Lc 5

A jun milagro yic syamchj no chay

(Mt 4.18-22; Mr 1.16-20)

1A 'a jun 'el, xc'och Jesús 'a sti a mar yic Genesaret.#Lc 5.1 A a Mar yic Genesaret, an̈jtona a tzcuch pax Mar yic Galilea. Til wal 'anma 'ix syam sb'a. Caw witz'n x'ajch eb' 'a 'a, yujto tznib'j eb' tzyab' spaxti Dios. 2Ax xyiln Jesús, 'ayc' chab' te barco 'a sjayl sti a'. Ax eb' yajl te', man̈ 'ayc 'ec' eb' 'a yojol, yujto wan sju'n eb' schim yic syamlab' chay. 3Yuj cha, x'och Jesús 'a yol jun te barco cha, atn te yic win Simón. Xlajw cha, xyalni to tznitzb't sb'a eb' jac 'a yib'n̈ a cha. Xlajwn̈ej cha, x'em wocn Jesús, syamn 'och scuywj 'a eb' 'anma ta'. 4Xlajw scuywj 'a eb', 'ix yaln 'a Simón 'ixtic:

—Coyc 'a 'aj 'ay xab'l a'. 'Oj 'at eyac' 'ejm eyamlab' chay tic ta', xchi 'a 'a.

5—Ach in Cuymal, jun 'ac'wl xcob' ca'lc qui yamn no q'uiq'ui, toxn may junc no xquij on̈. Palta yujn̈ej to ach tzala, 'oj 'at wac' 'ejm in yamlab' chay tic jun 'ejm xo, xchi Simón cha.

6Ax yic xya'n 'ejm eb' schim cha, man̈x jantcoc no chay 'ix yamchji. Ax schim eb' cha, xlaj n̈i'chj yol sat. 7Yuj cha, 'ix ya'n eb' sc'ab' 'a jun tzo'n̈ ewin yitb'eym 'a junx te barco cha, sec tzcot eb' colwjoc yet' eb'. Ax yic xjaw eb', til wal no chay chi xq'ueta, caw xb'ut'j te barco chi schab'l yuj no'. 'Ijn wal tz'ejm te 'a yojl a yuj yal-l no'. 8Yic 'ix yiln Simón Pedro jun cha, 'ix 'em cumn 'a yojltac Jesús, 'ix yaln 'ixtic:

—Mamin, mamtzac ej 'el a b'a 'a in tz'ey, yujto an tic caw 'ajmul in, xchi.

9'Ixta xyutj yalni, yujto caw 'ix xiwi. 'Ixta pax eb' ajun yet' cha, caw sat sc'ojl eb' yiln e no chay cha. 10An̈jtona', 'ixta pax Jacobo yet' Juan, atn eb' yunnal Zebedeo, yitb'eym sb'a eb' yet' Simón cha. Caw 'ix sat sc'ojl eb' yilni. Palta xyaln Jesús 'a Simón chi 'ixtic:

—Man̈ ach xiwoc; 'icha tzotj a yamn no chay tic, 'ixta 'oj otc e'n cot eb' 'anma 'ayin, xchi 'a 'a.

11Ax yic xc'och eb' yet' te barco chi 'a sti a', 'ix yactn can eb' smasnil tas 'ay 'a 'a, 'ix 'at eb' yet' Jesús.

B'oxnc jun win ya'ay yuj lepra

(Mt 8.1-4; Mr 1.40-45)

12A 'a jun 'el, yic 'ayc' Jesús 'a jun chon̈ab', 'ix jaw jun winc 'a 'a, caw ya'ay yuj lepra. Yic 'ix yiln win Jesús, 'ix 'em cumn win 'a yojltac. 'Ix tew 'och win 'a 'a, xyaln win 'ixtic:

—Mamin, comnoc tzyal a c'ojol tzin ac' b'oxoc, xchi win 'a 'a.

13Yuj cha, 'ix stzayn 'och Jesús sc'ab' 'a winac, 'ix yaln 'ixtic:

—Tzyal in c'ojol. Tic tzach wac' b'oxoc, xchi 'a winac.

Xlajwn̈ej yaln jun cha, 'ix tacj can jun yab'il chi 'a winac. 14Xlajw cha, xyaln Jesús 'a win 'ixtic:

—'Ayt 'aj xal-l jun tic, palta 'ixic, 'at ch'ox a b'a 'a win ya'mal 'och qui ti 'a Dios. 'At 'ac' junc a ofrenda 'a Dios, 'icha yaj yaln can Moisés, sec man̈x a paltail 'a sat ley, 'ixta 'oj 'aj scheclj 'eli, chajtlto ach b'ox cani, xchi Jesús 'a winac.

