Mt 7
7
A b'eyc'ojlal 'a junc xo mach
(Lc 6.37-38,41-42)
1Man̈ e b'eyc'ojloc junc xo mach, sec ma'oj ex sb'eyc'ojloc Dios. 2Yujto 'icha wal tzeyutj e b'eyc'ojlan eb' eyit 'anma'il, 'ixta 'oj ex yutc Dios ex sb'eyc'ojlan jun xo. A wal eyechtab' tzeya'lb'ej, a 'oj 'a'lb'axc 'ayex, tzyal 'el'chi to 'icha wal tzeyutj e b'eyc'ojlwi, 'ixta 'oj eyaj e b'eyc'ojlax jun xo. 3Q'uinloc 'ay junc eyit 'anma'il, tz'at jac c'alem#Mt 7.3 A c'ajloc c'alem cha, atn junc maysch'olnil jab' wali, ax tas tzalx patzb'il, atn junc maysch'olnil caw wal niwquil. 'a yol sat, ax xo, a junc patzb' 'aych 'a yol e sat. Toto matz eyila to 'aych jun te chi 'a yol e sat cha, ¿tom 'oj stac' eyiln jab' c'alem chi 'ayb't 'a yol sat junx cha? 4Toto 'aych jun patzb' chi 'a yol e sat ¿tom 'oj stac' eyaln 'a jun chi 'ixtic: Yaj 'elt jun c'alem 'a yol a sat, tzin nib'j tzwij 'elt 'ayach, tom 'oj e chic 'a 'a? 5Toto 'ixta tzeyutj eyalni, caw chab'sat ex. Yowlal tze b'ab'l 'ijcan 'elt jun patzb' chi 'a yol e sat cha. 'Ixta to b'i'an 'oj stac' eyilni, ax eyi'n 'elt jun c'alem chi 'a yol sat jun eyit 'anmal cha.
6A spaxti Dios, yicn̈ej yaji, lajn 'icha jun tzo'n̈ q'uen ton̈ perla#Mt 7.6 Perla, atn jun tzo'n̈ q'uen q'uen sac yilxi, tzictzni paxi. Caw chan̈ stojol, cojn eb' rico tzc'anlb'ani. sb'i, caw chan̈ stojol. Yuj cha, matz tac' ca'nec 'a eb' toxn may jac yel'ch Dios 'a sat. Yujto 'a eb' cha, lajn eb' 'icha jun tzo'n̈ tz'i tzcot 'ayon̈, tzon̈ schini. 'Ay pax eb' lajn 'icha jun tzo'n̈ no chitam, ton̈j tztec' 'ejm tas tzcac' 'a 'a.
C'anec, sayec
(Lc 11.9-13; 6.31)
7C'anec, 'oj yac' Dios 'ayex; sayec, ax schax eyu'uj. 'Awjan̈c 'och 'a te puerta, 'oj jacxoc te 'ayex. 8Yujto a eb' tzc'anni, 'oj scha eb'. Ax eb' tzsayni, 'oj chax yuj eb'. An̈jtona yet' eb' tz'awj 'och 'a te puerta, 'oj jacxoc te 'a eb'.
9Q'uinloc 'ayex, tzc'an eyunnal junc yoch 'ayex, ¿tom wal a junc q'uen tzeyac' 'a 'a? 10Toto a junc chay tzc'an 'ayex, ¿tom a junc chan tzeyac' 'a 'a? 11Ax tic, wach'xam may e ch'olnil, palta eyojc tas tzeyutj eya'n jun tzo'n̈ tas wach' 'a eb' eyunnal. Ax qui Mamc 'ayc' 'a satcha'an̈, yel xo wal niwn tas wach' tzyac' 'a eb' tzc'ann 'a 'a.
12Toto tze nib'j caw wach' tzyutj sb'a eb' eyit 'anmal 'ayex, wach' pax tzeyutj e b'a 'a eb'. Yujto 'ixta tzyal 'el'ch jun tzo'n̈ ley yic Moisés 'aycni, yet' jun tzo'n̈ Ch'an̈ Un̈ tzi'b'b'il can yuj eb' schecb' Dios pecti'.
A jun puerta lot'an
(Lc 13.24)
13'Ay jun 'icha puerta lot'an, ata tzex 'ochi. Yujto 'ay pax junx 'icha puerta caw lewan, ax jun b'e tz'ec' ta', caw lewn sat, palta a 'a yailal 'aj tzc'ochi. Til wal 'anma tz'at 'a jun b'e cha. 14Palta ax jun puerta lot'n cha, yic q'uinl yaji, yet' jun b'e tzc'och ta', caw lot'n sat. Yuj cha, jaywn̈n̈ej wal eb' 'anma tz'at ta'.
