Mt 5
5
Yaljnac 'el Jesús spaxti Dios*r* 'a eb' 'anma 'a jun tzalan
1Yic 'ix yiln Jesús eb' 'anma', 'ix 'at 'a jun tzalan, 'ix 'em wocn ta'. Ax eb' scuywum, 'ix c'och eb' 'a 'a. 2Yuj cha, 'ix cuywj 'a eb', xyaln 'ixtic:
A eb' wach' yico'
(Lc 6.20-23)
3A eb' tznachj 'el yu'uj, to man̈ wach'c eb' 'a sat Dios, caw wach' yic eb', yujto 'ayx 'och eb' 'a yol sc'ab' jun 'aj satcha'an̈.
4A eb' tzcus yuj smul, caw wach' yic eb', yujto 'oj 'ajxc sniwnc'ojlal eb' yuj Dios.
5A eb' 'emmquil tzyutj sb'a, caw wach' yic eb', yujto 'oj yico'oc eb' jun lugar 'aj ya'jnac can Dios sti'.
6A eb' tznib'j tojlb'oc snab'en wal 'a smasnil sc'ojol, caw wach' yic eb', yujto 'oj 'och Dios yet' eb', sec 'ixta 'oj 'aj eb'.
7A eb' tz'o'ch sc'ojl 'a eb' yit 'anma'il, caw wach' yic eb', yujto 'oj 'o'ch pax sc'ojl Dios 'a eb'.
8A eb' may jac maysch'olnil 'ay 'a spixan, caw wach' yic eb', yujto 'oj yil eb' Dios.
9A eb' 'a'm tup owal, caw wach' yic eb', yujto 'oj yal Dios yunnalc eb'.
10A eb' tz'ab'n syail, yujto tojl tzyutj eb' sb'eyb'al, caw wach' yic eb', yujto 'ayx 'och eb' 'a yol sc'ab' jun 'aj satcha'an̈.
11Ax xo tic, q'uinloc wujn̈ej tzex b'ajxi, toto 'ay tas maysch'olnil tz'ajx 'och 'a eyib'an̈, mto wujn̈ej tz'ajx 'och jun tzo'n̈ 'es 'a eyib'an̈, toto 'ixta', caw wach' pax eyico'. 12Tzaljan̈c si'mb'il, yujto caw niwn spac 'oj e cha 'a satcha'an̈. 'Icha tz'ajx 'och 'a eyib'n̈ ticnec, 'ixta 'ajxnac 'och 'a yib'n̈ eb' schecb' Dios 'a pecti'.
'Icha 'atz'am, mto sacq'uinal, 'ixta 'on̈ec
(Mr 9.50; Lc 14.34-35)
13'Icha yatz'mil tas tzc'uxxi, 'ixta eyaj 'a yolyib'n̈q'uinl tic. Q'uinloc 'ay junc 'atz'm tzsat sc'achi'al. ¿Tast wal 'oj 'aj sc'achib'i jun 'ejm xo? Man̈x 'a yopiso, toxn̈ej tzjulx 'eli, tzlaj te'x yuj eb' 'anma'.
14'Icha sacq'uinal, 'ixta 'ex 'a yolyib'n̈q'uinl tic. Q'uinloc 'ay junc chon̈b' 'a junc tzalan, caw matz tac' sc'ub'x 'eli. 15A yic tzca'nec 'och qui cantil, toc wal a 'a yaln̈ junc cajon tzca'c 'ochi. Palta a 'a yib'n̈ junc tas cha'an̈, ata tzca'c q'ue'i, sec wach' sacq'uinl tz'aj 'ejm yoc 'a eb' 'ayc' 'a yol n̈a cha. 16'Icha junc cantil cha, 'ixta 'ex cab'i', tze ch'oxl e sacq'uinlal 'a eb' 'anma'. Tzyal 'el'chi, atn e wach' b'eyb'al tze ch'ox yil eb', sec 'oj yal eb' wach' paxti 'a qui Mam 'ayc' 'a satcha'an̈.
A yopiso ley yic Moisés
17Xe natlaji, to in jaw wul wac' lajwc ley yic Moisés, yet' jun tzo'n̈ scuynb'il eb' schecb' Dios pecti'. Man̈ yujoc jun cha in jawi. Palta in jawi, sec 'oj wach' 'el'choc jun tzo'n̈ cha. 18Wal yel tzwal 'ayex, yowlal 'oj 'el'choc jantcn̈ej tas tz'ib'b'il can 'a ch'an̈ ley cha. Ya' sb'a 'ayt 'ec' yolyib'n̈q'uinl tic yet' satcha'an̈, may wal jac tas 'a Ch'an̈ Un̈ chi 'oj satli. Wach'xam junc letra, mto junc punto, may wal junc tas 'oj satoc, masnto 'oj 'el'choc jantcn̈ej tas 'ay 'a 'a. 19'Ay jun tzo'n̈ checnb'il 'a ch'an̈ ley cha, 'icha to may wal yel'chi. Palta tzann̈j eb' matz yiclni smasnil, tzyaln pax eb' 'a eb' 'anma', sec matz yiclj pax eb', toto 'oj c'och eb' 'a yol sc'ab' jun 'aj satcha'an̈, yel xo wal may yel'ch 'oj 'aj eb' ta'. Palta ax eb' tzyiclni tas tzyal jun ley cha, tzyaln pax eb' 'a eb' 'anma', sec tzyiclj pax eb', ax yic 'oj 'och eb' 'a yol sc'ab' jun 'aj satcha'an̈, yel xo wal niwn yel'ch 'oj 'aj eb'. 20Yuj cha, tzwal 'ayex, yowlal tojl tzeyutj e b'eyb'al 'a yib'n̈ sb'eyb'al eb' cuywjum 'a ley yic Moisés yet' eb' fariseo. Toto ma'ay, ma'oj eyoch 'a yol sc'ab' jun 'aj satchan̈ chi jun xo.
