Aʼmaal al-Rusul 28

Buulus fi jaziirat Maalta

1Wa wakit kullina maragna min al-bahar be l-aafe, naadum waahid ooraana kadar al-jaziira di usumha Maalta. 2Wa sukkaan Maalta zeeniin leena marra waahid wa faddaloona kullina. Wa oogado leena naar achaan al-wata baarde wa almi bada yusubb.

3Wa Buulus khamma hatab achaan yusubbah fi l-naar. Wa fajʼatan, daabi waahid marag min al-hatab jaari min hamu al-naar wa adda Buulus fi iidah wa lisig foogha. 4Wa wakit naas al-bakaan chaafo al-daabi laasig fi iidah, hajjo ambeenaathum wa gaalo : «Akiid, al-naadum da kattaal dimam ! Hu niji min al-bahar ma akalah. Wa laakin al-adil ma dawwar hu yiʼiich. Wa hassaʼ katalah khalaas !» 5Wa laakin Buulus hatta iidah min al-daabi wa l-daabi wagaʼ fi l-naar wa cheyy ma bigi leyah. 6Wa naas al-bakaan gaaʼidiin yarjo Buulus yinnafikh walla yagaʼ yumuut ajala. Wa rijo mudda tawiile wa cheyy ma bigi le Buulus. Wa achaan da, khayyaro afkaarhum wa gaalo : «Al-naadum da akiid waahid min al-ilaahaat.»

7Wa l-bakaan al-aniina gaaʼidiin foogah gariib le ziraaʼat naadum waahid usmah Bubliyuus wa hu kabiir hana naas Maalta. Wa hu faddalaana wa dayyafaana fi beetah talaata yoom. 8Wa abu Bubliyuus raagid wa indah wirde wa yisabbib damm. Wa Buulus macha chaafah wa saʼal leyah Allah wa khatta iideenah foogah wa khalaas daawaah. 9Wa baʼad da, kulla l-naas al-mardaaniin al-fi Maalta jo leena wa ligo al-aafe. 10Wa chakaroona katiir wa wakit dawwarna nisaafuru, antoona kulla cheyy al-waajib le l-safar.

11Wa gaʼadna talaata chahar fi Maalta. Wa baʼad da, rikibna fi safiina waahide. Indaha foogha suura manjuura hana l-Tiimaan al-Samaawiyiin. Hi min al-Iskandariiya wa gaaʼide fi Maalta tuul al-chite. 12Wa macheena wisilna fi hillit Siraakuusa wa gaʼadna foogha talaata yoom. 13Min hinaak, macheena giddaam lahaddi wisilna fi hillit Riikhiyuun. Wa gaʼadna fiiha yoom waahid. Wa l-riih gammat tusuug min al-wati wa ambaakir lihigna Buutiyuuli. 14Nazalna wa macheena ligiina akhwaan muʼminiin wa humman dayyafoona wa gaʼadna maʼaahum sabʼa yoom. Wa khalaas, wisilna fi Rooma.

15Wa wakit al-akhwaan al-saakniin fi Rooma simʼo aniina jaayiin, marago achaan yilaaguuna. Waahidiin jo lahaddi suug Abiyuus wa aakhariin le l-hille al-usumha Talaata Buyuut hana l-Diyaafa. Wa wakit Buulus chaafaahum, chakar Allah wa chadda heelah. 16Wa wakit dakhalna fi Rooma, masʼuul al-askar sallam al-masaajiin le l-khaayid wa anto izin le Buulus achaan yalga beet wa yaskun foogah wiheedah maʼa l-askari al-gaaʼid yaharsah.

Buulus fi madiinat Rooma

17Wa baʼad talaata yoom, Buulus naada kubaaraat al-Yahuud al-saakniin fi Rooma achaan yaju leyah. Wa humman jo leyah wa hu hajja leehum wa gaal : «Ya l-akhwaan, ana ma sawweet cheyy didd chaʼabna wa ma sawweet cheyy didd aadaat juduudna laakin karabooni fi Madiinat al-Khudus wa sallamooni le l-Roomaaniyiin. 18Wa l-Roomaaniyiin saʼalooni fi l-kalaam da wa dawwaro yatulguuni. Wa gaalo al-moot ma waajib leyi. 19Laakin al-Yahuud aarado achaan ma yatulguuni. Wa ma gidirt nisawwi cheyy illa natlub izin nidaafiʼ le nafsi giddaam al-sultaan. Wa abadan ma nidoor nigaddim chakwa didd ummati. 20Wa achaan da, dawwart nihajji maʼaaku. Wa ana marbuut be l-jinziir da fi chaan al-naadum al-Bani Israaʼiil gaaʼidiin yarjooh be acham.»

21Wa l-Yahuud gaalo leyah : «Ma ligiina foogak jawaab min daar al-Yahuudiiya. Wa l-akhwaan al-jo min hinaak kula, naadum waahid ma jaab leena khabar foogak wa ma simiʼna foogak cheyy fasil. 22Laakin nidooru nasmaʼo kalaamak wa naʼarfu fikrak. Wa kan le majmuuʼitku di, naʼarfu kadar fi kulli bakaan al-naas gaaʼidiin yachku minha.»

23Wa gataʼo leyah yoom achaan yihajji leehum. Wa fi l-yoom da, naas katiiriin bilheen jo lammo fi beetah. Wa min al-fajur lahaddi l-makhrib, Buulus gaaʼid yachhad le mamlakat Allah wa gaaʼid yihajji leehum be kalaam Tawraat Muusa wa l-anbiya achaan yijiibhum fi derib Isa. 24Wa waahidiin minhum simʼo kalaamah wa aamano wa waahidiin minhum abo, ma yiʼaamunu. 25Wa ma astafago ambeenaathum.

Wa gubbaal ma yichittu fi buyuuthum, Buulus gaal cheyy waahid bas ziyaada : «Akiid, kalaam al-Ruuh al-Khudduus sahiih wakit hajja le juduudku be khachum al-nabi Ichaʼya wa gaal : 26<Amchi wa guul le l-chaʼab dool :

‹Tasmaʼo wa laakin ma tafhamo

wa tichiifu wa laakin ma taʼarfu.

27Guluub al-chaʼab dool bigo gawiyiin

wa udneehum ma yasmaʼo

wa saddo uyuunhum.

Wa kan ma misil da,

uyuunhum yichiifu

wa udneehum yasmaʼo

wa yafhamo adiil wa yutuubu

wa ana nachfiihum.›>#28:27 Al-kalaam da talgooh fi Ichaʼya 6:9-10, hasab al-tarjama al-yuunaaniiye.

28«Khalaas, waajib taʼarfu Allah rassal bichaarat al-naja le l-naas al-ma Yahuud wa humman yasmaʼooha.» 29Wa baʼad gaal al-kalaam da, al-Yahuud marago min al-beet wa gaaʼidiin yikhaalutu ambeenaathum marra waahid.

30Wa fi muddit santeen, Buulus saakin fi l-beet al-ajjarah. Wa gaaʼid yifaddil kulla l-diifaan al-jaayiin leyah. 31Wa gaaʼid yiballikh bichaarat mamlakat Allah wa yiʼallim kulla l-naas be l-Rabb Isa al-Masiih bala khoof. Wa naadum waahid ma daharah.

Currently Selected:

Aʼmaal al-Rusul 28: ADT19

Highlight

Copy