Aʼmaal al-Rusul 25

Al-chariiʼa giddaam Fastus

1Wa Fastus wisil le daar al-Yahuudiiya. Wa baʼad talaata yoom hu gamma min hillit Geesariiya wa macha le Madiinat al-Khudus. 2Wa kabiir rujaal al-diin wa kubaaraat al-Yahuud macho leyah wa gaddamo leyah chakwithum didd Buulus. Wa humman hannasooh 3wa talabo minnah hu yiwaddi leehum Buulus fi Madiinat al-Khudus. Wa dawwaro yakursu le Buulus wa yaktuluuh fi l-derib. 4Wa Fastus ooraahum wa gaal : «Buulus gaaʼid fi l-sijin fi Geesariiya wa ana zaati namchi hinaak gariib. 5Achaan da, khalli waahidiin min kubaaraatku yamchu maʼaayi. Wa kan al-naadum da mujrim, khalli yisabbutu foogah al-tuhma hinaak.»

6Wa Fastus ma gaʼad maʼaahum ziyaada min tamaane walla achara yoom wa khalaas gabbal fi Geesariiya. Wa ambaakir, hu gaʼad fi kursi al-mahkama wa anta izin achaan yinaadu Buulus. 7Wa wakit Buulus ja, al-Yahuud al-jo min Madiinat al-Khudus hawwagooh wa gammo yukhuttu foogah jaraayim cheeniin wa katiiriin al-ma gidro yisabbutuuhum. 8Wa Buulus daafaʼ le nafsah wa gaal : «Ana ma khaalaft gawaaniin al-Yahuud wa la sawweet khata didd beet Allah wa la sawweet khata didd sultaan al-Roomaaniyiin.»

9Wa laakin Fastus dawwar yisawwi nafsah zeen giddaam al-Yahuud achaan humman yardo beyah. Wa achaan da, hu saʼal Buulus wa gaal : «Tidoor tamchi fi Madiinat al-Khudus wa nagtaʼ leek al-chariiʼa hinaak walla ?» 10Wa Buulus radda leyah wa gaal : «Ana gaaʼid fi mahkama hana sultaan al-Roomaaniyiin wa da bas al-bakaan al-waajib yichaaruʼuuni foogah. Ana ma sawweet cheyy fasil le l-Yahuud wa inta zaatak taʼarfah. 11Wa kan ana mujrim wa l-moot waajib leyi, ma nidoor najri minnah. Laakin kan kalaamhum foogi kidib, ma waajib le ayyi naadum yisallimni leehum. Ana nigaddim talab achaan sultaan al-Roomaaniyiin zaatah#25:11 sultaan al-Roomaaniyiin zaatah Kan naadum indah jinsiiya roomaaniye, indah hagg achaan yatlub min al-sultaan hu zaatah yagtaʼ leyah al-chariiʼa. yichaariʼni.»

12Wa Fastus chaawar jamaaʼtah wa radda leyah wa gaal : «Inta gult tidoor al-sultaan yichaariʼak wa khalaas tamchi le l-sultaan.»

Fastus chaawar Akhriibaas

13Wa baʼad ayyaam, al-malik Akhriibaas wa akhtah Barniis jo fi Geesariiya achaan yisallumu Fastus. 14Wa gaʼado ayyaam wa Fastus fassar le l-malik muchkila hana Buulus wa gaal : «Fi raajil waahid Fiiliks khallaah hini fi l-sijin. 15Wa wakit macheet fi Madiinat al-Khudus, kubaaraat rujaal al-diin wa chuyuukh al-Yahuud gaddamo leyi chakwa didd al-naadum da wa talabo minni achaan nahkim leyah. 16Wa raddeet leehum wa gult fi aadaat al-Roomaaniyiin, ma nahkumu le ayyi naadum illa kan al-mathuum wa l-naas al-tahamooh algaabalo. Wa l-mathuum indah fursa achaan yidaafiʼ le nafsah.

17«Wa khalaas, wakit humman jo leyi hini, ana ma akhkhart fi l-kalaam da. Wa ambaakir bas, macheet fi l-mahkama wa gaʼadt fi l-kursi wa anteet izin achaan yijiibu leena al-mathuum. 18Wa fi fikri ana, al-madluumiin dawwaro yathamooh be cheyy fasil. Wa laakin wakit humman gammo hajjo foogah, tuhmithum ma sabbatat ayyi jariime. 19Dawwaro yikhaalufuuh fi kalaam hana diinhum bas wa fi naadum mayyit usmah Isa, al-Buulus buguul hu hayy. 20Wa ma irift kikkeef nihill muchkila misil di. Wa achaan da, ana saʼaltah kan yikhassid yamchi fi Madiinat al-Khudus achaan ana nagtaʼ leyah chariiʼtah hinaak. 21Wa laakin Buulus aba wa gaddam talabah achaan naharsuuh lahaddi l-sultaan zaatah yagtaʼ leyah al-chariiʼa. Wa khalaas, ana amart askarna achaan yaharsuuh lahaddi nalga fursa niwaddiih le l-sultaan fi Rooma.»

22Wa Akhriibaas gaal : «Ana kula nidoor nasmaʼ kalaam al-naadum da.» Wa Fastus gaal leyah : «Ambaakir bas tasmaʼah.»

23Wa ambaakir, Akhriibaas wa Barniis jo laabsiin khulgaan hana muluuk wa dakhalo fi bakaan al-malamma maʼa kubaaraat al-askar wa kubaaraat al-hille. Wa Fastus anta izin achaan al-askar yijiibu leehum Buulus. 24Wa Buulus ja wa Fastus gaal : «Ya l-sayyid al-malik Akhriibaas wa kulla l-haadiriin, da bas al-naadum al-kulla l-chaʼab al-Yahuudi aato foogah fi Madiinat al-Khudus wa fi Geesariiya. Wa talabo minni achaan naktulah tawwaali. 25Laakin fi fikri ana, hu ma sawwa cheyy fasil wa ma waajib leyah al-moot. Wa hu zaatah gaddam leyi talab achaan Akhustus al-sultaan al-Roomaani yagtaʼ leyah chariiʼtah. Wa achaan da, kharrart niwaddiih le Rooma.

26«Laakin kan niwaddiih le l-sultaan, ana ma naʼarif al-cheyy al-naktibah foogah. Achaan da, ana gaddamtah leeku kulluku wa khaassatan leek inta, ya l-sayyid al-malik Akhriibaas. Akuun wakit simiʼna kalaamah, ana naʼarif al-cheyy al-waajib naktibah. 27Ma nidoor niwaddi naadum mathuum fi Rooma kan al-tuhma ma waadhe. Fi fikri ana, da ma waajib.»

Currently Selected:

Aʼmaal al-Rusul 25: ADT19

Highlight

Copy