Gn 8
8
Yic xtup 'ejm a a'
1Ax Noé yet' eb' yico', yet' smasnil no noc' 'aych yet' 'a yol barco cha, nann̈ej eb' yuj Dios, yuj cha, 'ix ya'n cot Dios jun niwquil 'ic' 'a yib'n̈ a a cha, sec wach' tztup 'ejm a'. 2'Ix macchj sjaj a 'ix q'uel 'a yol lu'um, yet' jantcn̈ej a 'ix 'emt secnjoc 'a satcha'an̈, 'ix 'och wan pax ya'n n̈ab'. 3Jab'jnal 'ix 'aj stup 'ejm a 'a yojl o'e 'ujl cha. 4Uclajn̈e xo c'u yoch yucl 'uj, 'ix 'em te barco chi 'a sjolm switzl Ararat. 5'Ipn stup 'ejm a a cha, a yic b'ab'l c'u yic slajn̈il 'uj. Ata 'ix checlj sjolm lum niwc witz chan̈ yaj cha'an̈.
6A yic 'e'nc xo schawinc c'ual, 'ix sjacn win Noé swentnual te barco b'ob'il yuj cha, 7'ix ya'n 'elt win jun no joj. Caw niwn 'ejm x'ec' jen̈n̈oc no', stan̈wj cob' no stup 'ejm a 'a sat lum lum tic. 8'Ix ya'n 'elt pax win jun no 'uch, yic tzyilni toto tacn̈ xo sat lu'um. 9Palta ax no 'uch cha, 'ix meltzj pax no 'a te barco chi jun 'ejm xo, yujto ma'ix 'ilchj yet'l no 'aj wach' tzcani. Caw wal b'ut'nto sat lum lum chi yet' a a cha. 'Ix ya'n 'elt win Noé sc'ab' yic schan 'och win no 'a yol te barco cha.
10Uqueto c'u 'ix stan̈wj Noé, 'ix ya'n 'elt win no 'uch chi jun 'ejm xo. 11Wan xo wal sq'uic'b'i, 'ix meltzj pax no', n̈ac'b'ilx jun te yune sc'ab' olivo yax yuj no'. 'Ixta 'ix 'aj snachj 'el yuj win Noé, chajtlto wan xo stacj sat lum lu'um. 12Uqueto pax c'u stan̈wj winac, 'ixta to b'i'an, sjacn 'elt win no jun 'ejm xo, palta man̈xtoc xmeltzj no'.
13A Noé 601 ab'il sq'uinal, yic 'ix tacj can pax lum lum tic 'a b'ab'l c'u yic b'ab'l 'uj. Xlajw cha, 'ix yi'n 'el Noé yib'n̈ te barco cha, ax xyiln winac to tacn̈ xo lu'um. 14Ax 'a yic uqueschawinc xo c'u yoch schab'l 'uj, caw tacn̈ xo sat lum si'mb'il. 15Ata xyal Dios 'a Noé 'ixtic: 16'Eln̈ta 'a yojl te barco chi yet' 'ix estzil, eb' onnal, yet' pax eb' 'ix alib'. 17Tze'n pax 'elt smasnil no noc' 'aych et'oc: No ch'ic, no cajb'en noc', no calte'al noc', no tzjuc sb'a 'a sat lu'um. Sactzic cab' 'at e no', 'unewoc cab' e no', sb'ut' cab' e no sat lum lum tic, xchi Dios.
18Xlajw cha, 'ix 'elt Noé yet' yistzil, yet' eb' yunnal, yet' pax eb' 'ix yalb' win 'a yojl te barco cha. 19An̈jtona', x'elt pax smasnil junjn c'aj no noc', a tzyal yin̈tl e no'.
Sb'o Noé jun yet'l xajmb'al
20'Ix sb'on Noé jun yet'l xajmb'al 'a yojltac Jehová, 'ix yi'n cot win no noc' yet' no ch'ic wach' yoch xajmb'alil. Junjn 'a junjn c'aj no', xya'n tz'a win e no 'a yib'n̈ yet'l xajmb'al. 21Caw su'q'ui sjab' jun xajmb'al chi xyab' Jehová, yuj cha, snan 'ixtic: Man̈x 'oj in chacl lum lum tic yuj syaloc eb' 'anma tic, yujto yictax 'unn 'anma to eb', cojn maysch'olnil tznib'j eb' sb'o'. Man̈ yujoc cha 'oj to in satl smasnil tas pitzan, 'icha 'ix wutj tic.
22Ya' sb'a 'ayt 'ec' yolyib'n̈q'uinl tic, 'ay tas 'oj 'awxoc, 'oj molb'tzaxc sat 'awb'en; 'ay stiempoal c'ac', 'ay stiempoal si'ic; 'ay n̈ab'lq'uinal, 'ay cuaresma, 'ay c'ual, 'ay pax 'ac'wal, xchi Dios 'a snab'en.
Currently Selected:
Gn 8: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