A b'eyb'al, lajn 'icha sat te te'
(Lc 6.43-44)
15'Ay eb' tzcob' yalch sb'a schecb'oc Dios, caw tzeyil wal e b'a 'a eb', yujto a yic 'oj c'och eb' 'ayex, caw manso 'oj cob' yutc sb'a eb' 'icha junc calnelu. Palta ax snab'en eb', caw tu', 'icha junc 'ocs caw ow. 16Yujn̈ej sb'eyb'al eb', ax eyojcan 'el eb', 'icha cojcan 'el junc te te yuj sat. Q'uinloc 'ay junc snun q'ui'ix, ¿tom tz'usp sat tzyac'a? Mto junc te manzan, ¿tom higo sat tzyac'a? 17Yujto a jun tzo'n̈ snun te wach', wach'n̈j sat tzyac'a. Ax pax jun tzo'n̈ snun te maysch'olnil, maysch'olniln̈ej sat tzyac'a. 18A jun tzo'n̈ snun te wach', matz tac' ya'n junc sat maysch'olnil. An̈jtona pax jun tzo'n̈ snun te maysch'olnil, matz tac' ya'n pax junc sat wach'. 19'Icha jun tzo'n̈ te may xon sat wach' tzyac'a, tzu'x 'eli, tzjulx can 'at 'a yib'n̈ c'ac', 'ixta 'oj 'aj eb' man̈ wach'c sb'eyb'al. 20Yuj cha, a eb' tzcob' yalch sb'a schecb'oc Dios, yujn̈ej sb'eyb'al eb', ax eyojcan 'el eb'.
Man̈ smasniloc 'anma 'oj colchjoc
(Lc 13.25-27)
21'Ay eb' tzaln 'ayn 'ixtic: Mamin, Mamin, xchi eb', palta man̈ smasniloc eb' 'oj 'och 'a yol sc'ab' jun 'aj satcha'an̈. Cojn eb' tzb'on 'icha tznib'j in Mam 'ayc' 'a satchan̈ cha, cojn eb' 'oj 'ochoc. 22At 'a yic 'oj jawc jun c'u cha, til wal eb' 'oj laj alnc 'ayn 'ixtic: Mamin, Mamin, caw x'ec' cal-l ab'xil on̈, yuj a poder quijnac 'el jun tzo'n̈ demonio 'a eb' 'anma 'on̈. An̈jtona', yuj a poder til wal milagro qui ch'oxjnac on̈, 'oj schic eb' 'ayin. 23Palta 'oj wal 'ixtc 'a eb': Toxn man̈ ex wojcoc. 'Eln̈ec 'a in tz'ey, yujto cojn maysch'olnil xlaj e b'o', 'oj in chic 'a eb'.
Yowlal tzqui yicljec tas tzyal Jesús
(Mr 1.22; Lc 6.47-49)
24A eb' tz'ab'n in paxti', toto tzyiclj eb' 'icha tzwala, lajn eb' 'icha jun winc jelan, sb'o yatut 'a yib'n̈ stzatzl lum lu'um.#Mt 7.24 A 'a griego tzyala to a q'uen q'uen tz'em yipnub'alc yich n̈a, palta 'a a tic may 'aj tzb'o n̈a 'a yib'n̈ q'ue'en, yuj cha, a stzatzl lum lu'um 'ix ca'chi. 25Ax yic xya'n jun yaxn̈ab', 'ix jaw a 'elmal a', xjaw jun 'ic' caw ow 'a yatut cha. Palta ma'ix telwi, yujto a 'a yib'n̈ stzatzl lum b'ob'il q'ue'i. 26Palta ax eb' tz'ab'n in paxti', toto matz yiclj eb' 'icha tzwala, lajn eb' 'icha jun winc may snab'en, sb'o yatut 'a yib'n̈ poc. 27Ax yic xya'n jun yaxn̈ab', 'ix jaw a 'elmal a', xjaw jun 'ic' caw ow 'a yatut cha. Yuj cha, caw xc'an̈ yem junnjoc jun yatut cha, xchi Jesús 'a eb'.
28Ax yic xlajw yaln Jesús 'a eb' 'anma cha, caw sat sc'ojl eb' yuj jun tzo'n̈ cuynb'il cha. 29Yujto a yic xcuywj 'a eb', 'ix checlj 'eli, to 'ay yopiso yuj Dios. Man̈ lajnoc scuywj 'icha' eb' cuywjum 'a ley yic Moisés.
Currently Selected:
Mt 7: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.