Lc 14

B'oxnc win malnc yuj jun yab'il

1A 'a yic jun sc'ul 'iljelal, 'ix c'och Jesús wac 'a yatut jun win syajlil eb' fariseo. 'Ay pax jun tzo'n̈ xo ewin fariseo tzmaclni yila'. 2Ata 'ay jun winc 'ayc' 'a yojltac Jesús, caw malnc win yuj jun yab'il. 3Ax Jesús 'ix yal 'ixtc 'a ewin cuywjum 'a ley yic Moisés, yet' 'a ewin fariseo cha:

—¿'Aym sleyl tzb'ox junc ya'ay 'a sc'ul 'iljelal, mto ma'ay? xchi 'a ewinac.

4Palta toxn̈ej sictac x'aj ewinac. Ax Jesús 'ix 'och yamn 'a win ya'ay cha, 'ix ya'n can b'oxc sc'ojol. 'Ix yaln 'a winac, to tzpax winac. 5Xlajwn̈ej cha, xyaln 'ixtc 'a ewin fariseo cha:

—Q'uinloc 'ayx 'ay junc eyunnal, tz'at 'a yol junc xab' 'a sc'ul 'iljelal, wach'xam junc e wacx tz'ati, ¿tom matz 'at eyic' q'uet muc'uc? xchi 'a ewinac.

6Palta toxn ma'ix nachj xon spacn ewin jac 'a 'a.

A yab'xil eb' 'awtb'il 'a nupnel

7'Ix yiln Jesús tas xyutj sb'a ewin 'awtb'il wac yet' 'a jun wal cha, chajtlto tznib'j ewin 'em wocn sb'a 'a 'aj tz'em wocn eb' niwn yel'chi, yuj cha, xyaln 'ixtc 'a ewinac:

8—Toto 'ay 'aj tzex 'awtx 'at 'a junc q'uin̈ nupnel, man̈ ex 'em wocn 'a 'aj 'ay yet'l eb' niwn yel'chi. Toq'ue 'ay junc win tzc'ochi, yel xo niwn yel'ch 'a eyib'an̈. 9Ax win tzex 'awtn 'at cha, 'oj yal win 'ayx 'ixtic: 'Eln̈ec 'a jun yet'l win tic, 'oj schic winac. Yuj cha, yowlal 'oj e c'och 'a 'aj 'ay eb' may jac yel'chi, caw 'oj eyac' e q'uixwloc. 10Palta a yic tzex 'awtx 'at cha, yel xo wach' tzex 'em wocn 'a 'aj 'ay eb' may jac yel'chi, sec wach' a yic 'oj c'och win tzex 'awtn 'at cha, ax yaln win 'ayx 'ixtic: Ex in wach'c'ojol, 'ixquec, 'at 'emn̈ec wocn 'a 'aj tz'em wocn eb' caw niwn yel'chi, 'oj schic winac. 'Ixta to b'i'an, caw niwn eyel'ch 'a sat eb' 'aych 'a te mexa cha. 11Tzann̈j mach tzyij chan̈ sb'a, 'oj 'ijxoc 'ejmi, man̈x 'a jac yel'ch 'oj 'ajoc. Palta ax mach tzyij 'ejm sb'a, 'oj 'ijxoc cha'an̈, caw niwn yel'ch 'oj 'ajoc, xchi Jesús.

12Xlajw cha, 'ix yaln 'ixtc 'a win x'awtn 'at cha:

—A yic tza'n 'och junc niwn wa'el, may xon junc eb' a wach'c'ojl tzawtj coti. Man̈ awtc cot pax eb' o'tac, eb' ecan, yet' eb' rico cajn 'a a tz'ey tic. Yujto a eb' cha, 'oj ach yawtc pax eb' wac jun xo, ax a chan can pax spac ec cha. 13Palta a yic tza'n 'och junc a q'uin̈, an̈j eb' meb'a tzawtj cot wac et'oc, eb' palta yaji, eb' coxo, yet' eb' matz uj yilni. 14Toto 'ixta', caw wach' eco', yujto a eb' cha, may xon spac 'oj stac' ya'n eb' 'ayach. Palta at wal yic 'oj pitzwc pax eb' tojl snab'en, ax a chan pax spac ec cha, xchi Jesús 'a winac.

A yab'xil jun niwn wa'el

(Mt 22.1-10)

15'Ay jun win 'a scal eb' 'aych 'a te mexa cha, yic xyab'n win jun tzo'n̈ cha, xyaln 'ixtc 'a Jesús:

—Caw wach' yic eb' 'oj swa pan yic 'oj 'och Dios Yajlil, xchi win 'a 'a.

