Mr 16

Pitzwnac pax Jesús

(Mt 28.1-10; Lc 24.1-12; Jn 20.1-10)

1Yic 'ix 'ec' sc'ul 'iljelal, ax 'ix María Magdalena, 'ix Salomé, yet' 'ix María snun Jacobo, 'ix smann eb' jun tzo'n̈ te su'q'ui sjab', yic tz'at ya'nc 'och eb' 'a sniwnal Jesús. 2Ax yic 'ix sacb' 'el 'a Domingo, 'ix 'at eb' 'a q'uen q'uen 'aj 'ix mucx can 'och cha, sq'uin̈b'il 'ix c'och eb'. 3'Ix yaln eb' 'ixtic:

—¿Mach 'oj 'i'nc 'el smac q'uen 'ayon̈? xchi eb'.

4Palta ax 'ix yiln 'at eb', 'elnc xo smac q'ue'en, caw niwquil q'uen smac q'uen cha. 5Yic 'ix 'ochch eb' 'a yojl q'ue'en, 'ix yiln eb' chotn 'ejm jun ángel 'a swach' c'ab' eb', 'icha quelm winc yilxi. 'Aych jun jucn pichl yu'uj, caw sac. Caw 'ix xiw eb' yuj si'mb'il. 6Palta xyaln 'ixtc 'a eb':

—Man̈ ex xiwoc, ax tic wan e sayn 'ec' Jesús 'aj Nazaret, atn jun x'ajx 'och 'a spenc culus. Palta tox 'ix pitzw paxi, man̈x 'ayc 'och 'a yojl q'uen q'uen tic. 'Iltec nab'n 'aj xwul yac' 'oxt eb' 'a tic. 7'Ixquec, 'at alc 'a Pedro yet' 'a jun tzo'n̈ xo eb' scuywum Jesús, chajtlto 'oj b'ab'l c'och eyuj 'a Galilea. Ata 'oj eyila', 'icha yaj yaln can 'ayex, xchi 'a eb'.

8Xlajwn̈ej cha, 'ix 'el paxt eb' 'a yojl q'ue'en. 'Ix 'at eb' 'eloc. Caw 'ix 'ib'x chan̈ eb' yuj xiwlal. May tas xyal eb' 'a junc xo mach, yujto caw xiw eb'.

Sch'oxjnac sb'a Jesús*r* 'a María Magdalena

(Jn 20.11-18)

9[A 'a Domingo 'a yic 'ayt sacb'i, ata xpitzw pax Jesús. Xlajw cha, a 'a 'ix María Magdalena 'aj 'ix sb'ab'l ch'oxj sb'a. A 'a jun 'ix cha, ata 'elnc ucwn̈ ewin demonio yuj Jesús. 10Ax 'ix x'at alnoc 'a jun tzo'n̈ xo eb' 'e'nc yet' Jesús 'a yic yalan̈. Caw tzcus eb', tzlaj oc' eb'. 11A yic xyaln 'ix 'a eb' chajtlto 'ix pitzw pax Jesús, to caw xyil 'ix yet' sat, palta ma'ix schaj eb' yab' 'a 'ix.

Sch'oxnac sb'a Jesús 'a chawn̈ scuywum

(Lc 24.13-35)

12Xlajw cha, xch'oxn sb'a Jesús 'a chawn̈ eb' scuywum, yic wan sb'ey eb' 'a sti 'el chon̈ab'. Chuc yilx xyil eb' scuywum cha. 13Yuj cha, 'ix meltzj eb', 'ix 'at yalnoc eb' 'a jun tzo'n̈ xo eb' yit cuywumal, palta ma'ix schaj pax eb' yab'i'.

Schecjnac 'at Jesús eb' schecab'

(Mt 28.16-20; Lc 24.36-49; Jn 20.19-23)

14Ax 'a jun 'ejm xo, yic wan swa eb' scuywum Jesús chi yuxlchwan̈il, 'ix sch'oxn sb'a 'a eb'. 'Ix yaln spaltail eb' yujto chab'c'ojlal yaj eb'. Pit xyutj sb'a eb', yujto ma'ix schaj eb' yab' 'a eb' x'ilni yic tox 'ix pitzw paxi. 15Xlajw cha, xyaln 'a eb' 'ixtic: 'Ixquec 'a smasnil yolyib'n̈q'uinl tic, alc 'el wach' 'ab'x yic colnb'il 'a scal smasnil 'anma'. 16A mach tzya'ch 'a sc'ojol, tzya'n 'ajxc bautisar sb'a, 'oj colchjoc. Palta ax eb' matz ya'ch 'a sc'ojol, 'oj 'ochcn yailal 'a yib'n̈ eb'. 17A eb' 'oj 'a'nc 'och 'a sc'ojol, 'oj sch'ox eb' jun tzo'n̈ milagro tic: Yuj in poder 'oj yi'l eb' jun tzo'n̈ demonio 'a eb' 'anma', 'oj paxtinc eb' 'a jun tzo'n̈ chucchc ti'al. 18Toto 'oj syam eb' junc chan, toto 'oj yuc' eb' junc tas tzcham 'anma yu'uj, may 'oj 'aj eb'. Toto 'oj ya'b't eb' sc'ab' 'a sjolm eb' ya'ay, 'oj b'oxc sc'ojl eb' yuj eb', xchi Jesús.

'Ijxnac 'at Jesús 'a satcha'an̈

(Lc 24.50-53)

19Ax yic xlajw yaln Cajlil Jesús jun tzo'n̈ tic 'a eb' schecb' cha, 'ix 'ijx 'at 'a satcha'an̈. Ata x'em wocn 'a swach' c'ab' Dios. 20Xlajw chi b'i'an, 'ix 'at eb' yal-l spaxti Dios 'a junjn lugar. 'Ix 'och Cajlil yet' eb'. 'Ix sch'ox jun tzo'n̈ milagro yet' eb', sec chequel to yel jun spaxti chi tz'ec' yal eb' cha. Ya' cab'i'.]

Currently Selected:

Mr 16: CSS

Highlight

Copy