Lc 16

A yab'xil win mayltoma

1'Ix yaln Jesús jun 'ab'x tic 'ixtc 'a eb' scuywum: A 'a jun 'el, 'ay jun win patron̈ caw rico. 'Ay jun smayltoma winac. Ax 'ix yab'n win patron̈ cha, to caw tz'ixtx tastc 'ay 'a win yu'uj. 2Yuj cha, xyawtn cot win jun smayltoma chi 'a 'a. 'Ix yaln 'ixtc a winac: 'Ay wal jun tzo'n̈ tas tzwab' speclal o'oj. Yuj cha, a jun tzo'n̈ munljel tic 'aych 'a yol a c'ab' wu'uj, yowlal 'oj a'x can 'ayin, yujto man̈x 'oj a munlj 'a jun opiso tic, xchi winac. 3Yuj cha, 'ix snan win mayltoma chi 'ixtic: ¿Tasm 'oj wutc in b'a ticnec? Caw in yij 'el win in patron̈ tic 'a wopiso. Palta toxn may tzin 'och in munlj 'a junc xo munljel. Caw 'oj in q'uixw wec' pax in c'an jac siylab' 'a eb' 'anma 'a scal n̈a. 4Palta a ticnec, xnachj wu'uj, tas 'oj wutc in b'a. Wach'xam may in munljel, palta 'ay eb' 'oj in chan 'och 'a yol yatut, xchi winac. 5Xlajw cha, xlaj yawtn cot win junjn eb' 'ay sjelb' 'a win spatron̈ cha. 'Ix sc'anb'n win 'a win xb'ab'l c'ochi: ¿Jantc a jelb' 'a win in patron̈? xchi winac. 6Jun ciente ch'ub' in b'oc aceite 'a winac, xchi winac. Toto 'ixta a b'oc aceite cha, yaj jun svaleal jun a cuenta tic. 'Emn̈ wocn muc'uc, cojxn̈ej cincuenta tza tz'ib'j can 'ejmi, xchi win mayltoma chi 'a winac. 7Xlajwn̈ej cha, 'ix sc'anb'n win 'a junx winac: Al ach, ¿jantc ec pax 'a win jun xo? xchi winac. An tic, jun ciente 'almu in b'oc trigo 'a winac, xchi junx win cha. Toto 'ixta', yaj svaleal jun a cuenta tic; cojxn̈ej ochenta tza tz'ib'j can 'ejmi, xchi winac. 8Ax win patron̈ chi 'ix alni to caw jeln win mayltoma chi 'a maysch'olnil. Yujto a eb' yic yolyib'n̈q'uinl tic, yel xo wal jeln tzlaj yutc sb'a eb' 'a yib'n̈ eb' 'ayx sacq'uinlal Dios 'a 'a.

9An tzwal 'ayex, a q'uen tumin, c'un sc'anx 'a maysch'olnil. Palta a 'a tas wach', a cab' ta tze c'anlb'ej sec wach' 'ay eb' 'oj e wach'c'ojloc e b'a yet'oc. Toto 'ixta', at yic 'oj lajwc yopiso jun tumn chi eyu'uj, 'ay eb' 'oj e chan e c'och 'a 'aj 'ay jun eyet'l 'a jun 'ejmn̈ej.

10A eb' tojl tzyutj sb'a yet' jac tas tz'ajx 'a 'a, an̈jtona', wach'xam niwn tas 'oj 'ajxc 'a eb', tojl 'oj yutcn̈ej sb'a eb' yet'oc. Ax eb' man̈ tojloc tzyutj sb'a yet' jac tas tz'ajx 'a 'a, an̈jtona', wach'xam niwn tas 'oj 'ajxc 'a eb', man̈ tojloc 'oj yutc pax sb'a eb' yet'oc. 11Yuj cha, toto man̈ tojloc tzeyutj e b'a yet' jun ricoal yic yolyib'n̈q'uinl tic, ¿tom 'oj 'ajxc jun caw ricoal 'ayex? 12An̈jtona', toto man̈ tojloc tzeyutj e b'a yet' jun tzo'n̈ tas man̈ eyico'oc, ¿tom 'oj 'ajxc jun tzo'n̈ tas caw eyic 'ayex?

13May junc mach tztac' ya'n servil chawn̈oc spatron̈. Yujto 'ay jun 'oj schacli, ax jun 'oj schamc'ojloc. 'Ay jun 'aj 'oj ya'ch snab'en, ax jun may jac yel'ch 'a sat. Yuj cha, matz tac' eya'n servil Dios, tzeya'n pax 'och e nab'en 'a e ricoal, xchi Jesús 'a eb'.

14Ax ewin fariseo cha, c'uxn xyab' ewinac tastc 'ix yal Jesús. Palta cojxn wal tumn 'aj 'aych snab'en ewinac. Yuj cha, ton̈j xb'uchwj ewin 'a 'a. 15Yuj cha, xyaln Jesús 'ixtc 'a ewinac: Ax xo tic, cojxn 'a sat eb' 'anma wach' tzeyutj e b'a, palta ax Dios, yojtac tas yaj e nab'en. A jun tzo'n̈ tas niwn yel'ch 'a sat eb' 'anma', caw yajb'il yuj Dios.