15Palta 'ix wach' pucl yab'xil Jesús 'a scal eb' 'anma'. Yuj cha, til wal eb' xlaj syam sb'a yic tz'ab'xni eb' 'a 'a. Tznib'n pax eb' tzlaj b'ox can sc'ojl yuj syailal. 16Ax Jesús, tz'at 'a 'aj may 'anma', ata tzleslwi.

B'oxnac jun win sicb'nac 'eli

(Mt 9.1-8; Mr 2.1-12)

17Ax 'a jun c'u, 'ix cuywj Jesús 'a eb' 'anma'. Wocn 'ejm jun tzo'n̈ ewin fariseo ta', yet' jun tzo'n̈ ewin cuywjum 'a ley yic Moisés. Xcot ewin 'a junjn chon̈b' 'a yol yic Galilea, yet' 'a Judea. 'Ay pax ewin xcot 'a Jerusalén. Ax Jesús, caw xcheclj 'el spoder Dios 'a 'a, yic 'ix ya'n b'oxc sc'ojl eb' ya'ay. 18A yic wan scuywji, 'ix jaw jaywn̈ winc yet' jun winc sicb'nac 'eli. T'un̈b'il yet' swaynub' yuj eb'. Snib'j eb' x'och yet' win 'a yol n̈a, tzya'n 'ejm eb' win 'a yojltac Jesús. 19Palta matz tac' yoch eb' yet' winac, yujto caw sin̈n̈i yajch eb' 'ama 'a yol jun n̈a cha. Yuj cha, xq'ue eb' 'a span̈nil yib'n̈ n̈a, 'ix yoln eb'. Xlajw cha, xya'n 'ejm t'un̈noc eb' win yet' swaynub' 'a scal eb' 'anma cha, 'ix 'ejm win 'a yojltac Jesús. 20Ax 'ix yiln Jesús to xya'ch eb' sc'ojl 'a 'a, yuj cha, xyaln 'ixtc 'a win sicb'nac 'el cha:

—Ach winac, tic 'ix 'ajx can lajwc a mul, xchi 'a winac.

21Ax ewin cuywjum 'a ley yic Moisés yet' ewin fariseo, 'ix snan ewin 'ixtic: ¿'Aj wal xyij cot sb'a winac, yuj chi tzb'uchwj win 'a Dios? Toc 'ay xon junc mach tztac' ya'n lajwc qui mul, cojxn Dios, xchi ewinac.

22Palta ax Jesús, yojtac tas wan snan ewinac, yuj cha, xyaln 'ixtic:

—¿Tas yuj wan e nan jun tzo'n̈ tic 'ixtic? 23¿'Aja junc man̈ 'ajltacc yel'ch tze na'a? Toto tzcal 'ixtic: Tic 'ix 'ajx can lajwc a mul, xqui chi, mto q'uen̈ wa'an b'eyan̈, xqui chi. ¿Tom 'ay junc man̈ 'ajltacc yel'chi? 24Palta a ticnec 'oj in ch'ox 'ayex, to an 'Ochnc in 'Anmal tic, 'ay in poder wa'n can lajwc smul eb' 'anma 'a yolyib'n̈q'uinl tic, xchi 'a ewinac.

Xlajw cha, xyaln 'a win sicb'nac 'el chi 'ixtic:

—An tzwal 'ayach, q'uen̈ wa'an, 'ij chan̈ a waynub' tic, paxn̈ 'a atut, xchi 'a winac.

25Yajn̈j wal cha, xq'ue wan win 'a sat eb'. 'Ix yi'n chan̈ win swaynub' 'a 'aj c'otn 'ec' cha, 'ix pax win 'a yatut. Xlaj yalnc win wach' paxti 'a Dios, yic x'at winac. 26Yuj cha, caw 'ix sat sc'ojl smasnil eb' 'ayc' ta'. 'Ix laj yalnc eb' wach' paxti 'a Dios, caw 'ix xiw pax eb'. 'Ix laj yalnc eb' 'ixtic:

—A jun tzo'n̈ tas xquilc 'a jun c'u tic, mant 'a xon 'aj tzquilc 'ixta', xchi eb'.

