Gn 39

Yab'xil José yet' 'ix yistzil Potifar

1A yic x'ijx 'at win José yuj eb' ismaelita 'a Egipto, a jun win 'aj Egipto tzcuch Potifar, a win xmann José cha. A win Potifar cha, niwquil yopiso win yuj win sreyl Egipto cha; yajl yaj win 'a eb' soldado tztan̈wni win rey cha. 2Palta a Jehová a 'aych yet' José, yuj cha, caw jeln x'aj 'el'chi yic 'ayc' 'a yatut spatron̈ cha. 3'Ix nachj 'el yuj win patron̈ cha, to caw 'aych Jehová yet' win quelm cha, yuj cha, wach' tz'el'ch smasnil tas tzb'o winac. 4Yuj cha, caw wach' xcan win 'a sat win capitan̈ cha, xya'n 'och win mayltomail win 'a yatut. A smasnil tas 'ay 'a winac, xcan 'a yol sc'ab' José. 5Atax yic xya'n 'och win Potifar José yilmalc smasnil tas 'ay 'a yatut cha, xya'n Jehová syaxilal 'a yib'n̈ smasnil tastc 'ay 'a yatut yet' 'a smunljel winac. 6X'ochcn José yilmalc smasnil, man̈x 'a junc tas tzna win Potifar, cojxn tas tzna'a to si'lj tas tzc'uxu.

Caw wal wach' yilx 'och José, wach'n̈j 'a smasnil. 7'Ixta x'aj yec' tiempo, ax x'aji xya'n 'och 'ix yistzil win Potifar snab'en 'a win José cha, xyaln 'ix 'a win 'ixtic:

—Comnoc tzyal a c'ojl tzach way wet'oc, xchi 'ix.

8Palta ma'ix yal sc'ojl José, yuj cha, 'ix yaln 'ixtic:

—Ma'ay, ojc ach tic to in ya'cn 'och win echmil yilmalc smasnil tas 'ay 'a tic; yujto an 'ayn can yuj win 'a tic, yuj cha, may tas tzna yuj tas 'ay 'a 'a. 9A smasnil tas 'ay 'a yol te n̈a tic, 'aych 'a yol in c'ab', an tztac' wa'n mandar; cojn 'ayach, matz tac' wa'n 'och in c'ab', yujto yistzil ach win in patron̈. ¿Tom 'oj stac' in b'on junc tas maysch'olnil, yujto tz'och pax in mul 'a sat Dios? xchi José.

10'Ix 'och tecn 'ix yaln 'a José, 'a junjn c'u tznib'j 'ix tzway win yet'oc, palta jun 'ejmn̈ej ma'ix yal sc'ojl win jun cha, matz nib'j win tzc'och 'a stz'ey 'ix. 11'Ay jun c'u, x'och José 'a yol n̈a yic tzb'on smunljel, may junc xo comn 'anma 'aych 'a yol n̈a cha, cojn 'ix 'aych ta'. 12Yuj cha, x'och yamnjoc 'ix 'a spichl winac, xyaln 'ix 'ixtic:

—Wayn̈ wet'oc, xchi 'ix.

A yic xyab'n win jun cha, sto'n 'el sb'a win 'a yol sc'ab' 'ix, carela x'at winac, ax spichl winac, xcancn 'a yol sc'ab' 'ix. 13Ax xyiln 'ix to x'at win 'eloc, xcancn pax spichl win 'a yol sc'ab' 'ix, 14yuj cha, x'el yaw 'ix, xyawtn cot 'ix eb' munljum 'a stz'ey n̈a cha, xyaln 'ix 'a eb' 'ixtic:

—'Iltec wal jun win hebreo xyij cot win wichmil tic, tznib'j win to in yixtej. Yajn̈j cha, x'ochl win 'a yol n̈a tic, snib'n win to xway wet'oc. Yujto caw 'ip x'el waw, 15yuj cha, x'at win 'eloc, cojxn spichl win tic xcani, xchi 'ix.

16Smoln can 'ix te spichl win José cha, masnto xjaw win yichmil 'ix 'a yatut cha. 17Xyaln 'ix 'icha xyutj yaln 'a b'ab'l cha:

—A win a moso hebreo 'ix ej cot 'a tic, x'oxt win 'a yol in cuarto, snib'n win to xway wet'oc. 18Palta caw 'ip x'el waw, yuj cha, x'at win 'eloc, cojxn spichl win tic xcan 'a tic. 19'Ixta wal in yutj jun a moso tic, xchi 'ix.

Ax win spatron̈ José cha, caw xcot yowl win si'mb'il yic xyab'n win tas xyal 'ix yistzil cha. 20Xya'n win yamchjoc José cha, xyaln winac to tz'och José 'a preso, 'a 'aj 'aych jun tzo'n̈ xo ewin 'a preso yuj win rey. X'ajx 'och José 'a yol sc'ab' win tan̈m preso, yic tztan̈wx win yuj si'mb'il. 21Palta a Jehová 'aych yet' José, xch'ox schamc'ojlal 'a 'a, yuj cha, caw wach' x'el'ch 'a sat win tan̈m preso cha. 22Ax win tan̈m preso cha, a win x'a'n 'och win José yilmalc eb' yit presoal, a tzalni tas tzb'o eb'. 23Man̈x 'a jac tas tzna win tan̈m preso cha, yic tzya'n cuenta win eb' 'aych 'a preso, yujto 'aycn 'och eb' smasnil 'a yol sc'ab' José. 'Aych Jehová yet' José, yuj cha, caw wach' x'aj 'el'ch smasnil tas tzb'o'o.

Currently Selected:

Gn 39: CSS

Highlight

Copy