A jun ley yic Moisés

16A ley yic Moisés yet' tas yaljnac can eb' schecb' Dios pecti', 'ochnc yopiso masnto 'a yic swulc' win Juan Bautista. Ax ticnec, at xo yic swulc' win Juan cha, syamchj can pax 'och yalx 'el wach' 'ab'ix, chajtl tz'aj eb' 'anma yoch 'a yol sc'ab' Dios. Yuj cha, c'uxn tzyac' eb' 'ip ya'n 'och sb'a 'a yol sc'ab'.

17A satcha'an̈ yet' sat lum tic, may syal 'oj 'aj slajw 'eq'ui. Palta ax jun ley cha, wach'xam junc letra, may wal junc ma'oj 'el'choc.

Yaljnac Jesús yuj pojjb'ail

(Mt 19.1-12; Mr 10.1-12)

18Toto 'ay junc winc tzpoj sb'a yet' yistzil, tzyi'n win junc xo 'ix, a jun winc cha, tz'och 'ajmulal. Toto 'ay pax junc winc tz'i'n junc 'ix spojjnac sb'a yet' yichmil cha, tz'och pax win 'ajmulal.

A yab'xil win rico yet' win Lázaro

19A 'a jun 'el, 'ay jun winc caw rico, caw wach' yaj yet' jun tzo'n̈ spichl caw chan̈ stojol. Ax 'a junjn c'u til wal tas caw wach' tzc'ux winac, tzcot ch'ucn 'a yojltac. 20'Ay pax jun winc Lázaro sb'i, caw meb'a'. 'Ay wal jun tzo'n̈ niwc yab'il 'ay q'ue 'a sniwnal. An̈j 'a sti yatut win rico chi tz'at 'em wocan. 21Tzcob' snib'oc, cojn cab' jac sc'ajl tas tz'elcn yuj win rico chi 'a yaln̈ smexa, a tz'ajx 'a 'a. Ax jun tzo'n̈ no tz'i', a no tz'at le'nc sat jun tzo'n̈ yab'il chi 'ay q'ue 'a 'a. 22A yic xjaw sc'ul scham win meb'a cha, ax eb' ángel xwul 'i'nc spixan. 'Ix c'och yet' Abraham 'a jun paraíso sb'i. An̈jtona', xjaw pax sc'ul scham win rico cha, 'ix mucxi.

23Palta ax spixan, ata xc'och a 'aj 'ay spixn eb' chamnac. Ax yic wan yab'n win syal 'a 'aj 'ayc' cha, xq'ue q'uelan. 'Ix yiln q'ue 'a caw najat, 'ayc' Lázaro yet' Abraham ta'. 24Yuj cha, x'awj chan̈ winac, 'ix yaln 'ixtic: Mamin Abraham, comnoc tz'o' cot a c'ojl 'ayin. Tza chec cot Lázaro 'ayin. Tzyac' 'ejm junc yune sc'ab' 'a scal a a', tzwul ya'nc 'och jac 'a sn̈i wac' tic. Yujto caw matz techj wab'n syal 'a scal c'ac' tic, xchi winac. 25Palta xyaln cot Abraham chi 'ixtc 'a winac: Ach 'un, na coti chajtlto caw wach' ach 'ec' 'a yolyib'n̈q'uinal, ax Lázaro tic, caw may jac swach'l x'ec' yil ta'. Al ticnec, to wan yajx sniwnal sc'ojl 'a tic, ach xo, wan ab'n syal ticnec. 26An̈jtona', 'ay wal jun niwquil xab' 'aycn 'a qui nan̈l et'oc. Yuj cha, wach'xam 'ay mach tznib'j tz'at 'a tic, tzc'och 'a 'aj 'aych cha, matz tac' sc'axw 'ec' eb'. An̈jtona 'ex, matz tac' e c'axw 'e't 'a tic, xchi Abraham cha.

27Toto 'ixta jun mamin Abraham, comnoc tza checb't Lázaro chi 'a yatut in mam, 28'a 'aj 'ay own̈ wu'tac. Tzyaln yab' eb', sec toq'ue ma'oj jawc eb' wet' 'a scal yailal 'aj 'ayn 'ec' tic, xchi winac. 29Palta a eb' cha, 'ayc' xon tas stz'ib'jnac can Moisés, yet' tas stzib'jnac eb' schecb' Dios 'a eb'. Ya' cab' 'och eb' schicn 'a jun tzo'n̈ cha, xchi Abraham 'a winac. 30Yel ton mamin Abraham: Palta toto 'oj yil eb' spitzw pax junc mach 'a scal eb' chamnac, 'oj sna sb'a eb', xchi winac. 31Toto matz ya'ch eb' schicn 'a tas stz'ib'jnac can Moisés, yet' eb' schecb' Dios, wach'xam 'ay junc mach tzpitzw pax 'a scal eb' chamnac, an̈jtona ma'oj ya'ch pax eb' 'a sc'ojol, xchi Abraham chi 'a winac. 'Ixta tzyal jun 'ab'x tic, xchi Jesús.

Currently Selected:

Lc 16: CSS

Highlight

Copy