'Ochnc win Leví scuywumoc Jesús

(Mt 9.9-13; Mr 2.13-17)

27Xlajw cha, x'atx Jesús. Ax yic wan sb'eyi, 'ix yiln jun tecm 'el tumin, Leví#Lc 5.27 A win Leví, tzcuch pax Mateo, 'ixta yaln 'a Mateo 9.9. sb'i. Wocn 'ejm 'a yet'l 'aj tztecl stumn eb' 'anma'.

—'Ochn̈ in cuywumoc, xchi Jesús 'a 'a.

28Yuj cha, 'ix q'ue wa'an, 'ix yactn can smasnil tas 'ayc' ta', 'ix 'och scuywumoc Jesús.

29Ax Leví cha, 'ix ya'ch jun niwn q'uin̈ 'a yatut yic tz'och wa'el, sec tzwa Jesús yet'oc. Til wal eb' tecm 'el tumin, yet' jun tzo'n̈ xo eb' 'anma x'em wocn 'a te mexa yet' eb'. 30Palta ax ewin fariseo yet' jun tzo'n̈ xo spartido ewinac, atn ewin cuywjum 'a ley yic Moisés, tu xyal ewin 'a eb' scuywum Jesús. 'Ix yaln ewin 'ixtic:

—¿Tas yuj junn̈j tzex wa yet' eb' tecm 'el tumin, yet' jun tzo'n̈ xo eb' maysch'olnil sb'eyb'al tic? xchi ewin 'a eb'.

31Yuj cha, xyaln Jesús 'ixtc 'a ewinac:

—Q'uinloc 'ay junc 'a'm remel ticnec, a eb' wach' sc'ojol, ¿tom 'ay tz'och yuj eb'? Cojn eb' ya'ay, a eb' 'ay tz'och yu'uj. 32'Ixta waj an tic, a eb' wach' sb'eyb'al snani, toc 'ay tzin 'och yuj eb', palta yuj wawtn eb' tznachj 'el yu'uj to maysch'olnil sb'eyb'al, yuj cha, in jawi, xchi Jesús.

33Xlajw cha, xyaln ewin 'a Jesús 'ixtic:

—A eb' scuywum Juan Bautista yet' eb' qui cuywum on̈, til wal 'ejm tzya'ch sb'a eb' 'a c'ajb'c'ojlal, tzleslwi eb'. Palta ax eb' a cuywum ach tic, ¿tas yuj ton̈j tzwan̈j eb'? xchi ewin 'a 'a.

34Yuj cha, xyaln pax Jesús 'ixtc 'a ewinac:

—Q'uinloc 'ay junc nupnel tz'och ticnec, a eb' 'awtb'il 'at ta', ¿tom tztac' ya'n 'och sb'a eb' 'a c'ajb'c'ojlal yic 'ayt 'ec' win tznupn chi yet' eb'? 35Palta at 'oj jawc stiempoal man̈x 'ayc 'ec' win yet' eb', atta 'oj ya'ch sb'a eb' 'a c'ajb'c'ojlal, xchi 'a eb'.

36Xlajw cha, xyaln pax junx 'ab'x tic 'a eb' 'ixtic:

—May junc mach 'ay junc ya't pichul, tzlot'j 'elt jab'oc, tzya'n 'och sniploc junc 'ichm pichul. Toto 'ixta tzyutej, caw tzjuw 'el jun 'a't cha, man̈ wach'c pax tz'aj jun 'ichm pichl chi yuj jun 'a't cha.

37An̈jtona', may junc mach tz'a'n 'ejm 'ac' yal uva mantzac jaw sti 'a yojl junc 'ichm tz'u'um.#Lc 5.37 'Ilt nota 'a Mateo 9.17. Yujto a yic tzjaw sti jun 'ac' yal uva cha, caw tzsipji, yuj cha, ton̈j tzjat jun 'ichm tz'um chi yu'uj. Ton̈j tz'ixtx jun yal uva chi yet' jun tz'um cha. 38Yuj cha, an̈j 'a yojl jun tzo'n̈ 'ac' tz'u'um, an̈jta tz'ejm 'ac' yal uva cha, sec wach' may tas tz'ixtx 'a schab'il. 39An̈jtona', toto 'ay mach an̈ja tzat 'u'n jun 'ichm yal uva cha, ax jun yal uva tzat b'o'i, may yel'ch 'a sat. Tzyaln 'ixtic: A jun 'ichm yal uva tic, yel xo wach', xchi, xchi Jesús.

Currently Selected:

Lc 5: CSS

Highlight

Copy