Yaljnac Jesús yuj chichnc'ojlal
(Lc 12.57-59)
21'Ay 'aj xcab'c tas alb'il can 'a eb' qui mam quichmec 'a pecti', 'a 'aj tzyal 'ixtic: Man̈ ex milwoc cham 'anma'. Tzann̈j mach tzma'n cham junc yit 'anma'il, yowlal tz'ijx 'at 'a sat ley, axta tzb'eyc'ojlaxi, xchi. 22Palta an tzwal 'ayex, tzann̈j mach tzchichn 'och 'a junc yit 'anma'il, yowlal 'oj b'eyc'ojlaxoc. Tzann̈j mach tzb'uchwj 'a junc yit 'anma'il, 'oj b'eyc'ojlaxc yuj eb' sat yajal. Tzann̈j mach tzb'aj junc yit 'anma'il, 'ay smay tz'at 'a infierno 'a scal c'ac'.
23Yuj cha, a yic tzex c'och yet' eyofrenda 'a 'aj tzeyac' 'a Dios, toto tze na coti, to 'ay 'aj x'och e mul 'a junc xo 'anma', 24can cab'n̈ej jun eyofrenda chi ta b'el. Tz'at e b'ox can yaj e b'a yet' jun 'anma cha, tzlajw cha, tzex japxi, tzeya'n eyofrenda cha.
25Q'uinloc 'ay junc mach tzex 'a'n queja, tzex yi'n 'at 'a win juez. Yic wan e 'at yet' 'a yol b'e, caw tze b'o yaj yet'oc, sec man̈x 'oj 'at ex ya'ch 'a yol sc'ab' winac. Yujto a win juez chi 'oj eya'n 'och 'a yol sc'ab' eb' policía, ax eb' 'oj eya'n 'och 'a preso. 26Wal yel tzwal 'ayex, ma'oj eyel 'a libre, masnto tz'acn 'oj eya'cn jun e multa chi smasnil.
Yaljnac Jesús yuj 'ajmulal
27'Ay 'aj xcab'c tas alb'il can 'a sley Dios, yic yaln can 'ixtic: Man̈ e b'o 'ajmulal 'a yol sc'ab' eyitb'eym junjn ex, xchi. 28Palta an tzwal 'ayex, tzann̈j mach tz'och q'ueln 'a junc 'ix, tznib'n 'ochi, a jun cha, tox x'och 'ajmulal yet' 'ix 'a snab'en.
29Q'uinloc 'ay ex, yuj yol e sat 'a e wach', tzjuw 'el e nab'en. To 'ixta', yel xo wach' tzeyij 'el jun yol e sat cha, tze juln can 'eli, yujto yel xo wach' jab' wal e niwnal chi tzsatcni, 'a yib'n̈ to tzex 'atcn 'a infierno yet' e niwnal smasnil. Toto 'ixta', caw maysch'olnil eyico'. 30Q'uinloc 'ayx pax yuj e wach' c'ab', tzjuw 'el e nab'en. To 'ixta', yel xo wach' tze tzu'l jun e c'ab' cha, tze juln can 'eli, yujto yel xo wach' jab' wal jun e niwnal chi tzsatcni, 'a yib'n̈ to tzex 'atcn 'a infierno yet' e niwnal smasnil. Toto 'ixta', caw maysch'olnil eyico'.
Yaljnac Jesús yuj pojjb'ail
(Mt 19.9; Mr 10.11-12; Lc 16.18)
31A 'a pecti', alb'il can pax junx tic 'ixtic: A mach tzpoj sb'a yet' yistzil, yowlal tzyac' win jun yun̈al yic pojjb'al chi 'a 'ix 'ix cha, xchi. 32Palta an tzwal 'ayex, toto 'ay mach tzpoj sb'a yet' yistzil, palta man̈ 'ajmuloc yistl cha, toto 'ixta', tzya't win 'ix 'a 'ajmulal. An̈jtona', tzann̈j mach tzyij sb'a yet' junc 'ix tzpoj sb'a yet' yichmil cha, tz'och pax win 'ajmulal yet' 'ix.