16Yuj cha, xyaln Jesús junx 'ab'x 'ixtic:

—A 'a jun 'el, 'ay jun winc 'ix 'a'n 'och jun niwn wa'el, til wal 'anma xcob' yac' win 'awtxoc cot wa'oc. 17Ax yic xc'och hora yoch jun wal cha, 'ix schecn 'at win jun smoso 'at yal 'ixtc 'a eb' 'awtb'il cot yuj cha: 'Ixquec, xc'och hora yoch wa'el, caw lista xo yaji, xchi 'a eb'. 18Palta xlaj yalnc junjn eb', to matz tac' s'at eb'. A win b'ab'el, xyaln win 'ixtic: To 'ay jun in lum tot xin mana, yowlal 'oj 'at wila'. Tzac' niwnc'ojlal 'ayin, ma'oj in 'ati, xchi winac. 19'Ix yaln junx winac: To 'ay omojn̈ in munljum wacx tot xin mana. Yowlal 'oj 'at wa'lc prowal eb', chajtl smunlj eb'. Comnoc tzin ac' niwnc'ojlal, xchi winac. 20'Ix yaln junx winac: Tot in nupni, yuj cha, ma'oj stac' in 'ati, xchi winac. 21Yic 'ix c'ochx jun smoso win cha, c'uxn xyala tastc xyutj ewin yaln 'a 'a. Yuj cha, caw xcot yowl win patron̈ cha. 'Ix yaln win 'ixtc 'a jun smoso cha: 'Ixc wal mu'c 'a jun tzo'n̈ caye, 'a jun tzo'n̈ b'e 'a yol chon̈b' tic. 'At 'ij cot eb' meb'a', eb' palta yaji, eb' coxo, yet' eb' matz uj yilni, xchi win 'a 'a. 22Xlajw sc'ochx jun smoso win cha, 'ix yaln win 'ixtc 'a winac: Mamin, tic xit' wi' cot eb' 'icha 'ix al cha, palta caw coln to, xchi 'a winac. 23Yuj cha, xyaln pax win spatron̈ chi 'ixtc 'a 'a: A ticnec, 'ixc 'a jun tzo'n̈ xo caye, yet' 'a jun tzo'n̈ xo b'e. 'At 'ac' pural eb' laj e'n coti, sec wach' 'oj b'ut'joc 'el yol watut tic yuj eb'. 24Yujto tzwal 'ayach, may xon junc eb' b'ab'l 'awtb'il cot wuj 'oj stac' swa 'a jun niwn wal tic, xchi winac. 'Ixta tzyal jun 'ab'x tic, xchi Jesús.

A eb' tz'och scuywumoc Jesús

(Mt 10.37-38)

25A 'a jun 'el, til wal 'anma x'och tza'n yuj Jesús, yuj cha, sutmj 'at q'uelan, 'ix yaln 'a eb' 'ixtic: 26Toto 'ay mach tzjaw 'ayin, palta yel xo niwn yel'ch smam snun 'a wib'n̈ snani, yet' yistzil, yunnal, yu'tac, yanab', yet' stzatzil, toto 'ixta', matz tac' yoch in cuywumoc. 27A eb' tz'och in cuywumoc, an̈j eb' tzb'eylb'an in b'eyb'al, wach'xam tzcham eb' 'a te culs wu'uj. 28Q'uinloc 'ay junc ex tze nib'j tze b'o junc eyatut niwquil tz'aji. Yic mantzac eyamch e b'oni, ¿tom matz ex 'em wocan, tze b'ab'l b'isn can jantc stumnal 'oj lajwoc, sec chequel, toto 'oj tza'wnoc e tumn chi sb'oni? 29Toto matz e b'ab'l b'oj 'ixta', cojn yipnub'al yich 'oj 'emcni, ma'oj b'o eyu'uj. Ax eb' 'oj 'ilnc jun cha, 'oj ex sb'uch eb', 30ax yaln eb' 'ixtic: A wal jun winc tic, xcob' syamch sb'on jab' yatut, palta toxn ma'ix b'o yu'uj, 'oj schic eb'. 31Q'uinloc 'ay junc rey, wan s'at yac' owl yet' junc xo yit reyal, palta cojn lajn̈e mil soldado tzyij 'at yet'oc. Ax junx rey cha, junc'l mil soldado ajun pax yet'oc. A yic mantzac 'ati, ¿tom matz b'ab'l 'emcn wocan, tznan si'mb'il, toto tzyac' ganar yet' ewin soldado chi tz'at yet' cha? 32Toto tznachj 'el yuj winac, to matz yac' ganar, tzya'b't win schecb' 'a junx win rey cha, yic najt to sjaw winac, tz'at sc'annoc win junc'ojlal 'a winac. 33An̈jtona', tzann̈j ex matz yal e c'ojl tzeyactj can jantcn̈ej tas 'ay 'ayex, matz tac' eyoch in cuywumoc.

A junc 'atz'm tzsat sc'achi'al

(Mt 5.13; Mr 9.50)

34A 'atz'm 'atz'm wach', caw 'ay yopiso; palta q'uinloc tzsat sc'achi'al jun 'atz'm cha, ¿tast wal 'oj 'aj sc'achib'i paxi? 35Man̈x 'a jac yopiso. Wach'xam tz'at 'a scal lu'um, wach'xam tz'at 'a scal abono, toxn may jac yopiso. Toxn̈ej tzjulx 'eli. A jun tzo'n̈ xeyab' tic, nac wal si'mb'il, xchi Jesús 'a eb'.

Currently Selected:

Lc 14: CSS

Highlight

Copy