Gn 40

Xyal José*r* tas tzyal 'el'ch chab' wayich

1X'ec' jun tiempoal, 'ay chawn̈ winc 'ix 'och 'a preso, jun win syajlil eb' tzb'achn b'ey te yal uva tzyu'j win rey, yet' junx win tzb'on 'ixm pan tzwaj winac. A eb' chawn̈ tic, 'ix 'och smul eb' 'a win sreyl Egipto cha. 2Caw 'ix cot yowl win rey chi 'a ewin schawn̈il. 3'Ix ya'n win rey 'ajxc 'och eb' 'a preso 'a yatut win capitan̈ 'a 'aj 'aych José 'a preso cha. 4Ax 'a yol sc'ab' José, ata xya'ch win capitan̈ ewinac, ax José x'och stan̈malc eb', najtl xcan eb' 'a preso cha.

5'Ay jun 'ac'wal, x'och swaych ewin schecb' win rey schawn̈il, win tzb'achn b'ey yal uva yet' win b'om pan, junjn swaych junjn eb', 'ay tas pax tzyal 'el'chi. 6Ax 'a yic sq'uin̈b'ial, xc'och José 'at yil ewinac, ax xyilni caw 'aych ewin 'a 'ilc'ojlal. 7Yuj cha, sc'anb'n 'ixtc 'a eb':

—¿Tas yuj cusltac yilx 'och e sat? xchi.

8—'Ay jun qui waych x'och 'a 'ac'wl tic on̈, palta may mach 'a tic tztac' yaln 'ayn̈ on̈ tas wal tzyal 'el'chi, xchi ewinac.

Yuj cha, xyaln José 'a eb' 'ixtic:

—¿Tom man̈oc Dios tztac' ya'n spac e waych cha? Alc 'ayin tas xeyil 'a e waych cha, xchi.

9Yuj cha, a win syajlil eb' tzb'achn b'ey yal uva tzyu'j win rey, syamn 'och yaln swaych 'a José cha:

—A 'a jun in wayich, xwil jun te snun uva, 10'ay 'oxe sc'ab' te'. Xwil yelt swol, xya'n snich, ax snich te cha, x'och uvail, yajn̈ej 'ix 'e'maxi. 11Ax xwilni to yamb'il chan̈ svaso win rey wu'uj, xwi'n cot te uva cha, xin pitz'n 'ejm yalil te 'a yol svaso winac. An pax xwac' jun vaso chi 'a yol sc'ab' win rey cha, xchi winac.

12Xyaln José 'a win 'ixtic:

—'Ixtc tzyal 'el'ch a waych tic: A 'oxe sc'ab' uva xel cha, 'oxe c'u tzyala. 13Chab'ej 'oj el 'a preso tic yuj win rey, ax ochx 'a a munljel jun 'ejm xo, 'icha xon aj 'a yic yalan̈. 14A yic 'oj 'el'choc jun tzwal 'aych tic, tzin a na coti, tzal 'a win rey chi wu'uj, toq'ue tzin yij 'el win 'a yol preso tic. 'O'ch cab' a c'ojl 'ayin. 15Yujto an tic, ton̈j 'elc'b'iln cot 'a scal eb' hebreo, man̈ in mojc 'ayn 'och 'a preso tic, yujto may xon jac tas tu xin b'o'o, xchi José cha.

16A yic xyab'n win syajlil eb' b'om pan cha, to wach' xyutj José yaln yuj swaych win cha, xyaln win 'ixtic:

—An tic, 'ix in waychej, to 'ay q'ue 'oxe xuc 'ixm pan 'a in jolm xwila. 17A te yune xuc 'ay q'ue 'a yib'n̈ chab'x te cha, niwn c'aj 'ixm pan 'ay 'ejm 'a yojol, 'ixm yic win rey cha. Ax no ch'ic xwul wanc q'uet 'ixm 'a yol te yune xuc cha, xchi winac.

18Yuj cha, xyaln José 'a win 'ixtic:

—A tzyal 'el'ch jun a waych cha; a 'oxe xuc cha, 'oxe c'u tzyala. 19Chab'ej 'oj el 'a preso tic yuj win rey cha, 'oj yac' win 'ijxoc 'el a jolom, ax ya'n winc locxoc q'ue a niwnal 'a junc te te', ax e no 'usej, a e no 'oj wul chinoc a chib'jal, xchi 'a winac.

20Schab'jil yaln José swaych ewin chawn̈ cha, snan win rey sq'uin̈ yuj yab'lil, xyawtn cot win smasnil ewin niwc yajl 'aych yajlil yet'oc. Sat wal eb' niwc yajl cha, x'at ya'nc win 'ijxoc 'elt eb' chawn̈ chi 'a preso. 21Win tzb'achn b'ey yal uva tzyu'j win rey cha, x'ajx 'och win 'a smunljel jun 'ejm xo, yic tzya'n pax win yal uva 'a win rey 'icha xon 'a yic yalan̈. 22Ax pax win syajlil eb' tzb'on 'ixm pan cha, 'ix yac' win rey locxoc q'ue win 'a jun te te', 'icha wal xyutj José yalni. 23Palta man̈xtoc 'ix nax cot José yuj win tzb'achn b'ey yal uva 'a win rey cha, 'ix sat sc'ojl win 'a 'a.

Currently Selected:

Gn 40: CSS

Highlight

Copy