَعَلْنَاهْ فِي وَكِتْ شَاوُولْ.» 4وَ كُلَّ الشَّعَبْ قَصَّدَوْا أَشَانْ الشَّيّءْ دَا عَجَبَاهُمْ.
5وَ دَاوُدْ لَمَّ كُلَّ بَنِي إِسْرَائِيلْ مِنْ وَادِي مَصِرْ فِي الْجُنُوبْ لَحَدِّي لَبُو حَمَاتْ فِي الْمُنْشَاقْ لِيِجِيبُوا صَنْدُوقْ الرَّبّ مِنْ حِلَّةْ قَرْيَةْ يَعَرِيمْ. 6وَ دَاوُدْ وَ كُلَّ بَنِي إِسْرَائِيلْ مَشَوْا لِبَعْلَةْ يَعْنِي قَرْيَةْ يَعَرِيمْ حِلَّةْ وَاحِدَةْ فِي بَلَدْ يَهُوذَا أَشَانْ يِجِيبُوا مِنْ هِنَاكْ صَنْدُوقْ الرَّبّ. وَ دَا الصَّنْدُوقْ الْفَوْقَهْ أُسُمْ اللّٰهْ، هُو الْعَرْشَهْ قَاعِدْ بَيْن الْمَخْلُوقِينْ السَّمَاوِيِّينْ الْمَصْنُوعِينْ فِي سِدَادَةْ الصَّنْدُوقْ. 7وَ هُمَّنْ شَالَوْا صَنْدُوقْ الرَّبّ مِنْ بَيْت أَبِنَدَابْ وَ خَطَّوْه فِي كَارَّوْ جَدِيدْ. وَ أَوْلَادْ أَبِنَدَابْ، عُزَّى وَ أَخْيُو قَادَوْه وَ مَشَوْا بَيَّهْ. 8وَ دَاوُدْ وَ كُلَّ بَنِي إِسْرَائِيلْ قَاعِدِينْ يَلْعَبَوْا قِدَّامْ صَنْدُوقْ الرَّبّ بِكُلَّ قُدْرِتْهُمْ وَ يِغَنُّوا فِي حِسّ آلَاتْ الْمُسِيقَى مِثِلْ جِقِنْدِيَّةْ وَ أَمْ سِبَيْبَةْ وَ تَنْبَلْ وَ نُقَّارَةْ وَ بُرُنْجِي.
9وَ وَكِتْ وَصَّلَوْا فِي الْمَدَقّ هَنَا كِيدُونْ، الْبَقَرْ أَتَّرْتَعَوْا وَ عُزَّى مَدَّ إِيدَهْ لِيَكْرُبْ الصَّنْدُوقْ. 10وَ طَوَّالِي اللّٰهْ غِضِبْ غَضَبْ شَدِيدْ ضِدّ عُزَّى وَ طَوَّالِي ضَرَبَهْ أَشَانْ هُو مَدَّ إِيدَهْ وَ كَرَبْ الصَّنْدُوقْ. وَ عُزَّى وَقَعْ مَاتْ هِنَاكْ قِدَّامْ الرَّبّ. 11وَ دَاوُدْ زِعِلْ زَعَلْ شَدِيدْ أَشَانْ اللّٰهْ غِضِبْ ضِدّ عُزَّى وَ ضَرَبَهْ. وَ سَمَّى الْبَكَانْ دَا فَارَصْ عُزَّى (مَعَنَاتَهْ ضَرَبْ عُزَّى) وَ الْأُسُمْ دَا قَاعِدْ لَحَدِّي الْيَوْم.
12وَ فِي الْيَوْم دَا، دَاوُدْ خَافْ خَوْف شَدِيدْ مِنْ الرَّبّ وَ قَالْ: «أَنَا مَا نَقْدَرْ نِجِيبْ صَنْدُوقْ الرَّبّ فِي بَيْتِي.» 13وَ فِي شَانْ دَا، دَاوُدْ مَا وَدَّى الصَّنْدُوقْ فِي بَيْتَهْ فِي مَدِينَةْ دَاوُدْ. وَ لَاكِنْ وَدَّاهْ فِي بَيْت عُبَيْد أَدَوْم الْمِنْ حِلَّةْ قَاتْ. 14وَ صَنْدُوقْ الرَّبّ قَعَدْ تَلَاتَةْ شَهَرْ فِي بَيْت عُبَيْد أَدَوْم. وَ اللّٰهْ بَارَكْ بَيْت عُبَيْد أَدَوْم وَ كُلَّ شَيّءْ الْعِنْدَهْ.
Currently Selected:
1 أخبار 13: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