Matz tac' qui locnec sb'i junc tas
33'Ay 'aj xcab'c tas alb'il can 'a eb' qui mam quichmec pecti', 'a 'aj tzyal 'ixtic: Toto tze loc sb'i Cajlil, yic tzeya'n e ti', yowlal tzeyac' 'el'choc jun tzo'n̈ tas tzeyalcn cha, xchi. 34Palta an tzwal 'ayex, may junc tas tztac' e locn sb'i. Matz tac' e locn sb'i satcha'an̈, yujto a jun cha, atn sdespacho Dios. 35An̈jtona pax sat lum tic, matz tac' e locn pax sb'i, yujto 'icha ste'nub' Dios yaji. Yet' pax Jerusalén, matz tac' e locn pax sb'i, yujto a jun cha, atn schon̈b' jun Rey caw niwn yel'chi. 36An̈jtona e jolom, matz tac' e locn pax sb'i, yujto man̈ eyico'oc e ch'ocoj. Matz tac' eya'n 'och jun ch'inc xil e jolm saquil mto q'uic'al. 37Palta a yic tzex paxtini, n', xe chin̈ej, mto ma'ay, xe chi. Matz tac' e locn sb'i junc tas, yujto a 'a win diablo tzcot jun tzo'n̈ cha.
Matz tac' qui pacnec qui b'a
(Lc 6.29-30)
38'Ay 'aj xcab'c tas alb'il can pecti', 'a 'aj tzyal 'ixtic: Toto 'ay mach tzma'n poj yol sat, mto tzma'l ye junc mach, 'icha wal cab' tz'aj yab'n syal junc cha, 'ixta pax tz'aj jun tz'och smul cha, xchi. 39Palta an tzwal 'ayex, man̈ eyac' owl yet' eb' maysch'olnil tzyutj sb'a 'ayex. Toto 'ay mach tzma'n spac'b'il e ti 'a e wach', tzeyac' jun pac' xo e ti 'a e surito chi smac'a'. 40Toto 'ay mach tznib'j tz'at to'nc 'ec' junc e camx 'a sat ley, tzeya'cn pax e chumpa 'a 'a. 41An̈jtona', toto 'ay mach tzex ecn pural e cuchn 'at junc yictz#Mt 5.41 A eb' israel 'aych eb' 'a yaln̈ schecnb'il eb' syajlil eb' soldado. Yuj cha, a eb' yajl yaj 'a Roma, tztac' ya'n pural eb' yi'n eb' israel 'icatz. 'a junc mel-l legua, to 'ixta', jun legua tze cuchb't 'a 'a. 42Tzann̈j mach tzc'ann smajnc junc tas 'ayex, matz tac' ton̈j tzex 'el ch'umn 'a 'a.
Chamc'ojlal 'a eb' tzchichni
(Lc 6.27-28,32-36)
43'Ay 'aj xcab'c tas alb'il can pecti', 'a 'aj tzyal 'ixtic: Tze chamc'ojlej eb' wach' tzyutj sb'a 'ayex. Ax eb' 'ajc'ojl yajch 'ayex, tzex chichn 'och 'a eb', xchi. 44Palta an tzwal 'ayex, yowlal tze chamc'ojlej eb' 'ajc'ojl yajch 'ayex. [A eb' tzc'ann cot yowl sc'ojl Dios 'a eyib'an̈, ax xo tze c'an cot swach'c'ojlal Dios 'a yib'n̈ eb'. Wach'n̈j tzeyutj e b'a 'a eb' tzchichn 'och 'ayex. Ax eb' tzex b'uchni,] yet' eb' tz'a'n 'och 'a eyib'an̈, tzex leslwi pax yuj eb'. 45'Ixta 'oj eyutc e ch'oxni to yel yunnalx qui Mam 'ayc' 'a satcha'an̈. Yujto a tz'a'n 'emt yoc c'u 'a yib'n̈ eb' maysch'olnil yet' 'a yib'n̈ eb' wach'. An̈jtona', tzya'n pax 'emt n̈ab' 'a yib'n̈ eb' man̈ tojloc snab'en yet' 'a yib'n̈ eb' tojl snab'en. 46Toto cojn eb' 'ay schamc'ojlal 'ayx tze chamc'ojlej, ¿tom 'oj e cha spac jun chi tze na'a? An̈jtona ewin tecm 'el tumin, 'in 'ixta pax tzyutj sb'a ewinac. 47An̈jtona', toto cojn eb' e wach'c'ojl 'aj wach' e paxtini, ¿tom 'ay yel'ch jun chi tze na 'ixta'? An̈jtona eb' man̈ 'ojtnacoc Dios, 'in 'ixta pax tzyutj sb'a eb'. 48Yowlal tz'acn ex 'a smasnil tas wach', 'icha qui Mam 'ayc' 'a satcha'an̈, tz'acn 'a smasnil tas wach'.
Currently Selected:
Mt 5: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.